Blog

رۆژی چوارشەممە رێکەوتی 1ـی ئاداری 2023 بە ئامادەبوونی سەرۆکی زانکۆ پ.د. ئیدریس محەمەد تاهیر هەرکی و ژمارەیەک لە ئەندامانی ئەنجومەنی زانکۆ و بەڕێوبەرانی سەرۆکایەتی زانکۆ و مامۆستایان و فەرمانبەران، وۆرکشۆپێک لەژێر ناونیشانی :

(Institutional Effectiveness: the Concept of Accreditation in Kurdistan)

بۆ بەڕێز دکتۆر هونەر عیسا ئەندامی بۆردی زانکۆی ئەمریکی لە کوردستان رێکخست.

لە وۆرکشۆپەکەدا د. هونەر بە وردی باسی لە کاریگەری متمانە کرد لە بەڕێوەبردنی دام و دەزگاکاندا کە گرنگییەکی بەرچاوی هەیە، و بابەتی بەخشینی متمانە بە بەش و کۆلێژ و پەیمانگەکانی بە پێویستییەکی گرنگ و سەردەمییانە زانی، و هەروەها چونیەتی کارکردن بۆ بەدەستهێنانی ئەو متمانەیەی بۆ ئامادەبووان روونکردەوە.

پاشان دەرگای گفتۆگۆ بۆ ئامادەبووان کرایەوە و پرسیار و پێشنیارەکانیان ئاراستە کرد و لە لایەن کۆڕگێڕەوە بە وردی و زانستییانە وەڵام درانەوە.

رۆژی چوار شەممە رێکەوتی 1ـی ئاداری 2023 بە ئامادەبوونی سەرۆکی زانکۆ پ.د. ئیدریس محەمەد تاهیر هەرکی و یاریدەدەرانی سەرۆکی زانکۆ و ژمارەیەک لە ئەندامانی ئەنجومەنی زانکۆ و بەڕێوبەرانی سەرۆکایەتی زانکۆ و مامۆستایان و قوتابیان، کۆتایی بە خولێکی تۆپی پێی بچووککراوە هات کە بۆ قوتابیانی کوڕ کرابوویەوە.

لە درێژەی کاروچالاکییەکانی بەڕێوبەرایەتی چالاکییەکانی سەرۆکایەتی زانکۆ کۆتایی بە خولێکی تۆپی پێی بچووککراوە هات لەسەر ئاستی قوتابیانی کوڕان کە تیایدا تیپی تۆپی پێی قوتابیانی پەیمانگەی تەکنیکی کۆیە بە ئەنجامی دوو گۆڵ بەرامبەر بە گۆڵێک لە قوتابیانی کۆلێژی تەکنیکی کارگێڕی هەولێری بردەوە و بووە پاڵەوانی خولەکە.

پاشان لە لایەن سەرۆک و ئەندامانی ئەنجومەنی زانکۆوە خەڵات بەسەر پاڵەوان و باشترینەکانی خولەکەدا دابەشکرا.

لە لایەکی ترەوە هەر ئەمڕۆ کۆتایی بە خولی تۆپی پێی بچووککراوە هات کە بۆ قوتابیانی کچ لەسەر ئاستی هەڵبژاردەی کۆلێژ و پەیمانگەکان کرابوویەوە.

لە یاری کۆتایی خولی تۆپی پێی بچووککراوەی سەر ئاستی قوتابیانی کچ تیپی هەڵبژاردەی یەکەم بە ئەنجامی شەش گۆڵ بەرامبەر بە دوو گۆڵ لە هەڵبژاردەی دووەمی بردەوە و بووە پاڵەوانی خولەکە.

پاشان خەڵات بەسەر پاڵەوان و باشترینەکانی خولەکەدا دابەشکرا.

رۆژی سێ شەممە رێکەوتی 28ـی شوباتی 2023 سەرۆکی زانکۆ پ.د. ئیدریس محەمەد تاهیر هەرکی پێشوازی کرد لە سەرۆکی زانکۆی تەکنیکی ناوەڕاست پ.د. عبدولمحسن ناجي ئەلمحيسن.

لە دیدارێکدا کە هەر یەکە لە یاریدەدەری سەرۆکی زانکۆ بۆ کاروباری زانستی و بەڕێوبەری پەیوەندییە نێودەوڵەتییەکانی زانکۆ ئامادەیبوون، سەرۆکی زانکۆی تەکنیکی ناوەڕاست پیرۆزبایی لە د. ئیدریس هەرکی کرد، بەبۆنەی دەستبەکاربوونی وەک سەرۆکی زانکۆی پۆلیتەکنیکی هەولێر و چەپکە گوڵی پێشکەش کرد، لەلای خۆیەوە سەرۆکی زانکۆ زۆر سوپاسی پیرۆزبایی کرد و سەردانەکەی بەڕێزیانی بە گرنگ و پێویست وەسفکرد.

لە بەشێکی دیکەی کۆبوونەوەکەدا، هەردوولا کۆک بوون لەسەر پتەوکردنی پەیوەندییەکانی نێوانیان لە بواری زانستی و ئەنجامدانی چالاکی زانستی هاوبەش، بۆ ئەمەش بڕیاردرا لە ماوەی داهاتوودا کۆنفرانسێکی زانستی هاوبەش ئەنجامبدەن.

لە بەشێکی دیکەی کۆبوونەوەکەدا د. عبدولمحسن ناجي داوای کرد هاوکاری زانکۆکەیان بکرێت لەلایەن زانکۆی پۆلیتەکنیکی هەولێرەوە لەچۆنیەتی جێبەجێکردنی سیستەمی بۆلۆنا پرۆسێس، تاکو سوود لە ئەزموونی زانکۆی پۆلتەکنیکی هەولێر وەربگرن لەوبارەیەوە.

رۆژی یەکشەممە رێکەوتی 26ـی شوباتی 2023 لەسەر بانگهێشتێکی فەرمی کونسولخانەی ئەرمینیا لە هەرێمی کوردستان، بەنوێنەرایەتی سەرۆکی زانکۆ، یاردەدەری سەرۆکی زانکۆ بۆ کاروباری زانستی و ڕاگری پەیمانگەی تەکنیکی مێرگەسۆر، بەشدارییان کرد لە دووەمین ساڵیادی کردنەوەی کونسولگەری گشتی کۆماری ئەرمینیا لە هەولێر.

هاوکات شاندەکەی زانکۆ بەشدارییان کرد لە پێشانگایەک کە وێنە و ئەرشیف و بەڵگەنامەی مێژوویی دەربارەی پێکهاتەی نەتەوەکانی کورد، یەزیدی و ئاشوریەکانی لە ئەرمینیا تێدا نمایش کرابوو، ئەمەش وەک لێکچوونێک لەنێوان ئەرمینیا و کوردستان نیشاندرا کە ساڵەهای ساڵە پێکهاتە جیاوزەکان بێ جیاوازی نەریت و ئاین و زمان، پێکەوە دەژین و ئاوێتەی یەکتربوون.

نەتەوەی کورد و ئەرمەن بە درێژایی مێژوو نەهامەتی زۆریان بەسەردا هێنراوە و هەردوو گەل جینۆساید کراون.

شیاوی باسە لە مەراسیمەکەدا ژمارەیەکی بەرچاو لە بەرپرسانی باڵای حکومەت و پارتی سیاسی و کۆنسولەکان ئامادەبوون.