ئەمرۆ یەکشەممە رێککەوتی 2ـی شوباتی 2020 سکرتاریەتی یەکێتی قوتابیانی کوردستان رێوڕەسمی رێزلێنانی بۆ سەرۆکی زانکۆی پۆلیتەکنیکی هەولێر پ.ی.د. کاوە عبدالکریم شێروانی رێکخست.
بە ئامادەبوونی ژمارەیەک لە بەرپرسانی حزبی و حکومی و سەرۆکی زانکۆی سەڵاحەددین و راوێژکار و ئەندامی پەرلەمان ، و ژمارەیەک لە ئەندامانی ئەنجومەنی زانکۆ و سەرۆک بەش و مامۆستایانی زانکۆ لە هۆڵی شەهید مەئمون دەباغ لە سکرتاریەتی یەکێتی قوتابیانی کوردستان مەراسیمەکە بەرێوەچوو.
سەرەتا مەراسیمەکە بە دەقیقەیەک وەستان بۆ گیانی پاکی شەهیدان، لە لایەن بەرپرسی نووسینگەی زانکۆی پۆلیتەکنیکی هەولێر دەستی پێکرد، دواتر سکرتێری یەکێتی قوتابیانی کوردستان نێچیرڤان حسین کەلاری وتەیەکی پێشکەش کرد و باسی لە دەستکەوت و سەرکەوتنەکان و هاوکارییەکانی سەرۆکی زانکۆ کرد و باسی لە هۆکاری بەخشینی ئەم رێزلێنانە کرد و وتی: لە ماوەی رابردوودا پ.ی.د. کاوە شێروانی یەکێک بووە لەو سەرۆک زانکۆیانەی زۆر گرنگی بە پێشکەوتنی زانکۆکەی داوە و لە رووی زانستی و ئەکادیمیەوە تا ئاستێکی زۆر باش هەروەها بەردەوام هاوکاری قوتابیانی کردووە و بۆیە بە پێویستمان زانی ئەم مەراسیمە بۆ بەرێزیان رێکبخەین.
دواتر کورتە ڤیدیۆیەک لەسەر چیرۆکی سەرکەوتن و ژیان و لێدوانی هاوکار و هاوپیشە و کەسە نزیکەکانی د. کاوە نماییش کرا.
پاشان سەرۆکی زانکۆ وتەیەکی پێشکەش کرد و تیایدا بە خێرهاتنی بەرپرسان و هاوکاران و مامۆستایانی زانکۆی کرد، و سوپاسی سکرتاریەتی یەکێتی قوتابیانی کوردستان و نووسینگەی زانکۆی پۆلیتەکنیکی هەولێری یەکێتیەکە کرد، بۆ بەخشینی خەڵاتی رێزلێنانەکە، هەر لە وتەکەیدا باسی لە چەند وێستگەیەکی ژیانی خۆی کرد، لە کۆتاییدا سوپاسی ئامادەبووانی کرد.
لە کۆتایی مەراسیمەکەدا خەڵاتی رێزلێنانەکە لە لایەن بەرێز علی حسین ئەندامی ئەنجومەنی سەرکردایەتی پارتی دیموکراتی کوردستانەوە پێشکەش بە سەرۆکی زانکۆ پ.ی.د. کاوە عبدالکریم شێروانی کرا.
