رۆژی پێنج شەممە رێکەوتی 23ـی ئەیلولی 2021 زانکۆی پۆلیتەکنیکی هەولێر و ژووری بازرگانی و پیشه‌سازی هه‌ولێر خولێکی دیکەی راهێنانی کاریان بۆ ژمارەیەک دەرچوو کردەوە کە ماوەی دوو مانگ بەردەوام دەبێت، و ئامانجی سەرەکی خولەکە هاندان و پاڵپشتی گەنجانە تاکو ببنە خاوەنکار و بازرگانی تایبەت بە خۆیان و بتوانن پشت بەخۆیان ببەستن ، بۆ ئەم مەبەستەش له ماوه‌ی خوله‌كه‌دا سه‌رجه‌م به‌شداربووان به‌شێوه‌یه‌كی پراكتیكی، كار له‌سه‌ر بنیاتنانی پرۆژه‌یه‌كی بازرگانی ده‌كه‌ن وه‌كو تیم.
ئەم خولە لە لایەن ژووری بازرگانی و پیشەسازی هەولێرەوە سپۆنسەر کراوە بە هەماهەنگی لەگەڵ کۆلێژی تەکنیکی کارگێری هەولێر و بە سەرپەرشتی م. زانیار جبار مامۆستا له كۆلێژی ناوبراو بەرێوەدەچێت.
خولی ڕاهێنانی پێشه‌نگ له ماوه‌ی (4 ساڵی) ڕابردوو سپۆنسه‌ر كراوه له لایه‌ن كونسوڵگه‌ری ئه‌مریكا له هه‌ولێر، دامه‌زراوه‌ی نێوده‌وڵه‌تی ئایرێكس، سه‌ره‌رای زانكۆی پۆلیته‌كنیكی هه‌ولێر، ژووری بازرگانی هه‌ولێر، رێكخراوی پلان، رێباز فاونده‌یشن و كافتریای كتێب.
به‌شداریكردن له‌م پرۆگرامه به‌خۆڕاییه و به‌شێك له به‌شدابووانی خوله‌كانی ڕابردوو له ئێستادا خاوه‌ن بزنسی خۆیانن و توانیویانه كه‌سانی دیکەش دابمه‌زرێنن.
