Blog

ڕۆژی دووشەمە ڕێکەوتی ٢٠٢٣/١١/٢٧ لە ژێر چاودێری سەرۆکی زانکۆی پۆلیتەکنیکی هەولێر ، کۆلێژی تەکنیکی سۆران لە هۆڵی کۆنفڕانسی کۆلێژ هەڵسا بە سازدانی پانێڵێک لە ژێر ناونیشانی ( مادەی هۆشبەر و مەترسییەکانی لەسەر کۆمەڵگا ) ، بۆ هەریەکە لە بەڕێزان ( د.سەڵاح ئەنوەر حەمەد ) و (سەرمەند حەمید بەرزنجی ) و ( محەمەد حەمید عەباس)، بە ئامادەبوونی سەرۆکی زانکۆی پۆلیتەکنیکی (پ.ی.د ئیدریس طاهر هەرکی ) ڕاگری کۆلێژ بەڕێز (م. پاکستان محەمەد ئەمین یوسف) و بەڕێز دەسکۆ عەلی لە لقی ١٠ ی (پ.د.ک ) و ئەندامانی ئەنجومەنی کۆلێژ و مامۆستایان و فەرمانبەران و قوتابیانی و چەندین لایەنی حزبی و حکومی ئیدارەی سەربەخۆی سۆران.

لە دەستپێکی پانێڵ بەڕێز ڕاگری کۆلێژ ( م.پاکستان محەمەدئەمین یوسف ) و بەڕێز (م.عەبدولباسط عەلی غەفور ) بەڕێوەبەری پانێڵ ووتارێکیان پێشکەش کرد.

لە پانێڵەکەدا به‌ گشتی باس لە ماددەی هۆشبەر و لێکەوتەکانی کرا کە لە ئێستادا یەکێکە لە گرنگترین بابەتەکانی جیهان و کوردستانە بەتایبەتی لە دەڤەری سۆران بەهۆی شوێنی جوگرافی، کە هاوسنورە لەگەڵ ئێران و تورکیا کە بە سەرچاوەی بڵاو بوونەوەی ماددەکە ناسراون.

ئامانج لە ئەنجامدانی پانێڵەکە هۆشیار کردنەوە و خستنەڕووی کۆمەڵێک زانیاری بوو لەسەر ماددە هۆشبەرەکان، جۆرەکانی، بازرگانی کردن، زیانەکانی هەروەها هۆکاری سەرهەڵدانی ماددە هۆشبەرەکان.

له‌گه‌ڵ باسكردنی چه‌ندین ته‌وه‌ری تری تایبه‌ت به‌ بابه‌ته‌كه،كه‌وا‌‌ به‌ شێوه‌یه‌كی زانستییانه‌ خوێندنه‌وه‌یان بۆ كرا.

ئەمڕۆ دووشەممە ٢٠٢٣/١١/٢٧ بەڕێز ( م.پاکستان حەمەدئەمین یوسف ) سەرۆکی ئەنجومەن و ئەندامانی ئەنجومەنی کۆلێژ ، پێشوازیان لە بەڕێز ( پ.د.ئیدریس محەمەد تاهیر هەرکی ) سەڕۆکی زانکۆی پۆلیتەکنیکی هەولێر و شاندی یاوەری كرد.

سەردانەکە بە مەبەستی کردنەوەی تاقیگەی(MMM) تایبەتە بە بەشی شیکاری نەخۆشییەکان بوو ، کە دەتوانرێت سەرجەم پشکنینەکان لەم تاقیگەیە ئەنجام بدرێن بە پێشکەوتووترین ئامێری سەردەم ، هاوکات ئامێره‌كان پێكهاتوون له‌ ئامێری ماگلۆمی بۆ پشكنینه‌ هۆرمۆنیه‌كان وه‌ ئامێری كۆباس C111 بۆ پشكنینه‌ كیمیاییه‌كان ، وه‌ ئامێری CBC بۆ پشكنینه‌كانی خوێن له‌ گه‌ڵ چه‌ند مایكرۆسكۆپێك .

دواتر تاقیگەی کۆمپیوتەری کرایەوە، کە پێکهاتبوو لە (٢١) سێتی کۆمپیوتەری کە سەرجەم قوتابیانی بەشەکانی کۆلێژەکەمان دەتوانن سوود لەم تاقیگەیە وەربگرن، لە وانەی کۆمپیوتەر .

لە کۆتاییدا سوپاسی هەڵوێست و ئامادەبوونی سەرۆکی زانکۆمان دەکەین لە هاوکاری و دابین کردنی سەرجەم کەلوپەل و پێداویستییەکانی تاقیگەی پزیشکی و تاقیگەی کۆمپیوتەر ، بەهیوای هەماهەنگی و کاری باشتر لە داهاتوودا.

بەناوی خودای گەورەو میهرەبان
رێزدار جەنابی مەلا مستەفا بارزانی
بەڕێزان میوانانی قەدرگرانی حکومى و حزبی
خانەوادەی قوتابییان
دەرچووانی ئازیزى پەیمانگەکەمان
مامۆستایانی خۆڕاگر
ئەم کاتەتان باش
هەست بە خۆشحاڵییەکى لە رادەبەدەر و شانازییەکى مەزن دەکەم، ئەمڕۆ وەک یەکەم راگرى پەیمانگەی تەکینکی مێرگەسۆر لە ژێر دروشمی خولی( خۆڕاگری و خۆبنیاتنان) لەبەردەمتان وەستاوم و، وتارى نۆبەرەى دەرچووانى پەیمانگەکەمانتان پێشکەشدەکەم؛ لە ناخى دڵەوە و بە ناوى تەواوی ئەنجومەنی پەیمانگەی تەکنیکی مێرگەسۆر، زۆر بە گەرمی بەخێرهاتنتان دەکەم بۆ رێوڕەسمى یەکەمین خولى دەرچووانی پەیمانگەی تەکنیکی مێرگەسۆر- زانکۆی پۆلیتەکنیکی هەولێر بۆ سالی خوێندنی 2022-2023
ئامادەبووانی هێژا….
ئەمڕۆ دواى دووساڵ خویندن و، بە دەستهێنانى ئەزموونێکى دەوڵەمەند، پۆلێک لە قوتابییانی ئازیزی پەیمانگەکەمان، بروانامەی دەرچوون/ دبلۆمی تەکنیکی لە دوو پسپۆریەتی جیا (کارگێڕی کاروتەکنیکی وەرگێڕان) وەردەگرن و، ئامادە دەبن بۆ قۆناغێکی تری ژیانیان، کە قۆناغى بەکارهێنانى زانست و زانیارییەکانیانە بۆ خزمەتکردنى کۆمەڵگە.
قوتابییانی ئازیز..
پەیمانگەکەتان، یەکەمین ناوەندی ئەکادیمی و تەکنیکیی خوێندنی بالایە لە سنوری قەزای مێرگوسۆر، کە لە سالی 2019 فەرمانی وزاری بۆ دەرچووەو لە ساڵی 2021یەکەم کاروانی قوتابیانی خۆی وەرگرتووە ؛ لەو تەمەنە کورتەدا، سەرەڕاى هەموو ئاڵنگارى و سەختییەکان، کە پەیوەست بوون بە بنیاتنانى پەیمانگەیەک لە سفرەوە، هەنگاوی باشی لە بواری ئەکادیمی و توێژینەوەی زانستی و پێشخستنی توانا مرۆییەکان و، پەیوەندی نێوخۆیی و نێودەوڵەتی ناوە و، چووەتە ئاستێکی بەرزەوە و، بووەتە مایەى ئومێدى خەڵکى دەڤەرەکە. ئەمە جگە لەوەى کە هەر لە سەرەتاى دامەزراندنییەوە، هەوڵمانداوە بیکەینە بەشێک لە کۆمەڵگە و کاریگەرى لەسەر دەورووبەرى خۆمان دابنێین. بەخۆشییەوە لەمبارەشەوە، بە ئەنجامى زۆر باش گەیشتووین، کە مایەى خۆشحاڵییە.
دەرچووانی خۆشەویست.
لە کاتێکدا ئێمە لێرە کۆدەبینەوە بۆ ئاهەنگگێڕانی سەرکەوتنەکانتان و، چنینەوەى دەسکەوتەکانتان، پێویستە سەرەتاى بیرکردنەوەش بێت لەوەى، کە رێگاى زانست، رێگایەکى ئاڵۆز و پڕ کەند و لەندە. رێگایەکە کە پێویستى بە شەونخونى و رامانى رەخنەگرانە و داهێنەرانە هەیە؛ رێگایەکە کە پێویستی بە خۆپەروەردەکردنى بەردەوام و کۆڵنەدان و ماندوونەناسى هەیە. پێویستە ئەوە بزانن، بە هەبوونى ئەم تایبەتمەندییانە و، کردنیان بە بەشێک لە رۆتێنى ژیانتان، سەرکەوتنتان هەروەکو ئێستا، لە داهاتووشدا مسۆگەرە. ئێوە بەوتایبەتمەندییانەوە، بە لێهاتوویى پێویست دەگەن و، زۆر بە هێزەوە تواناى رووبەڕووبوونەوەى ئاڵنگارى و کێشە ئاڵۆزەکانى دنیاى دەورووبەرتان دەبێ.
دنیایەک کە گۆڕانکارییەکانى خێرا و بەردەوام و، هەلومەرجەکانى بەردەمى ناڕوون و نادڵنیان. بۆیە لێرەوە، بەرپرسیارێتییەکى گەورە دەکەوێتە سەرشانتان و، وەک هێزى کارى پسپۆڕ، پێویستە بەردەوامبن لەبەرەو پێشبردنى حیکمەت و لێزانى خۆتان و، خۆتان بۆ ئەو رووبەڕووبوونەوەیە ئامادە بکەن. ئەمە جگە لەوەى کە دنیاى دەرەوەى زانکۆ، ئەگەر هەلێکى کارى تێدا هەبێ، بە تەواوى پەیوەستە بە توانا و لێهاتووییەکانتان و، چۆنیەتى پەرەپێدانى بەردەوامى ئەو لێهاتووییانە.
ئێمە دڵنیاین، خوێندنى دوو ساڵى ئێوە لە پەیمانگەکەمان، لەژێر تیشکى بەرنامەیەکى زانستى تۆکمە و، بە هەوڵ و ماندووبوونى ژمارەیەک مامۆستای دڵسۆزوخۆراگر، هەوێنی دەوڵەمەندى رێڕەوى داهاتووى ژیانتان دەبێت و، هیوادارین بە ئێتیک و ئەخلاقێکى بەرزەوە، بتوانن سوود لە پسپۆڕى و زانیارییەکانتان وەرگرن.
بەرێزان:
دەمەوێت لە قولایی دلەوە سوپاسی رێزدار (مەسرور بارزانی) سەرۆکی حکومەتی هەرێمی کوردستان و، هەموو دامەزراوە پێوەندیدارەکانى حکومەتى هەرێمى کوردستان بکەم، کە هەمیشە سەرەڕاى کێشە و بەربەستە زۆرەکانى بەردەمیان، لەخۆبردووانە و دڵسۆزانە یارمەتیدەرمان بوون بۆ گەیاندنى پەیمانگەکەمان بەمڕۆ.
ئازیزان
زۆر بە پێویستی دەزانم سوپاسێکی تایبەتی جەنابی (ملامستەفا بارزانی) و، نووسینگە بەرێزەکەیان،بکەم، کە لەم کاروانە زانستییەدا دەستیان گرتین، ئومێدیان پێبەخشین بۆ ئەنجامدانى کارى مەزن و بەردەوام.
هاوکات لەگەڵ پیرۆزبایى، سوپاسى بنەماڵەى بەڕێز و، هێژاى قوتابییەکانمان دەکەم، بۆ پشتگیرى بێ دریغى جگەرگۆشەکانیان، کە بێگومان ئەم سەرکەوتنە پشکێکى مەزنى ئەوانیشى تێدایە. هەروەها هەموو ئەو کەسایەتى و ئازیزانەش جێگاى رێز و ستایشن.
لە هەمان کاتدا، نابێت ڕۆڵی یەکێتی قوتابییانی کوردستان لە بیربکرێت کە هەردەم پالپشتی پەیمانگە و قوتابییەکانمان بوونە لە کاروچالاکیەکاندا. هەروەها سوپاسی لێژنەی ئامادەکاری ئاهنگی دەرچووانی پەیمانگەکەمان دەکەم کە شەو رۆژیان کردۆتە یەک بۆ سەرخستنی ئەم مەراسیمە هەژیە.
لە کۆتاییدا، دەمەوێت بڵێم، قوتابییانى ئازیز، ئەمڕۆ ئەگەرچى کۆتایى قۆناغێکى ئەکادیمتانە، بەڵام سەرەتاى قۆناغگەلێکى دیکەى دووروو درێژی ژیانتانە. ئومێدم وایە هەمیشە شەوقى سەرکەوتن وەها لەچاواکانتدا،ببریسکێتەوە. زانست و پەرەپێدان، هەولە بۆ ئەوەی ژیانی مرۆڤی کوردستانی خۆشتربکرێت، وە ئاستی رۆشنبیری و زانیاری خوێندن بەرزتربێت و، نیشتیمانسازی و ئایندەسازی لەناو هزری کوردستانیان پتەوتربێت.
جارێکی تربەخێربێن و، پیرۆزبایى لە یەکەمین خولى دەرچووانی پەیمانگەکەمان [پەیمانگەی تەکینکی مێرگەسۆر] دەکەم. شانازیتان پێوە دەکەین و، هیوادارین هەمیشە سەرکەوتوبن و، ئێرە بە ماڵى گەورەی ئەکادیمی خۆتان بزانن.
کوردستانیش هەر ئاوەدان و، خۆراگرو، خۆ بنیاتنەر بێت.

زۆر سوپاس

ڕۆژی پێنجشەممە ڕێکەوتی 23ی نۆڤەمبەری 2023، سەرۆکی زانکۆی پۆلیتەکنیکی هەولێر پ.د. ئیدریس محەمەد تاهیر هەرکی پێشوازی لە شاندێکی ئینستیتیوتی داهێنان و نوێگەری کوردستان (K.I.I) کرد، کە پێکهاتبوون لە بەڕێزان د. سەرباز نەجیب عوسمان جێگری سەرۆکی بۆرد و هاوبەڕێوەبەری جێبەجێکاری (K.I.I)، د. ئازاد نەجاڕ ئەندامی بۆرد و هاوبەڕێوبەڕی جێبەجێکاری (K.I.I) و شاندی یاوەریان.

لە دیدارێکدا کە هەریەکە لە پ.ی.د. نەجیب تۆما بەتۆ یاریدەری سەرۆکی زانکۆ بۆ کاروباری زانستی پ.ی.د. بۆتان مەجید ئاسنگەر ڕاگری کۆلێژی تەکنەلۆجی هەولێر پ.ی.د. ڕەنج سیروان عەبدوڵڵا بەڕێوبەری پەیوەندییە نێودەوڵەتییەکان،ئامادەیبوون، هەردوو لا جەختیان کردەوە لەسەر هاوکاریکردن و هەماهەنگیکردنی یەکتر لە بواری داهێنان و سوود وەرگرتن لە توانا و بەهرەی مامۆستا و قوتابییانی زانکۆ لەو بوارانەی کە پەیوەستن بە گەشەسەندنی ئابووری کوردستان و بنیاتنانی بنەمایەکی پیشەسازی بە تایبەتی لە بواری وزە بە سوودوەگرتن لە سەرچاوە سروشتییەکان.

لەم دانیشتنەدا هەردوولا ڕێککەوتن لەسەر ئەنجامدانی کۆڕبەندێکی تایبەت بە پەرەپێدانی تواناکانی داهێنان بۆ بەشێک لە مامۆستا و قوتابییانی زانکۆمان لە لایەن پسپۆڕان و شارەزا لە (K.I.I)، هەروەها ئاشناکردنیان بە دید و ئامانج و ستراتیژیەتی نیستیوتی داهێنان و نوێگەری کوردستان (K.I.I).

دواتر یاداشتنامەی لێک تێگەیشتن واژوو کرا لە لایەن هەردوو لا کە ئەم خاڵانەی خوارەوە لە خۆ دەگرێت:-

• ئاڵوگۆڕی زانیاری و بیرۆکەی نوێ لە بواری داهێنان.
• هاوکاری و هەماهەنگی بۆ پەرەپێدان و پێشخستنی پرۆژەکانی قوتابییان.
• ئەنجامدانی کۆڕبەند و وۆرکشۆپ بۆ پەرەپێدانی تواناکانی قوتابییان و مامۆستایان لە بواری داهێنان.
• بەشداریکردن لە کۆنفراس و کۆڕبەند و وۆرکشۆپی هەر لایەک لە لایەن ستافی لایەنی دووەم.
• سەردانی سەنتەر و تاقیگە و وەرشەی یەکتر لە لایەن ستافی هەردوولا.
• سوودوەرگرتن لە بەشداریکردنی کۆنفراسە جیهانییەکان تایبەت لە بواری نوێگەری و داهێنان.
• دابینکردنی فەندی جیهانی بۆ پڕۆژەکانی داهێنان و نوێگەری.