پەیامی راگری پەیمانگە بەبۆنەی 42هەمین ساڵیادی جێنوسایدی بارزانییەکان
ئەوکاتانەى کە ژیان تازە دەیویست بەدەم گریانى هاتنەدنیام بە پێکەنین وەڵامم بداتەوە و، شادى روخسارى باب و برام بە روونى هەستپێبکەم، دەستى رەشى دڕندەترین مرۆڤەکان، تاڵترین تامى ژیانی پێ چەشتم و بۆ هەمیشە وێنەى ئازیزانمى بە تەمى تارى نادڵنیایى داپۆشى؛ بۆیە بۆ من، یادى ئەنفال و جینۆساید جگە لەو کاریگەرییە گشتییەى کە لەسەر کۆنەستى هەموومان هەیەتى، ئەزموونێکى تایبەتى پڕ لە ژان و ئازاریشە؛ چونکە من خۆم رزگاربوویەکى ئەنفالم.
چل و دوو ساڵ لەمەوبەر، بە مەبەستى لەناوبردنى بزووتنەوەى رزگاری خوازی کوردستان، ڕژێمی سەدام حوسێنى گۆڕبەگۆڕ، لە کردەوەیەکی دڕندانەى بەرنامە بۆداڕێژراودا، کردەوەى جینۆساید و سڕینەوەى بارزانییەکانى دەستپێکرد و زیاتر لە 8 هەزار جوامێرى بارزانى بێسەروشوێن و راپێچى مەرگ کردن؛ لەوکاتەوە تا ئێستا، ئێمە بە ئازارى خەمى لەدەستدانى ئەو ئازیزانەوە ژیانمان تێدەپەرێنین.
ئەمڕۆ بە هەستێکی قووڵی پڕ لە خەم یادى ئەو کارەساتە دەکەینەوە؛ بەڵام لەگەڵ ئەوەشدا، ئەگەر چاوێک بە مێژووماندا بگێڕین و لە چارەنووسى ئەوانەى کە جینۆسایدان کرد و ئەوانەش کە جینۆسایدکران رابمێنین، سوکناییەک بەدڵماندا دێت. ئەوەتا ئێمەى رزگاربووانی جینۆساید و میراتگرانى ئەو کۆستە مەزنە، سەرەڕاى ئەو هەموو سەختى و نەهامەتییانەى کە چەشتمانن و رووبەڕوومان بوونەوە، بووینەتە رووسوورى مێژوو و بکەرانى ئەنفال و جینۆسایدش لە زبڵدانى مێژوودان.
بۆ ئێمە نەک تەنیا 31ى تەمووز، بەڵکو هەموو رۆژێک یادى ئەو ئازیزانەیە چونکە ئەوان تەنیا هەشت هەزار کەس نەبوون، بەڵکو ئەوان هەریەکەیان ژیانێک بوو بە هەموو رەنگاڵەیى و جۆراوجۆرییەکانیەوە، هەریەکەیان چیرۆک و ئاوات و خۆشەویستی خۆی هەبوو بۆ وڵات، ئاین و مرۆڤایەتی و ژینگەدۆستی.
وەک ئەکادیمییەک، ئەرکی ئێمەیە کە یادەوەرییەکانمان و تەواوى ئەو دڕندەییانەى بەرامبەرمان کراون لەبیر نەکەین؛ پێویستە نەوەکانی داهاتوو ئاگادار بکرێنەوە، کە پێشینانیان، باوک و براو خزم و کەسیان، تەنیا لەبەر ئەوەى کورد بوون، تەنیا لەبەرئەوەى بارزانى بوون، لە چرکەساتێکى مێژووییدا، جینۆساید کران و لەناوبران. ئەمە گرنگە بزانرێ، تا داهاتوومان روون و دیار بێ.
ئەنفالى بارزانییەکان لە یادەوەری ئێمەدا بۆ هەمیشە بە بەرزى دەمێنێتەوە؛ بەڵام ئەمە هاوکات پەڵەیەکى رەشیشە بە ناوچاوى مرۆڤایەتى و دادەپەروەری مرۆییەوە.
جارێکى تر لەو یادەدا، دروود دەنێرین بۆ گیانى پاکى هەموو ئەوانەى بوونە قوربانى ئەو دڕندەییەى داگیرکەران، و بەڵێن بە رۆحى بەرزەفڕیان دەدەین، هەروەک رابردوو ئیرادەى نەبەزیوى کوردستان هەر لە باڵاییدا دەمێنێتەوە.
د. طالب محەمەد شەریف عومەر
راگری پەیمانگەی تەکنیکی مێرگەسۆر
