سەرۆکایەتی زانکۆی پۆلیتەکنیکی هەولێر ساڵنامەی ساڵی خوێندنی 2023-2024ی کۆلیژ و پەیمانگاکانی سەر بە زانکۆکە بڵاودەکاتەوە.
بەپێی ساڵنامەکە، رۆژی شەممە 16.9.2023 بۆ ئەو کۆلیژ و پەیمانگایانەی کە رۆژانی پێنجشەممە پشوویانە و رۆژی یەکشەممە 17.9.2023 بۆ ئەو کۆلیژ و پەیمانگایانەی کە رۆژانی شەممە پشوویانە، یەکەم رۆژی دەوامی فەرمی ساڵی نوێی خوێندنی 2023-2024 دەست پێدەکات.
پ.د.ئیدریس محمد تاهیر هەرکی، سەرۆکی زانکۆی پۆلیتەکنیکی هەولێر سەردانی کۆلیژی تەکنیکی ئەندازیاری هەولێری کرد و لەلایەن پ.د.ئەیاد زکی صابر راگری کۆلێژی تەکنیکی ئەندازیاری هەولێر و یاریدەدەری راگر پێشوازیی لێکرا.
لە دانیشتنێکدا کە پ.ی.د نجیب توما بتو، یاریدەدەرى سەرۆکی زانکۆ بۆ کاروباری زانستی و خوێندنی باڵا ئامادەی بوو، باس لە ئامادەکارییەکان بۆ دەستپێکی ساڵی نوێی خوێندن کرا.
دواتر سەرۆکی زانکۆ بەیاوەری یاریدەدەری سەرۆکی زانکۆ بۆ کاروباری زانستی و خوێندنی باڵا بەشدارییان لە تاوتوێکردنی تێزى دکتۆرای قوتابى زرار خالد عبدول کرد لە بەشی تەکنیکی ئەندازیاری سیستەمی زانياریی لەژێر ناونیشانی Automatic Gear Fault Diagnosis Using Machine Learning Algorithms
دواتر بەشدارییان لە تاوتوێکردنی ماستەرنامەی قوتابی ديدار عارف حسين لە بەشی تەکنیکی ئەندازیاری شارستانى به ناونيشانى Experimental Evaluation of Load Carrying Capacity of Post Installed Adhesive Anchors
لە ژێر رۆشنایی رێککەوتننامەی لێکتێگەیشتنی نێوان زانکۆی پۆلیتەکنیکی هەولێر و زانكۆی بێڵێفیڵد بۆ زانست و تەکنەلۆژیا و لە چوارچێوەی ستراتیژیەتی بە نێودەوڵەتی كردنی زانكۆمان، بەڕێوبەرایەتی پەیوەندییە نێودەوڵەتییەکان، دەرفەتی خوێندن بۆ یەک وەرز (سمستەر) بۆ قوتابییانی قۆناغی دووەم و سێیەمی کۆلێژەکانی زانکۆمان لە زانكۆی بێڵێفیڵد بۆ زانست و تەکنەلۆژیا رادەگەیەنێت.
بۆ بەشداری كردن لەم پڕۆگرامە پێویستە قوتابی ئەم مەرجانەی خوارەوەی تێدابێت:
١-پێویستە قوتابی قۆناغی (دووەم یان سێیەم)ـی كۆلێژەکان بێت.
٢-پێویستە قوتابی ئینگلیزی زۆر بەباشی بزانێت و یەکێک لە بڕوانامەکانی (,TOEFL PTE) یان (IELTS 5-6)ـی هەبێت.
٣-گشت خەرجیەكان لەسەر ئەستۆی قوتابیە (جگە لە کرێی خوێندن لە زانکۆکە).
٤-قوتابی دەبێت وەكالە و كەفالە بکات و بەڵێننامە پڕ بكاتەوە كە دوای تەواوكردنی خوێندن بگەرێتەوە.
٥- لیژنەیەك پێك دێت بۆ هەڵسەنگانی قوتابیانی بەشداربوو.
٦- رۆژی 23/10/2023 دواکاتە بۆ پێشکەش کردن.
قوتابی ئارەزوومەند بە گوێرەی ئەم مەرجانە لە ڕێگەی ئەم لـــیـــنـــــــکـــــەوە دەتوانێت بەشداری بكات.
راگری پەیمانگە سەردانی سەرۆکایەتی هەرێمی کوردستان دەکات
رۆژی چوارشەممە 13ـی ئەیلولی 2023، د. طالب محەمەد شەریف راگری پەیمانگەی تەکنیکی مێرگەسۆر، سەردانی سەرۆکایەتی هەرێمی کوردستانی کرد و لە لایەن راوێژکاری بەڕێز سەرۆکی هەرێم (پ.د. صاڵح مەلا عومەر)ـەوە پێشوازییان لێکرا.
لە دیدارێکدا گفتوگۆکرا دەربارەی هەماهنگی وکارەکانی پەیمانگە و پلان و بەرنامەی کارکردن بۆ ساڵی نوێی خوێندنی 2023-2024 و کردنەوەی بەشی پەرستاری لە پەیمانگەی تەکنیکی مێرگەسۆر کە پێویستییەکی گرنگ و هەنووکەییە بۆ دەڤەرەکە و پڕکردنەوەی کەمی کادیری ناوەندی لە نەخۆشخانەکانی قەزای مێرگەسۆر و دەوروبەری.
لە لای خۆیەوە بەڕێز د. صاڵح بەڵێنی دا کە وەک سەرۆکایەتی هەرێم پشتیوان و پاڵپشتی پەیمانگە دەبن بۆ هاوکاریکردنی ئەو دامەزراوە ئەکادیمییە و قوتابییانی ئازیزی دەڤەرەکە.