Daily Archives: تشرینی دووه‌م 22, 2023

راگری پەیمانگەی تەکنیکی مێرگەسۆر سەردانی کۆمپانیای زۆم دەکات

رۆژی 22ی نۆڤەمبەری 2023، د. طالب محەمەد شەریف راگری پەیمانگەی تەکنیکی مێرگەسۆر سەردانی کۆمپانیای (زۆم)ی کرد لە هەولێر و لە لایەن سەرپەرشتیاری گشتی و بەڕێوبەری سەرچاوە مرۆییەکانی کۆمپانیاکەوە پێشوازییان لێکرا.

لە دیدارێکدا هەردوولا کۆک بوون لەسەر دروستکردن و پەرەپێدانی پەیوەندی لە نێوان پەیمانگەی تەکنیکی مێرگەسۆر و کۆمپانیای زۆم، ئەوەش بەمەبەستی هاوکاری و هەماهەنگی نێوانیان لە پێشخستنی پەیمانگەی تەکنیکی مێرگەسۆر و هەروەها سوود وەرگرتن لە توانا مرۆییەکانی پەیمانگە.

هەر لەو دیدارەدا گفتوگۆکرا دەربارەی پێداویستی بازاڕی کار لە پسپۆڕییە کشتوکاڵییەکان، بەو پێیەی کە بڕیارە لە داهاتوودا بەشی هەنگەوانی لە پەیمانگەی تەکنیکی مێرگەسۆر بکرێتەوە، لە بەرامبەریشدا بەرپرسانی کۆمپانیای ناوبراو ئامادەییان دەربڕی بۆ هاوکاری کردنی پەیمانگە لە رووی دابین کردنی تاقیگە و سوود وەرگرتن لە توانا مرۆییەکانیان.

رۆژی سێ شەمە 22ی نۆڤەمبەری 2023، پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر پێشوازی کرد لە شاندێکی (British Council) ئەنجومەنی رۆشنبیری بەریتانیا لە عێراق، کە پێکهاتبون لە بەڕێز عەممار تاریق بەرپرسی بەشی خوێندن و نوێنەری بەشی تاقیکردنەوەکانی زمانی ئینگلیزی و بەرێز نەشوان هەر لە بەشی خوێندن.

لە دیدارێکدا کە د.رەنج سیروان بەرێوەبەری پەیوەندییە نێودەوڵەتییەکانی زانکۆمان ئامادەیبوو، گفتوگۆکرا دەربارەی بەهێزکردنی پەیوەندییەکانی زانکۆمان لەگەڵ زانکۆکانی وڵاتی بەریتانیا لەڕێگای ئەو ئەنجومەنەکەوە کە پەیوەندییەکی بەهێزی لەگەڵ زانکۆ بەریتانیەکان هەیە.

لە بەشێکی دیکەی کۆبوونەوەکەدا پێشنیارکرا کە (British Council) لە ڕێگای خۆیەوە پاڵپشتی دارایی پێشکەش بکات بۆ فراوانکردن و بەهێزکردنی پەیوەندییە ئەکادیمییەکان.

هەر لەو کۆبونەوەیەدا باسی شێوازی تاقیکردنەوەکانی زمانی ئینگلیزی کرا، داواکرا کە سەنتەری زمانی زانکۆمان بکرێتە سەنتەرێکی تاقیکردنەوەکانی IELTS.