لە ڕێوڕەسمێکدا، کە لە سەرۆکایەتی زانکۆی پۆلیتەکنیکی هەولێر بەڕێوەچوو، یاداشتی لێکتێگەیشتن لەنێوان زانکۆى پۆلیتەکنیکی هەولێر و کۆمپانیای ئیگڵ پۆست (Eagle Post) بۆ خزمەتگوزارییەکانی پۆستە و گەیاندن واژۆ کرا.
یاداشتەکە لەلایەن پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر و، دانا شەمسەددین، نوێنەرى کۆمپانیای ئیگڵ پۆست بۆ خزمەتگوزارییەکانی پۆستە و گەیاندن واژۆ کرا؛ بە ئامانجی پێشکەشکردنی خزمەتگوزاریی پۆستەی خێرا و دڵنیا بۆ قوتابیان و دەرچووانی زانکۆ و هاووڵاتییان.
بەپێی ناوەڕۆکی یاداشتەکە، کۆمپانیای ئیگڵ پۆست، کە هاوبەشێکی حکوومەتی هەرێمی کوردستانە، دەبێتە گەیەنەری فەرمی و تایبەتی زانکۆی پۆلیتەکنیکی هەولێر بۆ گواستنەوەی سەرجەم بەڵگەنامە و دۆکیۆمێنتە فەرمییەکان. ئەم خزمەتگوزارییە قوتابیان و دەرچووان و هاووڵاتییان لە ناوەوە و دەرەوەی هەرێمی کوردستان دەگرێتەوە، بەهۆیەوە ئاسانکارییەکی گەورە بۆ ئەو قوتابیانە دەکات کە لە دەرەوەی شاری هەولێر یان لە پارێزگاکانی دیکەی هەرێمی کوردستان و عێراق نیشتەجێن. ئەم هەنگاوە لە چوارچێوەی هەوڵەکانی زانکۆدایە بۆ بەدیجیتاڵکردن و خێراکردنی ڕاییکردنی مامەڵەکانى زانکۆ بەگشتى و قوتابیان بەتایبەت.
میکانیزمی کارکردنەکە لەسەر بنەمای تەکنەلۆژیای سەردەم بنیات نراوە، بەجۆرێک زانکۆی پۆلیتەکنیکی هەولێر هەژمارێکی تایبەت لەسەر پلاتفۆرم و ئەپلیکەیشنی زیرەکی (iOS & Android) ئیگڵ پۆست وەردەگرێت. لە ڕێگەی ئەم سیستمەوە، زانکۆ داواکارییەکان تۆمار دەکات، فۆرمی بارکۆدکراو بۆ پاکێجەکان چاپ دەکات و، دەتوانێت بە شێوەیەکی ڕاستەوخۆ (online) چاودێریی قۆناغەکانی گەیاندنی پۆست و بەڵگەنامەکان بکات. هەروەها وەرگر پێویستە ناسنامەی خۆی بسەلمێنێت و واژۆی دیجیتاڵی لەسەر وەرگرتن بکات، کە ئەمەش ئاستی دڵنیایی و پاراستنی زانیارییەکان بەرز دەکاتەوە.
ئەم هاوبەشییە ستراتیژییە کە ئارەزوومەندانەیە نەک هەر خزمەتگوزارییەکی پێشکەوتوو پێشکەش بە قوتابیان و دەرچووانی زانکۆى پۆلیتەکنیکی هەولێر دەکات، بەڵکو وەک هەنگاوێکی گرنگیش بۆ پەرەپێدانی کەرتی پۆستە لە هەرێمی کوردستاندا سەیر دەکرێت. کۆمپانیای ئیگڵ پۆست، وەک یەکێک لە پێشەنگەکانی ئەم بوارە بە هاوبەشی لەگەڵ وەزارەتی گواستنەوە و گەیاندنی حکوومەتی هەرێمی کوردستان، پابەندبوونی خۆی بۆ پێشکەشکردنی خزمەتگوزاریی متمانەپێکراو و داهێنەرانە دووپات دەکاتەوە. نرخی خزمەتگوزارییەکانیش بە شێوەیەکی کێبڕکێکارانە و بە دراوی عێراقی دیاری کراون.
