Blog

رۆژی پێنج شەممە رێکەوتی 19ـی کانونی دووەمی 2023 بە ئامادەبوونی بریکاری وەزارەتی خوێندنی باڵا و توێژینەوەی زانستی د. عبدالفتاح عبدالرزاق، سەرۆکی زانکۆی پۆلیتەکنیکی هەولێر پ.د. ئیدریس محمد تاهیر هەرکی بڕوانامە و مەدالیای رێزلێنانی بەخشییە هەڵگرانی نازناوی زانستی پرۆفیسۆر و پرۆفیسۆرە یاریدەدەری سەر بە میلاکی کۆلێژ و پەیمانگە تەکنیکییەکانی زانکۆمان.

لە مەراسیمەکەدا هەریەک لە راوێژکاری وەزیری خوێندنی باڵاو توێژینەوەی زانستی د. ئەمیر چالی، راوێژکاری وەزیری ئەوقاف و کاروباری ئاینی د.دیار جەباری، بەرپرسی لێژنەی ناوچەی ئاسۆ کاک لاوەند دزەیی، بەرپرسی ناوچەی ئایندە کاک ئەمین لاجانی، ژمارەیەک لە راگری کۆلێژ و پەیمانگەتەکنیکییەکان و مامۆستایانی زانکۆ ئامادەبوون.

لەسەرەتای مەراسیمەکەدا سەرۆکی زانکۆ پ.د. ئیدریس هەرکی وتەیەکی پێشکەش کرد و تیایدا بەخێرهاتنی میوانان و مامۆستایان و ئامادەبووانی کرد، هەروەها پیرۆزبایی لە هەڵگرانی نازناوی زانستی پرۆفیسۆر و پرۆفیسۆرە یاریدەدەرەکان کرد بەبۆنەی بەرزکردنەوەی پلەی زانستییان و وتی: “بەرێزان ئەو رێزلێنانە تەنها بریتی نیە لە مەدالیایەک یاخود بڕوانامەیەک بەڵکو رێزلێنانە لە شەونخونی بەرێزتان و لەو توێژینەوانەی بڵاوتان کردووەتەوە، رێزلێنانە لەو هەموو خزمەتەی زانکۆیی کە کردووتانە کە بەهۆیەوە گەیشتوون بەم رۆژە و بەخۆشحاڵییەوە زێزتان لێدەنرێت.

لە بەشێکی دیکەی وتەکەیدا سەرۆکی زانکۆ وتی: دەمانەوێت لە زانکۆی پۆلیتەکنیکی هەولێر زیاتر پەرە بە پلەی زانستی بدەین و ژمارەی پرۆفیسۆر و پرۆفیسۆری یاریدەدەر بگاتە ئاستێکی دڵخۆشکەر، ئەوەی ئێستا هەیە هەم لە ژمارەی مامۆستا و هەم لە ژمارەی ئەو بەرێزانەی کە پلەی زانستییان پرۆفیسۆر و پرۆفیسۆری یاریدەدەرە لەچاو ناوی گەورەی زانکۆی پۆلیتەکنیکی هەولێر لە ئاستی پێویستدا نیە، بۆیە ئێمە هیوادارین کە بەرێزتان هەوڵبدەن توێژینەوەی زیاتر ئەنجامبدەن، ئەوانەی نەگەیشتوونەتە ئاستی پلەکەی ئێوە بەتایبەتی مامۆستا و مامۆستای یاریدەدر دەستیان بگرن و هانیان بدەن بۆ ئەوەی ئەوانیش بتوانن ئەو پلە زانستییە بەدەست بهێنن.

لەکۆتاییدا دووبارە پیرۆزباییتان لێدەکەم و بەڵێنتان پێدەدەم کە ئێمە بەردەوام دەبین لەسەر هاندان و پشتگیری کردنتان بۆ ئەوەی زانکۆی پۆلیتەکنیکی هەولێریش وەک زانکۆکانی دیکەی عێراق و کوردستان بگاتە ئاستێکی زۆر بەرزتر”.
پاشان دەستکرا بە دابەشکردنی خەڵاتەکان لە لایەن سەرۆکی زانکۆ و میوانان و راگری کۆلێژ و پەیمانگە تەکنیکییەکانەوە.

پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی ھەولێر بەیاوەری شاندێکی نەنجوومەنی زانکۆکانی جیھان کە پێکھاتبوو لە د. ئۆرھان حیکمەت عەزیز ئۆغلۆ سەرۆکی ئەنجوومەنی زانکۆ نیودەوڵەتییەکان و د.کامەران یونس محەمەد ئەمین سەرۆکی زانکۆی سەڵاحەددین و د.نورەدین ئیسماعیل سەرۆکی زانکۆی ھەولێری پزیشکی و د.شیروان شەریف قرتاس سەرۆکی زانکۆی سۆران و د.ئەحمەد دزەیی سەرۆکی زانکۆی بەیان سەردانی سەرۆک مەسعود بارزانی-یان کرد.

لە دیدارەکەدا شاندی میوان کورتەیەکیان لە بارەی بارودۆخی زانکۆ و ناوەندە ئاکادیمییەکان و ئاستی گەشەی زانستی لە هەرێم خستەڕوو. هەروەها پێزانییان بۆ پەرۆشیی سەرۆک بارزانی هەبوو کە لە سی ساڵی رابردوودا هەمیشە پشتیوانی زانکۆ و ناوەندە ئاکادیمییەکانی هەرێمی کوردستان بووە.

هەر لەو کۆبوونەوەیەدا بیروڕا لەبارەی ڕۆڵی زانکۆ و ناوەندە زانستییەکان لە پێشخستنی ڕەھەندە جۆراوجۆرەکانی کۆمەڵگەی کوردستانی و بەرزکردنەوەی ئاستی تێگەیشتن و پێگەیاندنی تاک ئاڵوگۆڕ کرا.

رۆژی پێنج شەممە رێکەوتی 19ـی کانونی دووەمی 2023 لە هۆڵی کۆبوونەوەکانی سەرۆکایەتی زانکۆ بە ئامادەبوونییاریدەدەرانی سەرۆکی زانکۆ بۆ کاروباری زانستی و قوتابیان، بڕوانامەی بەشداربوونی بەخشرایە ژمارەیەک قوتابی کە بەشداربوون لە سێ پرۆگرامی نێودەوڵەتی.

لەچوارچێوەی ستراتیژیەتی بە نێودەوڵەتی کردنی زانکۆی پۆلیتەکنیکی هەولێر پۆلێک لە قوتابیانمان بەشداربوون لە پرۆگرامەکانی:

خولێکی هاوینە لە وڵاتی پۆڵەندا کە 13 قوتابی بۆ ماوەی سێ هەفتە بە شێوەی ئۆنلاین و هەفتەیەک لە زانکۆی ڤۆرسلۆڤ بۆ زانست و تەکنەلۆژیا مەشقیان ئەنجام دا.

ئەمەش بووەهۆی ئەوەی کە زانکۆمان یاداشتێکی لێکتێگەیشتن واژوو بکات لەگەڵ زانکۆی ڤۆرسلۆڤ بۆ زانست و تەکنەلۆژیا بۆ بەردەوام بوونی هەماهەنگی نێوان زانکۆی پۆلیتەکنیکی هەولێر و زانکۆی ناوبراو.

بەشداریکردنی 7 قوتابی لە پرۆگرامی ئاڵوگۆڕی کەلتوری لە زانکۆی کوالالامپور لە وڵاتی زالیزیا بۆ ماوەی یەک هەفتە، ئەمەش لە چوارچێوەی رێکەوتننامەی زانکۆمان لەگەڵ یەکێتی زانکۆکانی عەرەبی بۆ مەشق و راهێنانی قوتابییان بەڕێوەچوو، پرۆگرامەکە لە ساڵانی داهاتووشدا بەردەوامی دەبێت.

بەشداریکردنی 42 قوتابی بە سێ گروپی جیاواز لە پرۆگرامی

Global Solutions Sustainability Challenge

بە هاریکاری رێکخراوی ئایرێکسی ئەمریکی و هاوبەشی سێ کۆلێژی جیا لە ئەمریکا بە مەبەستی چارەسەرکردنی کێشە سەردەمییەکان بەشێوەی ئۆنلاین بۆ ماوەی 8 هەفتە بەردەوام بوو بەسەرپەرشتی مامۆستایان ( بەرپرسی هۆبەی پەیوەندییە رۆشنبیرییەکان لە سەرۆکایەتی زانکۆ پ.ی.د. عبدالله عمر یاسین، سەرۆکی بەشی تەکنەلۆژیای نەوت کارپێکردن و کۆنترۆڵ لە پەیمانگەی تەکنیکی کۆیە د. رەوشەن عثمان علی، بڕیاردەری بەشی شیکاریی نەخۆشییەکان لە کۆلێژی تەکنیکی تەندروستی و پزیشکی هەولێر م. هەورۆ دلاوەر).

رۆژی سێ شەممە رێکەوتی 17ـی کانونی دووەمی 2023 مەراسیمی دەستپێکردنی خولی راهێنانی تایبەت بە پەرەپێدانی میراتی کلتوری قەڵای هەولێر بە ئامادەبوونی نوێنەرانی زانکۆی پۆلیتەکنیکی هەولێر و هاوبەشانی پرۆژەکە کە پێکهاتوون لە رێکخراوی یونسکۆ و دەزگای (ئای.ئێڵ.ئۆ)بەڕێوەچوو.

ئەم پرۆژەیە تایبەتە بە گەنجانی پەنابەر و گەنجانی کوردستان بۆ پەرەپێدانی مرۆیی، کە لە لایەن یەکێتی ئەوروپاوە کۆمەکی دارایی دەکرێت بە سەرپەرشتی رێکخراوی یونسکۆ و دەزگای (ئای.ئێڵ.ئۆ) و لە لایەن مامۆستایانی زانکۆی پۆلیتەکنیکی هەولێر خولەکە بەڕێوەدەچێت.

خولەکە بە بەشداری زیاتر لە 40 کەس بە دوو گرووپ بەڕێوەدەچێت لە لایەن مامۆستایانی زانکۆی پۆلیتەکنیکی هەولێر د. عفاف یوسف نوری و مامۆستا سۆران خۆرانی-یەوە سەرپەرشتی دەکرێت کە بۆ ماوەی 20 رۆژ بەردەوام دەبێت و لە کۆتایی خولەکەشدا بروانەمە دەبەخشرێتە بەشداربووان کە لە لایەن زانکۆی پۆلیتەکنیکی هەولێرەوە پەسەند کراوە.