Category Archives: سەرۆکایەتی زانکۆ

لە چوارچێوەی پرۆژەی کامپ پڵەسدا بەڕێوبەرایەتی پەیوەندییە نێودەوڵەتییەکانی زانکۆی پولیتەکنیکی هەولێر خولێکی راهێنان بۆ پەنابەرانی کامپەکانی شاری هەولێر و دەوروبەری(قوشتەپە، کەورگۆسک، دارەشەکران، باسرمە) بەڕێوەدەبات. دوای ئەنجامدانى پرۆسەى هەڵسەنگاندن ژمارەیەک پەنابەر و قوتابی هەڵبژێردران بۆ بەشداری کردن لەم خولە.

مەبەست لەم خولە یارمەتیدان و راهێنانى پەنابەرانە بۆ ئەوەی تێکەڵ بە کۆمەڵگە ببن تاوەکو ببنە سەرچاوەیەکی ئابووری بۆ خۆیان و کۆمەڵگەکەیان هەروەها لە خولەکەدا کار لەسەر پەرەپێدانی تواناکانى پەنابەران دەکرێت بۆ بەدەستهێنانی هەلی کار و گەشەپێدانی پرۆژەکانیان.

شايەنی باسە پڕۆژەکە لەلایەن ئیراسمەس پڵەس لە یەکێتی ئەوروپا کۆمەکی دارایی دەکرێت، کە تا کۆتایی ساڵی .2024 بەردەوام دەبێت

لە چوارچێوەی هەوڵ و هەنگاوەکانی زانکۆی پۆلیتەکنیکی هەولێر بۆ بەنێودەوڵەتیکردنی زانکۆمان بەستنەوەى زانکۆ بە کۆمەڵگە و بنیاتنانی زەمینەسازی بۆ گەنجان، بەڕێوەبەرایەتی گەشەپێدان و رەخساندنى هەلى کارى سەرۆکایەتى زانکۆکەمان بە هەمامەنگی لەگەڵ رێکخراوی خۆراکی جیهانیی (دەبڵیو. ئێف. پی) سەر بە نەتەوە یەکگرتووەکان پرۆگرامێک بۆ کەمدەرامەت و ئاوارەکانی نیشتەجێی شاری هەولێر و رادەگەیەنێت.

ئامانج لەم پڕۆگرامە یارمەتیدانى ئاوارە و کەمدەرامەتەکانى نیشتەجێی شاری هەولێرە  لە رێگەى پێشکەشکردنى خولی راهێنان و فێرکردن و رەخساندنی هەلی کار بۆیان لە بوارەکانى زمانی ئینگلیزى و تەکنۆلەژیای زانیاری و کارسازی.

ماوەی تەرخانکراو بۆ ئەم پڕۆژەیە ١٠ مانگە کە تیایدا خولی راهێنان و فێرکاری زمانی ئینگلیزى و تەکنۆلەژیای زانیاری بەشێوەى ئۆنڵاین لە چوار مانگی یەکەمی دەستپێکی پڕۆگرامەکەدا بۆ بەشداربووان دەکرێتەوە. دواى هەڵسەنگاندنى ئاستی توانستى بەشداربووان لە رێگەى تاقیکردنەوەی دیارییکردنی ئاست بۆ دوو بەش پۆلێن دەکرێن ( سەرەتایی و پێشکەتوو). هەروەها لە مانگی پێنجەمدا خولی کارسازی لە پۆل روو بەڕوو پێشکەشدەکرێت. لە ماوەى پێنج مانگی کۆتایى پڕۆگرامەکە هەوڵی رەخساندنى هەلی کار لە کەرتی تایبەت بۆ بەشداربووان دەدرێت. 

لەو پڕۆگرامەدا ١٥٠ کەس دەرفەتی وەرگرتنیان پێدەدرێت. وا باشترة كەسی بەشداربوو هەڵگری بڕوانامە بێت. نابێت کەسی بەشداربوو قوتابی بێت هەروەها تەمەنی لەنێوان ١٨-٣٥ ساڵ بێت. لە چوار مانگی یەکەمی پڕۆگرامەکەدا  بەشداربوو مانگانە ١٥٠ هەزار دیناری پێ دەرێت.

ئارەزوومەندان لەو پرۆگرامەدا، بەبووونی ئەو مەرجانەی سەرەوە دەتوانن لەم لینکەی خوارەوە خۆیان تۆمار بکەن.

لێرە کلیک بکە

بە ئامادەبوونی سەرۆکی زانکۆی پۆلیتەکنیکی هەولێر، پ.د.ئیدریس محەمەدتاهیر هەرکی، فێستیڤاڵی ریسایکلین کۆلێژی تەکنیکی کارگێڕی هەولێر بەڕێوەچوو.

لە فێستیڤاڵەکەدا کە د.نەجیب تۆما بتو، یاریدەدەری سەرۆکی زانکۆ و کاروباری زانستی و خوێندنی باڵا و د.ئازاد ئەحمەد، راگری کۆلێژی تەکنیکی کارگێڕی هەولێر و ژمارەیەک لە مامۆستایان و قوتابیان ئامادەی بوون.

فێستیڤاڵەکە لەژێر ناونیشانی دووبارە بەکارهێنانەوەی ماددەکان بۆ دووبارە ژیانەوەی زەوی بۆ ساڵی ٢٠٥٠ ئەنجامدرا و لە میانیدا سەرۆکی زانکۆی پۆلیتەکنیکی هەولێر، پ.د.ئیدریس محەمەدتاهیر هەرکی گوتارێکی پێشکەش کرد.

پ.د.ئیدریس محەمەدتاهیر هەرکی لە سەرەتای گوتارەکەیدا دەستخۆشی لە رێکخەرانی فێستیڤاڵەکە کرد کە قوتابیان پێی هەڵساون و گوتی “دەزانم تەنها ئەو کەسانە هەست بە پەرسیارییەتی دەکەن بەرامبەر بە ژینگە کە ئینتمای نیشتمانیان هەیە و خاک و وڵاتی خۆیان خۆش دەوێت، هەر بۆیە دڵخۆشم کە دەبینم قوتابیان سەرقاڵی ژینگە پارێزین”.

سەرۆکی زانکۆی پۆلیتەکنیکی هەولێر باسی مێژووی گرنگیدان بە ژینگە و سەرەتای دروست وونی رێکخراوەکانی ژینگەپارێزی دا و تیشکی خستە سەر لایەنی زانستی رایسکلین و گوتی: “ئەمڕۆ ژینگەپارێزی روانگەیەکی بەربلاوی فەلسەفی و ئابووری و سیاسی و کۆمەلایەتی و فەرهەنگی لەخۆدەگرێت و گرنگی زیاتری پێدەدرێت”.

جێی ئاماژەیە، ئەم فێستیڤاڵە لەلایەن تیمی (Glow_گلۆ) بە هاوبەشی لەگەڵ هەردوو لێژنەی قوتابیانی کۆلێژی تەکنیکی ئەندازیاری و تەکنیکی کارگێری ئەنجامدرا.

لەم فێستیڤاڵەدا کار لەسەر دۆزینەوەی ئەوکێشانە کرا کە پەیوەنییان بە ژینگەوە هەیە و دۆزینەوەی چارەسەر گونجاو، هاوکات چەندین چالاکی و بەرنامەی تایبەت پێشکەش کرا کە بووە مایەی خۆشحاڵ ئامادەبووان.

لە درێژەی کار و چالاکییەکانی بەڕێوەبەرایەتى سەنتەری گەشەپێدانی کار (سی.دی.سی.)ى سەرۆکایەتی زانکۆکەمان، خولێکی دوو مانگە بۆ ژمارەیەک لە پەنابەرانی سووری نیشتەجێی سنووری شاری هەولێر و قوتابیانی زانکۆکەمان کرایەوە.

ئەمڕۆ چوارشەممە ٢٣ى نۆڤێمبەری ٢٠٢٢، لە رێوڕەسمێکدا بە ئامادەبوونی پ.د. ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر، د.نەجیب تۆما بتو یاریدەدەری سەرۆکی زانکۆ بۆ کاروباری زانستی و خوێندنی باڵا،  م.کۆڤان عومەر بەڕێوەبەری سەنتەری گەشەپێدانی کار(سی.دی.سی.) ،بەڕێوەبەرانی دڵنیایی جۆری، کارگێڕی و دارایی سەرۆکایەتی زانکۆکەمان، ژمارەیەک لە مامۆستایان و قوتابیانى زانکۆ کۆتایی بە خولێکى (ئینتێرنشیپ) هێنرا.

بەڕێوەبەری سەنتەری گەشەپێدانی کار م.کۆڤان عومەر لە گوتەیەکدا سەرەتا بەخێرهاتنی ئامادەبووانى کرد، دواتر باسی لە کار و چالاکییەکانی سەنتەرەکەیانی کرد و ئەو پرۆژانەی کە لە پڕۆگرامی کارەکانى داهاتوویاندایە خستەڕوو.

پاشان پ.د. ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر لە گوتەیەکدا پیرۆزبایی لە بەشداربووانى خولەکە کرد ودەستخۆشی لە بەڕێوەبەرایەتی پەیوەندییە نێودەوڵەتییەکان و سەنتەری گەشەپێدانی کارى سەرۆکایەتی زانکۆمان کرد بۆ کۆشش و ماندووبوونیان بۆ بەرەوپێشبردنى زانکۆکەمان.  

سەرۆکى زانکۆ پ.د. ئیدریس محەمەد تاهیر هەرکی ووتى”سەرۆکایەتى زانکۆی پۆلیتەکنیکی هەولێر بە هەماهەنگی و هاوکاری ستافی ئەکادیمى و کارگێڕی زانکۆکەمان تیشکى خستۆتە سەر بەستەوەى زانکۆ بە کۆمەڵگە. ئەم جۆرە خولانە لە چوارچێوەی ئەم هەنگاوانەن بۆ بەرەوپێشبردن و گەسەندنى تاکەکانى ووڵاتەکەمان”. هاوکات رایگەیاند، بەردەوام دەبن لە هەنگاوەکانیان بۆ کردنەوەی خولی هاوشێوە تاوەکو لەو رێگەیەوە بەشداربووان بتوانن دەرفەتی زیاتری هەلی کاریان بۆ بڕەخسێت.

شایەنى باسە لە خولەکەدا١١٠ کەس بەشداربوون، بە هەماهەنگی و کۆمەکی دارایی ڕێکخراوى سپارکی نێودەوڵەتی هۆلەندی  لە رێگای وەزارەتی دەرەوەی هۆلەندا لە ماوەی دوو مانگدا لە هەریەک لە بوارەکانی زمانی ئینگلیزی، بزنس و مارکێتینگ مەشقیان پێکرا.

 لە کۆتایى ئەم بۆنەیە، دەرچووان بڕوانامەی باوەڕپێکراوی رێکخراوی سپاڕکی نێودەوڵتى هۆلەندی و زانکۆی پۆلیتەکنیکی هەولێریان پێ بەخشرا کە پاڵنەر و هۆکارن بۆ زیاتر رەخساندنی هەلی کار لە کەرتی تایبەتدا.