Blog

رۆژی پێنج شەممە رێككەوتی 7ـی ئۆکتۆبەری 2021 بە ئامادەیی سەرۆکی زانکۆی پۆلیتەکنیکی هەولێر پ.ی.د. کاوە عبدالکریم شێروانی و سەرۆکی دەزگای خێرخوازی بارزانی لە سەرۆكایەتی دەزگای خێرخوازیی بارزانی كۆتایی هات بەخولێكی سێ رۆژە کە لەبواری (بەڕێوەبردنی پرۆژەكان) لە لایەن دەزگای خێرخوازی بارزانی نەمر بە هاوکاری وهەماهەنگی زانكۆی پۆلیتەكنیكی هەولێر بۆ کارمەندانی دەزگاکە کرابوویەوە.

لەدەستپێكی رێوڕەسمی كۆتاییهاتنی خولەكەدا بەڕێز موسا ئەحمەد سەرۆكی دەزگای خێرخوازیی بارزانی وتەیەكی پێشكەشكرد و تیشكی خستەسەر گرنگی كردنەوەی ئەم جۆرە خولانە لەپێناو بەهێزكردنی توانای كارمەندانی دەزگای خێرخوازیی بارزانی لەبواری بەڕێوەبردنی پرۆژەكان كرد و رایگەیاند: زۆر سوپاسی زانكۆی پۆلیتەكنیكی هەولێر و مامۆستایانی بەڕێزی ئەم زانكۆیە كرد كە رۆڵیان بینیوە لە رێكخستنی ئەم خولە و سوودێكی زۆر باشی بە كادیرانی ئێمە گەیاندووە. هەروەها رایگەیاند: ئەم خولانە كاریگەری زۆر باشی هەیە لە بەڕێوەچوونی پرۆژەكان و رێكخستنە ئیدارییەكان و چۆنێتی كۆنتاكت دروستكردن لەگەڵ رێكخراوەكان، ئومێدەوارین دەرچووانی ئەم خولە، سوودێكی زۆر باشیان لەم خولە وەرگرتبێت و درێژە بە تواناكانیان لەبوارەكاندا بدەن.

دواتر بەرێز سەرۆكی زانكۆی پۆلی تەكنیكی هەولێر پرۆفیسیۆری یاریدەدەر د. كاوە شێروانی وتەیەكی پێشكەشكرد و راگەیاند: شانازی بە دەزگای خێرخوازیی بارزانی دەكەین كە خزمەتێكی زۆر بە عێراق هەرێمی كوردستان كردووە و جێگە و پێگەیان بەرز و دیارە.

هەروەها سەرۆکی زانکۆ گوتیشی : ئێمە هەموو كات ئامادەییمان هەیە لەبوارە جیاوازەكاندا خزمەت بە دەزگای خێرخوازیی بارزانی بكەین، ئەمە یەكەمین پرۆژەیە لەگەڵ دەزگای خێرخوازیی بارزانی ئەنجامی دەدەین و دڵنیاین لەداهاتوودا لەبواری راهێناندا پرۆژەی گشتگیر و زیاترمان دەبێت. كردنەوەی ئەم جۆرە خولانە بۆ بەرزكردنەوەی ئاستی كارمەندان زۆر پێویستە بۆ وەرگرتنی زانست و زانیاری نوێ و بەكارهێنانی لەكاروباری رۆژانەدا.

لە مەراسیمەکەدا کە هەر یەک لە یاریدەدەری سەۆکی زانکۆ بۆ کاروباری زانستی، راگری کۆلێژی تەکنیکی کارگێری هەولێر، بەرێوبەرانی رەخساندنی هەلی کار و پەرەپێدانی پرۆگرامەکانی خوێندن و مامۆستایانی سەرپەرشتیاری خولەکە ئامادەبوون، بڕوانامەی دەرچوون بەخشرایە (13) بەشداربوو کە بەشێوەی تیۆری و پراكتیكی بەشداری وانەکانیان کردبوو.

شیاوی باسە کردنەوەی ئەم خولە لە چوارچێوەی یاداشتنامەی لێکتێگەیشتنی نێوان زانکۆی پۆلیتەکنیکی هەولێر و دەزگای خێرخوازی بارزانی ـە کە لا ماوەی رابردوودا واژوو کراوە و بڕیاریشە لە داهاتوودا ئەم خولانە بەردەوامییان هەبێت و بە هاوکاری و هەماهەنگی هەردوولا.

رۆژی سێ شەممە رێکەوتی 4ـی ئۆکتۆبەری 2021 سەرۆکی زانکۆی پۆلیتەکنیکی هەولێر خەڵاتی رێزلێنانی بەخشییە نزیکەی ۲۰۰ مامۆستای یاریدەدەر و مامۆستا پرۆفیسۆری یاریدەدەر و پرۆفیسۆر کە نازناوی زانستییان وەرگرتووە یاخود پلەی زانستییان بەرزبووەتەوە.
لە مەراسیمێکدا کە هەریەک لە بەڕێزان گوتەبێژی حکومەتی هەرێمی کوردستان د. جوتیار عادل و بریکاری وەزیری خوێندنی باڵاو توێژینەوی زانستی د. عبدالفتاح عبدالرزاق و ژمارەیەک بەڕێوبەری گشتی و راوێژکارانی وەزیری خوێندنی باڵا و یاریدەدەرانی سەرۆکی زانکۆ و ئەندامانی ئەنجومەنی زانکۆ ئامادەیبوون خەڵاتی رێزلێنان بەخشرایە مامۆستایانی زانکۆ بەهۆی پلە بەرزبوونەوەیان.
سەرەتای مەراسیمەکە سەرۆکی زانکۆ وتەیەکی کورتی پێشکەش کرد و تیایدا بەخێرهاتی میوانان کردوو سوپاسی کردن کە ئامادەبوون لەم بۆنە پڕ بایەخەدا، هەروەها پیرۆزبایی لە مامۆستایانی زانکۆ کرد .
سەرۆکی زانکۆ لە میانەی ووتەکەیدا باسی لە بەرەو پێشچوونەکانی زانکۆی پۆلیتەکنیکی هەولێر کرد و باسی لەوە کرد کە زانکۆ بە زۆر قۆناغدا تێپەڕیوە و بەرەو پێش چووە سەرەتا لە دەستەی فێرکردنی دروست بوو پاشان بووە دەستەی خوێندنی تەکنیکی و دواتر زانکۆی پۆلیتەکنیکی،
هەروەها د. کاوە گوتی:”زانکۆی پۆلیتەکنیکی هەولێر ساڵ بە ساڵ بەرەو پێش چووە لەرووی چەندێتی و چۆنیەتی مامۆستا و توێژینەوە، هەروەها لە ریزبەندییە نێوخۆیی و نێودەوڵەتییەکانیش هەنگاوی گەورەی بڕیوە و پێشکەوتنی بەرچاوی بەدەست هێناوە”.
سەرۆکی زانکۆ گوتیشی :” لە ماوەی دوو ساڵدا 200 مامۆستا نازناوی زانستییان بەدەست هێناوە یان پلەیان بەرزبووەتەوە لەو رێژەیە 30 مامۆستا بوون بە پرۆفیسۆری یاریدەدەر، 100 مامۆستا بڕوانامەی ماستەری بەدەست هێناوە و نازناوی زانستیان پێدراوە و بوونەتە مامۆستای یاریدەدەر، هەروەها 30 مامۆستا دکتۆرای وەرگرتووە و 40 مامۆستای یاریدەدەریش بە توێژینەوە بوونەتە مامۆستا، هەموو ئەوانەش دەستکەوت و بەرهەمی کار و بەرنامەی زانکۆیە کە هانی مامۆستایانی داوە و پاڵپشتی کردوون تاکو توێژینەوە ئەنجام بدەن و لە گۆڤارە بەناوبانگەکان بڵاویان بکەنەوە.
لە کۆتایی وتەکەیدا د. کاوە شێروانی دووبارە بەخێرهاتنی میوانەکانی کرد و پیرۆزبایی لە مامۆستایان کرد و هیوای سەرکەوتن و پێشکەوتنی زیاتری بۆ خواستن، پاشان داوای لە بەڕێزان وتەبێژی حکومەت و بریکاری وەزیری خوێندنی باڵا و بەڕێوبەری گشتی و راوێژکارانی وەزارەتی خوێندنی باڵا کرد کە بەیەکەوە خەڵاتی ریزلێنانەکان دابەش بکەن.

بۆ بینینی سەرجەم وێنەکان تکایە سەردانی ئەم لــیــنــکە بکەن.

زانکۆی پۆلیتەکنیکی هەولێر بە هەماهەنگی لەگەڵ رێکخراوی سپارکی هۆڵەندی خولێکی راهێنان بۆ دەرچووانی زانکۆی پۆلیتەکنیکی هەولێردەکاتەوە، کە لە رێگەیەوە دەتوانن هەلی کار بەدەست بهێنن.
خولەکە سەرجەم پسپۆڕییەکان لە خۆدەگرێت و تیایدا بەشداربووان راهێنانی کردارەکی لە کۆمپانیا و دامەزراوەکان ئەنجام دەدەن و شانسی بەدەستهێنانی کاریان هەیە لەو دامەزراوەیەی راهێنانەکەی تێدا ئەنجام دەدات، بۆ ئەم مەبەستە پێویستە قوتابیانی دەرچووی کۆلێژ و پەیمانگە تەکنیکییەکان ئەم فـــۆرمــــە پڕ بکەنەوە تاکو مافی بەشداری کردن بەدەست بهێنن.
تێبینی:-
1.ئەم خولی راهێنانە تەنها دەرچووانی زانکۆی پۆلیتەکنیکی هەولێڕ دەتوانن بەشدار بن
2.کۆتا رۆژ بۆ پێشکەش کردن 7/10/2021

رۆژی پێنج شەممە رێکەوتی 30ـی ئەیلولی 2021 لە هۆڵی کۆنفرانسەکانی سەرۆکایەتی زانکۆ بە ئامادەبوونی سەرۆکی زانکۆ پ.ی.د. کاوە عبدالکریم شێروانی و بریکاری وەزیری خوێندنی باڵا و توێژینەوەی زانستی د.عبدالفتاح عبدالرزاق بڕوانامەی رێزلێنان بەخشرایە مامۆستایانی یەکەم لە پرۆسەی دڵنیایی جۆری.

لە مەراسیمەکەدا کە سەرۆکی کۆمیتەی زانکۆ نێودەولەتییەکان (ئای یو سی) د.ئۆرھان حیکمەت عزیزئوغلو، یاریدەدەرانی سەرۆکی زانکۆ، ئەندامانی ئەنجومەنی زانکۆ و بەرێوەبەران و مامۆستایان ئامادەبوون، خەڵاتی رێزلێنان بەخشرایە ئەو مامۆستایانەی لە هەر سێ پێوەری دڵنیایی جۆری پلەی یەکەمیان بە دەستهێناوە بۆ ساڵی خویندنی 2020-2021.

سەرەتای مەراسیمەکە سەرۆکی زانکۆ لە وتەیەکی کورتدا تیشکی خستەسەر گرنگی پرۆسەی دڵنیایی جۆری هەنگاو و بەرەوپێش چوونەکانی پرۆسەکە لە زانکۆمان و پیرۆزبایی لە مامۆستایانی سەرکەوتوو کرد و هیوای بەردەوامی بۆ خواستن و پاڵپشتی تەواوی سەرۆکایەتی زانکۆی بۆ دووپات کردنەوە.

پاشان د. عبدالفتاح عبدالرزاق وتەیەکی پێشکەش کرد و تیایدا بەگرنگییەوە باسی لە پرۆسەی دڵنیایی جۆری کرد لە گشت زانکۆکان هەروەها ئاماژەی بەوە کرد کە وەک وەزارەت پێداگری لەسەر پرۆسەی دڵنیایی جۆری دەکەن، لە بەشێکی دیکەی وتەکەیدا بریکاری وەزیری خوێندنی باڵا دەستخۆشی لە سەرۆکی زانکۆ کرد بۆ ئەنجامدانی ئەم جۆرە مەراسیمانە کە هانی مامۆستایان دەدات بۆ بەرزتر کردنەوەی ئاستی زانستی مامۆستایان و کوالیتی خوێندن لە کۆلێژ و پەیمانگەکان.

دواتر بروانامەکان بەخشرایە مامۆستایان.

ساڵانە سەرۆکی زانکۆی پۆلیتەکنیکی هەولێر لەرێگەی بەڕێوبەرایەتی دڵنیایی جۆری مەراسیمێک رێک دەخات و تیایدا خەڵاتی رێزلێنان دەبەخشێتە مامۆستایانی یەکەم کە لەسەر بنەمای پێوەرەکانی پرۆسەی دڵنیایی جۆری پلەی یەکەمیان بەدەست هێناوە.