پوختەی توێژینەوەكە

 ئەم توێژینەوەیە هەوڵێكی زانستییە بۆ زانینی سرووشتى گوتاری بازاڕسازیى كۆمپانیاكانى گه‌یاندنى خێرا لە سۆشیال میدیا له ‌سه‌رده‌مى كۆرۆنادا، لەگەڵ دیاریكردنی پەیوەندی نێوان گوتاری بازاڕسازیی كۆمپانیاكانى گه‌یاندنى خێرا و سرووشتى ئامرازه‌كانى سۆشیال میدیا لە سەردەمی كۆرۆنا لە هەرێمی كوردستاندا. لەم توێژینەوەیەدا میتۆدی رووپێوی به‌كارهێنراوە ‌و توێژەر پشتی بە رێگای شیكردنه‌وه‌ى ناوه‌ڕۆك به‌ستووه، سوودیشی لە تیۆری گوتارشیكاری وەرگرتووە بۆ شیكردنەوەی گوتاری بازاڕسازی هەردوو كۆمپانیای گەیاندنی خێرا (دلیڤەری)ـی (تەڵەبات و لەزوو) لە سەردەمی كۆرۆنادا. كۆمەڵگەی ئەم توێژینەوەیە بریتییە لە هەموو سۆشیال میدیای ئەو كۆمپانیایانەی لە بواری گەیاندنی خێرا كە لە هەرێمی كوردستان كاردەكەن، نموونەی توێژینەوەكەش پێكدێت لە سۆشیال میدیای كۆمپانیاكانی (تەڵەبات و لەزوو)، كە ئۆفیسیان لە هەولێری پایتەختی هەرێمی كوردستانی عێراقە، توێژینەوەكە بەو دەرئەنجامە گەیشتووە، كە گرنگترین ئەو بابەتانەی لە گوتاری بازاڕسازی سۆشیال میدیای كۆمپانیاكانی (تەڵەبات و لەزوو) لە هەردوو پلاتفۆڕمی فەیسبووك و ئینستاگرام لە سەردەمی كۆرۆنادا تیشكیان خراوەتە سەر بریتیین لە ناساندنی خزمەتگوزاری كۆمپانیاكان و پەیامی رۆشنبیركردنی جەماوەر، هەروەها گوتاری بازاڕسازیی هەردوو كۆمپانیاش زیاتر كاركردن بووە لەسەر وروژاندنی هەست و سۆزی وەرگر لەپێناو باوەڕپێهێنان و دروستكردنی كاریگەری لەسەریان بە ئامانجی بەدەستهێنانی قازانجی زیاتر.

وشە سەرەكییەكان: گوتار، گوتارشیكاریی، بازاڕسازی، سۆشیال میدیا و كۆرۆنا.