لە چوارچێوەی راسپاردەکانی وۆرکشۆپی وەزارەتی خوێندنی باڵا و توێژینەوەی زانستی لەبارەی گرنگی ئەنجامدانی مەشقی هاوینە لە زانکۆ پۆلیتەکنیکییەکانی کوردستان کە لەلایەن وەزارەتی خوێندنی باڵا و توێژینەوەی زانستی سەرپەرشتی زانکۆی پۆلیتەکنیکی سلێمانی و بە بەشداری زانکۆی پۆلیتەکنیکی هەولێر، زانکۆی پۆلیتەکنیکی دهۆک، زانکۆی پۆلیتەکنیکی گەرمیان و زانکۆی ئاکرێ بۆ زانستە کردارییەکان ئەنجامدرا و تیایدا تاوتوێی پڕۆگرامی مەشقی هاوینەی قوتابیان لە زانکۆ پۆلیتەکنیکییەکان کرا و لەبەر گرنگی ئەم بابەتە، بڕیاردرا کە پێداچوونەوە بە رێنماییەکانی مەشقی هاوینەی قوتابیان لەو زانکۆیانەدا بکرێت.
لەم چوارچێوەیەدا و پاڵپشت بە فەرمانی وەزاری وەزارەتی خوێندنی باڵا و توێژینەوەی زانستی، ئەمڕۆ دووشەممە ٩ی ئەیلوولی ٢٠٢٥، بە سەرۆکایەتی پ.ی.د.بۆتان مەجید ئاسنگەر یاریدەدەری سەرۆکی زانکۆی پۆلیتەکنیکی هەولێر بۆ کاروباری زانستی و خوێندنی باڵا و ئامادەبوونی نوێنەری وەزارەتی خوێندنی باڵا و توێژینەوەی زانستی و بە بەشداری نوێنەرانی زانکۆی پۆلیتەکنیکی سلێمانی، زانکۆی پۆلیتەکنیکی دهۆک، زانکۆی پۆلیتەکنیکی گەرمیان و زانکۆی ئاکرێ بۆ زانستە کردارییەکان و نوێنەرانی بەشێک لە پەیمانگا ناحکوومییەکان، لە دیوانی سەرۆکایەتی زانکۆی پۆلیتەکنیکی هەولێر کۆبوونەوەیەک ئەنجامدرا.
لە کۆبوونەوەکەدا پێداچوونەوە بە رێنماییەکانی مەشقی هاوینەی قوتابیان کرا و گفتوگۆی زانستییانە و تێروتەسەل لەمبارەیەوە ئەنجامدرا و بۆچوونە هاوبەشەکان یەکخران.
لەبەر گرنگی بابەتەکە، بڕیاردرا کۆبوونەوەکان بەردەوام بێت تاوەکو گەیشتن بە رەشنووسی کۆتایی هاوبەش لەنێوان زانکۆ پۆلیتەکنیکییەکانی کوردستان بەجۆرێک کە لەبەرژەوەندی قوتابیان و بەرەپێشبردنی زیاتری ئاستی زانستییاندا بێت.
