بەئامانجى بەستنەوەى زیاترى پرۆگرامەکانى خوێندنى زانکۆ و پەیمانگەکانى هەرێمى کوردستان بە بازاڕى کار و ئاشنابوونى زیاترى قوتابیان بەیاساکانى کارو خانەنشینى دەستەبەرى کۆمەڵایەتى، یاداشتنامەیەکى لێکگەیشتن لە نێوان هەردوو وەزارەتى خوێندنى باڵا و توێژینەوەى زانستى و کار و کاروبارى کۆمەڵایەتى واژوو کرا.
ئەمڕۆ سێشەممە ڕێکەوتى 8ـی ئابی 2022 بەسەپەرشتى د. ئارام محمد قادر، وەزیرى خوێندنى باڵا و توێژینەوەى زانستى و کوێستان محمد، وەزیرى کارو کاروبارى کۆمەڵایەتى و ئامادەبونى بریکارانى هەردو وەزارەت و سەرۆکی زانکۆی پۆلیتەکنیکی هەولێر پ.ی.د. ئیدریس محمدطاهر هەرکی و ڕاوێژکار و بەڕێوبەرانى گشتى هەردوو وەزارەت ، لە ڕێوڕەسمێکدا یاداشتنامەى لێکگەیشتنى نێوان هەردوو وەزارەت بۆ پەرەپێدانى زیاترى پرۆسەى بەکارخستن و بنیادنانى کارامەیى ئیمزاکرا.
لە دەستپێکدا وەزیرى کارو کاروبارى کۆمەڵایەتى ئاماژەى بە گرنگى ئیمزاکردنى ئەم یاداشتە کردو ڕایگەیاند: ئامانجى سەرەکى لەم یاداشتە دروستکردنی هەماهەنگی زانستی و سود وەرگرتنە لە توانا ماددی و مرۆییەکانی نێوان هەردو وەزارەت و ئاڵوگۆڕی زانیاری سەبارەت بە پێداویستییەکانی بازاڕی کار و گونجاندنی لەگەڵ ناوەڕۆکی پڕۆگرامی خوێندن و ڕاهێنان لە زانکۆکان. وتیشى: بەپێى خاڵەکانى یاداشتەکە هەماهەنگى دەکرێت لەنێوان (بەشەکانی بەکارخستنی بەڕێوەبەرایەتیەکانى کار)ى سەر بە وەزارەتى کار لەگەڵ (سەنتەرەکانی گەشەپێدانی کار-(سی، دی، سی)ی زانکۆکانی کوردستان بۆ تۆمارکردنى ناوى دەرچوانى زانکۆ و پەیمانگەکان بۆ مەبەستی ڕاهێنان و دۆزینەوەى هەلى کار لە کەرتى تایبەت بۆ دەرچوانی بێکار.
لەلایەن خۆیەوە وەزیرى خوێندنى باڵا و توێژینەوەى زانستى ئاماژەى بە خاڵە گرنگەکانى ئیمزاکردنى یاداشتنى نێوان هەردو وەزارەت کردو ڕایگەیاند: فراوانکردنی پانتایی خوێندنی تەکنیکی و ڤۆکەیشنەڵ و بەستنەوەی زیاتری پرۆسەی خوێندنی تەکنیکی بە پێداویستییەکانی بازاڕی کار و داڕشتنەوەی ستراتیجی خوێندنی پیشەیی و تەکنیکی لە کوردستان، لە کارە گرنگەکانى وەزارەتەکەمانە لەم کابینەیە، بۆیە ئیمزاکردنى ئەم یاداشتنامەیە یارمەتیدەرمان دەبێت بەمەبەستى گرنکى دانى زیاتر بە خوێندنى پیشەیى و تەکنیکى.
هەروەک وتیشى: ئەنجامدانی کاری هاوبەش بۆ دەستنیشانکردنی کارامەییە پێویستەکان و کەلێنی کارامەیی و گونجاندنی لەگەڵ پێداویستییەکانی بازاڕی کار و ئاراستەی گەشەکردنی ئابوری کوردستان، هەروەها هەماهەنگی بۆ بەدواداچونی دەرچوان بەمەبەستی کۆکردنەوەی زانیاری لە بارەی ڕێژەی دەستکەوتنی کار و هەڵسەنگاندنی ئاستی پەیوەندی کاری دەرچوان بە پسپۆڕی و کارامەییەکانیانەوە خاڵى سەرەکى نێو یاداشتەکەن.
جێگەى ئاماژەیە بەشێکى دیکەى یاداشتنامەى لێکگەیشتنى نێوان هەردو وەزارەت بریتیە لە: هاندانی توێژەران لە زانکۆکانی هەرێمی کوردستان بۆ ئەنجامدانی توێژینەوەی زانستی دەربارەی کاریگەرییەکانی جێبەجێکردنی (یاسای کار و یاسای خانەنشین و دەستەبەری کۆمەڵایەتی بۆ کرێکاران) لەسەر بازاڕی کار و گەشەکردنی ئابوری هەرێمی کوردستان، هەروەها ڕەخساندنی دەرفەتی ڕاهێنان بۆ خوێندکارانى زانکۆ پۆلیتەکنیکییەکان بەمەبەستى سود وەرگرتن لە وەرشەکانى ڕاهێنانى پیشەیی سەر بە وەزارەتى کار و کاروبارى کۆمەڵایەتى و هاندانی دەرچوانى زانکۆکانی هەرێمى کوردستان بۆ بەشداریکردن لە خولەکانى ڕاهێنانى پیشەیی و خولەکانى بەهێزکردنى تواناکان بۆ ئامادەکردنى گەنجان تاوەکو بتوانن دوای دەرچون بە پڕۆژەوە بچنە ناو بازارى کار.
