لەژێر چاودێری و ئامادەبوونی پ.د.ئیدریس محەمەدتاهیر هەرکی سەرۆکی زانکۆی پۆلیتەکنیکی هەولێر و یاریدەدەرانی سەرۆکی زانکۆ و ژمارەیەک لە ئەندامانی ئەنجوومەنی زانکۆ و مامۆستایان و فەرمانبەران، لە ڕێوڕەسمێکی شایستەدا ماڕشی زانکۆی پۆلیتەکنیکی هەولێر ناسێندرا.
لە سەرەتای ڕێوڕەسمەکەدا، پ.ی.د.بۆتان مەجید ئاسنگەر یاریدەدەری سەرۆکی زانکۆی پۆلیتەکنیکی هەولێر بۆ کاروباری زانستی و خوێندنی باڵا وەک سەرۆکی لیژنەی ئامادەکاریی مارشەکە لە وتەیەکدا لەدوای بەخێرهێنانی ئامادەبووان، هاوکات باسی لە بیرۆکەی ئامادەکردنی ماڕشی زانکۆی پۆلیتەکنیکی هەولێر و هەنگاوەکانی ئامادەکردنی هۆنراوەکەی تا تەواوکردنی کرد.
دواتر د.هیوا طلعت عارف، مایسترۆی مارشی زانکۆی پۆلیتەکنیکی هەولێر باسی لە گرنگی ماڕشی زانکۆ کرد کە دەکرێت وەک ناسنامەی زانکۆ پێناسە بکرێت.
د.هیوا طلعت عارف هیوای خواست کە ماڕشەکە لە ئاست گەورەیی زانکۆی پۆلیتەکنیکی هەولێر بێت و ببێتە مایەی ڕەزامەندی هەمووان.
پ.د.ئیدریس محەمەدتاهیر هەرکی سەرۆکی زانکۆی پۆلیتەکنیکی هەولێر لە وتەیەکدا دەستخۆشی لە لێژنەی ئامادەکاریی و نووسەران هۆنراوە و مایسترۆی ماڕشەکە کرد کە دوای ماوەیەک کارکردنی زۆر ئەو کارە گرنگ و پڕبایەخە گەیشتە ئەنجام.
جێی ئاماژەیە، هۆنراوەی ماڕشی زانکۆی پۆلیتەکنیکی هەولێر بەهاوبەشی لەلایەن هەریەک پ.ی.د.بۆتان مەجید ئاسنگەر یاریدەدەری سەرۆکی زانکۆی پۆلیتەکنیکی هەولێر بۆ کاروباری زانستی و خوێندنی باڵا و م.کازم کۆیە نووسراوە و قوتابیانی زانکۆمان بەشدارییان لە کارەکانی ئامادەکردنی ماڕشەکە کردووە.
