Blog

بە بۆنەی رۆژی جیهانی ئیفلیجی مێشک
(Cerebral Palsy day)
بەشی چارەسەری سروشتی لە کۆلێژی تەکنیکی تەندروستی و پزیشکی هەولێر بە هەماهەنگی لەگەڵ سەنتەری ئایلان هەڵسان بە ئەنجامدانی چەند چالاکییەک لە سەنتەری شاری هەولێر.

چالاکی یەکەم بریتی بوو لە پێشاندن و روونکردنەوەی کاریگەری چارەسەری سروشتی لەسەر چەند منداڵێکی تووشبوو بە ئیفیلیجی مێشک کە تیایدا رۆڵی چارەسەری سروشتی لە باشتربوونی بارودۆخی تەندروستییان بۆ دەزگاکانی راگەیاندن بەشێوەیەکی پراکتیکی روونکرایەوە.

لە چالاکیەکی دیکەدا قوتابیانی قۆناغی چوارەمی بەشی چارەسەری سروشتی لە کۆلێژی ناوبراو بەسەرپەرشتی سەرۆکی بەش د. مهدی خالد قادر سەردانی باغی شار و بازاری قەیسەریان کرد و ژمارەیەکی زۆر لە بڕۆشەری وشیارکردنەوە و رۆشنبیری سەبارەت بە رۆڵی چارەسەری سروشتی لە باشترکردنی بارودۆخی تووشبووانی نەخۆشی ئیفلیجی مێشک بەسەر هاونیشتمانیان و دوکاندار و کاسبکاران دابەشکرا.

شیاوی باسە ساڵانە لەم رۆژەدا بەشی چارەسەری سروشتی لە کۆلێژی تەکنیکی تەندروستی و پزیشکی هەولێر چالاکی هاوشێوە لە چەند شوێنێکی دیاریکراو لە بازاڕ و شوێنە گشتییەکان ئەنجامدەدەن بە مەبەستی زیاتر خزمەتکردن و وشیارکردنەوەی کۆمەڵگە لە نەخۆشییەکە و چۆنیەتی هاوکاریکردنی تووشبووان.

رۆژی دووشەممەر رێکەوتی 10ـی ئۆکتۆبەری 2022 سەرۆکی زانکۆی پۆلیتەکنیکی هەولێر پ.د. ئیدریس محمدطاهر هەرکی پێشوازی کرد لە سەرۆکی زانکۆی نۆڵج پ.ی.د. کیهان زرار غفور و شاندی یاوەری.

لە کۆبوونەوەیەکدا گفتوگۆ کرا دەربارەی دروستکردنی پەیوەندی زانستی لە نێوان هەردوو زانکۆ و ئەنجامدانی چالاکی هاوبەش هەروەها هاندانی دەرچووانی پەیمانگە تەکنیکییەکانی سەر بەزانکۆی پۆلیتەکنیکی هەولێر بەمەبەستی درێژەدان بە خوێندن لە زانکۆی نۆڵج.

هەر لەو کۆبوونەوەیەدا یاداشتێکی لێکتێگەیشتن لە لایەن بەڕێزان سەرۆکی هەردوو زانکۆ واژووی لەسەر کرا کە خۆی لە چەند خاڵێکی گرنگ دەبینێتەوە وەک:

یەکەم/ زانکۆی نۆڵج و زانکۆی پۆلیتەکنیی هەولێر هەماهەنگی دەکەن بۆ ئەنجامدانی چالاکی هاوبەش لەشێوەی سیمینار وۆرکشۆپ وسیمپۆزیۆم وکۆنفرانسی زانستی.

دووەم/ هەردوو لا هەماهەنگی دەکەن لەبواری تایبەت بە پرۆگرامەکانی خوێندن و میکانیزمەکانی جێبەجێکردنی پێواژۆی بۆڵۆنا لە بەشە زانستیەکاندا.

سێیەم/ دەرچوانی زانکۆی پۆلیتەکنیی هەولێر ئەگەر خوازیاربن لە کۆلێژ و بەشەکانی زانکۆی نۆڵج درێژە بە خوێندن بدەن، ساڵانە بەرێژەی15% داشکاندنیان بۆ دەکرێت ئەگەر دەرچووەکە سێیەمی سەرئاستی بەش بوو ئەوا سوودمەند دەبێت لە داشکاندنەکە بە ڕێژەی 25% لە هەموو ساڵەکانی خوێندن بەشەکە.

چوارەم/ دەرچوانی زانکۆی پۆلیتەکنیکی هەولێر جگە لەم داشکاندنە سوود لەو داشکاندنانەش وەردەگرن کە ساڵانە حکومەتی هەرێم یان زانکۆی نۆڵج یان هەرلایەنێکی دیکەی پەیوەندیدار دەریان دەکەن.

پێنجەم/ قوتاپی سوودمەند لەم داشکاندنە بۆ هەر قۆناغێک تەنها یەک جار سوودمەند دەبێت ، واتە ئەگەر قوتابیەک ساڵێک بە هەرهۆکارێک بە کەوتوو هەژمارکرا ، بۆساڵی داهاتوولە هەمان قۆناغ دووبارە سوود لە داشکاندنەکە وەرناگرێت.

شەشەم/ دەرچووی زانکۆی پۆلیتەکنیکی هەولێر بۆئەوەی سوود مەند بێت لەم داشکاندنە پێویستە لەکاتی وەرگرتنی فۆرم ، نووسراوی پشتگیری زانکۆی پۆلیتەکنیکی هەولێر پێشکەش بە زانکۆی نۆڵج بکات.

حەوتەم/ ئەم یاداشتی لێکتێگەیشتنە بۆ دوو ساڵی خوێندن 2023-2022 و 2024-2023 کاری پێدەکرێت لە حاڵەتی ڕەزامەندی هەردوو لایەن دەکرێت بۆ ساڵانی ئایندە لێکتێگەیشتنەکە هەموار و نوێبکرێتەوە.

رۆژی دووشەممە رێکەوتی 10ـی ئۆکتۆبەری 2022 لە هۆڵی کۆبوونەوەکانی سەرۆکایەتی زانکۆ بە ئامادەبوونی سەرۆکی زانکۆ پ.د. ئیدریس محمدطاهر هەرکی و پ.ی.د. ژاڵە بەڕێوبەری گشتی لە وەزارەتی خوێندنی باڵا و توێژینەوەی زانستی و شاندی یاوەری مەراسیمی بەخشینی بڕوانامە بە دەرچووانی خولی پێنجەمی پێداگۆجی لە سەنتەری پێداگۆجی زانکۆمان بەڕێوەچوو.

لە سەرەتای مەراسیمەکەدا سەرۆکی زانکۆ بەخێرهاتنی شاندی وەزارەتی خوێندنی باڵا و توێژینەوەی زانستی، میوانان و بەشداربووانی خولەکەی کرد و پیرۆزبایی لە مامۆستایانی سەرپەرشتیار و بەشداربووانی خولی پێنجەمی پێداگۆجی کرد و هیوای سەرکەوتنی بۆ خواستن.

لە بەشێکی دیکەی وتەکەیدا د. ئیدریس ئاماژەی بە گرنگی رۆڵی مامۆستایان کرد کە کۆڵەکەی سەرەکی زانکۆکانن و ئەرکێکی گرنگ و قورسیان لەسەرە لە پێگەیاندنی نەوەکانی دوارۆژ هەر بۆیە زانکۆکان بەردەوام پێویستیان بە پێگەیاندنی مامۆستای نوێیە تاکو پرۆسەی خوێندن بەشێوەیەکی دروست بەردەوامی هەبێت، هەر لەبەر ئەم هۆکارەشە کە خولەکانی پێداگۆجی پێویستییەکی گرنگی سەردەمیانەن لە دروستکردنی مامۆستای ئاست بەرز بۆ خزمەتکردن و پێگەیاندنی نەوەکانی داهاتووی کوردستان، دووبارە پیرۆزبایی لە سەرپەرشتیاران و دەرچووانی خولەکە کرد و هیوای سەرکەوتنی بۆ خواستن.

پاشان نوێنەری وەزارەتی خوێندنی باڵا و توێژینەوەی زانستی د. ژاڵە وتەیەکی پێشکەش کرد و تیادا سوپاسی سەرۆکی زانکۆی کرد بۆ بانگهێشت کردنیان بۆ ئەم مەراسیمە هەروەها دەستخۆشی لە سەرپەرشتیارانی خولی پێنجەمی پێداگۆجی کرد و باسی لەگرنگی گەشەپێدانی بەردەوام و پێگەیاندنی زانستی کرد لەڕێگەی بنیاتنانی ستافە زانستی و ئەکادیمیەکان لە دامەزراوەکانی خوێندنی باڵا و ئاماژەی بە چەند خاڵێکی گرنگ دا ئەویش بە پێگەیاندنی مامۆستای زانکۆ دەستپێدەکات چونکە مامۆستا زنجیرەی سەرەکیە لە نێوان قوتابی و زانیاری ئەکادیمی بۆ ئەو مەبەستەش مامۆستا پێویستی بە ئامادەکاری و پەرەپێدانی زانستی هەیە تاکو ببێتە کەسێکی بەرهەمهێنەر و سودبەخش بۆ رۆڵەکانی نیشتمان بە پلەی یەکەم، کەواتە پێداگۆجی دەبێتە هۆکارێکی بەهێزکردنی ناسنامەی نەتەوەیی و نیشتمانی، هەروەها پێداگۆجی رۆڵێکی سەرەکی هەیە لە دروستکردنی مامۆستای توێژەر نەک مامۆستا بەتەنها یان توێژەر بەتەنها، مامۆستای توێژەر دەستپێشخەر و نوێخوازە و کۆڵنادات بەرامبەر ئاڵنگارییەکان.

شیاوی باسە خولی پێنجەمی پێداگۆجی لە 2/2/2022 دەستی پێکرد تاکو 31/7/2022 کە تیایدا 35 هەڵگری بڕوانامەی ماستەر و دکتۆرا بەشداربوون کە لە لایەن 9 مامۆستای سەرپەرشتیارەوە خولەکە دەوترایەوە.

رۆژی دووشەممە رێکەوتی 10ـی ئۆکتۆبەری 2022 بە ئامادەبوونی سەرۆکی زانکۆ پ.د. ئیدریس محمدطاهر هەرکی و یاریدەدەری سەرۆکی زانکۆ بۆ کاروباری زانستی و ژمارەیەک لە بەڕێوبەرانی سەرۆکایەتی زانکۆ، بەڕێوبەرایەتی تۆماری گشتی وێرکشۆپێکی تایبەت بە ئەلیکترۆنی کردنی تۆماری قوتابییان لە کۆلێژ و پەیمانگە تەکنیکییەکان بەڕێوەبرد.

وێرکشۆپەکە لە لایەن م. شیلان مامۆستا لە کۆلێژی تەکنیکی ئەندازیاری هەولێر پێشکەش کرا، تیایدا بەوردی باسی لە داتابەیسی تایبەت بە ئەلیکترۆنی کردنی تۆماری کۆلێژ و پەیمانگەکان کرد و چۆنیەتی زیادکردنی داتا و زانیارییەکانی بۆ ئامادەبووان روونکردەوە.

شیاوی باسە ئەم داتابەیسە لە لایەن مامۆستای ناوبراوەوە دروست کراوە کە بەهۆیەوە یەکەی تۆماری کۆلێژ و پەیمانگەکان دەتوانن بەشێویەکی سەردەمییانە زانیارییەکانی تایبەت بە قوتابییانی زانکۆمان هەڵبگرن و نوێی بکەنەوە.