Blog

بەئامادەبوونی پ.ی.د.مراد امیر احمد ڕاگری کۆلێژی تەکنیکی تەندروستی و پزیشکی هەولێر و ژمارەیەک مامۆستایان و فەرمانبەران و قوتابیان پانێڵێک لەژێر ناونیشانی ( تاوانی ئەنفال.. جینۆسایدی کورد ) بەڕێوەچوو.

هەریەک لە پ.ی.د.مراد امیر احمد ڕاگری کۆلێژی تەکنیکی تەندروستی و پزیشکی هەولێر و فرحان جوهر قادر ئەندامی خولی پێشووی پەرلەمانی کوردستان د.احمد نوزاد حسن یاریدەدەری راگر بەجیا باسیان لەم تاوانە قێزونەوەی ڕژێمی پێشووی عێراق لە دژی گەلی کوردستان کرد کە بە چەند قۆناغێک هەوڵی لەناوبردنی گەلی کوردستانی دا بۆ ئەوەی ناسنامەی ئەو گەلە ستەمدیدەیە بسرنەوە کە دوور بوو لە هەموو بەهاکانی ئایینی و ئەخلاقی و مرۆڤایەتییەکان و بەبەرچاوی جیهان و رێکخراوەکانی نێودەوڵەتی ئەنجامدرا.

دواتر گەنگەشە و گفتوگۆ لەنێوان ئامادەبووان کرا و بابەتەکە زیاتر دەوڵەمەندتر کرا و بڕوانامەی بەشداربوون لەلایەن ڕاگری کۆلێژی تەکنیکی تەندروستی و پزیشکی هەولێر بەخشرا.

ئەنفال پرۆسەیەكی نەخشە بۆ داڕێژراوی رژێمی پێشووی عێراق بوو، ئەم پڕۆسەیە لە ٩ی شوباتی ساڵی ١٩٨٨ دەستیپێكرد ھەموو ساڵێك لە ١٤ی نیسان لە ھەرێمی كوردستان یادی ئەنفال دەکرێتەوە و بەم بۆنەیەوە چەندین چالاکی لەشارەکانی هەرێمی کوردستان بەڕێوەدەچێت.

بەرواری (١٢/٤/٢٠٢٥) بە سەرپەرشتی بەڕێز ڕاگری پەیمانگەی تەکنیکی پزیشکی هەولێر (پ.ی.د.تیران جمیل پیرۆ ) لەگەڵ ستافی ئەنجومەنی پەیمانگەو مامۆستایان و فەرمانبەران سەردانی مەزاری نەمرانیان کرد لە بارزان 

پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر بەشداری کرد لە کۆبوونەوەی دەووریی سەرۆک زانکۆکانی پۆلیتەکنیکی لەسەر ئاستی عێراق كه‌ له‌لایه‌ن زانكۆى پۆلیتەکنیکی باکوور میوانداریی کرا و له‌ شاری مووسڵ بەڕێوەچوو.

لە کۆبوونەوەکەدا کە رۆژی شەممە رێکەوتی ١٢ی نیسانی ٢٠٢٥، بەچاودێری بریکاری وەزارەتی خوێندنی باڵا و توێژینەوەی زانستی حکومەتی فیدڕالی، د.حەیدەر عەبد زەهد و ئامادەبوونی هەریەک لە سەرۆک زانکۆکانی پۆلیتەکنیکی عێراق و هەرێمی کوردستان بەڕێوەچوو، باس لە هەنگاوەکانی بەرەپێشبردنی خوێندنی تەکنیکی وپیشەیی لە عێراق و هەرێمی کوردستان کرا.

دوای پێشکەشکردنی گوتارەکان، ئەجێندای کۆبوونەوەکە خرایە روو کە پێداچوونەوە بوو بە بڕیار و راسپاردەکانی کۆبوونەوەکانی پێشوو، هاوکات باس لە هەنگاو رێککارەکانی چۆنییەتی بەرەپێشتربردنی خوێندنی تەکنیکی لە زانکۆ پۆلیتەکنیکییەکان. هەروەها چەند بابەتێکی دیکەیی هەنووکەیی خرانە بەرباس.