Blog

بەبۆنەی رۆژی جیهانی مامۆستایانی 5/10 و رۆژی مامۆستایانی کوردستان 6/10 گەرمترین پیرۆزبایی خۆمان ئاراستەی سەرجەم مامۆستایانی زانکۆی پۆلیتەکنیکی هەولێر بەتایبەتی و مامۆستایانی کوردستان بەگشتی دەکەین.

لای هەمووووان ئاشکرایە کە مامۆستایانی کوردستان هەمیشە ڕۆڵێکی گرنگیان لە پێگەیاندنی نەوەکانی کوردستان و داکۆکیکردن لە مافەکانی گەلی کوردستاندا گێڕاوە و داینەمۆی گۆڕانکاری کۆمەڵگە بوون، بۆیە بە ڕێز و پێزانینەوە لە خەباتی پەروەردەیی و نیشتمانیی مامۆستایان دەڕوانین.

لەم یادەدا بەپێویستی دەزانم سوپاسی بێ پایانی مامۆستایانی زانکۆمان بکەم کە سەرەڕای دۆخە سەختەکان لەماوەی ڕابردوو، بەردەوام بوون لە خزمەتکردن و درێژەدان بە پرۆسەی خوێندن و پەروەردەکردنی نەوەکانی داهاتووی کوردستان.

ئێمە لە زانکۆی پۆلیتەکنیکی هەولێر بەردەوام کار دەکەین لە پێناو باشترکردن و بەرزکردنەوەی ئاستی خوێندن و خزمەتکردنی مامۆستایان و پاراستنی مافەکانیان.

دووبارە هیوای سەرکەوتن و بەردەوامی بۆ مامۆستایانی زانکۆی پۆلیتەکنیکی هەولێر و مامۆستایانی کوردستان دەخوازم، هەر شاد و سەرفراز بن..

پ.د. ئیدریس محمدطاهر هەرکی
سەرۆکی زانکۆی پۆلیتەکنیکی هەولێر
5.10.2022

شاندێکی زانکۆی پۆلیتەکنیکی هەولێر بە سەرۆکایەتی یاریدەدەری سەرۆکی زانکۆ بۆ کاروباری زانستی د. نجیب تۆما بتو و بە ئەندامێتی ژمارەیەک مامۆستایانی زانکۆمان بەشدارییان کرد لە کاروچالاکیەکانی دووەمین کۆنفرانسی زانستی بۆ بوارەکانی تەندروستی و پزیشکی لە زانکۆی تەکنیکی ناوەراست کە لە پەیمانگەی تەکنیکی کوت بەڕێوەچوو لە رۆژی 29ـی ئەیلول تاکو 3ـی ئۆکتۆبەر بەردەوام بوو.

لە پەڕاوێزی کۆنفرانسەکەدا شاندی زانکۆ چەند دیدار و  چاوپێکەوتنێکیان ئەنجامدا و تیایدا دەربارەی هەماهەنگی و هاوکاری زیاتر لەبواری خوێندنی باڵا و توێژینەوەی زانستی گفتوگۆیان لەگەڵ نوێنەری زانکۆکانی تەکنیکی لە عێراق کرد، بۆ ئەوەی لەداهاتوودا بە هاوبەشی کاری لەسەر بکەن.

رۆژی چوارشەممە رێکەوتی 28ـی ئەیلولی 2022 سەرۆکی زانکۆ پ.د. ئیدریس محمدطاهر هەرکی پێشوازی کرد لە سەرۆکی ئەنجومەنی باڵای کوردستان بۆ پسۆرایەتیەکانی پزیشکی پ.د. ئاریانا خالص جواد و شاندی یاوەری.

لە دیدارێکدا شاندەکەی ئەنجومەنی باڵای کوردستان بۆ پسپۆڕییەکانی پزیشکی پیرۆزباییان لە د. ئیدریس کرد بەبۆنەی دەست بەکاربوونی بەڕێزیان وەک سەرۆکی زانکۆی پۆلیتەکنیکی هەولێر.

هەر لە دیدارەدا گفتۆگۆکرا دەربارەی بەشی بەڵگەکانی تاوان لە پەیمانگەی تەکنیکی پزیشکی هەولێر بەمەبەستی هەماهەنگی بۆ زیاتر بەرەوپێش بردنی ئەو بەشە.

لە بەشێکی دیکەی کۆبوونەوەکەدا باس لە کردنەوەی بۆردی پزیشکی پەرستاری کرا کە لەئێستادا ژێر دیراسەتکردندایە و شاندی ناوبراو داوایان کرد کە سەرۆکی بەشی پەرستاری لە پەیمانگەی تەکنیکی پزیشکی هەولێر بەشدار بێت لەو گفتۆگۆیانە کە بڕیارە لەم نزیکانە لەگەڵ بۆردی پزیشکی ئوردنی ئەنجام بدەن.