زانکۆی پۆلیتەکنیکی هەولێر وۆرکشۆپێکی تایبەت بە بۆڵۆنا پرۆسێس و سیستەمی داتابەیسی (ECTS) بۆ مامۆستایانی پەیمانگای تەکنیکی کۆیە رێکخست.
وۆرکشۆپەکە لەلایەن لیژنەکانی بۆڵۆنا پرۆسێس و سیستەمی داتابەیسی (ECTS) لە سەرۆکایەتی زانکۆ، کە هەریەک لە پ.ی.د. بۆتان مەجید ئاسنگەر، سەرۆکی لیژنەی بۆڵۆنا، د.دلێر عبداللە ئەندامی لێژنەی بۆڵۆنا، هەروەها ئەندامی لیژنەی داتابەیسی (ECTS) م.یاسین حمید رشید، م.ی.ڕێبوار خالد حمد و م. گۆران مغدید بەڕێوەچوو کە تیایدا نوێترین پێشهات و بەرەوپێشچوونەکانی هەردوو سیستەمەکە بۆ ئامادەبووان و مامۆستایان روونکرایەوە.
لە وۆرکشۆپەکەدا سەرۆکی لێژنەی باڵای بۆڵۆنا لە زانکۆی پۆلیتەکنیکی هەولێر، پ.ی.د. بۆتان مەجید ئاسنگەر باسی لە هەنگاو و رێنماییە نوێیەکانی وەزارەتی خوێندنی باڵا و توێژینەوەی زانستی بۆ ئەمساڵی خوێندن کرد.
دواتر د.دلێر عبداللە پێداویستییەکانی سیستەمی بۆڵۆنای بۆ سەرۆک بەش و مامۆستایان روونکردەوە، هەر لە چوارچێوەی وۆرکشۆپەکەدا ئەندامی لێژنەی داتابەیس، م.ی. ڕێبوار خالد حمد باسی لە هەڵە تەکنیکییەکانی ساڵانی رابردوو کرد کە سەرۆک بەش و مامۆستایان لەناو سیستەمی داتابەیسی (ECTS) ئەنجامیان داوە، هەروەها م.یاسین حمید رشید تیشکی خستە سەر ئەو گۆڕانکاریانەی لە ڕووکار و شێوازی کارکردنی سیستەمەکەدا کراون.
دواتر م.گۆران مغدید تیشکی خستە سەر فرمانە نوێیەکانی سیستەم و باسی لە نوێترین زیادکراوەکانی ناو سیستەمەکە کرد کە بۆ ئەمساڵی خوێندن بەردەست دەبن.
