ههولێر- سهرۆكایهتی زانكۆ
ئەمڕۆ دووشەممە ٩ی شوباتی ٢٠٢٦، لە کەشێکی پڕ لە وەفا و پێزانیندا، زانکۆی پۆلیتەکنیکی هەولێر مەراسیمێکی شایستەی بۆ ڕێزلێنان لە ژمارەیەک مامۆستا و فەرمانبەری خانەنشینکراوی زانکۆ سازکرد. مەراسیمەکە بە سەرپەرشتی بەڕێز پ.د. ئیدریس محەمەد تاهیر هەرکی، سەرۆکی زانکۆ و بە ئامادەبوونی دكتۆر ئامانج برادۆستی بهرپرسی ناوچهی زانكۆ، و دكتۆر كۆڤان بهرپرسی رێكخراوی مامۆستایانی پۆلیتهكنیك، كاك ستار بهرپرسی رێكخراوی فهرمانبهرانی پۆلیتهكنیك، و ژمارەیەک لە ئەندامانی ئەنجوومەنی زانکۆ و سەرۆک بەش و مامۆستایان بەڕێوەچوو، وەک نیشانەیەک بۆ بەرزنرخاندنی خەرمانی ئەو تەمەنەی لە خزمەتی زانست و کارگێڕیدا بەخشیویانە.
دوای ساتێک وەستان بۆ گیانی پاکی شەهیدانی كوردستان، لە وتارێكیدا سهرۆكی زانكۆمان بهخێرهاتنی یهكه یهكه میوانهكانی كرد، و لە وتارەکەیدا وێڕای دەربڕینی خۆشحاڵی بۆ ئەم کۆبوونەوەیە، ستایشی ڕۆڵی کاریگەری ئەو بەڕێزانەی کرد کە بە ماندووبوونیان بوونەتە کۆڵەکەی سەرەکیی پێشکەوتنی زانکۆمان. هەروەها ئاماژەی بەوەدا کە سەرباری دۆخی ئاڵۆزی ناوچەکە، سەقامگیری و ئارامیی هەرێمی کوردستان بەرهەمی دڵسۆزی، خۆڕاگری و هەستی بەرپرسیارێتی کەسانی وەک ئەوانەیه، جەختیشی لهوه کردەوە کە خزمەتی دڵسۆزانەی مامۆستایان و فەرمانبەران هیچ جیاوازییەکی نییە لەگەڵ هەڵگرتنی چەکی شەرەف و بەرگریکردن لە نیشتمان.
لە کۆتایی مەراسیمەکەدا سوپاسنامەی زانکۆ بەخشرایە خانەنشینان و وێنەی یادگارییان لهگهڵ گیرا. جێگەی ئاماژەیە، زانکۆی پۆلیتەکنیکی هەولێر هەمیشە وەک بەشێک لە ستراتیژ و نەریتی زانکۆیی خۆی، بایەخێکی تایبەت بەم جۆرە چالاکییانە دەدات و دەرگای هەمیشە واڵایە بۆ ڕێزلێنان لەو کەسانەی خزمەتیان کردووە، بەو بڕوایەی کە ڕێزگرتن لە ماندووبوونیان و بەسەرکردنەوەیان، ئەرکێکی ئەخلاقی و ئەکادیمییە و زانکۆ هەمیشە پاڵپشتیان دەبێت.
