Category Archives: سەرۆکایەتی زانکۆ

ئەمڕۆ سێشەممە ٢٢ى نۆڤێمبەری ٢٠٢٢ بە ئامادەبوونى سەرۆکی زانکۆی پۆڵیتکنیکی ھەولێر پ.د. ئیدریس محەمەد تاهیر ھەرکی، راگرى پەیمانگای تەکنیکی پزیشکی ، ستافی ئەکادیمى و کارگێڕی پەمانگە وۆرکشۆپێکی زانستی سەبارەت بە  نەخۆشییەکانی شەکرە ڕێکخست  بۆ ستافی ئەکادیمى و کارگێڕی پەیمانگە کە بۆ ماوەى سێ رۆژ بەردەوام بوو.

لە وۆرکشۆپەکەدا مامۆستایانی پەیمانگای تەکنیکی پزیشکی هەولێر چەندین بابەتی زانستی پزیشکیان سەبارەت بە هۆکارەکانی تووشبوون بە نەخۆشی شەکرە و چۆنییەتی خۆپاراستن لەو نەخۆشییە پێشکەش کرد.

لە کۆتایی وۆرکشۆپەکەدا سەرۆکی زانکۆ پ.د. ئیدریس محەمەد تاهیر بڕوانامەى بەشداربوونى  پێشکەش بە مامۆستایانى بەشداربوو لە وێرکشۆپەکە کرد.

بەڕێوەبەرایەتی پەیوەندییە نێودەوڵەتییەکان و بەڕێوەبەرایەتی سەنتەری توێژینەوەی زانستی زانکۆمان سیمینارێکیان لەبارەی وزە نوێبووەکان بۆ هەریەک لە پرۆفیسۆر کلاوس بەیلر و پرۆفیسۆر بەکر فەرەنگی کە مامۆستان لە زانکۆی (تی. هێیج. ئێم)ى ئەڵمانى. بۆ زانستە کردارییەکان رێکخست لە چوارچێوەی پرۆژەی

Academic Education in the field of Renewable energies

 کە لە لایەن رێکخراوی  دادی ئەڵمانیاوە کۆمەک کراوە.

لە سیمینارەکەدا کە لە هۆڵی کۆنفرانسەکان لە سەرۆکایەتی زانکۆمان بەڕێوەچوو و هەریەک لە پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر و د.بۆتان مەجید ئاسنگەر، راگری کۆلێژی تەکنۆلۆجی هەولێر و ژمارەیەک لە بەڕێوەبەران و مامۆستایانی زانکۆ ئامادەی بوون، پرۆفیسۆر کلاوس بەیلر و پرۆفیسۆر بەکر فەرەنگی بەجیا باسیان لە وزە نوێبووەکان کرد. دواتر لەلایەن ئامادەبووانەوە بە چەندین پرسیار و پێشنیاز بابەتەکە دەوڵەمەندتر کرا.

جێی ئاماژەیە، ئەم سیمینارە لە چوارچێوەی پرۆژەی

Academic Education in the field of Renewable energies

بەڕێوەچوو کە لە لایەن بەڕێوەبەرایەتی پەیوەندییە نێودەوڵەتییەکان بە کۆمەکی رێکخراوی DAADی ئەڵمانیا جێبەجێ دەکرێت.

پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر لە دیوانی سەرۆکایەتی زانکۆ پێشوازیی کرد لە شاندێکی زانکۆی (تی. هێیج. ئێم)  University of Applied Sciences کە پێکهاتبوو لە پرۆفیسۆر کلاوس بەیلەر و پرۆفیسۆر بەکر فەرەنگی.

لە دیدارەکەدا کە د.رەنج سیروان، بەڕێوەبەری پەیوەندییە نێودەوڵەتییەکان و د.هێمن کاکەخان، بەڕێوەبەری سەنتەری توێژینەوەی زانستی زانکۆمان ئامادەی بوون، باس لە پرۆژەی

Academic Education in the field of Renewable energies

 کرا کە لە لایەن رێکخراوی (داد)ی ئەڵمانیا کۆمەک کراوە.

لە بەشێکی دیکەی کۆبوونەوەکە باس لە گرنگی پرۆژەکە کرا و تیایدا جەخت لەسەر بەهێزکردنی پەیوەندییەکانی نێوان زانکۆمان و زانکۆی (تی. هێیج. ئێم) ی ئەڵمانی و زیادکردنی ئالۆگۆڕی ئەکادیمی و زانستی کرا.

هەر لە دیدارەکەدا  گفتوگۆ لەسەر کردنەوەی بەشی زانستی لە کۆلێژ و پەیمانگاکانی سەربە زانکۆمان کرا و لەمبارەیەوە شاندەکەی زانکۆی (تی. هێیج. ئێم)ی ئەڵمانیا ئامادەیی خۆیان بۆ هەر جۆرە هاوکاریی و هەماهەنگییەک نیشاندا.

جێی ئاماژەیە، ئەم پرۆژەیە لەلایەن بەڕێوەبەرایەتی پەیوەندییە نێودەوڵەتییەکان بە کۆمەکی رێکخراوی داد (دی. ئەی. ئەى.دى) بە سێ قۆناغ لە ماوەی دوو ساڵ جێبەجێ دەکرێت.

رۆژی چوارشەمە ڕێکەوتی ١٦ی نۆڤێمبەری ٢٠٢٢، سێیەمین کۆنفرانسى نێودەوڵەتى گۆڕانکارى کۆمەڵایەتى و گەشەپێدانى هەرێمى ٢٠٢٢، لەژێر ناونیشانی (بەرەو زانستە کۆمەڵایەتییە کردارییەکان) لە نێوان زانکۆی پۆلیتەکنیکى هەولێر، زانکۆی پۆلیتەکنیکى دهۆک و زانکۆى )یو.تی.ئێچ.ئێم)ـی مالیزى لە شاری دهۆک دەستی بە کارەکانی کرد کە بۆ ماوەی دوورۆژ بەردەوام بوو.

بە چاودێرى د.ئارام محمد قادر وەزیرى خوێندنى باڵا و توێژینەوەى زانستى، ئامادەبونى پ.د. ئیدریس محەمەد طاهر هەرکی سەرۆکی زانکۆی پۆلیتەکنیکى هەولێر، پ. د. ئاری عادل سەرۆکى زانکۆى پۆلیتەکنیکى دهۆک، ستافی ئەکادیمى زانکۆی (یو.تی.ئێچ.ئێم)ـی  مالیزى،  ژمارەیەک لە یاریدەدەرانى سەرۆکى زانکۆکان، ستافی ئەکادیمى، و توێژەری زانستى و کۆمەڵایەتى بیانى و کوردی و عەرەبی سێیەمین کۆنفرانسى نێودەوڵەتى گۆڕانکارى کۆمەڵایەتى و گەشەپێدانى هەرێمى ٢٠٢٢، (بەرەو زانستە کۆمەڵایەتییە کردارییەکان) دەستیپێکرد.

سەرەتا سەرۆکی زانکۆی پۆلیتەکنیکی دهۆک پ.د. ئاری عادل بەناوى هەرسێ زانکۆکە وتارێکى پێشەکەش کرد کە تیایدا ئاماژەیدا بە ژمارە و ناوەرۆکی توێژینەوەکان کە پێکهاتوون لە ١٢٦ توێژینەوەى ناوخۆیى و نێودەوڵەتى لەبوارەکانى ئامار و ئابوورى، کارگێرى، دارایى و بانک، ژمێریارى، راگەیاندن و زمان  کە پێشکەشى کۆنفڕانسەکە کراون. لە کۆی گشتى توێژینەوەکان ١١٤ توێژینەوە ڕەزامەندى لەسەر دراوە کە لێژنەیەکى تایبەت هەڵسەنگاندنیان بۆ کردوون و لەماوەى دوو رۆژى کۆنفرانسەکە گفتوگۆیان لەبارەوە دەکرێت.

دواتر لە پانێڵى سەرەکى کۆنفرانسەکە تیشک خرایە سەر ئاراستەی پەیوەندییەکانى هەولێر و بەغدا و کاریگەرییە لاوەکییەکانى لەسەر پەیوەندییە ئابووری، کۆمەڵایەتى، و تەنانەت زانستییەکانیش کە بەپوختى و ووردی باسکران.

لە رۆژی دووەمی کۆنفڕانسەکەدا سێشنەکان بەردەوام بوون کە تیایدا توێژەرەکان توێژینەوەکانى خۆیان پێشکەشکرد و بۆچوون و سەرنجی ئامادەبووانیشیان وەرگرت و گفتوگۆیان لەبارەیانەوە کرد.

 بەر لە کۆتاییهاتنی کۆنفڕانسەکە، سەرۆکی زانکۆمان پ. د. ئیدریس محەمەد تاهیر هەرکی وتەیەکى پێشکەشکرد. لە دەستپێکدا پیرۆزبایی لە توێژەرەکان کرد کە توێژینەوەکانیان پەسند کراون و لە دوو رۆژی کۆنفرانسەکە  بە سەرکەوتوویى پێشکەشیان کرد هاوکات سوپاسی لێژنەی باڵای هەڵسەنگاندنى توێژیەنەوەکانى کرد.

دواتر باسى لە ئامانجە گشتی و تایبەتییەکانی کۆنفرانسەکە کرد و ووتی: ” ئەو کۆنفرانسە بێجگە لە ئامانجە سەرەکییەکانى توانی توێژەرانی هاوپسپۆڕ لەیەک نزيک بکاتەوە بۆ ئەوەی دوایین کار و توێژینەوەكانیان بخەنەڕوو و تاوتوێی بکەن، هەروەها سوود لە ئەزموونی یەکتر وەربگرن.”  سەرۆکی زانکۆی پۆلیتەکنیکى هەولێر تیشکی خستە سەر ئامانجە تایبەتییەکەی ئەو کۆنفرانسە ووتی؛ لە ناونیشانی کۆنفرانسەکەدا دیارە گۆڕانکارى کۆمەڵایەتى و گەشەپێدانى هەرێمى ٢٠٢٢، بەرەو زانستە کۆمەڵایەتییە کردارییەکان کە بەهۆی پێشکەوتنی تەکنۆلۆجیا گۆرانکاری بەردەوام لە کۆمەڵگە روودەدات، دەرەنجام کێشە و گیروگرفتی جیاواز تووشی کۆمەڵگە بوونەتەوە. لە درێژەى ووتارەکەی پڕۆفیسۆر دکتۆر ئیدریس محەمەد تاهیر هەرکی ووتی:  “زانستە مرۆڤایەتیيەکان بەگشتی لە رواڵەتدا پشت دەبەستن بە چەند بيرۆکەیەک کە بە بڕوای ئێمە لەم سەردەمەدا باوی نەماوە کە تەنها توێژینەوەکان پەیوەست بن بەم بیرۆکانە بەڵکو دەبێت زانستی جێبەجێکار پەیڕەو بکرێت و ئالیات و تەکنۆلۆژیای سەردەم بەکاربهێنرێت. بۆیە هەردوو زانکۆی پۆلیتەکنیکی هەولێر و دهۆک بەهەماهەنگی و هاوکاری زانکۆی مالیزی ئەم کۆنفرانسەیان رێکخست. خۆشبەختانە بە سەرکەوتوویی کۆتایی هات بە هەوڵ و ماندووبوونی لێژنەکان کە ماوەی شەش مانگ زیاترە کاردەکەن. ئومێدەوارین لە ئاییندەیەکى نزیکدا کارو چالاکی تر هاوشێوەى ئەم کۆنفڕانسە ئەنجامبدرێت. لە کۆتایی ووتەکەی سوپاسگوزاری خۆى ئاڕاستەى لێژنەى باڵای زانستی و ئامادەکاری کۆنفڕانس کرد.

ئامانجى سەرەکى ئەم کۆنفرانسە کۆکردنەوەى توێژەرانى زانکۆکانى کوردستانە لەبوارى زانستە کۆمەڵایەتییەکان و رەخساندنى دەرفەتە بۆ قوتابیان و خوێندکارانى خوێندنى باڵاى ماستەرو دکتۆرا تاکو لەم کۆنفرانسە توێژینەوەکانیان بڵاوبکەنەوە، هەروەها هاندان و هاوکارى لەنێوان زانکۆکان و بڵاوکردنەوەى توێژینەوەکان لە گۆڤارە زانستییە نێوخۆیى و نێودەوڵەتییەکان. دیدگایەکى ترى ئەم کۆنفرانسە چارەسەرکردنى کێشە کۆمەڵایەتییەکانى کۆمەڵگەیە بەشێوەیەکى زانستى لە ڕێگەى بڵاوکردنەوەى توێژینەوەى زانستى، بەستنەوەى بابەتى توێژینەوەکان بەکێشەکانى کۆمەڵگە، و بایەخدانى زیاتر بەو بوار و پسپۆڕییانەى کاریگەرى لەسەر چینە جیاواز و جۆراوجۆرەکانى کۆمەڵگە هەیە. لە کۆتایی کۆنفڕانسەکە خەڵات و دیاری پێشکەش بە توێژەران و لێژنەى باڵای زانستی و ئامادەکاری کۆنفڕانس كرد.