ئەمڕۆ چوارشەممە (١١ی شوباتی ٢٠٢٦)، بە مەبەستی گفتوگۆکردن و هەڵسەنگاندنی دیزاینی نوێی وێبسایتی زانکۆ و وەرگرتنی پێشنیاز و سەرنجەکان، کۆبوونەوەیەکی فراوان بە سەرپەرشتیی بەڕێز پ.ی.د. بۆتان مەجید ئاسنگەر، یاریدەدەری سەرۆکی زانکۆ بۆ کاروباری زانستی و خوێندنی باڵا، و بە ئامادەبوونی ژمارەیەکی بەرچاو لە بەڕێوەبەرانی زانکۆمان بەڕێوەچوو.
لە سەرەتای کۆبوونەوەکەدا، دکتۆر بۆتان وێڕای بەخێرهێنانێکی گەرمی ئامادەبووان، تیشکی خستە سەر قۆناغەکانی گەشەسەندنی وێبسایتی زانکۆ لە سەرەتاکانی دروستبوونییەوە تاوەکو دەگاتە ئەمڕۆ. پاشان، لەلایەن م.ی زانیار ڕزگار، بەڕێوەبەری وێبسایت و مامۆستا لە کۆلێژی ئەندازیاری کۆمپیوتەر و ئینفۆرماتیک، و بە وردی باسی لە دوایین گۆڕانکاری و بەرەوپێشچوونەکانی دیزاینی نوێی وێبسایتەکە کرا.
لە بەشێکی تری کۆبوونەوەکەدا دەرگای گفتوگۆ کرایەوە و هەریەک لە بەڕێوەبەرەکان بەپێی تایبەتمەندیی بوار و بەشەکانیان، سەرنج و تێبینییەکانی خۆیان خستەڕوو بە مەبەستی دەوڵەمەندکردن و باشترکردنی کارەکە.
جێی ئاماژەیە، زانکۆمان هەمیشە بایەخ و گرنگییەکی زۆر بەم هەنگاوانە دەدات لە پێناو بەرەوپێشبردنی ژێرخانی تەکنەلۆژی و زانستی. لەم سۆنگەیەشەوە، زانکۆ هەمیشە پاڵپشت و هاوکاری سەرەکییە بۆ سەرخستن و جێبەجێکردنی هەر پڕۆژە و چالاکییەک کە خزمەت بە پرۆسەی ئەکادیمی و ئیداریی زانکۆکەمان بکات.
