Monthly Archives: ئازار 2024

نوێنەری سەرۆکی زانکۆی پۆلیتەکنیکی هەولێر بەشداری کرد لە کۆبوونەوەی خولی زانکۆکانی تەکنیکی لە عێراق کە لە رۆژانی 7 و 8ی ئاداری ،2024 لە شاری بەسڕا بەڕێوەچوو.

پ.ی.د. نەجیب تۆما بەتۆ بە نوێنەرایەتی سەرۆکی زانکۆی پۆلیتەکنیکی هەولێر بەشداربوو لە کۆبوونەوەکە کە لە زانکۆی تەکنیکی باشوور(الجامعة التقنية الجنوبية) ئەنجامدرا، و تیایدا تیشک خرایە سەر هەڵسەنگاندنی فێسی دووەم لە پڕۆژەی پەرەپێدانی خوێندنی تەکنیکی و پیشەیی لە عێراق (TVET-2) کەوا سێ تەوەری سەرەکی لەخۆی گرتبوەوە بریتی بوون لە:(Degree programme, Quality Assurance. Internatinalization).

تەوەرێکی دیکەی کۆبوونەوەکە تایبەت بوو بە پێشنیار و بۆچوونی زانکۆکان وەک ئامادەکاری باشتر بەڕێوەچوونی فێسی سێیەم لە پڕۆژەی پەرەپێدانی خوێندنی تەکنیکی و پیشەی لە عێراق کە بڕیارە لە ماوەیەکی نزیک و لە چەند مانگی داهاتوو دەست پێبکات

شیاوی باسە پڕۆژەی داهاتوو گرنگی دەدات بە (وزەی سەوز، ⁠پڕاکتیز کردنی چواچیوەی بڕوانامەکانی خوێندنی تەکنیکی و پیشەیی، ⁠گرنگی دان بە ناساندنی زانکۆکانی تەکنیکی لە ڕێگای پەرەپێدانی وێب سایتی زانکۆکان.

 

ئەمڕۆ دوای نیوەڕۆ ٢٠٢٤/٣/٧ پەیمانگەی تەکنیکی پزیشکی هەولێر بەسەرپەرشتی بەڕێز ڕاگری پەیمانگە (پ.ی.د. تیران جمیل پیرۆ) و یاریدەدەری ڕاگری ئێواران بەڕێز(م. پشتیوان ظاهر مجید)بە هاوکاری لێژنەی نوێنەرایەتی یەکێتی قوتابیانی کوردستان. بە بۆنەی ڕۆژی جیهانی ئافرەتان و ڕۆژی جلی کوردی پەیمانگەکەمان مەراسیمێکی بەم بۆنانەوە ڕێک خست.كە تیاییدا بەڕێز (پ.ی.د.تیران جمیل پیرۆ) لە وتارێکدا باسی لە گرنگی ئەم بۆنانە کرد. پیرۆزبایی گەرمی لە تەواوی ئافرەتانی جیهان و بە تایبەت ئافرەتانی کوردستان کرد. کە ڕۆڵێکی مەزنیان هەییە لەبنیاتنانی کۆمەڵگە و پێشکەوتنی لەڕووی زانست و کارگێڕی هیوای سەرکەوتنی بۆ خواستن لە تەواوی بوارەکانی ژیان، هەروەها باسی لە جلی نەتەوەیی کوردی کرد ووتی : دەبێت هەموومان شانازی بە جلی کوردی بکەین، چونکە ئەوە بەشێکە لە ناسنامە و کەلتوری کورد بونمان لە کۆتاییدا دووبارە پیرۆزبایی خۆی لە سەرجەم ئافرەتان کرد

پەیمانگەی تەکنیکی مێرگەسۆر یەکەمین کۆربەندی ساڵانەی خۆی سازدەکات

ڕۆژی چوارشەممە ڕێکەوتی 6ی ئاداری 2024، یەکەمین کۆربەندی پەیمانگەی تەکنیکی مێرگەسۆر لەژێر ناونیشانی “بارزان لە بەرخودان خۆنەچەماندن بۆ نیشتمانسازی ( پەروەردە و فێرکردن ژینگەپارێزی و پێکەوەژیان)” بە بەشداری هەریەک لە بەڕێزان (پ.د.ابوبەکر دێوانە حمد، د.عەبدوڵا ملا سعید وەیسی، پ.د.فەرسەت مەرعی، مامۆستا ڕێکار مزوری) بەڕێوەچوو.
کۆڕبەندەکە ئامادەبوونی پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، هەڵگورد شێخ نەجیب سەرپەرشتیاری ئیدارەی سەربەخۆی سۆران و نوێنەرانی نووسینگەی (جەنابی مەلامستەفا بارزانی)و، غەفور احمد ملاسوار قائیمقایمی قەزای مێرگەسۆر، ژمارەیەک ئەندامی ئەنجومەنی زانکۆ، بەرپرسانی حزبی و حکومی دەڤەرەکە، پەیڕەوانی ئاین و ئاینزا جیاوازەکان و مامۆستایان و فەرمانبەران وقوتابیان دەستی پێکرد.

سەرەتا ڕاگری پەیمانگە تەکنیکی مێرگەسۆر وتەیەکی پێشکەش کرد کە ئەمەی خوارەوە دەقەکەیەتی:

به‌ناوی خودای گه‌وره‌ و میهره‌بان

• میوانانى بەرێز ،چ حکومی و حیزبی لە هەر پێگە و مەقامێکدابن
  -توێژەر و ئەکادیمیستان و مامۆستایانی قەدرگران
  قوتابییانی ئازیز و گەنجانی خۆشەویست
  ئەم کاتەی هەموولایەک باش و زۆر بەخێربێن:
  سەرەتا بە ناوی ڕاگرایەتی پەیمانگەی تەکنیکی مێرگەسۆر و زانکۆی پۆلیتەکنیکی هەولێر، زۆر بەگەرمی بەخێرهاتنتان دەکەم؛ هەست بە خۆشحاڵییەکى زۆر دەکەین، کە لە چالاکییەکى ئەکادیمی دیکەدا لە خزمەتتانداین؛ چالاکییەک کە لە روانگەی ئێمەوە، خاوەنى تایبەتمەندى و جیاوازى تایبەت بە خۆیە؛ چونکە تیشک دەخاتە سەر میراتێکى گەورەی مێژوویى و چەند رەهەندێکى خاوەن شانازى و پر لە ئەزموونى شارستانى نەتەوەکەمان لە ناوچە و دەڤەرێکى دیاریکراوى کوردستان.

بەڕێزان:
هەروەکو لە بۆنە و چالاکییەکانى پێشترى پەیمانگەکەشماندا ئاماژەمانپێداوە، ئێمە پێمانوایە، بیرکردنەوە و رێگاو مێتۆدى زانستى، ئەو کاتە زیاتر نرخ و بەهایان دەردەکەوێ، ئەگەر هەوڵبدرێ هەلومەرجى هەنووکەیى کۆمەڵگەکانیان راچاوبکرێت؛ تا لەم رێگەیەوە، یاسا و رێساکان دیاریبکرێن و ئاسۆى بینینى تاکەکان روونتر و مەوداى وشیارى و هەگبەی زانست و مەعریفەی کوردستانیان فراوان و دەوڵەمەند بکرێت و، دواجارلێرەشەوە، هەلى پێشکەوتنى بەردەوام و سەقامگیر بۆ کۆمەڵگە بڕەخسێنرێ.
هەر لەم ڕوانگەیەوە، ئێمە لە سەر ئاستی باڵا لە پەیمانگەکەمان بە پێویستمان زانى، بەرنامەو بابەتی ئەم کۆڕبەندە زانستیە بۆ تیشک خستنەسەر ئەزموون و نەریتى مێژوویى، سیاسى و کولتوورى دەڤەرەکەمان بێت. ئەمڕۆو لە یەکەمین کۆڕبەندا، بە ناونیشانى (بارزان لە بەرخۆدان و خۆنەچەماندن بۆ نیشتمانسازی) دەست پێ دەکەین و، بە ووردی باس لە پەروەردە و فێرکردن، ژینگەپارێزی و پێکەوە ژیان دەکەین، تا بتوانین راسپاردەمان هەبێ بۆ ئایندە سازی..

هێژایان:

کاتێک ئاوڕ لەم دەڤەرە بچووک لە رووى رووبەرو، دەوڵەمەند لە رووى فەرهەنگ و سامانى مێژووییە دەدەینەوە، بۆمان دەردەکەوێ، وەکو کورد پێویستە هەڵوەستەیەکى جدى لەسەر مێژوو و هەموو رەهەندەکانى ژیانى کولتوورى و سیاسییمان بکەین.

بە پێچەوانەى زۆرێک لەوانەى کە بە دیدێکی رەشبینیەوە سەیرى هەلومەرجى رابردوو و ئێستامان دەکەن و، لەم ڕوانگەیەوە، ئەوەى کە نیشانەى باوەڕبەخۆبوونە بۆ تاکى کوردیان نەهێشتووەتەوە.
ئێمە بە کەمێک لێووردبوونەوە، دەتوانین، لە هەناوى دوورترن خاڵەکانى مێژوومان، درەوشاوەترین ئەزموونەکان و، جوانترین گونجانەکانى مرۆڤ لەگەڵ بیروباوەڕ لە لایەک و، سرووشت لە لایەکى ترەوە و، ئەزموونى مرۆیى لە لایەکى دیکەوە، هەستپێبکەین.

بەرێزان:
لە راستیدا ئیمە کە باس لە دەڤەرى بارزان دەکەین، باس لە نەریتێکى تایبەتى ژیان و، هەڵسوکەوتى مرۆیى دەکەین؛ باس لە مێژوو و، گیانى بەرخۆدان و، ملکەچنەکردن دەکەین؛ باس لە کولتوورى مرۆڤدۆستى و، رۆحى بەرزى پێکەوەژیان دەکەین؛ باس لە نیشتمان خۆشەویستى و ژینگەدۆستى دەکەین؛ باس لە هاڕمۆنى باوەڕی ئایینى و خزمەتکردنى راستەقینەى مرۆڤ دەکەین، باس لە پەروەردەى مرۆڤدۆستانە دەکەین.

ئەمانە هەموو ئەو رەهەند و، ئاڕاستانەن کە بوون بە بەردی بناغەى کۆمەڵگە پێشکەوتووو، مۆدێڕنەکانى جیهان. ئەو وڵاتە پێشکەوتووانەى کە ئێستا، ئەوقییەم وبەهایانەمان وەکو بەهاى جێگیرى خۆیان پێدەناسێننن و، پێیان وایە، ئێمەش دەبێ رەچاویان بکەین!!!! غافڵ لەوەى کە ئێمە زۆر دەمێکە لە گۆشە و کەنارەکانى ئەم نیشتمانەدا، دەتوانین بەهێزترین نموونەکانیشى بە شێوەیەکى کردەیى ببینینەوە. بۆیە، زێدەڕۆی نییە، ئەگەر بپرسین:

لە مێژووى کام نەتەوە هەیە کە بۆ نیشاندانى باوەڕداریى راستەقینەى ئایینى و خزمەتکاریى مرۆڤ، بتوانێ نموونەیەکى جوانترمان لە ( شێخ عەبدولسەلامى بارزانی) بۆ بخاتە بەردەست؟ لە مێژووى کام نەتەوە دەتوانێ نموونەیەکى بەرزتر لە نەبەزین و کۆڵنەدانى ناوچەى بارزانمان بداتێ، کە سەرەڕاى ٤٦ جار راگواستن، تەنیا لە ماوەى سەدەیەکدا و، دەیانجار سووتاندن و بۆمبارانکردن و لێدانى بەچەکى قەدەغەکراو، کەچى هێشتاش هەر کۆڵى نەداوە و نەچەمیوە؛
ئەزموونى کام نەتەوە دەتوانێ لە رۆژگارانێکى دوورەوە، نەریتى ژینگە پارێزییەکى جوانتر لە ژینگەپارێزیى بارزانمان بۆ بێنێتەوە؛
لە مێژووی کام نەتەوەدا هاتووە، بۆپیشاندانی تفاق و بەزەیی و عەدالەتی کۆمەلایەتی بتوانێ نموونەیەکی جوانترمان لە( شێخ ئەحمەدی بارزانی) بۆ بەرجەستەبکات.
لە میژووى رزگاریخوازى کام نەتەوە هەیە، کە بتوانێ خەباتکارو شۆڕشگێڕێکى وەک جەناڕالی چیاکان (بارزانى نەمرمان) بۆ وێنا بکات . رابردووى دوور و نزیکى کام نەتەوە هەیە، کە بتوانێ نموونەیەکى جوانتر لە نموونەى پێکەوەژیانى ئایینى و کۆمەڵایەتى دەڤەرى بارزانمان بۆ بنوێنێ؛

ئەمانە و دەیان نموونەى تر. بۆیە، ئێمە لەم رێگەیەوە و، بە هەڵدانەوەى ئەو لاپەڕە نەناسراوانەو، ئەو دیمەنە کەمبینراو و هەستپێکراوانە، چ لە دەڤەرى بارزان و چ لە دەڤەرەکانى دیکەى کوردستان، دەتوانن ئاسۆى روانین و رێگاکانى دەرچوونمان لە هەر قەیران و بنبەستێکى مێژوویى، رووناکتر و جوانتر بکەین.

هێژایان
کاتێک سەیرى ئەو هەموو نموونانەى سەرەوە دەکەین و دەشزانین کە رەگێکى پتەویان لە مێژوودایە، ئەوەمان پێدەڵێن، کە مێژوو تەنیا بریتى نییە لە رابردوو، بریتى نییە لە بەسەرچوون و پووکانەوە، بەڵکو بریتییە لە ئێستا و داهاتووشمان. ئەمەش پێویستى بە کارى زانستى و پشتبەستن بە پسپۆڕییە جیاوازەکانە، تا هەر یەکە و لە روانگەى خۆیەوە، تێگەیشتنێکى بابەتییانەترمان سەبارەت بە رابردووى خۆمان پێبڵێ. ئیتر لێرەوە دەتوانین ئومێدمان بەوە هەبێ، کە سبەینێمان زۆر گەشاوەتر بێ.

لە کۆتاییدا،
وێڕاى بەخێرهێنانى دووبارەى هەموو ئێوە بەرێز، زۆر بە گەرمى دەستخۆشى لە هەموو ئەو ئازیزانە دەکەم، کە بە ماندوونەناسى و دڵسۆزى خۆیان ئەم کۆربەندە بە ئەنجامگەیاند. هەروەها سوپاسى تایبەتى بەشدارانى بەڕێزى کۆربەندەکە دەکەم و، هیوادارم بەگفتوگۆی ئەکادیمی و زانستیانە، بە ئەنجامى باش و بەسوود بگەین، تا بتوانین باشتر مامەڵە لەگەڵ رابردووى خۆمان و شێوازی پەرەپێدانى ئێستامان بکەین.

دواتر دەستکرا بە پێشکەش کردنی بەرنامەکانی کۆڕبەندەکە پێکهاتبوو لە پێشکەشکردنی پانێڵێک بە بەشداری ” پ.د.ابوبەکر دێوانە حمد، د.عەبدوڵا ملا سعید، پ.د.فەرسەت مەرعی، مامۆستا ڕێکار مزوری ” کە تیایدا بە وردی شەن و کەوی قوناغەکانی بەرخودان و شۆڕشی بارزانیان و کەلتوری پێکەوەژیان و ژینگەدۆستی لە دەڤەرەکە کرا، و دوای کۆتایی هاتنی پانێڵەکە لەلایەن سەرۆکی زانکۆی پۆلیتەکنیکی هەولێر پ.د.ئیدریس محمد طاهر هەرکی و سەرپەرشتیاری ئیدارەی سەربەخۆی سۆران هەلگورد شێخ نەجیب بروانامەی رێزلێنان بە خشرایە بەشداربووانی پانێڵەک.

لە بڕگەی دووەمی کۆڕبەندەکەدا وەک رێزگرتنێک لە هەوڵ و تێکۆشان لە بواری زانستی و ئەکادیمی قەڵغانی رێزلێنان بەخشرایە کۆمەڵێک خاوەن نازناوی زانستی پرۆفیسۆر کە لەدایکبوو یاخود خەڵکی سنووری قەزای مێرگەسۆرن و کۆڕبەندەکە کۆتایی هات.

ڕۆژی چوارشەممە ڕێکەوتی 6ی ئاداری 2024،بە ئامادەبوونی پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، یەکەمین کۆربەندی پەیمانگەی تەکنیکی مێرگەسۆر لەژێر ناونیشانی “بارزان لە بەرخودان خۆنەچەماندن بۆ نیشتمانسازی ( پەروەردە و فێرکردن ژینگەپارێزی و پێکەوەژیان)” بە بەشداری هەریەک لە بەڕێزان (پ.د.ابوبەکر دێوانە حمد، د.عەبدوڵا ملا، پ.د.فەرسەت مەرعی، مامۆستا ڕێکار مزوری) بەڕێوەچوو.

کۆڕبەندەکە بە ئامادەبوونی پ.د. ئازاد حەسەن قادر یاریدەدەری سەرۆکی زانکۆ بۆ کاروباری کارگێری و دارایی، هەڵگورد شێخ نەجیب سەرپەرشتیاری ئیدارەی سەربەخۆی سۆران، غەفور احمد ملاسوار قائیمقایمی قەزای مێرگەسۆر، ژمارەیەکی بەرچاو لە بەرپرسانی حزبی و حکومی، پەیڕەوانی ئاین و ئاینزا جیاوازەکان و مامۆستایان و فەرمانبەران و قوتابیان دەستی پێکرد.

سەرەتا پ.د. ئیدریس هەرکی وتارێکی پێشکەش کرد و تیایدا بە ناوی ئەنجومەنی زانکۆی پۆلیتەکنیکی هەولێر و ئەنجومەنی پەیمانگای تەکنیکی مێرگەسۆر بەخێرهاتنی میوانان و بەشداربووانی پانێڵەکەی کرد و گوتی: ” ئەمڕۆ لێرە کۆبووینەتەوە بۆ ئەنجامدانی کۆڕبەندێکی تایبەت بە ڕۆڵ و خەبات و بەرخودانی بارزان و سەرکردەکانمان و شێخەکانی بارزان و بە تایبەتی لە بواری پەروەردە و فێرکردن و ژینگەپارێزی، بەڕێزان ئەرکی زانکۆ تەنیا پێشکەشکردنی زانست و زانیاری و ئەنجامدانی توێژینەوەی زانستی نییە بەڵکو ئەرکێکی تری گرنگتر ئەرکی زانکۆ خزمەتکردنی کۆمەڵگایە بۆ یەکسانی کۆمەڵایەتی بۆ ئابووریەکی باشتر بۆ هوشیارکردنەوەی کۆمەڵگا لە بابەتە جیاجیاکان و بە تایبەتریش لە بابەتی نەتەوایەتی”.

“ئەمڕۆ ئەو بەڕێزانەی کە لەم پانێڵە نووسەران و مامۆستایانی زانکۆ بەشدارن لەگەڵ ئێمە دەمەوێت لە سەرەتاوە زۆر سوپاسی ئامادەبوونیان بکەم و نامەوێت بچمە ناو بابەتەکانەوە بەڵام ئەوەی کە گرنگە دەمەوێت باسی بکەم ڕوونی پەروەردە و فێرکردن بە تایبەتی ڕۆڵی شێخەکانی بارزان و سەرکردەکان لە بابەتی بەر پەروەردە فێرکردن دەمەوێ هەر لە سەرەتای شۆڕشەکانی بارزان و شێخ عەبدولسەلام بارزانی کە ڕۆلێکی گرنگی تایبەتی هەبووە لە دروستکردن و ئامادەکردنی قوتابخانەکان بە تایبەتی قوتابخانە ئایینییەکان، تاوەکو ئەمڕۆ ئەم ڕێبازە بەردەوامە ئەگەر سەیر بکەین ڕۆڵی بارزانی نەمر لە دامەزراندنی یەکێتی زانایانی ئایینی ئیسلام کە ڕۆلێکی سەرەکی هەبووە و بە فەرمانی جەنابیان ئەم یەکێتییە دامەزراوە دواتریش یەکێتی مامۆستایانی کوردستان و گرنگیدا بە خوێندن و پەروەردە بە زمانی کوردی کە بارزانی نەمر گرنگییەکی تایبەتی بەو بوارەدا بوو، و لە ڕێکەوتنامەی 11ی ئازاری ساڵی 1970 تواندرا ئەم بابەتە چەسپێندرێت کە بە زمانی کوردی بخوێندرێت و دواتریش دامەزراندنی کۆڕی زانیاری کورد کە هەر لەسەر دەستی بارزانی نەمر، ئەوانە چەند نموونەیەکن لەسەر ڕۆلی شێخەکانی بارزان تایبەت بە بابەتی پەروەردە و فێرکردن.”

“خۆشحاڵین کە ئەمڕۆ پەیمانگەی تەکنیکی مێرگەسوور ڕۆڵی چەند کەسێک کە لە پلەیەکی زانستی بەرزن لە پلەی پرۆفیسۆر بەرز دەنرخێنن، کە ڕۆڵەی ئەم دەڤەرەن و لەسەر ئەم ڕێبازە خۆیان پێگەیاندووە تا گەیشتن بەم ئاست و دەرئەنجامە پێمان خۆش بوو ئەمڕۆ لە گەڵمان و رێزلێنانیان پێ ببەخشین.” ئامادە بن دووبارە بە خێراتنتان دەکەین و هیوادارم ئەم دەڤەرە هەروا بە سەر بەرزی بە سەر فرازی بمێنێتەوە دووبارە هەموو لایەک بەخێربێن زۆر سوپاس بۆ ئامادە بوونتان”.

دواتر دەستکرا بە پێشکەش کردنی بەرنامەکانی کۆڕبەندەکە پێکهاتبوو لە پێشکەشکردنی پانێڵێک بە بەشداری ” پ.د.ابوبەکر دێوانە حمد، د.عەبدوڵا ملا، پ.د.فەرسەت مەرعی، مامۆستا ڕێکار مزوری ” کە تیایدا بە وردی شەن و کەوی قوناغەکانی بەرخودان و شۆڕشی بارزانیان و کەلتوری پێکەوەژیان و ژینگەدۆستی لە دەڤەرەکە کرا، و دوای کۆتایی هاتنی پانێڵەکە لەلایەن سەرۆکی زانکۆی پۆلیتەکنیکی هەولێر پ.د.ئیدریس محمد طاهر هەرکی و سەرپەرشتیاری ئیدارەی سەربەخۆی سۆران هەلگورد شێخ نەجیب  بروانامەی رێزلێنان بە خشرایە بەشداربووانی پانێڵەکە.

لە بڕگەی دووەمی کۆڕبەندەکەدا وەک رێزگرتنێک لە هەوڵ و تێکۆشان لە بواری زانستی و ئەکادیمی قەڵغانی رێزلێنان بەخشرایە کۆمەڵێک خاوەن نازناوی زانستی پرۆفیسۆر کە لە دایکبوو یاخود خەڵکی سنووری قەزای مێرگەسۆرن و کۆڕبەندەکە کۆتایی هات.