ڕۆژی شەممە ڕێکەوتی ٦ـی کانوونی یەکەمی ٢٠٢٥، وەک بەشێک لە چالاکییەکانی هەڵمەتی جیهانیی ١٦ ڕۆژەی بەرەنگاربوونەوەی توندوتیژی دژی ئافرەتان و خێزان، پەیمانگەی تەکنیکی مێرگەسۆر بە هاوبەشی لەگەڵ ناوەندی مێرگەسۆری یەکێتیی ئافرەتانی کوردستان، سیمپۆزیۆمێکی زانستی و مەیدانیی لەژێر دروشمی “کاتێک ئافرەت سەلامەت و پارێزراو بێت، هەموومان سەلامەت و پارێزراو دەبین” ڕێکخست.
مەراسیمەکە بە ئامادەبوونی پ.ی.د. تالیب محەمەد شەریف، ڕاگری پەیمانگە، و ژمارەیەک لە ئەندامانی پەرلەمان و کەسایەتییە ئەکادیمی و حزبی و حکومییەکان و چین و توێژە جیاوازەکان و قوتابیان بەڕێوەچوو، کە ئامانج لێی خستنەڕووی دیدگا زانستی و کۆمەڵایەتییەکان بوو بۆ پاراستنی شکۆی ئافرەتان و خێزان.
لە دەستپێکی سیمپۆزیۆمەکەدا، پ.ی.د. تالیب محەمەد شەریف، ڕاگری پەیمانگەی تەکنیکی مێرگەسۆر وتارێکی پێشکەش کرد و تێیدا جەختی لەوە کردەوە کە پاراستنی ئافرەتان پاراستنی کۆی کۆمەڵگەیە. ڕاگرى پەیمانگە ئاماژەی بە گرنگیی بەرزکردنەوەی ئاستی هۆشیاریی تاکەکان کرد بۆ ڕووبەڕووبوونەوەی فۆرمە جیاوازەکانی توندوتیژی و تیشکی خستە سەر ڕۆشنبیریی دەڤەری بارزان و کوردستان وەک سەرمایەیەکی ڕەمزی بۆ پێکەوەژیان و ڕێزگرتن لە مافەکان. هەروەها باسی لە مەترسییەکانی سەردەمی تەکنەلۆژیا و زیرەکیی دەستکرد کرد و ڕایگەیاند کە پێویستە لەم سەردەمەدا بە دیدگایەکی سەردەمییانە کار بۆ بەهێزکردنی تواناکانی ئافرەتان و پاراستنی ئاسایشی دیجیتاڵییان بکرێت.
بڕگەی زانستیی سیمپۆزیۆمەکە بە پێشکەشکردنی بابەتێک لەلایەن دکتۆر وەلی عومەر دەستی پێکرد، کە تێیدا تیشکی خستە سەر ڕۆڵی خێزان و شێوازی ژیانی دروست. دواتر لە ڕێگەی دوو پانێلی تێروتەسەلەوە باس لە تەوەرە سەرەکییەکان کرا؛ پانێلی یەکەم تایبەت بوو بە “خۆراکی تەندروست و کاریگەریی لەسەر ئافرەت” کە تێیدا بە وردی گفتوگۆ لەسەر لایەنە تەندروستییەکان کرا. پانێلی دووەمیش کە ناونیشانی “هۆشیاریی زیرەکیی دەستکرد لە بەهێزکردنی تواناسازیی ئافرەت”ـی هەڵگرتبوو، وەک بابەتێکی هەنووکەیی گفتوگۆی لەسەر کرا و تێیدا شارەزایانی بواری تەکنەلۆژیا و یاسا و کۆمەڵناسی، ڕەهەندەکانی بەکارهێنانی تەکنەلۆژیا و چۆنیەتی خۆپاراستن لە مەترسییە ئەلیکترۆنییەکانیان بۆ ئامادەبووان شیکردەوە.
لە کۆتایی مەراسیمەکەدا بڕوانامەی ڕێزلێنان پێشکەش بە بەڕێوەبەرانی پانێل و پانێلیستەکان کرا. شایانی باسە زانکۆ و پەیمانگەکەمان هەمیشە بایەخێکی تایبەت بەم جۆرە چالاکییە زانستی و ئەکادیمی و ڕۆشنبیرییانە دەدات، ئەمەش لەپێناو بەرزکردنەوەی ئاستی زانستی و مەعریفیی مامۆستایان و قوتابیان و دروستکردنی پردێکی بەهێز لەگەڵ پرسە هەنووکەییەکانی کۆمەڵگە.
