رۆژی پێنج شەممە 13 تەمووزی 2023، پ.د.ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر و سەرۆکی لقی عێراقی کۆمپانیای تۆیۆتای یابانی یاداشتێکی لێکتێگیشنیان واژوو کرد.
لە مەڕاسیمەکەدا سەرۆکی زانکۆ وتەیەکی پێشکەش کرد و تیایدا ئاماژەی بەوە کرد ئەم جۆرە یاداشتنامانە لە نێوان زانکۆ و کەرتی تایبەت هەیە بەڵام ئێمە وەکو زانکۆی پۆلیتەکنیکی هەولێر یەکەم زانکۆین لە رۆژهەڵاتی ناوەڕاست بتوانین راستەوخۆ هەلیکار بۆ دەرچووانمان بدۆزینەوە وە ئەمجۆرە یاداشتی لێکتێگەیشتنانە سوودی بۆ هەردوولا هەیە چونکە هەم دەرچووانی زانکۆمان هەلی کاریان دەست دەکەوێت هەم کۆمپانیاکان سوود لە دەرچووەکان وەردەگرن.
لەلایەن خۆشیەوە سەرۆکی کۆمپانیای تۆیۆتا/ لقی عێراق ئاماژە بەوە کرد ئێمە تێڕوانینمان وایە کە هاوکار و بەشدار بین لە بەرەوپێشبردنی عێراق و هەرێمی کوردستان وە مەبەستیش لەم جۆرە پڕۆژانە ئەوەیە هاوکار بین لە دابین کردنی هەلیکار بۆدەرچووانی زانکۆ وە دەمانەوێت پێشەنگی هەموو کۆمپانیا یابانیەکان بین لە عێراق و هەرێمی کوردستان.
لە کۆتاییدا سەرۆکی زانکۆ بانگهێشتی کۆمپانیای ناوبراوی کرد بۆ ئەوەی ببنە پێشەنگ لە بەرنامەی دۆزینەوەی هە لیکار کە زانکۆی پۆلیتەکنیکی هەولێر لە ئێستادا کاری لەسەر دەکات، وەکو زانکۆ دەمانەوێ کارێک بکەین دەرچووانمان بیر لە دامەزراندنی حکومی نەکەنەوە هەلی کاریان لە کەرتی تایبەت دەست بکەوێت.
شیاوی باسە شاندی زانکۆمان پێکهاتبوون لە راگری کۆلێژی تەکنەلۆجی هەولێر، سەرۆکی بەشی تەکنیکی ئۆتۆمبێل لە کۆلێژی تەکنەلۆجی هەولێر، بەڕێوبەرانی پەیوەندییە نێودەوڵەتییەکان، سەنتەری گەشەپێدان بۆ کار و رێکخەری پەیوەندییەکانی نێوان زانکۆ و کۆمپانیای ناوبراو.
ناوەرۆکی یاداشتی لێکتێگەیشتنی نێوان زانکۆی پۆلیتەکنیکی هەولێر و کۆمپانیای تۆیۆتا/عێراق:
- دابینکردنی بەشێک لە پێداویستیەکانی مەشق و راهێنانی پڕاکتیکی لە لایەن کۆمپانیای ناوبراو.
- راهێنانی مامۆستایانی بەشی تەکنیکی ئۆتۆمۆبیل لە کۆلێژی تەکنەلۆجی هەولێر لە چەند بوارێکی تەکنیکی ئۆتۆمۆبیل.
- فەراهەمکردنی هەلی مەشق و راهێنان بۆ قوتابیانی قۆناغی دووەمی پڕۆگرامی دبلۆم و قوتابیانی قۆناغی سێیەمی بەکالۆریۆس بە شێوەیەکی ساڵانە.
- پێدانی زانیاری دەرچووانی بەشی ئۆتۆمبیل بە کۆمپانیای تۆیۆتا عێراق بە مەبەستی لەبەرچاوگرتنیان بۆ هەلی دامەزراندن لە کۆمپانیاکە بە پێی رێوشوێنی بەرکاری کۆمپانیا.
- دابینکردنی راهێنانی ئەلیکترۆنی بواری تەکنیکی ئۆتۆمبیل بۆ مامۆستایانی بەشی ئۆتۆمۆبیل بە مەرجی بەکارهێنانی تەنها لەلایەن مامۆستایانی بەش.
