Blog

رۆژی دووشەممە 22ی کانوونی دووەمی 2024، بە ئامادەبوونی پ.د. عەبدولفەتاح عەبدولرەزاق بریکاری وەزارەتی خوێندنی باڵا و توێژینەوەی زانستی و بەرپرسی لێژنەی ناوچەی ئاسۆی (پ.د.ک) و ژمارەیەکی بەرچاو لە مامۆستایان و فەرمانبەران، مەراسیمی ماڵئاوایی لە یاریدەدەرانی سەرۆکی زانکۆ و ژمارەیەک راگر بەڕێوەچوو.

لە سەرەتای مەراسیمەکەدا پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر وتەیەکی پێشکەش کرد تیایدا بەخێرهاتنی میوانەکانی کرد و گوتی:

“بەڕێزان ئەمڕۆ لێرە کۆبووینەتەوە بۆ ئەوەی ڕێز لە کۆمەڵێک مامۆستا بگرین کە ماوەیەکە لە زانکۆی پۆلیتەکنیکی هەولێر لە پلە و پۆستی جیاجیا خزمەت دەکەن لە یاریدەدەری سەرۆکی زانکۆ، لە ڕاگر، لە بەرێوەبەری سەنتەری توێژینەوەی زانستی، لەبەرێوەبەری تۆماری گشتی زانکۆ خزمەتی زۆری زانکۆیان کردووە، ئێمە دەزانین ئیدارە و پۆست بەتایبەتی لەو کاتەی ئەوان پلە و پۆستیان تێدا وەرگرتووە کارێکی ئەستەم و زۆر زەحمەت بوو هەر لە قەیرانی ئابووری، شەڕی داعش، پەتای کۆرۆنا، کە هەمووی بەربەست بوونە لەبەردەم کارەکانی ئەو بەڕێزانە، لەگەڵ هەموو ئەو قەیرانانە بەڵام هەر بەردەوام بوون و کۆلیان نەداو هەوڵێکی زۆریان دا تا بەو ڕۆژەیان گەیاند، دەبێت ئەو خزمەتە پڕ زەحمەتیەی ئەوانمان لەبەرچاوبێت کە کێشاویانە، بەگەرما و بەسەرما، بەهەموو گلەییەکانی مامۆستایان و فەرمانبەرانیان، ‌کە ئێمە دەزانین شەو و ڕۆژ کاریان کردووە و کە حەقیان بوو مامۆستا و فەرمانبەران ئەو  گلەییە بکەن، بەڵام بە پلەی یەکەم ئەو بەڕێزانە بوون کە بەرگەیان گرتووە و توانیویانە سەرکەوتوانە ئیش و کارەکانیان ڕاپەرێنن و تا بەو ڕۆژەیان گەیاندووە”.

هەروەها لە بارەی گۆڕانکارییەوە سەرۆکی زانکۆ ئاماژەی بەوەدا کە ، “بابەتی گۆرانکاری بابەتێکە هەر لە دوای پێکهێنانی حکومەتی هەرێم هەر لەکابینەی یەکەمەوە تا بەمڕۆ دەگات ئێمە لە هەرێمی کوردستان ‌سوپاس بۆخوا فێری ئەوەبووین کە هەموو پلە و پۆستێک دەستا و دەست دەکرێت و هیچ پۆستێک تا کۆتایی بۆ کەسێک نامێنێتەوە، ئەوەی بینیمان لە سەرۆکی هەرێمەوە تا ڕاگرو سەرۆک بەشێک، چۆن بەجوانی فێری ئەو دابونەریتە بووین کە بتوانین بەو شێوەیە  ئیدارەی دام و دەزگاکانی حکومەتی هەرێم بدەین، ئەمە هەنگاوێکی زۆر جوانە کە لە دوای ڕاپەرینەوە توانیومانە ئەو کارە جوانە ببینین بەچاوی خۆمان، هەموومان خەباتمان لەپێناوی ئەو کارە کردووە کە کارێکی دیموکراسیە، بۆیە دەبێت ئەو گۆرانکارییانە بەدڵێکی فراوان وەربگرین بۆ ئەوەی بتوانین بوار بەخەڵکانی تریش بدەین تا ئەوانیش خۆیان ئەزموون بکەن و بزانن لە کوێ دەتوانن کاری باشتر بکەن، گومان لەوەشدا نییە کە زانکۆی پۆلیتەکنیکی هەولێر زۆر پێویستی بەو بەڕێزانە هەیە کە شارەزاییەکی باشیان پەیداکردووە لەبابەتە کارگێڕییەکان، وە زانکۆی پۆلیتەکنیکی هەولێر کە هەموومان دەزانین پێویستی زیاتری بەمامۆستا هەیە، بۆیە بەدڵنیاییەوە پێویستی بەشارەزایی ئەو مامۆستا بەڕێزانە هەیە، لەمەدواش دەبێت یارمەتیدەرو هاوکاربن لەگەڵ ئەو بەڕێزانەی تازە دەست بەکاردەبن لەزانکۆ و ئەنجومەنی زانکۆ.

بەڕێزان ئێمە وەک مامۆستای زانکۆ دەبێت شانازی بە مامۆستایەتی خۆمانەوە بکەین، پلەی هەرە بەرزی ناو کۆمەڵگا مامۆستای زانکۆیە، ئەوەنییە یەکێک ببێتە سەرۆک زانکۆ ئەوە پلە هەرە بەرزەکەیە یان ڕاگرو یان یاریدەدەری سەرۆک زانکۆ، ئەوە پلە بەرزەکە نییە، بەڵکو پلە بەرزەکە ئەوەیە کە مامۆستای زانکۆیە، بۆیە هەموومان شانازی بەخۆمانەوە دەکەین کە مامۆستای زانکۆین یەکەمجار، دەبێت‌ ئەوەمان لەپێش چاوبێت، تەماشا دەکەین لەوڵاتە پێشکەوتووەکان بەتایبەتی لەوڵاتە یەکگرتووەکانی ئەمەریکا لەماوەی تەواوبوونی دەسەڵاتی سەرۆکی ئەو وڵاتە سەیردەکەین بەدوای کارێکدا دەگەڕێت کە ماوەی سەرۆکایەتی کۆتایی هات، باشترین کار کە بیدۆزێتەوە ئەوەی لە یەکێک لە زانکۆکان دەبێتە مامۆستا تا وانە بڵێتەوە، کەواتە مامۆستایەتی هاوشانی ئەو کەسەیە کە دەبێتە سەرۆکی ئەمەریکا، بۆیە هیوادەخوازین ئەو بەڕێزانە ئەو گۆرانکاریانە بەدڵێکی فراوان وەربگرن و خۆیان بەمامۆستایەکی سەرکەوتوو بزانن و لەبوارەکەی خۆیاندا بتوانن زیاتر خزمەتی ئەو وڵات و ئەو زانکۆیە بکەن، هیوادارین تەمەنێکی درێژ و بە تەندروستیەکی باشەوە بتوانن بەردەوام بن لەسەر کارەکانیان، خۆشحاڵین کە ئەمڕۆ ڕێز لەماندوبونی ئەو بەڕێزانە دەگرین بۆیە مەراسیمێکی شایستەمان سازکرد بۆیان”.

دواتر دەستکرا بە بەخشینی پلاکێتی تایبەت بە رێزلێنانەکە و نووسراوێکی سوپاس و پێزانین ئاراستەی هەر یەک لەو بەڕێزانە کرا.

ئەو بەڕێزانەی کە رێزلێنانەکەیان بۆ رێکخرا بریتیبوون لە :

پ.د. جەودەت جەعفەر خەتاب، یاریدەدەری سەرۆکی زانکۆی پۆلیتەکنیکی هەولێر بۆ کاروباری کارگێری و دارایی.

پ.ی.د. نەجیب تۆما بەتۆ، یاریدەدەری سەرۆکی زانکۆی پۆلیتەکنیکی هەولێر بۆ کاروباری زانستی و خوێندنی باڵا.

د. برزۆ هەمزە دزەیی، راگری پەیمانگەی تەکنیکی کارگێڕی هەولێر.

پ.ی.د. ئازاد ئەحمەد مەحموود، راگری کۆلێژی تەکنیکی کارگێڕی هەولێر.

پ.ی.د. بۆتان مەجید ئاسنگەر، راگری کۆلێژی تەکنەلۆجی هەولێر.

پ.ی.مامۆستا ئومێد ئەرشەد حەوێزی، راگری پەیمانگەی تەکنیکی پزیشکی هەولێر.

مامۆستا سەروەر جەمال حەیدەر راگری پەیمانگەی تەکنیکی چۆمان.

مامۆستا سۆران ذنون یاسین پەیمانگەی تەکنیکی خەبات.

مامۆستا پاکستان محمەد ئەمین کۆلێژی تەکنیکی سۆران.

پ.ی.د. هێمن کاکەخان عەوڵا بەڕێوبەری گشتی سەنتەری توێژینەوەی زانستی.

پ.ی.د. رەنج سیروان عەبدوڵڵا بەڕێوبەری ئۆفیسی پەیوەندییە نێودەوڵەتییەکان لە سەرۆکایەتی زانکۆ.

پ.ی.د. سەرسام خەلیل عومەر بەڕێوبەری تۆماری گشتی لە سەرۆکایەتی زانکۆ.

راگری پەیمانگەی تەکنیکی مێرگەسۆر لە شاری دوبەی چەندین دیدار و کۆبوونەوەی گرنگی زانستی ئەنجامدا

هەفتەی رابردوو د.طالب محەمەد شەریف راگری پەیمانگە بە سەردانێکی فەرمی گەیشتە شاری دوبەی لە وڵاتی ئیمارات چەندین دیدار و کۆبوونەوەی گرنگی زانستی بەرهەمداری ئەنجامدا لە بوارەکانی پەرەپێدانی پەیوەندییەئەکادیمیەکان و کاری هاوبەشی زانستی و ئەکادیمی نێوان پەیمانگەی تەکنیکی مێرگەسۆر- زانکۆی پۆلیتەکنیکی هەولێر و زانکۆکانی وڵاتی ئیمارات.

رۆژی چوارشەممە 17ی کانوونی دووەمی 2024، لە چوارچێوەی پەیوەندییە ئەکادیمیەکان، سەردانی زانکۆی ولۆنگۆنگ لە دوبەی- ئیمارات کرد

لە دیدارێکدا لەگەڵ تاتیانا یەکیمۆڤا بەرپرسی کاروباری پەیوەندییەکانی زانکۆی ولۆنگۆنگ، گفتوگۆکرا لەسەر پەرەپێدانی پەیوەندییەکان لەو بوارە هاوبەشانەی لە نێوان زانکۆی ناوبراو زانکۆی پۆلیتەکنیکی هەولێر و پەیمانگەی تەکنیکی مێرگەسۆر هەیە بۆ ئەوەی لە ئایندەدا بتوانن لە بوارەکانی پێشخستنی توانا مرۆییەکان و ئاڵوگۆڕی قوتابییان و ستاف و مامۆستایان سوود لەیەکتر وەربگرن، هەروەها کارکردن لەسەر توێژینەوەی زانستی وۆرکشۆپی هاوبەش تەوەرێکی دیکەی کۆبوونەوەکە بوو.

رۆژی دواتر واتا رۆژی پێنجشەممە 18ی کانوونی دووەمی 2024، راگڕی پەیمانگە سەردانی زانکۆی دوبەی کرد و لەلایەن پرۆفیسۆر حسێن ئەلئەحمەد یاریدەدەری سەرۆکی زانکۆ بۆ کاروباری زانستی و پەیوەندییە ئەکادیمیەکان و پرۆفیسۆر واثق مەنسور راگری کۆلیژی ئەندازیاری و تەکنەلۆجیای زانیاری بەفەرمی پێشوازییان لێکرا.

لە کۆبوونەوەیەکدا، دوای کورتەیەک باسکردن لە بارەی رەوشی گەشەسەندنی کوردستان وەک نمونەیەکی جوان لە پێکەوەژیان، باسیان لە ستراتیژی زانکۆی پۆلیتەکنیکی هەولێر و پەیمانگەی تەکنیکی مێرگەسۆر کرد لە بواری بەنێودەوڵەتی بوون. هەروەها تیشک خرایەسەر دروستکردنی پەیوەندی ئەکادیمی و پەرەپێدانی ئەو بوارە زانستییە هاوبەشانەی لە نێوان پەیمانگەی تەکنیکی مێرگەسۆر / زانکۆی پۆلیتەکنیکی هەولێر، و زانکۆی دوبەی هەیە و کاریان لەسەر بکرێت.

ئەو بوارانەش پێکهاتوون پێشکەوتنی توانا ئەکادیمیەکان ئاڵوگۆڕی قوتابییان و راهێنانی ستاف و مامۆستایان و ئەنجامدانی چالاکی و توێژینەوەی زانستی هاوبەش. تەوەرێکی دیکەی کۆبوونەوەکە تایبەت بوو بە وزەی نوێبووەوە و بەتایبەت کە ئەندازیارانی کە زانکۆی ناوبراو دەستپێشخەر بوون لە دامەزراندنی پرۆژەیەکی وزەی نوێبووەوە کە کارەبای زانکۆکەی دابین کردووە و بەشێکیشی لێ دەفرۆشنەوە، ئێمەش وەک زانکۆی پۆلیتەکنیکی هەولێر بەشی وزەی نوێبووەوەمان هەیە و دوو تاقیگەی پشکەوتووش بۆ بەشەکە دابینکراون، لەچوارچێوەی سراتیژیەتی زانکۆیە کە کار بکرێت لە بواری وزەی نوێبووەوە بۆ ئەو مەبەستەش بوونی هەماهەنگی نێوان هەردوو زانکۆکە کلیلێکە دەتوانرێت لە ئایندەدا پەرە بە پرۆژە و تاقیگە و بەشە زانستییەکان بدرێت بەردەوامیش بن، بەتایبەت لەگەڵ زانکۆی دوبەی کە یەکێکە لە زانکۆ حکومییە هەرە پێشکەوتووەکانی ئەو وڵاتە.

هەر لەو سەردانەدا راگری پەیمانگە گەشتێکی بە نێو تاقیگەکانی زانکۆی ناوبراودا کرد لە بواری ئەندازیاری و تەکنەلۆژیا و ئەلیکترۆنیک.

جێگەی ئاماژەیە راگری پەیمانگە دوای دیدارەکانی لەگەڵ بەرپرسانی زانکۆی ولۆنگۆنگ و دوبەی، دیاری لۆگۆی پەیمانگە و زانکۆمانی لەگەڵ تابلۆیەکی سروشتی جوانی کوردستان پێشکەش کردن.