The Methods Writing of Security News on Kurdish Websites as Example on NRT and Kurdistan24’s Websites

پوختە

ئامانجی ئەم توێژینەوەیە كە بەناونیشانی (شێوازەكانی داڕشتنی هەواڵی تەناهی لە ماڵپەڕە كوردییەكاندا)ـە، زانینی ئاستی گرنگیدانی ماڵپەڕە كوردییەكانە بە شێوازه‌كانی داڕشتنی ده‌قی هەواڵی تەناهی و دەستنیشانكردنی فۆڕمە بەكارهاتووەكانی وەك وێنە، ڤیدیۆ و گرافیكە لەگەڵ دەقە هەواڵییەكان، لەگەڵ ناساندنی ئەو سەرچاوانەی ماڵپەڕە كوردییەكان بۆ بڵاوكردنەوەی زانیارییە تەناهییەكان پشتی پێ دەبەستن، كە تا چەندە سەرچاوەكان پەیوەندیدار و فەرمین بە بابەتی تەناهییەوە، لەگەڵ دیاریكردنی جۆر و سرووشتی ئەو مەترسییە تەناهیانەی هەڕەشەن لەسەر تەناهی قەوارەی هەرێمی كوردستان.

ئەم توێژینه‌وه‌یه‌ لە جۆری وەسفیی شیكارییە و توێژەر فۆڕمی ناخشیكاریی وەك ئامرازی سەرەكی بۆ كۆكردنەوەی داتا و زانیارییەكان بەكارهێناوە. هەواڵی تەناهی لە ماڵپەڕە كوردییەكان وەك كۆمەڵگەی توێژینەوە دەستنیشانكراون و هەردوو ماڵپەڕی NRT و K24 وەك مشتەی توێژینەوە بەشێوەی وەرزی ده‌ستكرد لە ماوەی 1/1/2022 تا 31/12/2022 وەرگیراون، لەو ماوەیەدا ماڵپەڕی NRT (356) هەواڵ و K24 (423) هەواڵی تەناهیی بڵاوكردووەتەوە و كۆی گشتییان دەكاتە 779 هەواڵ.

توێژینەوەكە بە كۆمەڵێك ئەنجام گەیشتووە، گرنترینیان بریتین لە:

1. لەڕووی زمانەوانییەوە داڕشتنی مانشێتی هەواڵەكان لە ماڵپەڕە كوردییەكان لە یەكێكەوە بۆ یەكێكی دیكە جیاوازییەكی رێژەیی هەیە، بەڵام تاڕادەیەك باڵانس لە بەكارهێنانی دەستەواژەكان لە نێوانیاندا هەیە. هەرچی لە ناوەڕۆك و ئاراستەدایە، جیاوازییەكی فراوان لە نێوانیاندا هەیە و هەر یەكێكیان بەگوێرەی پەیامە بنەڕەتییەكە، شوێنگۆڕكی بە دەستەواژەكان دەكات، بۆ ئەوەی مەبەستی دیاریكراوی خۆی بپێكێت.
2. لە ناوەڕۆكی هەواڵ و مانشێتەكاندا هەرچەند ئاراستەی هاوسەنگی بەڕێژەی 46.04% لە پلەی یەكەمدایە و لایەنگریی بەڕێژەی 14.63% لە پلەی سێیەمدایە، ئەمەش بۆ هەواڵی تەناهی كە یەكێكە لە هەستیارترین بوارەكانی هەواڵ و لە ئەگەری ناڕوونی لە هەر زانیارییەكی بچووكیش، لەوانەیە كارەساتێكی بەدواوە بێت، ئەوا هێشتا رێژەكەی بەرزە.