Blog

ڕۆژی چوارشەممە ڕێکەوتی 6ی ئاداری 2024،بە ئامادەبوونی پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، یەکەمین کۆربەندی پەیمانگەی تەکنیکی مێرگەسۆر لەژێر ناونیشانی “بارزان لە بەرخودان خۆنەچەماندن بۆ نیشتمانسازی ( پەروەردە و فێرکردن ژینگەپارێزی و پێکەوەژیان)” بە بەشداری هەریەک لە بەڕێزان (پ.د.ابوبەکر دێوانە حمد، د.عەبدوڵا ملا، پ.د.فەرسەت مەرعی، مامۆستا ڕێکار مزوری) بەڕێوەچوو.

کۆڕبەندەکە بە ئامادەبوونی پ.د. ئازاد حەسەن قادر یاریدەدەری سەرۆکی زانکۆ بۆ کاروباری کارگێری و دارایی، هەڵگورد شێخ نەجیب سەرپەرشتیاری ئیدارەی سەربەخۆی سۆران، غەفور احمد ملاسوار قائیمقایمی قەزای مێرگەسۆر، ژمارەیەکی بەرچاو لە بەرپرسانی حزبی و حکومی، پەیڕەوانی ئاین و ئاینزا جیاوازەکان و مامۆستایان و فەرمانبەران و قوتابیان دەستی پێکرد.

سەرەتا پ.د. ئیدریس هەرکی وتارێکی پێشکەش کرد و تیایدا بە ناوی ئەنجومەنی زانکۆی پۆلیتەکنیکی هەولێر و ئەنجومەنی پەیمانگای تەکنیکی مێرگەسۆر بەخێرهاتنی میوانان و بەشداربووانی پانێڵەکەی کرد و گوتی: ” ئەمڕۆ لێرە کۆبووینەتەوە بۆ ئەنجامدانی کۆڕبەندێکی تایبەت بە ڕۆڵ و خەبات و بەرخودانی بارزان و سەرکردەکانمان و شێخەکانی بارزان و بە تایبەتی لە بواری پەروەردە و فێرکردن و ژینگەپارێزی، بەڕێزان ئەرکی زانکۆ تەنیا پێشکەشکردنی زانست و زانیاری و ئەنجامدانی توێژینەوەی زانستی نییە بەڵکو ئەرکێکی تری گرنگتر ئەرکی زانکۆ خزمەتکردنی کۆمەڵگایە بۆ یەکسانی کۆمەڵایەتی بۆ ئابووریەکی باشتر بۆ هوشیارکردنەوەی کۆمەڵگا لە بابەتە جیاجیاکان و بە تایبەتریش لە بابەتی نەتەوایەتی”.

“ئەمڕۆ ئەو بەڕێزانەی کە لەم پانێڵە نووسەران و مامۆستایانی زانکۆ بەشدارن لەگەڵ ئێمە دەمەوێت لە سەرەتاوە زۆر سوپاسی ئامادەبوونیان بکەم و نامەوێت بچمە ناو بابەتەکانەوە بەڵام ئەوەی کە گرنگە دەمەوێت باسی بکەم ڕوونی پەروەردە و فێرکردن بە تایبەتی ڕۆڵی شێخەکانی بارزان و سەرکردەکان لە بابەتی بەر پەروەردە فێرکردن دەمەوێ هەر لە سەرەتای شۆڕشەکانی بارزان و شێخ عەبدولسەلام بارزانی کە ڕۆلێکی گرنگی تایبەتی هەبووە لە دروستکردن و ئامادەکردنی قوتابخانەکان بە تایبەتی قوتابخانە ئایینییەکان، تاوەکو ئەمڕۆ ئەم ڕێبازە بەردەوامە ئەگەر سەیر بکەین ڕۆڵی بارزانی نەمر لە دامەزراندنی یەکێتی زانایانی ئایینی ئیسلام کە ڕۆلێکی سەرەکی هەبووە و بە فەرمانی جەنابیان ئەم یەکێتییە دامەزراوە دواتریش یەکێتی مامۆستایانی کوردستان و گرنگیدا بە خوێندن و پەروەردە بە زمانی کوردی کە بارزانی نەمر گرنگییەکی تایبەتی بەو بوارەدا بوو، و لە ڕێکەوتنامەی 11ی ئازاری ساڵی 1970 تواندرا ئەم بابەتە چەسپێندرێت کە بە زمانی کوردی بخوێندرێت و دواتریش دامەزراندنی کۆڕی زانیاری کورد کە هەر لەسەر دەستی بارزانی نەمر، ئەوانە چەند نموونەیەکن لەسەر ڕۆلی شێخەکانی بارزان تایبەت بە بابەتی پەروەردە و فێرکردن.”

“خۆشحاڵین کە ئەمڕۆ پەیمانگەی تەکنیکی مێرگەسوور ڕۆڵی چەند کەسێک کە لە پلەیەکی زانستی بەرزن لە پلەی پرۆفیسۆر بەرز دەنرخێنن، کە ڕۆڵەی ئەم دەڤەرەن و لەسەر ئەم ڕێبازە خۆیان پێگەیاندووە تا گەیشتن بەم ئاست و دەرئەنجامە پێمان خۆش بوو ئەمڕۆ لە گەڵمان و رێزلێنانیان پێ ببەخشین.” ئامادە بن دووبارە بە خێراتنتان دەکەین و هیوادارم ئەم دەڤەرە هەروا بە سەر بەرزی بە سەر فرازی بمێنێتەوە دووبارە هەموو لایەک بەخێربێن زۆر سوپاس بۆ ئامادە بوونتان”.

دواتر دەستکرا بە پێشکەش کردنی بەرنامەکانی کۆڕبەندەکە پێکهاتبوو لە پێشکەشکردنی پانێڵێک بە بەشداری ” پ.د.ابوبەکر دێوانە حمد، د.عەبدوڵا ملا، پ.د.فەرسەت مەرعی، مامۆستا ڕێکار مزوری ” کە تیایدا بە وردی شەن و کەوی قوناغەکانی بەرخودان و شۆڕشی بارزانیان و کەلتوری پێکەوەژیان و ژینگەدۆستی لە دەڤەرەکە کرا، و دوای کۆتایی هاتنی پانێڵەکە لەلایەن سەرۆکی زانکۆی پۆلیتەکنیکی هەولێر پ.د.ئیدریس محمد طاهر هەرکی و سەرپەرشتیاری ئیدارەی سەربەخۆی سۆران هەلگورد شێخ نەجیب  بروانامەی رێزلێنان بە خشرایە بەشداربووانی پانێڵەکە.

لە بڕگەی دووەمی کۆڕبەندەکەدا وەک رێزگرتنێک لە هەوڵ و تێکۆشان لە بواری زانستی و ئەکادیمی قەڵغانی رێزلێنان بەخشرایە کۆمەڵێک خاوەن نازناوی زانستی پرۆفیسۆر کە لە دایکبوو یاخود خەڵکی سنووری قەزای مێرگەسۆرن و کۆڕبەندەکە کۆتایی هات.

 

لەچوارچێوەی ستراتیژیەتی بەنێودەوڵەتی کردنی زانکۆی پۆلیتەکنیکی هەولێر و بە پێی ڕێککەوتنامەی لێکتێگەیشتنی زانکۆی پۆلیتەکنیکی هەولێر لەگەڵ زانکۆی لوودز لە پۆڵەندا بە خۆشحاڵیەوە مامۆستا پ.د. وەلاء جەودەت هەڵبژێردرا کە وەک مامۆستای میوان لە زانکۆی لوودس وانە بڵێتەوە.

شیاوی باسە ئەو مامۆستایەی زانکۆمان سێ بابەت دەڵێتەوە ئەوانیش (Soft Skill, International University Resource Management, Business presentation Technology) کە کۆی گشتی وانەکان دەگاتە 60 کاتژمێر لە ڕێکەوتی 26ی شوبات تاکو 30 نیسانی 2024.

 

پ.د.ئیدریس محەمەد تاھیر ھەرکی، سەرۆکی زانکۆی پۆلیتەکنیکی ھەولێر بەشداری لە کۆنگرەی یەکێتی زانکۆکانی عەرەبی کرد کە لە رۆژانی3-6ی ئاداری 2024 لە زانکۆی بەغدا بەڕێوەدەچێت.

سەرۆکی زانکۆی پۆلیتەکنیکی ھەولێر لەگەڵ ژمارەیەک لە سەرۆکی زانکۆکانی ھەرێمی کوردستان بەشداریی لە کارەکانی کردنەوەی 56 ھەمین خولی کۆنگرەی گشتیی یەکێتی زانکۆکانی عەرەبی کرد کە لەژێر چاودێری و بە ئامادەبوونی وەزیری خوێندنی باڵا و توێژینەوەی زانستی عێراق، د.نەعیم عەبوودی و ئامادەبوونی د.عەمرو عیزەت سەلامە ئەمینداری گشتی یەکێتی زانکۆکانی عەرەبی دەستی بەکارەکانی کرد.

دوای رێوڕەسمی کردنەوەی کارەکانی کۆنگرەکە کە بە ئامادەبوونی وەزیری خوێندنی باڵا و توێژینەوەی زانستی عێراق، د.نەعیم عەبوودی بەڕێوەچوو، پ.د.ئیدریس محەمەد تاھیر ھەرکی، سەرۆکی زانکۆی پۆلیتەکنیکی ھەولێر و سەرۆکی زانکۆکانی ھەرێمی کوردستان بەناوی ھەرێمی کوردستانەوە زنجیرەیەک دیدار و کۆبوونەوەیان لەگەڵ بەشداربووانی کۆنگرەکە ئەنجامدا.

لەو دیدارانەدا شاندی کوردستان لەبارەی پەرەپێدان بە پەیوەندی و ھەماھەنگیی نێوان زانکۆکان ئاڵوگۆڕی بیروبۆچوونەکانیان کرد.

بڕیارە لە میانی کارەکانی کۆنگرەکەدا چەندین بابەتی پەیوەندار بە پرۆسەی خوێندن لە زانکۆکان تاوتوێی بکرێت، لەوانە ھەماھەنگی نێودەوڵەتی، سیستەمی بۆلونا، پرۆژەکانی پۆلێنبەندی عەرەبی بۆ زانکۆکانی عەرەبی و چەند پرسێکی دیکەی گرنگ تاوتوێ بکرێت.

جێی ئاماژەیە، زانکۆی پۆلیتەکنیکی ھەولێر وەک یەکێک لە زانکۆکانی ئەندام لە یەکێتی زانکۆکانی عەرەبی ساڵانە بە فەرمی بانگھێشتی کۆنگرەی یەکێتییەکە دەکرێت کە ھەر خولێکی لەلایەن زانکۆیەکی ئەندام لە یەکێتییەکە میوانداریی دەکرێت.

 

ڕۆژی دووشەممە ٤ـی ئاداری ‌‌‌‌‌٢٠٢٤، لە هۆڵی کۆنفڕانسی کۆلێژی تەکنیکی سۆران، بە بەشداری هەریەکە لە  ( هەڵگورد شێخ نەجیب- سەرپەرشتیاری ئیدارەی سەربەخۆی سۆران، پ.د. مونا یاقو- سەرۆکی دەستەی سەربەخۆی مافی مرۆڤ لە هەرێمی کوردستان، مونا قەهوەچی جێگری سەرۆکی پارتی چاکسازی تورکمانی)، لە ژێر دروشمی “بە نەمانی کورسی کۆتاکان، پرۆسەی دیموکراسی لە هەرێمی کوردستان دەکەوێتە ژێر پرسیار”، نوسینگەی مافی مرۆڤی سۆران بە هەماهەنگی کۆلێژی تەکنیکی سۆران، پانێلێکی سەبارەت بە دوایین بڕیارەکانی دادگای فیدڕاڵی عێراق، تایبەت بە هەڵوەشاندنەوەی کورسی کۆتاکان لە هەرێمی کوردستان بەڕێوەبرد.
لە سەرەتای پانێلەکە (پ.ی.د. سیروان لەتیف حاجی) ڕاگری کۆلێژی تەکنیکی سۆران لەپاڵ بەخێرهێنانی میوانان لە وتەیەکدا تیشکی خستە سەر هەوڵەکانی دەستەڵاتی سیاسی کوردستان بە ئامانجی ڕەنگاڵەیی هێشتنەوەی کۆمەڵگای کوردستان، وەکو کۆمەڵگایەکی فرە ڕەنگ لە نەتەوە و ئاینی جیاواز و گوتی:” سەرکردایەتی سیاسی کوردستان بڕوای وابووە کەوا جگە لە کورد نەتەوەی دیکەش لە کوردستاندا هەن، بۆ ئەوەی بەشداریکردنیان لە پرۆسەی سیاسی بەرجەستە بێت، کورسی تایبەتیان لە پەرلەمانی کوردستان بۆ دیاریکردووە، تا ئەوانیش لە ڕێگای گەورەترین دامەزراوەی یاسایی کوردستان پارێزگاری لە داواکاری و مافە ڕەواکانیان بکەن”.
دواتر  جەواد سوار- بەڕێوەبەری نوسینگەی مافی مرۆڤی سۆران تیشکی خستە سەر مافی مرۆڤ لە هەرێمی کوردستان و گوتی:” ئێمە گەواهی ئەوە دەدەین کە پێکهاتەکان ڕۆڵێکی کاریگەریان هەبووە لە نەخشەی سیاسی هەرێمی کوردستان، بەشداریپێکردنی کۆتاکان لە پڕۆسەی سیاسی هەرێمی کوردستاندا وەک تابلۆیەکی ڕەنگاوڕەنگ پیشانی دەرەوە دراوە، بۆئەم مەبەستەش کاتێک سەرکردەکانی کوردستان سەردانی دەرەوە دەکەن یاخود یەکێک لە سەرکردەکانی دەرەوە سەردانی هەرێم دەکەن بە شانازییەوە باسی پێکەوەژیانیان کردووە لە کوردستان.
دواتر بەڕێوەبەری پانێل سیروان مەحموود مامۆستای زانکۆ پرسیارەکانی ئاراستەی بەشداربووانی پانێلەکەی کرد و بە تێر و تەسەلی گفتوگۆ لەسەر دوایین بڕیارەکانی دادگای فیدراڵی کرد کە تێدا  د. مونا یاقو سەرۆکی دەستەی سەربەخۆی مافی مرۆڤ لە هەرێمی کوردستان گوتی:” من بۆچوونم ئەوەیە ئەگەر هاتوو ئەو بڕیارە بەم شێوەیە بێت پێکهاتەکان کەسیان بەشداری لە هەڵبژاردنی پەرلەمانی کوردستان ناکەن، چونکە ئەگەر هاتوو پەرلەمانی کوردستان تەنها یەک پێکهاتەی تێدا بەشدار بێت، ئەوا کاریگەری زۆری دەبێت لەسەر ئاستی نێودەوڵەتی، بەڕاستی ئەوە مانای ئەوەیە کە دیموکراسییەت نییە و ئەوەش باجێکی زۆری دەبێت بۆ ئەو کەسانەی پاڵپشتی ئەم بڕیارەیان کردووە”.
لە درێژەی پانێلەکە مونا قەهوەچی ڕووی لە ئامادەبووان کرد و گوتی:” هەندێک تۆمەت دەخرێنە پاڵ پێکهاتەکان و دەڵێن پێکهاتەکان هاوکار و هاوئاوازن لەگەڵ لایەنێک، پێکهاتەکان بەشانازییەوە هاوپەیمانن لەگەڵ ئەم لایەنە دیاریکراوە ئەمە شتێکی شاراوە نییە، چونکە چۆن بۆ لایەنەکانی دیکە ڕەوایە بۆ بەرژەوەندی خۆیان هاوپەیمانی ببەستن، ئێمەش ئەم هاوپەیمانییەتەمان ئەنجامدا لە پێناو بەدەستهێنانی مافە ڕەواکانمان”.
یەکێک لە بەشداربووەکانی دیکەی پانێلکە هەڵگورد شێخ نەجیب بوو کە تایبەت  لەبارەی پێکەوەژیانی پێکهاتەکان لە سنووری ئیدارەی سەربەخۆی سۆران دواو گوتی:”ئێمە لە خێزانەکەمان ئەوەندە لەگەڵ پێکهاتەی کریستیانەکان تێکەڵببووین ئەو پەیوەندیەی ئێمە لەگەڵیان هەمانبوو لەگەڵ موسڵمانان نەمانبوو، کریستیانەکان لە سۆران میوان نین بەڵکو خەڵکی ئەم شارەن و کوردستان بەم پێکەوەژیانە جوان بووە”.