ئەمڕۆ پێنچ شەممە 26ـی ئۆکتۆبەری 2023، لەژێر چاودێری رێزدار مەسرور بارزانی سەرۆکی حکومەتی هەرێمی کوردستان، یەکەمین پێشانگای هەلی کار بۆ قوتابیانی دەرچوو لە لایەن زانکۆی پۆلیتەکنیکی هەولێر کرایەوە، کە یەکەمین جارە پێشانگای لەم شێوەیە دەکرێتەوە لەسەر ئاستی زانکۆ حکومییەکانی هەرێمی کوردستان.
لە رێوڕەسمی کردنەوەی پێشانگاکەدا هەریەکە لە پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، پ.د.عبدالفتاح عبدالرەزاق بریکاری وەزارەتی خوێندنی باڵاو توێژینەوەی زانستی، د.ئەمیر چالی راوێژکاری وەزیری خوێندنی باڵا، ئەندامانی ئەنجوومەنی زانکۆ، م.هەژار عوسمان بەرپرسی ناوچەی ئاسۆ، بەڕێز شیرین خالید بەرپرسی ناوچەی ئایندە، بەڕێز نێچیرڤان کەلاری سکرتێری یەکێتی قوتابییانی کوردستان و ژمارەیەکی زۆر لەمامۆستایان و قوتابییان ئامادەبوون.
سەرەتا سەرۆکی لێژنەی ئامادەکاری پێشانگای هەلی کار، پ.ی.د.نەجیب توما بتو هاوکات یاریدەدەری سەرۆکی زانکۆ بۆ کاروباری زانستی وتەیەکی پێشکەش کرد و گوتی: زۆر خۆشحاڵین بەئامادەبوونتان لەمەراسیمی کردنەوەی یەکەمین پێشانگای هەلی کار تایبەت بەدەرچووانی زانکۆمان ، بەبەشداری 40 کۆمپانیای کەرتی تایبەت، سوپاسی یەکە بەیەکەی کۆمپانیاکان دەکەین کە ئامادەیی خۆیان نیشاندا بە بەشداری کردنیان لەو پێشانگایە، بەتابیەت ئەو کۆمپانیایانەی وەک سپۆنسەر بەشداریان کردووە، هیوادارین ئەمڕۆ دڵی چەند گەنجێکی لێهاتوو و بەتوانا لە دەرچووانی خۆشەویست شاد بکرێت و هیوای بەکارخستنیان پێببەخشین.
سوپاسی (کۆمپانیای کۆوتەر) دەکەیین کە هاوکارمان بوون بۆ ڕاهێنان پێکردنی ستافێکی ئەکادیمی لەسەر میکانیزم و شێوازی ئامادەکاری بۆ پێشانگاکەمان، هەروەها ئامادەکردنی نامیلکەیەک بەهەرسێ زمانی کوردی و ئینگلیزی و عەرەبی، ئەو نامیلکەیەی چاپکراوە ڤێرشنی کوردییە، بەڵام بارکۆدی لە سەرەو دەتوانن بەزمانی ئینگلیزی و عەرەبی سەیری بکەن.
سوپاسی کۆمپانیای CCC دەکەین کە ئەرکی خاوێن کردنەوە و کاری لۆجستی ئەنجامداوە، وەک ئامادەکاری بۆ ئەو پێشانگایە.
دەمانەوێت بەدەرچووانی خۆشەویست بڵێین دەمانەوێت پەیوەندیتان لەگەڵ زانکۆ بەردەوام بێت، ئێمە لەگەڵتانین لە ڕێگای سەنتەری گەشەپێدان بۆ کار، بۆ کار ئاسانی و ئامادەکردنتان بۆ بازاری کار ، بۆ ئەوەی بتوانن ئایندەیەکی پرشنگدار دابین بکەن ، ببن بەبەشێکی ئەکتیف و پۆزەتیف لەبنیادنانەوەی کوردستان ، کوردستانی دواڕۆژ ئێوە بنیادی دەنێن .
سوپاسی سەرجەم مامۆستایان و هاوکارانم دەکەم لەئامادەکارانی ئەو پێشانگایه کەوەک خۆبەخش و لەخۆ بوردوانە زۆر بەهیمەت کاریان لەگەڵ کردین، وەک قوتابیانی دەرچوو و کۆمپانیاکان و کادیرانی یەکێتی قوتابییانی کوردستان.
دواتر سەرۆکی زانکۆی پۆلیتەکنیکی هەولێر پ.د.ئیدریس محەمەد تاهیر هەرکی لەوتەیەکیدا وێرای بەخێرهاتنی میوانەکان گوتی:” پیرۆزبایەکی گەرم لەدەرچووان دەکەم کەئەمڕۆ دەتوانن هەریەکە بەپێی پسپۆڕی خۆیان دەتوانن لەم پێشانگاییەدا هەلی کار بە دەستبهێنن و ئایندەی خۆیان رەنگ ڕێژبکەن، بە ئومێدی ئەوەی ئەو پێشانگایە، کە یەکەم هەنگاوی کرداری ئێمەیە، دوای دەستبەکاربوومان بەڵێنماندا هەموو هەوڵەکانمان بخەینە گەڕ تا دەرفەتی کار بۆ دەرچووانمان بدۆزینەوە.
بەڕێزان
لەجیهانــى نوێــدا گۆڕانکارییــەکان زۆر خێــران لە هەمــوو کایەکانى ژیانــدا، ئەگەر ئێمــە بمانەوێــت دانەبڕێیــن و لەگەڵ جیهان هەنگاو بنێین، ئەوا دەبێت زۆر بە وریایی و ئاگاییەوە هەنگاوەکانمان بنێین و ئاگاداربین لــە گۆڕانکاریــە خێــراکان، بێگومــان ئــەو گۆڕانکاریانەش بەشێوەیەکى ڕاست و دروست و بەســوود و قازانجی نیشتمانی و نەتەوەیی خۆمان وەربگرین، لەم نێوانەشــدا زانکۆکان ئەرکــی ســەرەکیان هەیــە لەم بــوارەدا، کە پێویســتە هەنــگاوى زۆر وورد و بوێرانــە بنێین تا بتوانین نەوەى تازە پێگەیشــتوو و کۆمەڵگە بەرەو ئاقارێکی ســەرکەوتوو ببەین و لە جیهانى نوێدا بەشــدار بین لە بنیاتنانى کۆمەڵگەیەکی مۆدێرن و دانەبڕاو.
ئامادەبووانی ئازیز
لــەم ســاڵانەى دواییــدا، لــە هەرێمــی کوردســتان ژمارەیەکــى زۆر لــە پەیمانگە و کۆلێژ و زانکۆی تازە کراونەتەوە، ژمارەیەکی زۆری قوتابی لە بەشە زانستییە جیاوازەکان دەردەچن و بڕوانامە بەدەست دەهێنن، بەڵام ڕەخساندنى هەلیکار بۆ ئەم هەموو دەرچووە کارێکــی ئەســتەمە و لە هیــچ وڵاتێک یان حکوومەتێــک لەجیهاندا ناتوانرێ دامەزراندنى ئــەم ژمارە زۆرە بخرێتــە بەرنامە و کارەوە، بەڵکو دامەزراندن و هەلیکار پەیوەست بووە بە بازاڕى کارەوە.
زانکــۆ پێویســتە ڕۆڵــی هەبێــت لــە پێشخستنى تواناى دەرچووەکانى و هاوکات پێویســتە لــە پەیوەنــدی بەردەوەوامــدا بێت لەگەڵیــان بۆ ئەنجامدانى ڕاهێنان و هەروەها رەخساندنی هەلی کار بۆیان
خۆشــبەختانە، وەزارەتى خوێندنى باڵا و توێژینەوەى زانســتی لە کابینەى نۆیــەمی حکوومەتی کوردستاندا، گرنگییەکی تایبەتــى بەم بابەتە داوە و ئێســتا لەســەر داوای وەزارەتى خوێندنى بااڵ و توێژینەوەى زانســتی، بەڕێوەبەرایەتــى گەشــەپێدانى کار )CDC )لــە گشــت زانکــۆکان کارا دەکرێــت و هەیکەلێکی تایبەت و فراوانى بۆ دادەنرێــت، کە ئەرکی ئــەم بەڕێوەبەرایەتیە بریتــی دەبێــت لــە هەبوونــی پەیوەنــدی بــەردەوام بە دەرچووانــەوە، هەروەها هەلی ڕاهێنانى پیشــەیی و پێشــانگەی کاریان بۆ بڕەخسێنن.
پێویســتە ســاڵانە پێشــانگەى کار بــۆ دەرچــووان فەراهــەم بکرێت و بانگهێشــتی کۆمپانیا و دامەزراوەکان بکرێن بۆ دروســت کردنى پــردی پەیوەندی لەگــەڵ دەرچووان تایبەت بە شــوێنی بەتاڵــى کار، ئەم جۆرە پێشــانگەیانە ســوودی زۆری هەیــە بــەو پێیــەى بیرۆکەیــەک دەدات بــە دەرچوو لەم بوارانەى، کە تێیدا شــارەزان و دەتوانن کاری تێــدا بکەن، هەروەها زانکۆ پێویســتە بــەردەوام لەگــەڵ کۆمپانیا و دامــەزراوەکان کار بکات لەسەر کلینکی پیشەیی )وەرشەی پیشــەیی( بۆ ئاشنا بوونى دەرچووان بە کار و پیشە و تەکنەلۆجیاى سەردەم.
ئێمــە لە زانکۆی پۆلیتەکنیکی هەولێر دەمانەوێــت لەم بوارەدا دەستپێشــخەر بین بۆ ئەنجامدانى یەکەمین پێشــانگەى هەلیکار لەناو زانکۆ بۆ دەرچووانى زانکۆکەمان، ئومێد دەکەین، کە ببێتە هەڵمەتێکی نیشــتمانى و لەبەرزتریــن ئاســتدا کارى لەســەر بکرێت و پــڕۆژەى نیشــتمانى هەلیکار بــۆ دەرچووان ئەنجام بدرێت.
لەگــەڵ ئەمانەشــدا پێویســتە، دەسەڵاتی یاسادانان و دەسەڵاتی جێبەجێکردن و وەزارەتــى کار و کاروبــارى کۆمەڵایەتــى کار لەســەر ئەرک و مافــی کارمەندانــى کەرتــی تایبــەت بکەن، بەجۆرێــک کــە هەمــان مــاف و جیاوگــى هــەردوو کەرتی گشــتی و تایبــەت لە یەکتر نزیک بن، ئەمــەش دادپەروەری کۆمەڵایەتى دەچەسپێنێت. بــەم هەنگاوانــەش ئەرکــی سەرشــانى حکوومــەت ســووک دەبێت و فشــارى ســەر حکومەت کــەم دەبێتەوە و لە هەمان کاتدا کۆمەڵگەش بــە ئامانجی خۆی دەگات و زانکۆش بە ئەرک و فەرمانى ڕاســتەقینەى خــۆی هەڵدەســتێت، لە هەمووشــی گرنگتر دەتوانیــن جێــگاى زۆرتریــن دەرچــووان لە هەلی کاردا بکەینــەوە و ئیتــر بێــکاری و دەســت بەتاڵــی ڕۆڵەکانمــان نابینین و ئەو ڕێژە زۆرەی بێکارى دادەبەزێت بۆ ئاستێکی نزمتر.
بەڕێزان
ئەو بۆنەیە بە دەرفەت دەزانم، بەناوی زانکۆی پۆلیتەکنیکی هەولێر سوپاسی رێزدار جەنابی مەسرور بارزانی، سەرۆک وەزیرانی هەرێمی کوردستان بکەم کەهەردەم خەمخۆری زانکۆکان بووەو بەردەوام پشتگیری مامۆستایانی زانکۆی کردووە، سەراڕی هەموو ئەو رێگریانەی هاتوونەتە بەردەم کابینەکەی جەنابیان، کەچی بەڕێزیان بە خۆڕاگرییەوە پاڵپشتییە دارایی و مەعنەوییەکانی بۆ زانکۆ بۆ یەک چرکەش رانەگرتووە، بەڵکو کاری زیاتریشی کردووە بۆ دابینکردنی پشتیوانی دارایی بۆ قوتابیان و زانکۆکانی هەرێمی کوردستان، هەر ئەوەش وایکردووە زانکۆکان بەردەوام بن لە پڕۆسەی خوێندن، بە ئومێدی ئەوەی زانکۆمان لە ئاست ئەو متمانەیە بێت کە جەنابیان بە زانکۆکانی بەخشیوە.
لەکۆتاییدا جارێکی تر بەخێربێن، هیوادارین لە رێگەی ئەو پێشانگایەوە توانیبێتمان ببینە پردی پەیوەندی نێوان کۆمپانیاکان و دەرچووانی ئازیزی زانکۆکەمان.
هەر ئاوەدان و بەهێز بێت کوردستان، مەڵبەندی پێکەوە ژیانی ئاشتیانەی نێوان پێکهاتە ئایینی نەتەوەییەکان”.
پاشان پ.د.عبدالفتاح عبدالرەزاق بریکاری وەزارەتی خوێندنی باڵاو توێژینەوەی زانستی، لە وتەیەکدا دەستخۆشی لە زانکۆی پۆلیتەکنیکی هەولێر کرد بۆ رێکخستنی ئەو پێشانگایە و گوتی: ئەو چالاکیەی ئەمڕۆ دەروازەیەکە کە زانکۆی پۆلیتەکنیکی هەولێر ئەمڕۆ بەرەو رووی دەرچووانی دەکاتەوە بۆ کار ئاسانی و دۆزینەوەی هەلی کار، گرنگی‌ئەو پێشانگایە خۆی لەوە دەبینێتەوە کەباس لەمافێک دەکات لەمافەکانی مڕۆڤ کەمافێکی بنەڕەتی و گرنگە ئەویش مافی کارە، دەستەبەرکردنی مافی کار، دروستکردنی هەلی یەکسان بۆ ئەو کەسانەی داخوازی کارن یەکێکە لەمافە هەرە بنەڕەتییەکانە کەرێکەوتننامە نێودەوڵەتییەکان و هیچ دەستورێک خاڵی نییە لەو برگەیەی کەتایبەتە بەدەستەبەرکردنی مافی کار.
بێگومان بەو مافەش وەکو بەرێز سەرۆکی زانکۆ ئاماژەی پێدا تەنیا بەحکومەت ناکرێت، دەستەبەرکردنی ئەو مافە پێویستی بەپرۆسەیەکی دەستە کۆمەڵییە کە پێویستە هەموو لایەک بەشداری تێدا بکات، جا بۆیە لە زۆربەی دەستورەکان کە باس لە دەستەبەرکردنی مافی کار دەکات دەڵێت کۆمەڵگا هەڵدەستێ بەدەستەبەرکردن، واتە کۆمەڵگا لە حکومەت و لە کەرتی تایبەت و لە کەرتی گشتی پێکهاتووە، پرۆسەیەکە دەبێت زانکۆ تێیدا بەشداربێت و حکومەت و پەرلەمان لەگەڵ کەرتی تایبەت کە بەشێکی گرنگە لەو پرۆسەیە، بۆیە لەسەر زانکۆیە پشت لەدەرچووانی نەکات، سەرەتا پێویستە پرۆگرامەکانی خوێندنی ئەو بەشانەی هەبێت کە بازاری کار پێویستییەتی، پاشان کە دەرچوو پێویستە رێنوێنی بکات لەڕێگای سەنتەرەکانی کار بۆ ئەوەی بتوانن بەئاسانی هەلی کار بدۆزێتەوە، ئەو چالاکییەی ئەمڕۆ یەکێکە لەکارەکانی ئەو سەنتەرانە، دەستخۆشیان لێدەکەم، هەروەها پێویستە بەدواداچوون بۆ دەرچوەکانی خۆی بکات ئەوکاتەی کار بەدەست دەهێنن.
باشی و ڕێزبەندی زانکۆکان مەرج نییە بەرێژەی ژمارەی دەرچوانی بێت، ژمارەی دەرچوانیش پێوەرێک نییە بۆ کوالێتی خوێندن لەزانکۆکان، بەڵکو مەرج ژمارەی ئەو دەرچوانەیە کە دەتوانن کار بدۆزنەوە و بچنە ناو مەیدانی کار لە وڵاتەکەیدا، بۆیە پێویستە بۆ ئەوەی ئەو کارە بەرزە بەدەست بهێنی پێویستە بەدواداچوون و لێکۆلینەوە بۆ دەرچوەکانی خۆت بکەیت.
هەروەها لەسەر حکومەتیش پێویستە فرسەتی کار بۆ دەرچووان بدۆزێتەوە، لێرە دەڵێم حکومەت درێغی نەکردووە بۆ دەرکردنی یاسای وەبەرهێنان بۆ ئاسانکاری بۆ کاری وەبەرهێنان لە هەرێمی کوردستان، هەروەها پشتگیری و هانیدانی وەبەرهێنەران لە کەرتە جیاجیاکان کارێکی باشە، لەئێستادا کاری جددی دەکرێت لەلایەن حکومەتی هەرێمی کوردستان لەبریارەکانی 86 ، بریاری 172 کە دوو بریارن لەسەریەک و تائکیدیان کردەوە کەپێویستە یاساکانی کار لەهەرێمی کوردستان وەکو خۆی دەستەبەر بکرێت، ئەو هەوڵانەش بۆ دروستکردنی دەرفەتی کارە و هەلی یەکسان بۆ هەمووان دابین دەکات، هەروەها لەسەر کەرتی تایبەتیش، کۆمپانیاکان، خاوەن کارەکان، پێویستە یاساکانی کار وەکو خۆی جێبەجێ بکەن، هەلی زیاتر بۆ داخوازی کار بۆ هاوڵاتیان دابین بکات، بۆچی داخوازی زیاتر لەسەر کەرتی گشتی هەیە، لەبەرئەوەی گرێنتییەک هەیە پێی دەگوترێت خانەنشینی، بەڵام یاسای کار ئەوەی بۆ کرێکاران و ئەو کەسانەی لەکەرتی تایبەت ئیش دەکەن بۆ ئەویشی گرێنتی کردووە بەڵام پێویستە سندوقەکانی دەستەبەری کۆمەڵایەتی و خانەنشینی پڕبکرێتەوە، ئەوەش بەوە پڕدەکرێتەوە کۆمپانیا و خاوەن کارەکان ئەو پابەندییەی وەکو یاسا لەسەریانە جێبەجێی بکەن، ئەو هاوبەشییانە بکەن ئەوکاتە هاوڵاتیان گرێنتییەکیان دەبێت بۆ ئەوەی لە دواڕۆژ خانەنشینی وەربگرن، ئەو دەستەبەرە کۆمەڵایەتییە وەربگرن ئەوەش وادەکات کە زۆر چاوی لەسەر کەرتی گشتی نەبێت و بتوانین کاریان پێ بکەین لەکەرتی تایبەت، دووبارە دەستخۆشی لە زانکۆی پۆلیتەکنیکی هەولێر و ئامادەکاران دەکەم.
دوای وتاری بەڕێزان پێشانگاکە کرایەوە و ئامادەبووان سەرجەم بەشەکانی تایبەت بە کۆمپانیاکانیان بەسەر کردەوە کە ژمارەیان زیاتر بوو لە 40 کۆمپانیای کەرتی تایبەت لە بوارە جیاجیاکان.
شیاوی باسە لەم پێشانگایەدا کۆمپانیاکانی کەرتی بە پێی پێداویستی خۆیان دەرفەتی هەلی کاریان خستەڕوو کە ژمارەیان 150 دەرفەتە، و (CV)یان لە قوتابیان وەرگرت بۆ ئەوەی لە داهاتوویەکی نزیکدا بەپێی پسپۆڕییەکانیان بخرێنە سەرکار، بۆ ئەم مەبەستەش سەنتەری گەشەپێدانی کار لە زانکۆی پۆلیتەکنیکی هەولێر بەدواداچوون دەکات بۆ ئەو دەرفەتانەی بەدەستهاتوون لە لایەن قوتابیان و پرۆسەکە بەردەوامی دەبێت لەڕێگەی سەنتەری ناوبراوەوە.
بۆ بینینی سەرجەم وێنەکان بە کوالیتی بەرز کلیک لـــــــــــــێــــــــــــــــــــــرە بکە.
