ژمارەیەک لە رۆژنامەکانی عێراق بە بایەخەوە هەواڵی ناردنی ژمارەیەک قوتابی زانکۆی پۆلیتەکنیکی هەولێریان بۆ زانکۆی نەزوە لە عومان بەمەبەستی مەشقی هاوینە بڵاوکردەوە.
رۆژی پێنج شەممە 6ـی تەمموزی 2023 بە ئامادەبوونی پ.د. ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر، بەڕێوبەرایەتی پەیوەندییە نێودەوڵەتییەکان، رێورەسمی بەڕێکردنی بۆ ژمارەیەک قوتابی زانکۆمان رێکخست کە لە چوارچێوەی پرۆگرامی ئاڵوگۆڕی قوتابییان لە نێوان زانکۆی پۆلیتەکنیکی هەولێر و زانکۆکانی ئەندام لە یەکێتیی زانکۆکانی عەرەبی بەمەبەستی ئەنجامدانی مەشقی هاوینە لە زانکۆی نەزوە سەردانی عومان دەکەن.
هەواڵی ناردنی ئەم ژمارەیە لە قوتابییانی زانکۆمان بۆ زانکۆی نەزوە لە وڵاتی عومان لە ژمارەیەک لە رۆژنامە و گۆڤاری عێراق بایەخی تایبەتی پێدرا و بە گرنگییەوە ئەو هەواڵەیان بڵاوکردوەتەوە.
ماڵپەڕی رۆژنامەی التآخي زمانحاڵی پارتی دیموکراتی کوردستان هەواڵێکی لەژێر ناونیشانی (ژمارەیەک قوتابیی زانکۆی پۆلیتەکنیکی هەولێر مەشقی هاوینە لە زانکۆی نەزوە ئەنجام دەدەن) بڵاوکردووەتەوە، تیایدا ئاماژەی بە گرنگیی پەیوەندییەکانی نێوان زانکۆی پۆلیتەکنیکی هەولێر لەگەڵ زانکۆکانی جیهان کردووە و ناردنی ئەم ژمارە قوتابییەی زانکۆکەی بۆ عومان بە گرنگ وەسف کردووە.
هاوکات رۆژنامەی (کل الاخبار) لە ژمارە 3233ـی خۆیدا کە رۆژی 12ـی تەمووز بڵاوکراوەتەوە، هەواڵی ناردنی ژمارەیەک قوتابی زانکۆمانی بۆ زانکۆی نەزوە لە وڵاتی عومان بڵاوکردووەتەوە.
هەروەها رۆژنامەی (الـبـيـنـة الجديدة) کە رۆژنامەیەکی سەربەخۆی بێلایەنە و لە بەغدا دەردەچێت، لە ژمارە 4152 کە رۆژی 12ـی تەمووز دەرچووە، بەبایەخەوە باسی لە هەنگاوەکانی زانکۆی پۆلیتەکنیکی هەولێر و بەرەپێشچوونی زانکۆکە و پەیوەندییەکانی لەگەڵ زانکۆکانی دیکەی جیهان کردووە و ناردنی ژمارەیەک قوتابی زانکۆکەی بۆ مەشقی هاوینە بۆ یەکێک لە زانکۆ بەناوبانگەکانی عومان بۆ هەوڵەکانی سەرۆک و ستافی زانکۆ گەڕاندوەتەوە.
هەروەها هەریەک لە رۆژنامەی (الصیاد) کە رۆژنامەیەکی سیاسیی سەربەخۆیە لە ژمارە 724 لە 12ـی تەمووز و رۆژنامەی (الصباح الجدید) لە ژمارە 5172 ـی خۆیدا کە رۆژی چوارشەممە 12ـی تەمووز بڵاوکراوەتەوە، بەهەمان شێوەی رۆژنامەکانی دیکە بە بایەخەوە هەواڵی ناردنی ژمارەیەک قوتابی زانکۆی پۆلیتەکنیکی هەولێر بۆ یەکێک لە زانکۆکانی پۆڵەندا بڵاوکردوەتەوە.
پێشتریش لە چوارچێوەی پرۆگرامی ئاڵوگۆری قوتابیان لەنێوان زانکۆکانی ئەندام لە یەکێتیی زانکۆکانی عەرەبی، ژمارەیەک قوتابی زانکۆی پۆلیتەکنیکی هەولێر چوونە زانکۆی لودز لە وڵاتی پۆڵەندا.
