Blog

رۆژی سێ شەممە رێکەوتی 14ـی دیسەمبەری 2021 بە ئامادەبوونی یاریدەدەری سەرۆکی زانکۆ بۆ کاروباری قوتابیان پ.ی.د. یوسف مصطفی  رسول، بەڕێوبەرایەتی چالاکییەدەرەکییەکانی سەرۆکایەتی زانکۆ بەهەماهەنگی لەگەڵ بەڕێوبەرایەتی گشتی خانەنشینی هەرێم و رێکخراوی سۆنۆشاد وێرکشۆپێکی بەسەرپەرشتی راهێنەر رێمەند خالد نوری بەرێوبەری بەشی یاسایی لە ب.گ. خانەنشینی هەرێم بەڕێوەبرد.

وێرکشۆپەکە دەربارەی یاسا و رێنماییەکانی خانەنشینی بۆ فەرمانبەرانی میری بوو کە بۆ فەرمانبەرانی کۆلێژ و پەیمانگەتەکنیکییەکان و سەرۆکایەتی زانکۆ کرابوویەوە، تیایدا راهێنەر رێمەند بەوردی باسی لە یاسا و رێنماییەکانی تایبەت بە خانەنشینی کرد هەروەها باسی لە چۆنیەتی ئەنجامدانی کارەکانی مامەڵەی خانەنشینی و کەمکردنەوەی رۆتین لەکاتی بەڕێکردنی مامەڵەکاندا کرد.

لە کۆتایی وێرکشۆپەکەدا خەڵاتی رێزلێنان بەخشرایە راهێنەر و سەرۆکی رێکخراوی سۆنۆشاد و هەروەها بڕوانامەی بەشداربوون بەخشرایە فەرمانبەران.

رۆژی سێ شەممە رێکەوتی 14ـی دیسەمبەری 2021 لە دیوانی وەزارەتی خۆێندنی باڵا و توێژینەوەی زانستی، هەردوو وەزیری ناوخۆ رێبەر ئەحمەد و وەزیری خوێندنی باڵا و توێژینەوەی زانستی د. ئارام محمد قادر، بە ئامادەبوونی سەرۆکی زانکۆی پۆلیتەکنیکی هەولێر پ.ی.د. کاوە عبدالکریم شێروانی و راگری پەیمانگەی تەکنیکی پزیشکی هەولێر پ.ی. ئومێد ئەرشەد حەوێزی یاداشتێکی لێکتێگەیشتنیان واژوو کرد کە تایبەت بوو بە کردنەوەی بەشی بەڵگەکانی تاوان لە پەیمانگەی تەکنیکی پزیشکی هەولێری سەر بەزانکۆی پۆلیتەکنیکی هەولێر.

دوای واژووکردنی یاداشتەکەش لە کۆنگرەیەکی رۆژنامەوانیدا وەزیرى خوێندنى باڵا و توێژینەوەى زانستى ڕایگەیاند: کردنەوەى بەشى (بەڵگەکانى تاوان) لە زانکۆى پۆلیتەکنیکى هەولێر هەوڵێکە بۆ خزمەتکردن بە ڕەوتى لێکۆڵینەوەکان و ئەنجامدانى لێکۆڵینەوەى زانستى و ئەکادیمى لە تاوانەکان بۆ گەیشتن بە سەرچاوەى تاوانەکان، لەهەمان کاتیشدا پێگەیاندنى کادیرى پسپۆڕە لە بوارى بەڵگەكانى تاوان و تاقیگەى تاوان بۆ وانە پراكتیكییەكان.

لەبەرامبەریشدا وەزیرى ناوخۆ: وتى سەرۆکى حکومەتى هەرێمى کوردستان پاڵپشتە بۆ کردنەوەى ئەم بەشە و بەمەش بۆشایى ئەکادیمى لە وەزارەتەکەمان پڕدەکرێتەوە، هاوکات وتیشى ئەم بەشە تەواوى ئامادەکارى زانستى لەلایەن وەزارەتى خوێندنى باڵا بۆ کراوە گرنگیەکى تایبەتى پێدراوە بەتایبەت لە داڕشتنى پڕۆگرامى خوێندن و ستافى پێویستى وانە وتنەوە، ئاماژەکانیش پێمان دەڵین پڕۆژەکە سەرکەوتوو دەبێت و تەواوى پاڵپشتى خۆشمان بۆ سەرکەوتنى لەسەرجەم لایەنەکانەوە دووپات دەکەینەوە.

بەر لە ئیمزاکردنى یاداشتى لێکتێگەیشتن بۆ کردنەوەى بەشى (بەڵگەکانى تاوان) لەزانکۆى پۆلیتەکنیکى هەولێر لە کۆبونەوەیەکدا وەزیرى ناوخۆ ڕایگەیاند: ئێمە لە وەزارەت تاقیگەو ئەفسەرى باش و سەرکەوتومان هەیە، بەڵام ئەم بابەتە بەخول و ئامادەکردنى کادیر ڕێکخستنى ئەستەمە، بۆیە بە کردنەوەى ناوەندێکى زانستى لەو شێوەیە دەبێتە هاوکارێکى باش بۆ دادگاکان، دەستخۆشیشى لە وەزارەتى خوێندنى باڵا کرد بۆ کردنەوەى ئەم بەشەو جەختى لەپاڵپشتى و هاوکارى تەواوى وەزارەتەکەى کرد بۆ سەرەکەوتنى خوێندن لەو بەشە هەستیارە، ڕێبەر ئەحمەد: تەئکیدى کردەوە کە هەر کارێک بکەوێتە ئەستۆى وەزارەتى ناوخۆ بۆ سەرەکەوتنى ئەو بەشە درێغى ناکەن.

شیاوی باسە لەسەر پێشنیاری زانکۆی پۆلیتەکنیکی هەولێر بەشەکە کراوەتەوە و وەک دەستپێک 25 ئەفسەر و کارمەندی وەزارەتی ناوخۆ دەست بەخوێندن دەکەن لەئەمساڵی خوێندنی 2021-2022 لە بەشی ناوبراو، بڕیارە لە داهاتووشدا لە کۆلێژیش ئەم بەشە بکرێتەوە و بڕوانامەی بەکالۆریۆس ببەخشێت بە قوتابیانی.

رۆژی دووشەممە رێکەوتی 13ـی دیسەمبەری 2021 سەرۆکی زانکۆ پ.ی.د. کاوە عبدالكريم شێروانی بە ئامادەبوونی راگری پەیمانگای تەکنیکی پزیشکی هەولێر پ.ی. مامۆستا ئومێد ٲرشد حەويزی خەڵاتی ڕێزلێنانی بەخشییە هەردوو مامۆستای زانکۆ پ.د. فؤاد حسين كامل و م. طارق ويسي صادق بەبۆنەی بەدەستهێنانی مەدالیای زێڕ لەسەر پاکانەی داهێنان ( براءة اختراع ) لە کۆنفرانسێکی زانستی لە زانکۆی بەسڕا.

هەروەها سەرۆکی زانکۆ پیرۆزبایی گەرمی لە مامۆستایان کرد و سوپاس و پێزانیی ئاڕاستە کردن، و پشتگیری خۆی بۆ دووپاتکردنەوە بۆ بەردەوامی برەودان بە ئەنجام دانی داهێنانی زانستی و زیاتر بەرزکردنەوەی توانای زانستی مامۆستایانی زانکۆ بۆ پێشخستنی زیاتری زاکۆ.

کۆنفرانسەکە لە رۆژانی 10-11ـی نۆڤەمبەری 2021 لە زانکۆی بەسڕا کۆلێژی دەرمانسازی لە شاری بەسڕا بەڕێوەچووبوو و تیایدا هەردوو مامۆستای پەیمانگەی تەکنیکی پزیشکی هەولێر پ.د. فؤاد حسین و م. طارق ویسي مەدالیای زێڕیان بەدەست هێنا.

رۆژی پێنج شەممە ڕێکەوتی 9ـی دیسەمبەری 2021 لە هۆڵی سەنتەری ڕۆشنبیری زانکۆى پۆلیتەکنیکى هەولێر لەژێر چاودێری د. ئارام محمدقادر وەزیری خوێندنی باڵا و توێژینەوەی زانستی و، بەدروشمی تێپەڕاندنی بەربەستەکان و، بە ئامادەبوونى پارێزگاری هەولێر ئومێد خۆشناو، نوێنەرى وەزارەتی خوێندنی باڵاوتوێژینەوەی زانستی د.ئەمیر عەبدولڕەحمان و سەرۆکى ژمارەیەک لە زانکۆ حکومى و تایبەتەکان و، مامۆستایان و دەرچوان و کەسوکاریان، مەراسیمی ئاهەنگی دەرچووانی زانکۆی پۆلتەکنیکی هەولێر بەڕێوەچوو.

ڕێوڕەسمەکە بەهاتنە ناوەوەی ئەندامانی ئەنجومەنی زانکۆ دەستیپکرد، پاشان ئامادەبووان دەقیقەیەک وەستان بۆ گیانی پاکی شەهیدان و گوێ گرتن لە سرودی نیشتمانی ئەی رەقیب ، دواتر چەند وتارێک پێشکەشکرا.

سەرەتا سەرۆکی زانکۆی پۆلیتەکنیکی هەولێر پ.ی.د. کاوە عبدالکریم شێروانی وتارێکی پێشکەش کرد و ووتی: “دەرچووانى خۆشەویست، دایکان و باوکان، کەس و کارى دەرچووان، پیرۆزبایی دەرچوونى ئەم پۆلە قوتابیەتان لێدەکەم و هیواى تەمەن درێژیتان بۆ دەخوازم…

هیواخوازم ئەم دەرچووانە داهاتوویەکى گەشیان هەبێت و بتوانن بەپێى پسپۆرى خۆیان کارێکى باشیان دەست بکەوێ و لە ژیاندا سەرکەوتوو بن، جا چ لە کەرتی گشتی یان لە کەرتى تایبەت بەپێى پسپۆریان یان بتوانن پڕۆژەى تایبەت بە خۆیان هەبێت و کارى تایبەت بەخۆیان برەو پێ بدەن.

لەساڵانى ڕابردوودا بەهۆی بڵاوبوونەوەى پەتاى نەگریسی کۆڕۆنا نەمانتوانى بەپێى پێویست ئاهەنگى دەرچوون، کە شایستەى دەرچووانى ئێمە بێت بۆ دەرچووانى خۆمان لە دوو ساڵى ڕابردوودا ئەنجام بدەین، بەڵام ئەگەر بەشێوەیەکى ڕەمزیش بێت پێمان خۆشە پیرۆزبایی دەرچوونیان لێ بکەین و ئاهەنگێکى خنجیلانە بە ڕەچاوکردنى ڕێنماییە تەندروستییەکان بۆ دەرچووانى خۆمان ساز بکەین.

دەرچووانى ئازیز … ئێوە دەزانن، کە قۆناغى تەواو کردنى زانکۆ، قۆناغێکى گرنگە، لێرەوە لەوانەیە زۆر بە تیۆری و لەناو پۆل و تاقیگەکاندا، وانەکانتان خوێند بێ و فێری زانستەکە بوو بن، بەڵام لەمەودوا لە ژیانى ڕۆژانەتاندا لەناو کۆمەڵگە زیاتر فێری کارەکان دەبن بە شێوەیەکى کردارەکى، لەبەر ئەوە، پاش دەرچوونیش پرۆسەى خوێندن و بە تایبەتیش فێربوون هەر بەردەوام دەبێت و پێویستیش دەکات زیاتر خۆتان ماندوو بکەن، چ بە خوێندنەوە بێت، چ بە کارکردن بێت، تا لەم ڕێگەیەوە بتوانن داهاتوویەکى گەشتر بۆ خۆتان مسۆگەر بکەن.

ئێمە لە زانکۆی پۆلیتەکنیکی هەولێر هەر هەموومان شانازى بەوە دەکەین، کە هەوڵمانداوە جۆرێک لە ئینتیما و خۆشەویستی و دڵسۆزى دروست بکەین، هەر لە سەرۆکی زانکۆ و ئەنجوومەنى زانکۆوە تا دەگاتە سەرۆک بەش و فەرمانبەران و قوتابیان، بەجۆرێک، کەکارێک بکەین زانکۆکەمان پێشکەوتنێکى جۆری بەخۆوە ببینێ و ببێتە زانکۆی شانازیمان.

ئەو پێشڤەچوونانەى زانکۆی پۆلیتەکنیکی هەولێر لە ساڵانى ڕابردوودا وایکردوە، کە بە کردارەکى قوتابیان و دەرچووانمان شانازى بەوەوە بکەن، کە بە شانازیەوە بڵێن: ئێمە دەرچووى زانکۆی پۆلیتەکنیکی هەولێرین، بێگومان ئەمەش بە ماندوو بوونى تەواوى ستافی زانکۆمان لە مامۆستایان و فەرمانبەران و قوتابیانى زانکۆمان هاتۆتە کایەوە، ئێمە تەنها ڕێخۆشکەر و هاوکار بووین بۆ هاتنە پێشەوەى گەنجان و هەروەها بۆ پێگەیاندنى گەنجان، ئەوەیتر هەموو کارەکە ئەو چینە گەنج و لاوە بەهێز و بەتوانا مەعنەوى و مەعریفیەوە دەیکەن، کە بوونەتە داینەمۆی زانکۆ لە تەواوى ئاستەکان، دڵنیام لە داهاتوودا گەشانەوە و درەوشانەوە چاوەڕێیان دەکات، هەر ئەمەش بە قازانجى ووڵات و نیشتمان تەواو دەبێت.

دەرچووانى قەدر گران… لەمەودوا شێوازى کارکردن، ئەو پیشە و کارانەى، کە هەن گؤڕانکاری زۆریان بەسەردا دێت، لەگەڵ پێشڤەچوونە تەکنەلۆژیەکانى دونیا بەتایبەتی ئەوەى، کە پێى دەگووترێ (زیرەکى دەستکرد)، کە زۆر شێوازى کارەکانى گۆڕیوە، ئەو شێوازى کلاسیکیەى، کە هەیە لەوانەیە لە داهاتوویەکى نزیکدا نەمێنێت، لەبەر ئەوە پێویستە خۆتان ئامادە بکەن بۆ کارە نوێکان لەڕووى تەکنەلۆجیا و IT و لەڕووى زیرەکى دەستکرد زیاتر بەشێوەیەکى کردارەکى خۆتان فێر بکەن بۆ ئەوەى بتوانن لە بازاڕى کاردا جێگاى خۆتان بکەنەوە و لە گۆشەیەکدا خۆتان و تواناکانتان بدۆزنەوە.

دەرچووانى بەڕێز … زۆر گرنگە، کە دەرچووانى زانکۆی پۆلیتەکنیکی هەولێر متمانەى تەواویان بەخۆیان هەبێت، چونکە متمانە بەردى بناغەى دروست بوونى کەسایەتى هەموو مرۆڤێکە، لەبەر ئەوە لەم تەمەنەى ئێستاى ئێوەدا زۆر گرنگە ئێوە متمانەتان بەخۆتان هەبێت و کارى جددى بکەن و زیاتر خۆتان ماندوو بکەن بۆ ئەوەى کەسایەتیەکى جێگیر بۆ خۆتان دروست بکەن و خاوەن هێز و متمانە بن بۆ ئەوەى لە هەموو شوێنێک لە کەرتى تایبەت و کەرتی حکومى پێویست بن و بتوانن بخزێنە هەموو ئەو بۆشایی و کەلێنانەى، کە هەن وە ببنە جێگاى متمانە و دەستخۆشی ئەوەش دەبێتە گەورەترین شانازى لە ژیانتان.

لە کۆتاییدا دووبارە پیرۆزبایی لەم پۆلە گەنج و لاوانە دەکەم … پیرۆزبایی لەدایک و باوکان و کەسوکارتان دەکەم، هیواى ژیانێکى خۆشتان بۆ دەخوازم … هەر بژین و بۆ پێشەوە … بەهیواى کوردستانێکى ئاوەدان و بەهێز و گەشاوە”.

دواتر د.ئەمیر عەبدولڕەحمان ڕاوێژکاری وەزارەتی خوێندنی باڵا و توێژینەوەی زانستی لە وتارێکدا، کە بەناوی وەزارەتی خوێندنی باڵا و توێژینەوەی زانستی پێشکەشی کرد، دوای پیرۆزبایی کردن لە دەرچووان و کەسوکاریان، دەستخۆشی لە مامۆستایان و ستافی زانکۆ کرد، کە سەرباری قەیرانەکان، بەڵام توانیان پۆلێک لە گەنجانی وڵات بە زانستی سەردەم پێ بگەێنن و پێشکەشی کۆمەڵگەی بکەن، وتیشی مایەی خۆشحاڵیە کە زانکۆی پۆلیتەکنیکی هەولێر بۆ ماوەی سێ ساڵە سیستمی بۆلۆنیا پڕۆسیس جێبەجێ دەکات،  هەر لە وتارەکەیدا ڕاوێژکارى وەزارەتى خوێندنى باڵا و توێژینەوەى زانستى باسی لە گرنگی خوێندنی تەکنیکی کردو ڕایگەیاند: زانکۆی پۆلیتەکنیکی کۆمەڵێک بەشی زانستی گرنگی لەخۆگرتوە، کە هاوتەریب و گرنگن بۆ بازاڕی ئەمڕۆی کوردستان، ئەوەش لەگەڵ نەخشەڕێ و پلانى ستراتیژى وەزارەتى خوێندنى باڵا و توێژینەوەى زانستى یەکدەگرێتەوە، لە کۆتایشدا پیرۆزبای لە سەرۆکایەتی زانکۆی پۆلیتەکنیکی هەولێر کرد، کە ڕیزبەندی زانکۆکەیان بەرزکردۆتەوە.

پاشان قوتابیانی کۆلێژەکانی تەکنیکی ئەندازیاری،کارگێڕی، تەندروستی پزیشکی، تەکنەلۆژیای هەولێر و پەیمانگەکانی تەکنیکی کارگێڕی و پزیشکی هەولێر قۆناغ بە قۆناغ هاتنە هۆڵەکە و مەراسیمی سوێندخواردنی یاساییان ئەنجامدا ،و لەسەر راسپاردەی ئەنجومەنی کۆلێژ  و پەیمانگەکان سەرۆکی زانکۆی پۆلیتەکنیکی هەولێر بڕوانامەی بەکالۆرێوس پێشکەش بەدەرچوان کراو کۆتایى بەئاهەنگەکە هات.

photo: by Xesro Ibrahimi