بە مەبەستی پتەوکردنی پەیوەندییە ئەکادیمی و کولتوورییەکان و هەماهەنگی زانکۆ لەگەڵ کەرتی تایبەت و دۆزینەوەی هەلی کار بۆ دەرچووانی زانکۆ پۆلیتەکنیکییەکان وە هەروەها لە نزیکەوە ئاگادار بوون لە سیستەمی خوێندنی پیشەیی بۆ ئاگاداربوون لە پێشکەوتنەکانی وڵاتی چین لەو بوارەدا، پ.ی.د.یونیس خالد خۆشناو وەک نوێنەری زانکۆی پۆلیتەکنیکی هەولێر بە هاوڕێیەتی نوێنەرانی زانکۆ پۆلیتەکنیکییەکانی کوردستان بۆ ماوەی چواردە ڕۆژ لە چین دەبن کە لە 10 ی نیسان تاکو 24ی نیسان نوێنەری هەر پێنج زانکۆ پۆلی تەکنیکییەکانی کوردستان لەو وڵاتە دەمێننەوە.
لەو سەردانەدا نوێنەری زانکۆ پۆلیتەکنیکییەکانی هەرێمی کوردستان، بەشداری لە چەندین سیمیناردا دەکەن وسەردانی چەند کۆلێژ و زانکۆیەکی ئەو وڵاتە دەکەن لەگەڵ سەردانی چەند کارگەیەکی پێشکەوتوو بۆ وەرگرتنی ئەزموونی وڵاتی چین و ئاگاداربوون لە چۆنییەتی پێکەوە گرێدانی کەرتی تایبەت و خوێندنی پیشەیی.
ئەم سەردانە بە هەماهەنگی وەزارەتی خوێندنی باڵاو توێژنەوەی زانستی و کۆنسوڵخانەی چین لە هەولێر و وەزارەتی بازرگانی چین ڕێکخراوە بە مەبەستی پتەوکردنی هەماهەنگی لەگەڵ زانکۆی پۆلیتەکنیکی نینگبۆ لە شاری نینگبۆ وە زانکۆی ئیڕۆنیوتیکی فڕۆکەوانی لە شاری چەندوو لە وڵاتی چین بۆ پتەوکردنی پەیوەندی ئەکادیمی و پیشەیی و کەلتوری بە ناونیشانی: (Seminar for Vocational Education Teachers in Developing Countries 2024) شیاوی باسە شاندی زانکۆکانی کوردستان لە لایەن سەرۆکی زانکۆی پۆلیتەکنیکی نینگبۆ پێشوازییان لێ کرا.
