Author Archives: hemn hemn

هه‌ولێر- كه‌مپه‌سی یه‌كی زانكۆ

ئەمڕۆ پێنج شەممە، ڕێکەوتی 30/١٠/٢٠٢٥، به‌ئاماده‌بوونی به‌ڕێز دكتۆر پشتیوان سادق وه‌زیری ئەوقاف و کاروباری ئایینی، و  له‌ژێر چاودێری به‌ڕێز پ.د. ئیدریس محه‌مه‌د تاهیر هه‌ركی سه‌رۆكی زانكۆ، و به‌ئاماده‌بوونی هه‌ر یه‌ك له‌ به‌ڕێزان پ.د. ئازاد حسن، ی. سه‌رۆكی زانكۆ بۆ كاروباری  كارگێڕی و دارایی، و پ.ی.د. بۆتان مجید ئاسنگه‌ر، ی. سه‌رۆكی زانكۆ بۆ كاروباری زانستی و خوێندنی باڵا و  پ.ی. د. یوسف مسته‌فا ره‌سول ی. سه‌رۆكی زانكۆ بۆ كاروباری قوتابیان، و بەشێک لە ئەندامانی ئەنجوومەنی زانکۆی پۆلیته‌كنیكی هه‌ولێرو ژماره‌یه‌ك لە بەرپرسانی حزبی و مامۆستایان، مه‌راسیمی رێزلێنان بۆ پۆلێك مامۆستایان كه‌ پله‌یان به‌رزبۆته‌وه‌ بەڕێوەچوو.

دوای وه‌ستان خوله‌كێك وه‌كو رێزو نه‌وازش بۆ سه‌رجه‌م شه‌هیدانی كورد وكوردستان، به‌ڕێز پ.د. ئیدریس محه‌مه‌د تاهیر هه‌ركی سه‌رۆكی زانكۆ، وتارێكی پێشكه‌ش به‌ ئاماده‌بووان كردو تێیدا ئاماژه‌ی به‌وه‌دا: “ئه‌م رێزلێنانه‌ مایه‌ی هه‌وڵ و ماندووبوونی خۆتانه‌ كه‌ توانیوتانه‌ ئه‌و پله‌ به‌رزه‌ به‌ده‌ست بهێنن بۆ ئه‌م ساڵی خوێندنی 2024-2025.. و ئێمه‌ رێز له‌ماندوبوونتان ده‌گرین، و ده‌توانین له‌گه‌ڵ ئێوه‌ هه‌نگاوه‌كانمان فراوانتر بكه‌ین بۆ فراوانبوونی زانكۆ و به‌رزكردنه‌وه‌ی ئاستی زانستی له‌زانكۆكانمان”. دواتر سه‌رۆكی زانكۆ ئاماژه‌ی به‌ ده‌ستكه‌وته‌كانی زانكۆمانی داو گوتی: “زانكۆمان به‌رده‌وامه‌ له‌سه‌ر نۆژه‌نكردنه‌وه‌و دروستكردنی تاقیگه‌و هۆڵ و دابینكردنی پێداویستییه‌كانیان و هه‌روه‌ها توانیومانه‌ گۆڤاری زانستی زانكۆمان بخه‌ینه‌ ناو سكۆپه‌سه‌وه‌، ئه‌مه‌ش یه‌كێكه‌ له‌ ده‌ستكه‌وته‌ گرنگ و گه‌وره‌كانی زانكۆمان”.

دواتر سه‌رۆكی زانكۆ، ئاماژه‌ی به‌وه‌دا: “كه‌ئه‌م هه‌نگاوانه‌ بێ پاڵپشت نه‌بوونه‌، به‌ڵكو هاوكاری سه‌ره‌كی حكومه‌تی هه‌رێمی كوردستان و خودی به‌ڕێز مه‌سرور بارزانی سه‌رۆكی ئه‌نجوومه‌نی وه‌زیران بووه‌، هه‌رده‌م پاڵپشتی وه‌زاره‌تی خوێندنی باڵاو توێژینه‌وه‌ی زانستی بووه”‌.

دواتر مه‌راسیمی رێزلێنان بۆ شه‌ست و پێنج مامۆستا ئه‌نجام درا، پاشان رێز له‌و مامۆستایانه‌ نرا كه‌ له‌ پرۆسه‌ی دڵنیایی جۆری بۆ ساڵی خوێندنی 2024-2025 به‌ئاستێكی باش سه‌ركه‌وتوو بوونه‌.  له‌كۆتایی مه‌راسیمه‌كه‌دا سه‌رۆكی زانكۆ وێنه‌ی یادگاری به‌گروپ له‌گه‌ڵ هه‌موو مامۆستایان گرت.

ئه‌مڕۆ 29/10/2025، له‌دیدارێكیدا به‌ڕێز پ.د. ئیدریس محمد طاهر هه‌ركی سه‌رۆكی زانكۆی پۆلیته‌كنیكی هه‌ولێر، چاویكه‌وت به‌ هه‌ر یه‌ك له‌ به‌ڕێزان پ.ی.د ئه‌رشه‌د صدیق عه‌بدوڵڵا، مامۆستا له‌ كۆلیژی ته‌كنیكی كارگێڕی و ئیمان سامی ئه‌حمه‌د، قوتابی له‌ كۆلیژی ته‌كنیكی كارگێڕی، توێژینه‌وه‌كه‌یان له‌لایه‌ن زانكۆی (نه‌زوه‌) هه‌ڵبژێردراوه‌ بۆ به‌شداریكردنی له‌ (26)مین دیداری قوتابیانی داهێنه‌ر‌، له‌چوارچێوه‌ی زانكۆكانی وڵاتانی عه‌ره‌بی له‌ زانكۆی نه‌زوه‌ی سه‌ڵته‌نه‌ی عه‌ممانی ئه‌مساڵ (6/11/2025) به‌ڕێوه‌ ده‌چێت.

 

له‌دیداره‌كه‌دا هاوه‌ڵی سه‌رۆكی زانكۆ، هه‌ر یه‌ك له‌ به‌ڕێزان پ.ی.د. بۆتان مجید ئاسنگه‌ر ی. سه‌رۆكی زانكۆ بۆ كاروباری زانستی و خوێندنی باڵا و دكتۆر عه‌بدوڵڵا به‌ڕێوه‌به‌ری په‌یوه‌ندییه‌ نێوده‌وڵه‌تییه‌كان و مامۆستا به‌هزاد حلمی ئاكره‌یی به‌ڕێوه‌به‌ری نووسینگه‌ی سه‌رۆكی زانكۆ و خاتوو دره‌خشان ستافی به‌ڕێوه‌به‌رایه‌تی په‌یوه‌ندییه‌ نێوده‌وڵه‌تییه‌كانی زانكۆ ئاماده‌ی ئه‌م دانیشتنه‌ بوون.

 

ئامانج له‌م چاوپێكه‌وتنه‌، جه‌ختكردنه‌وه‌ بوو له‌وه‌ی كه‌ قوتابی و سه‌رپه‌رشتیاری به‌نوێنه‌رایه‌تی زانكۆمان ئه‌م چالاكییه‌ ئه‌نجام ده‌ده‌ن، ده‌ستخۆشی له‌هه‌ردوو به‌ڕێزان كرا له‌وه‌ی كه‌ توێژینه‌وه‌كه‌یان به‌سه‌ركه‌وتوویی وه‌رگیراوه‌.

 

له‌و دیداره‌دا سه‌رۆكی زانكۆی پۆلیته‌كنیكی هه‌ولێر، وێڕای پیرۆزبایی له‌قوتابی و سه‌رپه‌رشتیاری توێژینه‌وه‌كه‌، ئومێدی سه‌ركه‌وتن و به‌ده‌ستهێنانی پله‌و ده‌ستكه‌وتێكی گه‌وره‌یان بۆ ده‌خوازێت، ئاماژه‌ی به‌وه‌دا كه‌ زانكۆمان له‌ساڵی 2015، تاكو ئێستا به‌رده‌وام له‌م جۆره‌ چالاكییانه‌ به‌شداره‌ كه‌ له‌وڵاتانی عه‌ره‌بی ئه‌نجام ده‌درێت.

 

شایانی باسه‌، زانكۆی پۆلیته‌كنیكی هه‌ولێر، وێڕای جێبه‌جێكردنی له‌ پلان و ده‌رفه‌تی ئاڵوگۆڕی قوتابیان بۆ ئه‌نجامدانی مه‌شقی هاوینه‌ له‌زانكۆكانی وڵاتانی عه‌ره‌بی، ساڵانه‌ له‌كۆنفرانس و دیداره‌كانی ئه‌نجوومه‌نه‌كه‌ مافی به‌شداریكردنی توێژینه‌وه‌ی قوتابیان و سه‌رپه‌رشتیاران ده‌ڕه‌خسێنێت، دوای په‌سندكردنیان له‌لایه‌ن لیژنه‌ی زانستی كۆنفرانس.

پارێزگاری هەولێر، بە هۆی پڕۆژەی ڕووناکی 100% ژینگەی هەولێر پاکبۆتەوە

 

ئەمڕۆ سێشەممە 2025.10.28، ئومێد خۆشناو، پارێزگاری هەولێر، بە ئامادەبوونی هێمن قادر، جێگری پارێزگار و نەبەز عەبدولحەمید، قائیمقامی ناوەندی هەولێر، لە دیوانی پارێزگا، لەگەڵ لیژنەی کوالێتی هەوا لە شاری هەولێر کۆبۆوە.

 

لە كۆبوونەوەكەدا، دوای ئەوەی لەلایەن د.ڕێبین سەمەد، مامۆستای زانکۆ و سەرۆکی لیژنەی کوالێتی هەوا لە شاری هەولێر، ڕاپۆرتێکی زانستی لیژنەکە خرایەڕوو سەبارەت بە پاکبوونەوەی هەوای هەولێر و لەوبارەشەوە بەداتا ئاماژەی بەجیاوازییەکانی ساڵی ڕابردوو لەگەڵ ئەمساڵ باسکرد و ئاماژەی بە وردەکاری ئەو هەنگاوانەدا کە لەلایەن حکومەتی هەرێمی کوردستان گیراوەتەبەر بۆ پاکبوونەوەی ژینگەی پایتەخت، بەتایبەتی پڕۆژەی ڕووناکی و کوژاندنەوەی مولیدەکان کە 100% کاریگەری هەبووە لە پاکبوونەوەی ژینگە و هەوای هەولێر.

 

پارێزگاری هەولێر، دەستخۆشی لە لیژنەی ناوبراو کرد و هەوڵەکانی بەرز نرخاندن و خۆشحاڵی خۆشی بە جیاوازی زۆری پاکبوونەوەی هەواو و ژینگەی ئەمساڵی هەولێر لەگەڵ ساڵانی ڕابردوو نیشاندا.

 

دواتر لە کۆنگرەیەکى ڕۆژنامەوانى بۆ کەناڵەکان، ئاشکرای کرد، بۆ چارەسەرکردنی کێشەی پیسبوونی ژینگەی شاری هەولێر، چەندین ڕیکار و ڕێوشوێنی پێویست لە ماوەى ڕابردوودا دەرهەق بەو کەس و لایەنانەی سەرپێچى کارن گیراوەتەبەر، لەدەرنجامی وەرگرتنی ئەو ئیجارئات و ڕێکارانەش بەخۆشحاڵییەوە ڕایدەگەێنین، کە لە ئێستادا بەپێی دواینی توێژینەوەی زانستی، کە لەلایەن لیژنەی کوالێتی هەوا لە شاری هەولێر کە پارێزگای هەولێر بەهەماهەنگی زانکۆی پۆلیتەکنیکی هەولێر ئەنجامیداوە، وێڕای دەستخۆشی لەو لیژنەیەو بەرز نرخاندنی هەوڵەکانیان، لە ئەنجامدانی ئەو دیراسە و لێکۆلینەوە زانستییە دەرکەوتووە، بە هۆی پڕۆژەی ڕووناکی 100% ژینگەی شاری هەولێر پاکبۆتەوە.

 

پارێزگاری هەولێر بۆ ئەو مەبەستەش، دووپاتی لە سەر توندکردنى بە دواداچوون و گرتنەبەرى ڕێوشوێنەکان کردەوە، بۆ گرتنەبەرى ڕێکاری یاسایی بەرامبەر هەموو ئەو کەس و لایەنانەى کە پابەندی ڕێنمایی و بڕیارەکان پاکڕاگرتنى ژینگە نابن و داواشی لەهاووڵاتیان کرد هاوکار و هەماهەنگ بن بۆ پاکژی ژینگەی شار.

 

گوتیشی، لە ماوەی ڕابردوودا، جگە لە داخستنی 84 پاڵاوگە و ئیجرائات وەرگرتن لەگەڵ خاوەنەکانیان، بەهۆی پڕۆژەی ڕووناکی و دابینکردنی کارەبای 24 کاتژمێری، کە کاریگەری زۆری هەبووە لەسەر پاکڕاگرتنی ژینگەی هەولێر، ( 3776) موه‌لیده‌ کوژاوەتەوە، کە ڕۆژانە 35 تا 40 هەزار بەرمیل گازیان دەسوتاند. ئەوە جگە لە مولیدەی فەرمانگە و مولیدەی دیکەی تایبەتی هاووڵاتییان لەگەڕەکانی دیکەی شار.

 

گوتیشی، تێکدانی سەدانی شوێن، کە بە ئاوی پیس سەوزیان ئاودەدا و ئیجرائاتکردن و بەدواداچوون سەدان شوێنی دیکەی جیاجیا کە هۆکاربوونە بۆ پیسبوونی ژینگەی شاری هەولێر و پابەندکردنی کارگەکان بەدانانی فلتەر و دەستبەسەر داگرتنی ئەو ئۆتومبێلانەشی کە ببونە هۆی پیسبوونی ژینگە، و زیادکردنی ڕێژەی سەوزایی، هەموو ئەوانە بەیەکەوە هۆکار بوونە بۆ پاکبوونەوەی ژینگەی شار، دڵنیاشین لەداهاتوودا بەهۆی دروستکردنی پشتێنەی سەوزایی هەولێر پاکتر دەبێتەوە.

 

ڕاشیگەیاند، هاوڵەکانمان بۆ پاراستنی ژینگەی شاری هەولێر بەردەوام دەبێت و هەموو ڕێکارێکیش بەرامبەر ئەوانە دەگیرینە بەر کە ژینگە پیس دەکەن، هەر شوێنێکیش ببێتە هۆکاری پیسبوونی ژینگە، لێپرسینەوەی لەگەڵ دەکرێت و چاوپۆشی لەکەس ناکرێت.

ئەمڕۆ بە ئامادەبوونی بەڕێزان سەرۆک مەسعود بارزانی و سەرۆکی حکومەتی هەرێمی کوردستان مەسرور بارزانی، شاندێکی زانکۆمان بە سەرۆکایەتی بەڕێز سەرۆکی زانکۆ پ.د. ادریس محمد طاهر هەرکی و بە یاوەری یاریدەدەری سەرۆکی زانکۆ بۆ کاروباری زانستی پ.ی.د. بۆتان مەجید ئاسنگەر، بەشداریان لە پێنجەمین کۆنفرانسی زانستی نێودەوڵەتی بە دۆکۆمێنتکردنی تاوانەکانی جینۆسایدی کوردان کرد، کە بۆ ماوەی دوو رۆژ ٢٨-٢٩/١٠/ ٢٠٢٥، لە شاری دهۆک بەڕێوە دەچێت.

سەرەتای کۆنفڕانسەکە بە وتارێکی گرنگ لەلایەن بەڕێز سەرۆک بارزانی پێشکەش کرا و ئاماژەیدا، کە سەرەڕای ئەو زوڵم و تاوانانەی بەرامبەر به‌ میللەتی کورد کرا، بەڵام گەورەیی کورد لەوە زیاتر دەرکەوت، کە لە راپەڕینەکە دوو فەیلەق سەرباز لە دەستی میللەتی کورد رووبەڕووی هیچ تۆڵەیەک نەبوونەوە. سەرۆک بارزانی وێڕای سوپاسی هەندێک وڵاتی وەک بەریتانیا و سوێد کرد لە ناساندنی جینۆسایدی کوردان، بەڵام جەختی له‌وه‌ کردەوە کە هێشتا پێویستە کۆمەڵگەی نێودەوڵەتی و وڵاتان زیاتر ئەم تاوانە بناسێنن.

هەریەک لە نوێنەرانی سەرۆک کۆماری عێراقی فیدڕاڵ و سەرۆک وەزیرانی ناوەند بە وتارێک بەشدار بوون.

شایەنی باسە سەرۆکی زانکۆمان، ئەندامی لیژنەی باڵای کۆنفرانس بوو، لە هەمان کات یاریدەدەری سەرۆکی زانکۆ بۆ کاروباری زانستی ئەندامی لیژنەی زانستی کۆنفڕانسەکە بوو.

هەریەک لە مامۆستایانی زانکۆمان بەرێز پ.ی.د. سیروان لەتیف حاجی راگری کۆلێژی تەکنیکی سۆران و مامۆستا کۆڤان عمر وەک قوربانیانی تاوانی جینۆساید و کوڕانی شەهیدان لە پاڵ چەندین قوربانیانی تر ئامادەی کۆنفڕانسەکە بوون.

لە میانەی دوو رۆژی کۆنفڕانس ئەکادیمێست و پسپۆڕان، چەندین توێژینەوە و سیمیناری تایبەت پێشکەش دەکەن. هەریەک لە بەرێزان د. زکری علی عزیز و د.کاوە یاسین مامۆستایانی زانکۆمان بە توێژینەوەیەک بەشدار بوون.

لە پەراوێزی کۆنفڕانسەکەدا پێشانگایەکی دۆکۆمێنتاری ئامادەکرابوو کە چەندین بەڵگەی تاوانەکەی دەخستە ڕوو.