Category Archives: سەرۆکایەتی زانکۆ

رۆژی چوار شەممە رێکەوتی 15ـی شوباتی 2023 بە ئامادەبوونی سەرۆکی زانکۆ پ.د. ئیدریس محمدطاهر هەرکی، یاریدەدەرانی سەرۆکی زانکۆ و ژمارەیەک لە ئەندامانی ئەنجومەنی زانکۆ و بەرێوبەرانی سەرۆکایەتی زانکۆ، بەرێوبەرایەتی دڵنیایی جۆری وێرکشۆپێکی بۆ سەرۆکی بەشە زانستییەکانی گشت کۆلێژ و پەیمانگەکان لەژێر ناونیشانی (پەرەپێدانی توانا ئەکادیمی و کارگێڕییەکان) ئەنجامدا کە ئەم بابەتانەی لەخۆ گرتبوو (زمانی جەستە، جۆرێک لە سەرکردایەتی، هەڵسەنگاندنی نووسینی ئاکادیمی ،جێبەجێکردنی ڕێنماییەکانی وەزارەتی خوێندنی باڵا لە سیستەمی بۆلۆنا، رێنماییەکانی بەرزکردنەوەی نازناوی زانستی) وە بۆ ماوەی دوو رۆژ بەردەوام بوو.

لە دەستپێکی وێرکشۆپەکەدا سەرۆکی زانکۆ وتەیەکی پێشکەش کرد تیایدا بەخێرهاتنی سەرۆک بەشەکانی کرد. لە درێژەی وتەکەیدا پ.د. ئیدریس محمدطاهر هەرکی ئەنجامدانی چالاکییەکەی بە گرنگ وەسف کرد بۆ بەرزتر کردنەوەی توانای سەرۆک بەشەکان لەرووی کارگێری و زانستی و تەکنەلۆجییەوە، تاکو لە رێگەیەوە پرۆسەی خوێندن و پەروەردەکردن بگاتە ئاستێکی بەرزتر.

لە بەشێکی دیکەی وتەکەیدا سەرۆکی زانکۆ وتی: پۆستی سەرۆک بەش ئەرکێکی پیرۆز و گرنگە، هەروەها خاڵی بەیەک بەستنەوەی قوتابی و مامۆستایە و پێشکەوتنی پرۆسەی خوێندن بەندە بە کارامەیی و لێهاتووی ئەو مامۆستایەی کە لەو ئەرکەدایە، بۆیە هیوادارم ئەم وێرکشۆپە بە دەرفەتێک ببینن و زۆرترین سوودی هەبێت بۆ باشتر بەڕێوەبردنی ئەرکەکەتان.

پاشان بابەتی یەکەم لەژێر ناونیشانی (زمانی جەستە) لە لایەن د. فاضل جاف پێشکەشکرا و بەشێوەیەکی زانستی زمانی جەستە و پەیوەندی و کۆمیۆنیکەیشنە جەستەییەکان وەک جوڵە و ئاماژەکانی چاو، و هێڵەکانی دەم و چاو بەگشتی، و جوڵەی پەل و دەستەکان دەکۆڵێتەوە لە کاتی قسەکردن و گفتۆگۆ کردندا بۆ ئامادەبووان ڕوونکردەوە.

لە دوای پشوودانێکی کورت بابەتی دووەم لەژێر ناونیشانی (جۆرێک لە سەرکردایەتی) لە لایەن د. مەهدی خالد قادر پێشکەشکرا کە تیایدا بەشێوەیەکی چڕوپڕ باسی هونەری سەرکردایەتی و تایبەتمەندییەکانی سەرکردەی سەرکەوتووی کرد.
لە کۆتاییدا دەرگای گفتوگۆ کرایەوە و ئامادەبووان پرسیارەکانیان ئاراستە کرد و لە لایەن بەڕێزان د. فاضل و د. مەهدی وەڵامدرانەوە.

لە رۆژی دووەمی وێرکشۆپەکەدا سێ بابەت پێشکەش کرا کە بەشێوەیەکی زانستی و ورد هەریەک لەم بابەتانە (هەڵسەنگاندنی نووسینی ئەکادیمی) لە لایەن (پ.د.هیمداد عبدالقهار محمد)وە بابەتی دووەم بە ناونیشانی (جێبەجێکردنی ڕێنماییەکانی وەزارەتی خوێندنی باڵا لە سیستەمی بۆلۆنا (ئی.سی.تی.ئێس) لە لایەن(پ.ی.د. بۆتان مجید ئاسنگەر).
دوای پشوو بابەتێکی دیکە لەژێر ناونیشانی (ڕێنماییەکانی بەرزکردنەوەی نازناوی زانستی) لە لایەن (پ.ی.د. عەفان عثمان حسین) پێشکەش کران پاشان دەرگای گفتوگۆ کرایەوە و ئامادەبووان پرسیارەکانیان ئاراستە کرد و لە لایەن بەڕێزان د. هیمداد و د. بۆتان و د. عەفانەوە وەڵام درانەوە.

لە کۆتایی وۆرک شۆپەکە رۆژی دووەمدا بروانامەی رێزلێنان بەخشرایە پێشکەشکارەکان و سوپاسی ماندووبوونیان کرا.

وێنەکانی رۆژی یەکەم:

وێنەکانی رۆژی دووەم:

رۆژی چوار شەممە رێکەوتی 15ـی شوباتی 2023 لە هۆتێلی نێودەوڵەتی هەولێر بە ئامادەبوونی بریکاری وەزیری خوێندنی باڵا و توێژینەوەی زانستی د. عبدالفتاح عبدالرزاق، سەرۆکی ئەنجومەنی پارێزگای هەولێر د. علی رشید، جێگری پارێزگاری هەولێر مەسعود کاڕەش، ژمارەیەک لە سەرۆکی زانکۆ حکومی و ناحکومییەکان و بەرپرسی لێژنەی ناوچەی ئاسۆی پارتی دیموکراتی کوردستان لاوەند دزەیی، مەراسیمی کردنەوەی نۆهەمین کۆنفڕانسی ساڵانەى نێودەوڵەتى ئەندازیاری نێوان زانکۆی پۆلیتەکنیکی هەولێر و زانکۆی نێودەوڵەتیی تیشک بە پاڵپشتى (ئی ئی ئی تریپڵ-عێڕاق) بەرێوەچوو.

دوای گوێگرتن لە سروودی نیشتمانی عێراق و سرودی نیشتمانی کوردستان سەرۆکی زانکۆی پۆلیتەکنیکی هەولێر پ.د. ئیدریس محمد تاهیر هەرکی وتارێکی پێشکەش کرد و وتی: “میوانە بەڕێزەکان، زۆر خۆشحاڵم بە ئامادەبوونتان لە مەراسیمی نۆهەمین کۆنفڕانسی ساڵانەى نێودەوڵەتى ئەندازیاری لەژێر ناونیشانی (بەرەو ئاراستەیەکی تازە بۆ توێژینەوە و پەرەپێدان لە بواری ئەندازیاری) کە لە لایەن زانکۆی پۆلیتەکنیکی هەولێر و زانکۆی تیشکى نێودەوڵەتى و بە پاڵپشتى (ئی ئی ئی تریپڵ-عێڕاق) ئەنجام دەدرێت.

ئامادەبووانى ئازیز، ئێمە لە زانکۆی پۆلیتەکنیکى هەولێر گرنگییەکی زۆر دەدەین بە توێژینەوەی زانستی بۆ ئەو مەبەستەش کاردەکەین بۆ ئەوەی ساڵانە چەند کۆنفرانسێک ئەنجام بدەین بۆ ئەوەی مامۆستایان و توێژەرانمان بتوانن ئەنجامی توێژینەوەکانیان لەو کۆنفرانسانە پێشکەش بکەن و بڵاوی بکەنەوە خۆشبەختانە ئەمڕۆش لەگەڵ زانکۆی تیشکی نێودەوڵەتی یەکێکە لەو کۆنفرانسانە.

بەڕێزان ئەنجامدانی کۆنفرانسی زانستی چەند ئامانجێکی هەیە لەو ئەمانجانە بەیەک گەیشتنی پسپۆڕانی بوارێکی تایبەت کە بەیەکەوە توێژینەوەکانیان پێشکەش دەکەن و بیر و را دەگۆڕنەوە و لێک تێگەیشتن لە نێوانیان دروست دەبێت کە ئەوەش دەبێتە هۆی ئەوەی لە داهاتوودا توێژینەوەی هاوبەش ئەنجامبدەن و سەرپەرشتیاری قوتابیانی خوێندنی باڵا بکەن ئەمانە ئامانجی گشتی هەر کۆنفرانسێکی زانستین.

بەڕێزان بۆ ئەم کۆنفرانسەش جگە لەو ئامانجانەی باسم کرد پێویستیەکی سەردەمییە بۆ هەرێمی کوردستان بە گشتی و هەولێری پایتەخت بە تایبەت چونکە ئەمڕۆ دەبینین ئاوەدان کردنەوەیەکی بەربڵاو هەیە لە بوارەکانی بیناکاری و تەکنەلۆژیا بۆیە ئێمە وا هەست دەکەین ئەنجامدانی ئەم جۆرە کۆنفرانسانە بە تایبەتی لە بواری ئەندازیاری زۆر پێویستە، هیوادارین ئەنجامی توێژینەوەی مامۆستایانی بەشدار لە کۆنفرانس پاڵپشتییەکی دیکە بێت بۆ دەزگا پەیوەندیدارەکانی حکومەت کە بتوانن باشتر و بە تەکنیک و تەکنەلۆژیایەکی باشتر ئەو ئاوەدانیەی کە ئێستا هەیە سودی لێوەربگرن.

دووبارە دەستخۆشی لە لێژنەکانی سەرپەرشتیار و ئامادەکاری کۆنفرانس دەکەین هەروەها سوپاسی سپۆنسەرەکانی کۆنفرانس دەکەین و دووبارە بەخێربێن و زۆر سوپاس.

دواتر بریکاری وەزیری خوێندنی باڵا وتەیەکی پێشکەش کرد و وتی: کۆنفرانسە زانستیەکان لە چەندین ڕوەوە گرنگى و بایەخى خۆیان هەیە، چونکە لەگەڵ ئەوەى وێنەیەکى جوانى زانکۆکان پیشان دەدەن، لەهەمان کاتدا کاریگەرى بەرچاوى لەسەر بزاوت و چالاکى توێژینەوەى زانستى دەبێ، هەروەک ڕێگەیەکیشە بۆ کۆکردنەوەى ئەقڵەکانى کۆمەڵگە بۆ گفتوگۆکردن و خستنەڕو و دواتر چارەسەرکردنى گرفتەکانى کۆمەڵگە.

لە بەشێکى دیکەى وتارەکەیدا بریکارى وەزارەتى خوێندنى باڵا و توێژینەوەى زانستى ئاماژەى بەگرفتەکانى جیاکانى کۆمەڵگە و ئەو ئاڵنگاریانە کرد، کە ڕوبەڕوى هەرێمى کوردستان دەبنەوە، بۆ ئەوەش وتى: هەرێمەکەمان ڕوبەڕوى کۆمەڵێک گرفتى جۆراوجۆر بۆتەوە؛ لەوانە گرفتى (کارەبا، بەبیابانبون، پیسبونى ژینگە، سەرچاوەکانى ئاو، ئاوەڕۆ، ڕێگەوبان) و چەندانى دیکە، هەموو ئەمانەش لە ڕێگەى پێشنیاز و توێژینەوەى ئەندازیاران دەتوانرێ چارەسەریان بۆ بکرێ،

هەر لەو چوارچێوەیەدا ڕایگەیاند: پێویستە ئەندازیاران کەلتورێک لە کۆمەڵگە بڵاوبکەنەوە کە هاوڵاتیان و تەنانەت دامەزراوە جیاکانى حکومەتیش لەکاتى دروستکردنى خانو و باڵەخانە پشت بەو کەرەستە و پێداویستیانە ببەستن کە کەمتر لەوەرزەکان هاوڵاتیان لە ماڵەکانیان پشت بەئامێرەکانى گەرمکردنەوە و ساردکردنەوە ببەستن، هیواشى خواست لە دیزاینى خانو و باڵەخانەکاندا ئەندازیاران وردتر ڕەچاوى تایبەتمەندى شارنشینى و کەلتورى شارەکان بکەن.

شیاوی باسە ئەم کۆنفرانسە بۆ ماوەی دوو رۆژ بەردەوام دەبێت لە رۆژانی 15 و 16/2/2023، کە تیایدا لە ڕێگەى (8) پانێڵێ جیا، توێژەرانی دامەزراوە و رێکخراوی ئەکادیمی و زانکۆکانى (10) وڵاتى جیاوازی جیهان بەشدارن بە پێشکەش کردنی (53) توێژینەوەى زانستى لە بوارە جیاکانى ئەندازیارى کە گفتوگۆیان لەبارەوە دەکرێت و دوای هەڵسەنگاندن لە گۆڤارە ناوخۆیی و جیهانییەکان بڵاو دەکرێنەوە.

رۆژی دووشەمە رێکەوتی 13ـی شوباتی 2023 لە کۆلێژی تەکنەلۆجی هەولێر بە ئامادەبوونی راگری کۆلێژ پ.ی.د بۆتان مجید ئاسنگەر، بەڕێوبەری سەنتەری گەشەپێدانی کار لە سەرۆکایەتی زانکۆ مامۆستا کۆڤان عمر حسن و سەرۆکی بەشی (ئای.سی.تی. ئی) مامۆستا سالار احمد رسول، بڕوانامەی بەشداربوون لە مەشقی هاوینەی ساڵی 2022 بەخشرایە ژمارەیەک قوتابی.

مەشقەکە لە بۆ ماوەی یەک مانگ بەردەوام بوو کە تیایدا قوتابیانی بەشی ئەندازیاری تەکنەلۆژیای زانیاری و گەیاندن لە ژێر سەرپەرشتی رێکخراوی ئایرێکس مەشقەکەیان ئەنجامدابوو و لە لایەن رێکخراوی ناوبراوەوە بڕوانامەیان پێبەخشرا.

رۆژی دووشەممە رێکەوتی 13ـی شوباتی 2023 سەرۆکی زانکۆ پ.د. ئیدریس محمد تاهیر هەرکی پێشوازی لە مامۆستا دلاوەر بەڕێوەبەری ڕاهێنانی پیشەیی هەولێر و شاندی یاوەری کرد.

لە دیدارێکدا کە هەریەک لە یاریدەدەری سەرۆکی زانکۆ بۆ کاروباری زانستی و بەڕێوبەری سەنتەری گەشەپێدانی کار لە زانکۆمان ئامادەیبوون، گفتوگۆکرا دەربارەی پتەوکردنی پەیوەندیەکانی بەڕێوەبەرایەتی ناوبراو لەگەڵ سەنتەری گەشەپێدانی کاری زانکۆکەمان و کردنەوەی خولی پەرەپێدانی پیشەیی بۆ دەرچوانی زانکۆمان و ئاشناکردنی قوتابیانمان بە (یاسای خانەنشین و یاسای دەستەبەری کۆمەڵایەتی).

هەر لەو دیدارەدا بڕیاردرا لە کۆبونەوەی داهاتووی نێوان زانکۆ و بەڕێوبەرایەتی راهێنانی پیشەیی هەولێر یاداشتی لەیەکگەیشتن واژوو بکرێت لە نێوان هەردوو لا بەمەبەستی ئەنجامدانی کاری پێکەوەیی بۆ زیاتر هاوکاریکردنی دەرچووانی زانکۆی پۆلیتەکنیکی هەولێر.