Blog

رۆژی سێ شەممە رێکەوتی 31ـی ئایاری 2022 سەرۆکی زانکۆ پ.ی.د. ئیدریس محمدطاهر هەرکی پێشوازی لە کونسوڵی گشتی شانشینی ئەردەن لە هەرێمی کوردستان بەڕێز فوئاد خازر ئەلمەجالی کرد.

لە دیدرێکدا کە هەریەکە لە یاریدەدەری سەرۆکی زانکۆ بۆ کاروباری کارگێڕی، زانستی و بەڕێوبەرانی پەیوەندییە نێودەوڵەتییەکان و تۆماری گشتی ئامادەیبوون، سەرۆکی زانکۆ کورتەیەکی دەربارەی مێژووی زانکۆ و کۆلێژ و پەیمانگەکان و ئامانجی زانکۆی بۆ شاندی میوان باسکرد.

لە بەرامبەریشدا کونسوڵەکەی شانشینی ئەردەن باسی لە زانکۆکانی وڵاتەکەی کرد و بە گرنگییەوە لە پتەوکردنی پەیوەندیی زانکۆکانی وڵاتەکەی و هەرێمی کوردستان بەگشتی و زانکۆی پۆلیتەکنیکی هەولێری بەتایبەتی رووانی.

هەروەها بەرێز فوئاد ئەلمەجالی بەڵێنی دا کە وەک کونسوڵخانە ئاسانکاری تەواو بکەن لە کاروبارەکانی تایبەت بە خوێندنی باڵا بەهەماهەنگی لەگەڵ لایەنە پەیوەندیدارەکانی وەزارەتی خوێندنی باڵای شانشینی ئەردەن.

رۆژی پێنج شەممە رێکەوتی 26ـی ئایاری 2022 سەرۆکی زانکۆ پ.ی.د. ئیدریس محمدطاهر هەرکی پێشوازی لە سەرۆکی زانکۆی پۆلیتەکنیکی دهۆک پ.د ئاری عادل و شاندی یاوەری کرد.

لە دیدارێکدا سەرۆکی زانکۆی پۆلیتەکنیکی دهۆک پیرۆزبایی لە پ.ی.د. ئیدریس هەرکی کرد بەبۆنەی دەستبەکاربوونی وەک سەرۆکی نوێی زانکۆ، هەر لەو دیدارەدا جەخت لەسەر زیاتر پتەوکردنی پەرەپێدانی پەیوەندییەکانی نێوان هەردوو زانکۆ کرایەوە، بە تایبەت کۆنفرانسی نێودەوڵەتی نێوان هەردوو زانکۆی پۆلیتەکنیکی هەولێر و دهۆک و زانکۆی (یو، تی، ئێچ، ئێم)ـی مالیزی کە بڕیارە لە مانگی 11ـی ئەمساڵ ئەنجام بدرێت.

شایانی باسە کۆنفرانسەکە پەیوەندیدار دەبێت بە زانستە مرۆڤایەتی و کۆمەڵایەتییەکان کە چەندین بوار لەخۆی دەگرێت وەک (کارگێڕی، ژمێریاری، ئابووری، یاسایی، رۆژنامەگەری و زانستی دارایی و بانک)، هەروەها بڕیارە مانگی داهاتوو دەرگای پێشکەش کردنی توێژینەوە و پەیپەرەکان بە لێژنەی زانستی کۆنفرانس بکرێتەوە.

رۆژی چوارشەممە رێکەوتی 25ـی ئایاری 2022 سەرۆکی زانکۆ پ.ی.د ئیدریس محمدطاهر ھەرکی بەیاوەری یاریدەدەری سەرۆکی زانکۆ بۆ کاروباری زانستی د. نجیب تۆما سەردانی کۆلێژی تەکنیکی شەقڵاوەی کرد و لەلایەن ڕاگرایەتی کۆلێژی ناوبراوەوە پێشوازییان لێ کرا.

لەمیانە سەردانەکەیدا سەرۆکی زانکۆ و شاندی یاوەری سەردانی ھۆڵی تاقیکردنەوەکانی قوتابیان و لیژنەی باڵای ئـەزمونەکانییان کرد، لەکۆتایی سەردانەکەیدا سەرۆکی زانکۆ دەستخۆشی لە راگرایەتی کۆلێژ کرد و ھیوای سەرکەوتنی بۆ قوتابیان خواست.

رۆژی یەکشەممە رێکەوتی 22ـی ئایاری 2022 سەرۆکی زانکۆ پ.ی.د. ئیدریس محمدطاهر هەرکی پێشوازی لە باڵیۆزی وڵاتی جۆرجیا لە عێراق و کوردستان د. زازا کاندێلاکی و شاندی یاوەری کرد.

لە دیدارێکدا سەرۆکی زانکۆ د. ئیدریس هەرکی کورتەیەکی دەربارەی زانکۆ و مێژووی دامەزراندنی بۆ میوانان باسکرد، لەبەرامبەریشدا شاندی میوان باسی زانکۆکانی وڵاتی جۆرجیایان کرد و باڵیۆزی جۆرجیا خۆشحاڵی خۆی دەربڕی بە زیاتر ناسینی زانکۆی پۆلیتەکنیکی هەولێر و هەنگاونان بۆ پێکەوە کارکردنی زانکۆکانی وڵاتی جۆرجیا لەگەڵ زانکۆکانی هەڕێمی کوردستان بە تایبەتی زانکۆی پۆلیتەکنیکی هەولێر.

هەر لە دیدارەکەدا بەرپرسی ئۆفیسی پەیوەندییە نێودەوڵەتییەکانی زانکۆ پ.ی.د. رەنج سیروان باسی لە پەیوەندیەکانی زانکۆمان لەگەڵ زانکۆکانی جیهاندا کرد و هەروەها باسی لە ستراتیژیەت و ئامانجی زانکۆ کرد بۆ بەنێودەوڵەتی بوونی زانکۆی پۆلیتەکنیکی هەولێر.