پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر پێشوازیی کرد لە پ.ی.د.چیا محەمەد حەسەن، سەرۆکی زانکۆی پۆلیتەکنیکی گەرمیان.
لە کۆبوونەوەیەکدا کە یاریدەدەرانی سەرۆکی زانکۆی پۆلیتەکنیکی هەولێر، ژمارەیەک لە بەڕێوەبەری بەڕێوەبەرایەتییەکانی زانکۆی پۆلیتەکنیکی هەولێر و بەڕێوەبەری پەیوەندییە گشتییەکانی زانکۆی پۆلیتەکنیکی گەرمیان ئامادەی بوون، گفتوگۆ لەسەر پەرەپێدانی پەیوەندییە ئەکادیمی و زانستییەکانی نێوان هەردوو زانکۆی پۆلیتەکنیکی کرا.
هەردوولا جەختیان لەسەر گرنگیی هەماهەنگیی بەردەوام کردەوە بۆ بەرزکردنەوەی ئاستی خوێندنی تەکنیکی و پیشەیی کە بتوانێت بە شێوازێکی کارا خزمەت بە بازاڕی کاری کوردستان بکات.
دوای کۆبوونەوەکە، یاداشتێکی لێکتێگەیشتن لە نێوان زانکۆی پۆلیتەکنیکی هەولێر و زانکۆی پۆلیتەکنیکی گەرمیان لەلایەن سەرۆکی هەردوو زانکۆوە واژۆ کرا.
ئەم یاداشتە ئامانجی دروستکردنی چوارچێوەیەکی گشتگیرە بۆ هاوکاریی هاوبەش، کە خۆی لە ئەنجامدانی توێژینەوەی زانستی هاوبەش لە نێوان مامۆستایان و توێژەرانی هەردوو زانکۆدا، ئاڵوگۆڕی ئەزموون و کارمەند لە بوارە جیاوازەکانی کارگێڕی، تەکنیکی و ئەکادیمیدا، ڕێکخستنی کۆنفرانس، سیمینار و وۆرکشۆپی هاوبەش بۆ بەرزکردنەوەی توانای قوتابییان و ستافی زانکۆ، پەرەپێدانی پرۆگرامەکانی خوێندن و سوود وەرگرتن لە تاقیگە و کەمپەسەکانی یەکتر.
لە کۆتایی دیدارەکەدا، هەردوو سەرۆکی زانکۆ هیوای سەرکەوتنیان بۆ ئەم هەنگاوە هاوبەشە خواست و ڕایانگەیاند کە ئەم جۆرە یاداشتانە دەبنە هاندەرێکی بەهێز بۆ بەرەوپێشبردنی زیاتری خوێندنی تەکنیکی لە هەرێمی کوردستان.
