Monthly Archives: حوزه‌یران 2023

سەرۆکی زانکۆ ئەو پڕۆژانەی بەسەرکردەوە کە لە قۆناغی جێبەجێکردندان

پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر ئەو پڕۆژانەی زانکۆی بەسەرکردەوە کە لە قۆناغی جێبەجێکردندان.

بەمەبەستی لە نزیکەوە ئاگاداربوون لە چۆنییەتی بەڕێوەچوونی ئەو پڕۆژانە زانکۆی بەسەرکردەوە کە لە قۆناغی جێبەجێکردندان، پ.د.ئیدریس محەمەد تاهیر هەرکی پرۆژەی دروستکردنی باڵەخانەی تاقیگەکانی لە کۆلیژی تەکنەلۆجی هەولێر بەسەرکردەوە و لە نزیکەوە گفتوگۆی لەگەڵ ئەندازیارانی سەرپەرشتیار و بەڵێندەری پڕۆژەکە کرد.

هەر لەمیانی بەداواداچوونەکانیدا، سەرۆکی زانکۆی پۆلیتەکنیکی هەولێر باڵەخانەی سەنتەری چالاکی قوتابیانی بەسەرکردەوە کە لە قۆناغی کۆتاییدایە و سەردانی بەشەکانی باڵەخانەکەی کرد. هەروەها سەردانی پڕۆژەی دروستکردنی باخچەی مودێرنی ناو کەمپی ژمارە ١ی زانکۆی کرد و لەنزیکەوە بەدواداچوونی بۆ کارەکان کرد و رێنوێنی بە ئەندازیاران دا و داوایان لێکرا بۆ خۆئامادەکردن بۆ قوناغی دووەمی پڕۆژەکە.

جێی ئاماژەیە، لە دوای دەستبەکاربوونی پ.د.ئیدریس محەمەد تاهیر هەرکی وەک سەرۆکی زانکۆی پۆلیتەکنیکی هەولێر، لە ماوەی یەک ساڵی رابردوودا چەندین پڕۆژەی گرنگ کە بەشێکە لە پلانی بنیاتنانی ژێرخانی زانکۆ، خراونەتە بواری جێبەجێکردن و بەشێکیشیان تەواوبوون و خراونەتە خزمەتی زانکۆوە.

 

بە ئامادەبوونی سەرۆکی زانکۆ فێستیڤاڵی ساڵانەی قوتابیانی کۆلێژی تەکنەلۆجی هەولێر بەڕێوەچوو

لەژێر چاودێری و ئامادەبوونی پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر، پێنجەمین فێستیڤاڵی ساڵانەی قوتابیانی قۆناغی دووەمی کۆلێژی تەکنەلۆجی هەولێر لەژێر ناوی ( تەکنەلۆجیا و داهێنان) بەرێوەچوو.

دوای کردنەوەی فێستیڤاڵەکە کە هەریەک لە پ.ی.د.نەجیب توما بتو، یاریدەدەری سەرۆکی زانکۆ بۆ کاروباری زانستی و خوێندنی باڵا و راگرانی کۆلێژی تەکنەلۆجی هەولێر و پەیمانگەی تەکنیکی کارگێڕی هەولێر و پەیمانگەی تەکنیکی پزیشکی هەولێر و بەرپرسی لیژنەی ناوچەی ئایندە و ژمارەیەک لە مامۆستایان و فەرمانبەران و قوتابیان ئامادەی بوون، بەشەکانی فێستیڤاڵەکە بەسەرکرایەوە و کار و چالاکییە نمایشکراوەکان نیشانی ئامادەبووان درا.

لای خۆیەوە سەرۆکی زانکۆی پۆلیتەکنیکی هەولێر دەستخۆشی لە رێکخەر و سەرپەرشتیاران و قوتابیانی بەشداربوونی فێستیڤاڵەکە کرد و هیوای سەرکەوتنی بۆ خواستن.

پ.د.ئیدریس محەمەد تاهیر هەرکی جەختی لەوە کردەوە کە پێویستە بەرهەم و کارە دەستییەکانی قوتابیان رەنگدانەوی لەناو کۆلیژ و زانکۆکان هەبێت و بۆ ئەمەش قوتابیانی بەشداربووی هاندا کە بەشێک لە کارە دروستکراوەکانیان وەک دیاریی ئامادەبکرێن بۆ پێشکەش بە ئەو شاند و میوانانەی دێنە زانکۆ و لایەنە پەیوەندارەکان بکەن تاوەکو ئاشنای کارەکانیان ببن.

 

سەرۆکی زانکۆ بەشداریی لە کۆبوونەوەی بریکارى وەزارەتى خوێندنى باڵا لەگەڵ سەرۆکى زانکۆى (Dundee)ی بەریتانى دەکات

سەرۆکی زانکۆ بەشداریی لە کۆبوونەوەی بریکارى وەزارەتى خوێندنى باڵا لەگەڵ سەرۆکى زانکۆى (Dundee)ی بەریتانى دەکات

پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر بەشداریی لە کۆبوونەوەی بریکارى وەزارەتى خوێندنى باڵا و توێژینەوەی زانستیی لەگەڵ سەرۆکى زانکۆى (Dundee)ی بەریتانى کرد.

بەمەبەستى پەرەپێدانى بوارى زانستى و ئەکادیمى و ئاڵوگۆرى مامۆستایان و قوتابیان و خوێندکاران، وەفدێکى زانکۆى (Dundee) دەندى بەریتانى سەردانى وەزارەتى خوێندنى باڵا و توێژینەوەى زانستى کردو لەگەڵ ستافى وەزارەت کۆبۆوە.

پ.د. عبدالفتاح عبدالرزاق، بریکارى وەزارەتى خوێندنى باڵا و توێژینەوەى زانستى پێشوازی کرد لە پ.ئییەن گیلیپسى، سەرۆکى زانکۆى (Dundee) دەندى بەریتانى و شاندێکی یاوەرى کە پێکهاتبوون لە پرۆفیسۆر محەمەد ئەلئوزرى، سەرۆکى ئەنجوومەنى عێراقى – بەریتانى بۆ کار، د. جەیسن نۆریس، بەرپرسى پارتنەر لە زانکۆى دەندى بەریتانى کە بەمەبەستى ئەنجامدانى چەند پرۆژەیەکى هاوبەشى زانستى لەگەڵ چەند زانکۆیەک لە هەرێمى کوردستانن.

لە دیدارێکدا کە سەرۆکی زانکۆی پۆلیتەکنیکی هەولێر و ژمارەیەک لە سەرۆک زانکۆکانى کوردستان و ڕاوێژکارى وەزیر و بەڕێوەبەرانى گشتى ئامادەیبوون، سەرۆکی زانکۆى دەندى بەریتانیا خۆشحاڵى خۆى نیشاندا بۆ سەردانى وەزارەتى خوێندنى باڵا و توێژینەوەى زانستى و باسى لە ئەرک و کارى هاوبەشى زانکۆکەى کرد لەگەڵ زانکۆ و دامەزراوەکانى هەرێمى کوردستان.

لە وتەیەکیشدا بریکارى وەزارەتى خوێندنى باڵا و توێژینەوەى زانستى باسى لە پەیوەندییەکانى هەرێمى کوردستان لەگەڵ وڵاتى بەریتانیا کرد، بۆ ئەمەش گوتى: وەزارەتەکەمان لە ڕابردودا زۆرترین پڕۆژەى زانستی هاوبەشى لەگەڵ زانکۆ و دامەزراوەکانى وڵاتى بەریتانیا هەبوە و زۆرترین وەبەرهێنانی زانستی لە بوارەکانی پەرەپێدانی تواناکان و توێژینەوەی هاوبەش و ئاڵوگۆری ئەکادیمی لەگەڵ زانکۆکانتان هەبووە بۆیە خوازیارین ئەم پەیوەندییە زانستییانە فراوانتر بن و بوارەجیاجیاکانی تایبەت بەگەشەپێدانی کەرتی خوێندنی باڵا لەخۆ بگرێت.

بۆ ئەمەش گوتى: بەشێکى گرنگ و ستراتیژى کارى ئێمە بریتیە لە فراوانکردنى پانتایى خوێندنى تەکنیکى و پیشەیى لە هەرێمى کوردستان، لەو چوارچێوەیەشدا بەپێویستى دەزانین کەناڵێکى ڕاستەوخۆ و باشتر لەگەڵ بازارى کارى کوردستان ئەنجام بدەین، بۆ جێبەجێکردنى ئەم ئامانجانە پێویستمان بە شارەزایى و لێهاتوویى و توانا زانستییەکانتان هەیە، بۆ ئەوەى سوود لە ئەزموون و تواناى ئەو وڵاتە وەربگرین. هەروەها بریکارى وەزارەت باسی لە پلانی وەزارەت بۆ ڕیفۆرم و چاکسازى و پێداچوونەوە بە پرۆگرامى خوێندنى سەرجەم بەشەکانى زانکۆکانى کوردستان کردو گوتى بەشداری و هەماهەنگی شارەزایانی بەریتانیا زۆر یارمەتیدەر دەبێت لە سەرخستنی ئەم پرۆژەیە.

لە کۆتایی کۆبونەوەکەدا چەند بابەتێکى زانستى و ئەکادیمى بۆ پەرەپێدانی زیاترى پەیوەندییەکان لەنێوان هەردوولا ئاڵوگۆڕکرا.

لیژنەی باڵای ئەزموونەکانی کۆلێژەکەمان ئەنجامی کۆتایی تاقیکردنەوەکانی سیمستەری دووەم و چوارەم / خولی یەکەمی ‌دەوامی بەیانیان و ئێوارانی ڕاگەیاند.


تێبینی: هەر قوتابیەک گازندەی لە نمرەکانی هەیە ، لە ڕۆژانی دووشەممە و سێشەممە ڕێکەوتی ٦- ٥ /٢٠٢٣/٦ بەیانی کاتژمێر ٨:٣٠ تاکو کاتژمێر ٢:٠٠ ی پاش نیوەڕۆ سەردانی ڕاگرایەتی / هۆبەی ژمێریاری بکەن بۆ پرکردنەوەی فورمی گازندە.

بەهیوای سەرکەوتن بۆ گشت قوتابیان.

ئێستا قوتابیان دەتوانن لە ڕێگەی ئەم لینکەی خوارەوە ئەنجامەکانیان وەربگرنەوە

https://bologna.epu.edu.iq/adminects/