دوای راگەیاندنی ئەنجامی هەڵسەنگاندنی زانکۆکانی کوردستان لەلایەن گۆگڵ سکۆلەر پڕۆفایل کە مانگی کانوونی دووەمی ٢٠٢٠ راگەیاندرا لە ڤێرژنی٩ پۆینت ١ بۆ سایتیەشنی زانکۆکانی جیهان لەژێر ناوی (توپ گۆگڵ سکۆلەر پرۆفایلز) زانکۆی پۆلیتەکنیکی هەولێر بووە نۆیەمین زانکۆ لەسەر ئاستی زانکۆ حکومی و تایبەتیەکانی هەرێمی کوردستان، هاوکات پلەی یەکەمیشی لەسەر ئاستی زانکۆ پۆلیتەکنیەکانی هەرێمی کوردستان بەدەستهێناوە.
رێزبەندییەکە فەرمیە و ئینتەرناشناڵە، دانپێندراوە لەسەر ئاستی جیهان و هەر زانکۆیەک سایتەیشنی لە 1000 کەمتر بێت ناوی ناچێتە لیستەکەوە، زانکۆی پۆلیتەکنیکی هەولێر بۆ ئەمساڵ پلەی هەزار و ٧١٣ بەدەستهێناوە، بەهۆیەوە پێش زۆربەی ئەو زانکۆیانە کەوتووە کە لە ساڵانی رابردوو لە پێش زانکۆی پۆلیتەکنیکی هەولێر بوون.
زانکۆی پۆلیتەکنیکی هەولێر لە ریزبەندیەکەدا نۆیەمە لەسەر ئاستی زانکۆ حکومی و ئەهلیەکانی هەرێم، هاوکات لە پلەی شەشەمە لەسەر ئاستی زانکۆ حکومیەکان و یەکەمە لەسەر ئاستی زانکۆ پۆلیتەکنیکیەکانی هەرێمی کوردستان، ئەوەش سەرکەوتنێکی گەورەیە بۆ زانکۆ بەبەراورد بە ساڵانی رابردوو پێشکەوتنی زۆری بەخۆیەوە بینیووە و گەیشتوەتە ئاستێکی باڵای زانستی و ئەکادیمی لەسەر ئاستی عیراق و هەرێمی کوردستان.
ساڵ بەساڵ زانكۆی پۆلیتەكنیكی هەولێر پێشدەکەوێت، سەبارەت بەم پێشوەچوونە پرۆفیسۆری یاریدەدەر دکتۆر کاوە شێروانی سەرۆکی زانکۆی پۆلیتەکنیکی هەولێر دەڵێت: ”ئێمە لە زانكۆی پۆلیتەكنیكی هەولێر بەهەموو توانامانەوە بە یەك تیم كار بۆپێشخستنی زانكۆ دەكەین لە رووی ئەکادیمیەوە بە ئامانجی پێگەیاندنی كادری بەتوانا لەگشت ئەو پسپۆریانەی لە زانكۆماندا هەن”.
سەرۆکی زانکۆ وتیشی: ” پیرۆزبایی لە خۆم و تەواوی ستافی زانكۆ و قوتابیان دەكەم، ئەم ئەنجامە بە هەوڵ و ماندووبوونی تەواوی مامۆستا و فەرمانبەران هاتۆتەدی و دەست خۆشییان لێدەكەم، جێگای دڵخۆشییە گەیستووین بەم ئاستە و هیوادارین بۆ ساڵانی داهاتوو بتوانین زیاتر بەرەوپێش بچین و بەهەوڵی هەموومان زانکۆمان بگەیەنینە لوتکە”.
ئەمەش لەکاتێکدایە رۆژی پێنجشەممە 9ـی کانونی دووەمی 2019 له شاری هه‌ولێر له مه‌راسیمێكدا ، ریزبەندی نیشتمانی زانکۆ حکومی و تایبەتیەکانی هەرێمی کوردستان راگەیەندرا و تیایدا زانکۆی پۆلیتەکنیکی هەولێر سەرکەوتنێکی گەورەی تۆمارکرد و لە گروپی (دی) گەیشت بە گرووپی (سی) لە گرووپەش پلەی سێیەمی گرتووە.