Category Archives: سەرۆکایەتی زانکۆ

لە سەر بانگهێشتی فەرمی زانکۆی بیلیفێڵدی ئەڵمانی بۆ زانستە پراکتیکیەکان، شاندێکی زانکۆی پۆلیتەکنیکی هەولێر بەشدارییان کرد لە چالاکیەکانی هەفتەی نێودەوڵەتی زانکۆی بیلیفێڵد، کە لە 8ـی ئایار تاکو 12ـی ئایاری 2023 بەردەوام بوو.

لە چالاکییەکەدا نوێنەری زانکۆکانی 31 وڵات بەشدار بوون وە زانکۆکەمان یەکێک بوو لە زانکۆ بەشداربووەکان. کە تیایدا چەندین سیمینار و چالاکی نێودەوڵەتی ئەنجامدرا.

شاندی زانکۆمان پێکهاتبوون لە پ.ی.د.بۆتان مەجید ئاسنگەر، راگری کۆلێژی تەکنەلۆجی هەولێر و پ.ی.د. رەنج سیروان عەبدوڵڵا، بەرێوەبەری پەیوەندیە نێودەوڵەتیەکانی سەرۆکایەتی زانکۆ، و هەر لە پەراوێزی چالاکییەکەدا شاندی زانکۆمان چەندین دیدار و کۆبۆنەوەیان لەگەڵ بڕیار بەدەستان و توێژەر و پرۆفیسۆرەکانی ئەم زانکۆیە ئەنجامدا بە مەبەستی فراوانکردنی ئەو پەیوەندیە ئەکادیمی و فەرمیەی لە ساڵی 2019 ــەوە لە نێوان زانکۆی پۆلیتەکنیکی هەولێر و زانکۆ ئەڵمانیەکەدا هەیە.

لە کۆبوونەوەکاندا زۆر بابەتی تایبەت بە ئاڵوگۆڕی قوتابیان و ئەنجامدانی توێژینەوەی پرۆژەکانی قوتابیانی ماستەر و دکتۆرا بە هاوبەشی گفتوگۆی جددی لەسەرکرا، سەرەرای ئەنجامدانی کۆنفرانس و توێژینەوەی هاوبەش لە نێوان ستافی هەردوو زانکۆ.

هەروەها بڕیارە سەرۆکایەتی زانکۆ و کۆلێژە تایبەتمەندەکان لە هەردوولا وردەکاری جێبەجێکردنی پرۆسەکان دابڕێژن.

شایانی باسە مامۆستا موئەیەد ئیسماعیل عوسمان مامۆستای توێژەر لە زانکۆی بیلەفێڵد، کە بەرەچەلەک خەڵکی هەولێرە، هاوکارێکی گرنگ بوو لە رێکخستنی پەیوەندی و ئامادەکاری و بە ئەنجام گەیاندنی کۆبوونەوەکان.

پ.د.ئیدریس محەمەد تاهیر هەرکی، سەرۆکی زانکۆی پۆلیتیەکنیکی هەولێر بە یاوەری ژمارەیەک لە ئەندامانی ئەنجومەن و بەرێوبەرانی سەرۆکایەتی زانکۆ، سەردانی یادگەی نیشتمانیی بارزانی نەمریان کرد لە بارزان و لە لایەن شێخ خەڵات بارزانی پێشوازییان لێکرا.

لە پەراوێزی کۆنفرانسی زانستی قوتابیانی زانکۆی پۆلیتەکنیکی هەولێر کە لە پەیمانگای تەکنیکی مێرگەسۆر بەڕێوەچوو، پ.د.ئیدریس محەمەد تاهیر هەرکی، سەرۆکی زانکۆی پۆلیتیەکنیکی هەولێر لەگەڵ ژمارەیەک لە ئەندامانی ئەنجوومەنی زانکۆ و بەڕێوەبەرانی زانکۆ و بەشێکی زۆری بەشداربووانی کۆنفرانسەکە، سەردانی یادگەی نیشتمانیی بارزانی-یان کرد لە بارزان.

لە میانی سەردانەکەدا، بەشەکانی یادگەکە بەسەرکرایەوە و لە لایەن سەرپەرشتیار و رێبەرانی یادگەکەوە زانیاری ورد و نەبیستراو بە ئامادەبووان درا دەربارەی هەموو ئەو کەلوپەل و بەڵگەنامە مێژوویانەی کە لە چەند بۆکسێکدا نمایش کراون.

رۆژی یەکشەممە رێکەوتی 14ـی ئایاری 2023 بە ئامادەبوونی سەرۆکی زانکۆ پ.د. ئیدریس محەمەد تاهیر هەرکی، ژمارەیەک بەرپرسی حزبی و حکومی دەڤەری مێرگەسۆر و ئیدارەی سەربەخۆی سۆران و ئەندامانی ئەنجومەنی زانکۆی پۆلیتەکنیکی هەولێر، سێیەمین کۆنفرانسی زانستی قوتابیانی زانکۆی پۆلیتەکنیکی هەولێر لە پەیمانگەی تەکنیکی مێرگەسۆر بەڕێوەچوو.

کۆنفرانسەکە بە گوێگرتن چەند ئایەتێک لە قورئانی پیرۆز و مارشی نیشتمانی ئەی ڕقیب دەستی پێکرد، پاشان یاریدەدەری سەرۆکی زانکۆ بۆ کاروباری قوتابیان و سەرۆکی لێژنەی باڵای کۆنفرانس پ.ی.د. یوسف مصطفى رسول وتەیەکی پێشکەش کرد و تیایدا بەناوی لێژنەی باڵای کۆنفرانسەوە بەخێرهاتنی ئامادەبووانی کرد و باسی لە گرنگی کۆنفرانسەکە کرد بۆ قوتابیان و وتی: “بەڕێزان کۆنفرانسی زانستی قوتابیان کۆنفرانسێکی ساڵانەیە تیایدا باشترین پڕۆژەی دەرچووانی قوتابیان لەسەر ئاستی بەشە زانستییەکانی کۆلێژ و پەیمانگە تەکنیکییەکان بەشداردەبن، مەبەستیش لەو کۆنفرانسە خستنەڕووی بەرهەمی ماندووبوون و لێهاتوویی قوتابیانە لەئەنجامدانی پڕۆژەی دەرچوون بەهاوکاری و سەرپەرشتی مامۆستا بەڕێزەکان”.

دواتر سەرۆکی زانکۆ پ.د. ئیدریس محەمەد تاهیر هەرکی وتەیەکی پێشکەش کرد و تیایدا بەخێرهاتنی بەرپرسانی حزبی و حکومی و مامۆستایان و قوتابیانی بەشداربووی کرد و وتی: “بەناوی خۆم و ئەنجومەنی زانکۆی پۆلیتەکنیکی هەولێر بەخێرهاتنی میوانە بەڕێزەکان دەکەیین، هەروەها پیرۆزبایی لەو قوتابیانە دەکەین کە سەرکەوتووانە توانییان ئەو قۆناغانە ببڕن و ئەمڕۆ بەشداربن لە سێیەمین کۆنفرانسی زانستی قوتابیان.

بەڕێزان ئامادەکردنی کۆنفرانسات بەشێوەیەکی گشتی لەهەموو دام و دەزگا و ناوەندێکی ئەکادیمی لە سەرتاسەری جیهان ئەنجام دەدرێت، بەڕێوەچوونی هەر کۆنفرانسێک لە چەند رۆژێک تێناپەڕێت، بەڵام خۆئامادەکردن و ئامادەسازییەکانی لەوانەیە چەند مانگێک یاخود لە ساڵێک زیاتری دەوێت، هەروەها لەوانەیە کۆنفرانسێکی زانستی تێچوویەکی ماددی زۆر بوێت تا ئەنجام دەدرێت، پرسیارەکەی ئێمە لێرەدا ئەوەیە لە کاتێکدا کۆنفرانسی زانستی ئەو هەموو کات و ماندووبوون و تێچوو و ئامادەکارییەی دەوێت، ئایا شایەنی ئەو هەموو ماندووبوونەیە؟ یان کۆنفرانسی زانستی پێویستە؟

لە وەڵامدا دەڵێین: “بەڵێ، کۆنفرانسی زانستی پێویستە بۆ توێژەران و قوتابیان و مامۆستایان لە هەموو ناوەندە ئەکادیمی و زانکۆیەکان، لای هەموومان ئاشکرایە توێژینەوەی زانستی چ رۆڵێکی گرنگ دەبینێ لە ژیانی مرۆڤایەتی و پێشکەوتنی کۆمەڵگا، هەروەک دەبینین هەموو بوارەکانی زانست وەک زانستی تەندروستی و ئابووری و ئەلیکترۆنی و کشتوکاڵ و هتد و هەر لایەنێک بگری لە لایەنەکانی زانست پێویستە بۆ ژیانی ئادەمیزاد و پێشکەوتنی کۆمەڵگا.

توێژینەوەی زانستی بۆخۆی رۆڵێکی بەرچاوی هەیە لەژیانی مرۆڤ و دەرگایەکە بۆ پێشکەوتنی کۆمەڵگا ، ئەگەر توێژینەوەی زانستی دەرگایەک بێت بۆ پێشکەوتنی کۆمەڵگا کلیلی ئەو دەرگایە بڵاوکردنەوەی توێژینەوەکەیە ، زۆر پێویستە ئەو توێژینەوەیەی ئەنجام دەدرێت بڵاوبکرێتەوە ، ئاسانترین ڕێگاش بۆ بڵاوکردنەوەی توێژینەوەی زانستی کۆنفرانساتی زانستییە ، کەواتە یەکێک لە ئامانجە هەرە گرنگەکانمان لە ئەنجامدانی کۆنفرانسی زانستی بۆئەوەیە تۆ بتوانیت ئەنجامەکانی توێژینەوەکە لە کۆنفرانسەکەدا بڵاوبکەیتەوە و خوێندنەوەی بۆ بکەیت و هەڵبسەنگێندرێ ، لە لایەکی ترەوە لە کۆنفرانسی زانستی چەند زانست خوازێک یاخود چەند گرووپێکی هاوشێوە لە پسپۆری لەیەکتری نزیک دەبنەوە، لە ئەنجامدا گفتوگۆیەکی زانستییانە و پڕ مانا لە ماوەی ئەو کۆنفرانسەدا لەنێوانیان ئەنجام دەدرێت، ئەو توێژەرانەی لە کۆنفرانسەکان پێکەوە کۆدەبنەوە و دادەنیشن لەوانەیە بیروڕا ئاڵوگۆر بکەن و کێشەکانی یەکتری چارەسەربکەن و شارەزاییان دەبێت لەو تاقیگە و کەرەستە و ئامێرانەی کە لە ناوەندە زانستییەکان هەیە کە دەتوانرێت سوود لەیەکتری وەربگرن.

جگە لەو سوودانەی باسم کرد بەرێوەچوونی کۆنفرانسی زانستی گرنگییەکی تری هەیە ئەویش ئەوەیە کاتێک کۆنفرانسی زانستی لە وڵاتێک بەڕێوەدەچێت جارێکی تر لە وڵاتێکی تر ئەنجام دەدرێت، لەو لایەنەش دەتوانین میللەتان سوود لە کەلتوری یەکتری وەربگرن لەو شوێن و وڵاتەی کۆنفرانسەکەی لێ ئەنجام دەدرێت .

ئێمەش هەر لەسەر ئەو نیەتە ویستومانە کە لەمەودوا هەر ساڵەو لە شوێنێکی جیاواز ئەنجام بدەیین ، رۆژێک لە مێرگەسۆر و رۆژێک لە شەقڵاوە و کۆیە و سۆران و خەبات و هەولێر ئەنجامی دەدەین ان شاءالڵە، قوتابیانی ئازیز بەهیوام ئەمڕۆ وانەیەکی تر فێربن لەسەر چۆنیەتی بەشداریکردنتان لە کۆنفرانساتی زانستی و یا سوود و بەرێوەچوونی کۆنفرانسی زانستی بۆچییە.

بۆیە بەپێویستمان زانی گرنگی بەو بابەتەش بدەیین ئەمەش وانەیەکی ترە تا قوتابیان بزانن لە ناوەندە ئەکادیمییەکان و زانکۆکاندا بە چی شێوازێک کۆنفرانس ئەنجام دەدرێت.

لە کۆتاییدا دەستخۆشی لە لێژنەی ئامادەکاری کۆنفرانس دەکەم و دەستخۆشی لە ڕاگرایەتی پەیمانگەی تەکنیکی مێرگەسۆر دەکەین کە میوانداری ئەو کۆنفرانسەیان کرد و بەهیواین توێژینەوە و پڕۆژەکانی قوتابیان هەڵسەنگاندنێکی تریان بۆ بکرێت قوتابیان دووبارە سەرکەوتووبن تیایدا”.

هەر لە میانەی بەڕێوەچوونی مەراسیمی کردنەوەی کۆنفرانسەکەدا سەرۆکی زانکۆ رێزلێنانی بەخشییە د. طالب محەمەد شەریف راگری پەیمانگەی تەکنیکی مێرگەسۆر، مامۆستا سەروەر حسین راگری پەیمانگەی تەکنیکی چۆمان و د. هەژار محەمەد حسین بەبۆنەی بەرزکردنەوەی زازناوی زانستییان.

دواتر دەستکرا بە بەڕێوەچوونی سیمناری قوتابیان بە پێی کەرتە پسپۆڕییەکانی کارگێڕی، ئەندازیاری و تەکنەلۆجی، پزیشکی، کشتوکاڵی کە دابەش کرابوون بەسەر چوار هۆڵی سیمنار لە لایەن هەڵسەنگێنەرانی کەرتە جیاوازەکان هەڵسەنگاندن بۆ پرۆژەی قوتابیان کرا.

شیاوی باسە لە کۆنفرانسەکەدا 67 توێژینەوە لە بوارەکانی کارگێڕی و ئەندازیاری و تەکنەلۆجی، پزیشکی و کشتوکاڵی بەشدار بوون.

لە کۆتایی کۆنفرانسەکەدا سەرۆکی زانکۆ پ.د. ئیدریس هەرکی خەڵاتی رێزلێنان بەخشییە لێژنەکانی ئامادەکاری کۆنفرانس و هەڵسەنگێنەران و لێژنەلاوەکییەکان.

رۆژی سێ شەممە رێکەوتی 9ـی ئایاری 2023، بە ئامادەبوونی جەنابی مەلا مستەفا مەسعود بارزانی، نوێنەری سەرۆکی هەرێم، بریکاری وەزارەتی خوێندنی باڵا، سەرۆکی زانکۆ پ.د. ئیدریس محەمەد تاهیر هەرکی، بەڕێوبەری ئیدارەی سەربەخۆی سۆران، قائیمقامی قەزای مێرگەسۆر، ئەندامانی ئەنجوومەنی زانکۆ و ژمارەیەک کەسایەتی و پیاوماقولانی دەڤەرەکە و بەرپرسانی حیزبی و حکومی و مامۆستایان و قوتابیان، رێوڕەسمی بەفەرمی ناساندنی پەیمانگەی تەکنیکی مێرگەسۆر بەڕێوەچوو.

مەراسیمەکە بە ساتێک وەستان بۆ گیانی پاکی شەهیدان و گوێگرتن لە مارشی نیشتمانی ئەی ڕەقیب دەستی پێکرد، دواتر راگری پەیمانگە د. طالب محەمەد شەریف وتەیەکی پێشکەش کرد و تیایدا بەخێرهاتن و سوپاسی بەڕێز مەلامستەفا بارزانی کرد بۆ ئەو هاوکاری و دەستگرتنەی بەڕێزیان بە پەیمانگە هەر لەسەرەتای دامەزراندنی پەیمانگە تا ئەم ساتە.

دواتر بریکاری وەزارەتی خوێندنی باڵا و توێژینەوەی زانستی وتەیەکی پێشکەش کرد و تیایدا دەستخۆشی لە زانکۆی پۆلیتەکنیکی هەولێر و بەرپرسانی هاوکار لە دامەزراندنی یەکەمین دامەزراوەی ئەکادیمی لە دەڤەرەکە کرد و ئەم هەنگاوەی بە گرنگ وەسف کرد بۆ گەنجانی قەزای مێرگەسۆر و دەڤەری بارزان و رایگەیاند ئەمە بچووکترین دیاری ئێمەیە بۆ ئەم دەڤەرە شۆڕشگێڕ و تێکۆشەرە و هیواداریم لێمانی قبوڵ بکەن.

پاشان لە پارچە ڤیدیۆیەکدا سەرۆکی زانکۆ پ.د. ئیدریس محەمەد تاهیر هەرکی وتەیەکی پێشکەش کرد و رایگەیاند: “کردنەوەی ئەم پەیمانگەیە گرنگییەکی تایبەتی هەیە بۆ دەڤەرەکە خۆمان بە خۆشحاڵ دەزانین کە بتوانین خزمەتی ئەم دەڤەرە بکەین و وەک زانکۆ هەوڵ دەدەین ئەو پسپۆڕییانەی لەم پەیمانگەیە دەخوێندرێن لەگەڵ سروشتی دەڤەرەکە و بازاڕی کار بگونجێنین، هەر بۆ ئەو مەبەستەش بۆ ئەمساڵی خوێندن بەشێکی دیکەی زانستی لە پەیمانگەی تەکنیکی مێرگەسۆر دەکرێتەوە ئەویش بەشی پەرستارییە کە دەبێتە هۆی پڕکردنەوەی پێداویستییەکانی قەزای مێرگەسۆر و دەوروبەری بە کارمەند و یاریدەدەری پزیشکی لە گەنجانی دەڤەرەکە ئەمەش کاریگەری دەبێت لەسەر بەرەوپێشچوونی کەرتی تەندروستی لە ناوچەکە”.

دواتر کورتە ڤیدۆیەک لەسەر چۆنییەتی دامەزراندن و قۆناغەکانی بنیاتنانی پەیمانگە، هەروەها ستراتیژ و بەرنامەی داهاتووی پەیمانگەی تێدا روونکرایەوە.

بەر لە کۆتایی رێوڕەسمەکە بەڕێز مەلا مستەفا بارزانی خەڵاتی رێزلێنانی بەخشییە هەریەک لەو بەڕێزانەی کە لە ماوەی رابردوودا یارمەتیدەر و هاوکار و پاڵپشتیکارێکی گرنگ بوون لە دامەزراندن و کردنەوە و پەرەپێدانی پەیمانگەی تەکنیکی مێرگەسۆر.