Category Archives: سەرۆکایەتی زانکۆ

رۆژی دووشەممە رێکەوتی 3ـی نیسانی 2023، بە ئامادەبوونی سەرۆکی زانکۆ پ.د. ئیدریس محەمەد تاهیر هەرکی، خولی راهێنانی قۆناغی دووەمی دامەزراندنی تاقیگەی وزە نوێبووەوەکان لە سەنتەری توێژینەوەی زانکۆی پۆلیتەکنیکی هەولێر بەڕێوەچوو، کە بۆ ماوەی پێنج رۆژ بەردەوام دەبێت.

بابەتەکانی خولەکە پێکهاتوون لە (Solar thermal energy ,Photovoltaic solar energy ,Wind energy)، کە ستافی بەشی میکانیک و وزە لە هەردوو کۆلیژی تەکنیکی ئەندازیاری و تەکنەلۆجی هەولێر بەشدارن و هەروەها ستافی بەشی فیزیای کۆلێژی ئەندازیاری زانکۆی سەڵاحەددین کە وەک میوان ئامادەن و لە لایەن (Dr. Baker Farangi) لە زانکۆی ناوبراو دەگووترێتەوە.

شیاوی باسە خولەکە گرنگییەکی تایبەتی هەیە بۆ داهاتووی وزە نوێبووەوەکان لە هەرێمی کوردستان بەو پێیەی کە بەشداربووانی خولەکە لە داهاتوودا وانە پراکتیکییەکان لەم تاقیگەیە بە قوتابییان دەڵێنەوە، کە ئەمەش دەبێتە هۆی ئامادەکردنی کادری بەتوانا لە بواری وزەی خاوێن کە لە ئێستادا هەموو جیهان رووی لە بەکارهێنانی وزەی خاوێن کردووە.

خولەکە لە چوارچێوەی پرۆژەی (Renewable Energy Laboratory) کە زانکۆی پۆلیتەکنیکی هەولێر و زانکۆی (THM)ـی ئەڵمانی و بە پاڵپشتی دارایی رێکخراوی (DAAD) بە سێ قۆناغ بەڕێوەدەچێت، قۆناغی یەکەم مانگی نۆڤەمبەری ساڵی رابردوو بەڕێوەچوو، لە ئێستاشدا قۆناغی دووەمی بەڕێوەدەچێت و بڕیاریشە لە داهاتوودا شاندی زانکۆ ئەڵمانییەکە سەردانێکی دیکە بۆ زانکۆمان ئەنجام بدەن بۆ دەستپێکردنی قۆناغی سێیەم و کۆتایی پرۆژەکە.

لە چوارچێوەی ستراتیژیەت و هەوڵەکانی زانکۆی پۆلیتەکنیکی هەولێر بۆ پەرەپێدانی تواناکانی ستافی زانکۆ رۆژی دووشەممە رێکەوتی رێکەوتی 3ـی نیسانی 2023، بە ئامادەبوونی سەرۆکی زانکۆ پ.د. ئیدریس محەمەد تاهیر هەرکی، خولێکی راهێنان بۆ ژمارەیەک مامۆستا و فەرمانبەر بەڕێوەچوو کە بۆ ماوەی 4 رۆژ بەردەوام دەبێت.

زانکۆی پۆلیتەکنیکی هەولێر بە هەماهەنگی لەگەڵ زانکۆی (THM)ـی ئەڵمانی لە چوارچێوەی جێبەجێ کردنی پرۆژەی (Academic Education in the Field of renewable energies) کە لە رێگەی رێکخراوی (DAAD) پاڵپشتی دارایی دەکرێت، خولێکی راهێنانی لە ژێر ناونیشانی (project management, systematic Development solution) بۆ ستافی زانکۆ، لە سەنتەری توێژینەوە بەڕێوەبرد.

لە رێورەسمی کردنەوەی خولەکەدا سەرۆکی زانکۆ وتەیەکی پێشکەش کرد و تیایدا بەخێرهاتنی بەشداربووانی کرد و گووتی: “لە سەردەمی ئەمڕۆدا زانکۆکانی جیهان گۆرانکاری فراوان بەخۆیانەوە دەبینن و فەرهەنگی بەنێودەوڵەتیکردنی زانکۆ بۆتە ستراتیژییەتی کارکردنیان.

بۆ ئەوەی زانکۆیەکی هەرێمی یان دەوڵەتی ببێتە زانکۆیەکی نێودەوڵەتی یان جیهانی پێویستی بە گۆرانکاری ریشەیی هەیە لە فەلسەفە و ئاراستە جیاوازەکان و ستراتیجیەتی کارکردن.

بۆ ئەم کارەش میکانیزمی جیاواز لە گشت دام و دەزگاکانی زانکۆ پێویستن، هەر لەم چواچێوەیەدا ئەم جۆرە خولانە بە پێویست دەزانین کە چەند چەمکێکی جیاواز لە خۆ دەگرێت؛ لەوانە چۆنییەتی رێکخستنی کارگێری کار و چۆنییەتی چارەسەرکردنی کێشەکان و دروستکردنی کادر و چۆنییەتی دانانی پلانی کورت و درێژ مەودا، هەموو ئەو بابەتانەن کە لەو خولەدا پێشکەش دەکرێن”.

لە خولەکەدا 23 مامۆستا و فەرمانبەری کۆلێژ و پەیمانگە تەکنیکییەکان بەشدارن تیایدا و بۆ ماوەی 4 رۆژ بەردەوام دەبێت کە تیایدا لە لایەن (Prof. Dr. Klaus Behler) بابەتەکانی (Project management, Problems solutions, Systematic Development) بەشێوەیەکی چڕوپڕ بۆ بەشداربووان روون دەکرێتەوە.

پ.د.ئیدریس محەمەد تاهیر هەرکی، سەرۆكی زانكۆی پۆلیتەكنیكی هەولێر، بەبۆنەی هاتنەوەی مانگی پیرۆزی ڕەمەزان لە پەیامێکدا پیرۆزبایی لە سەرجەم مامۆستایان، فەرمانبەران و قوتابیانی زانكۆی پۆلیتەكنیكی هەولێر کرد و هیوای خواست ئەم مانگە ببێتە مایەی خێر و خۆشی بۆ کوردستانیان.

ئەمەش دەقی پەیامەکەی سەرۆكی زانكۆی پۆلیتەكنیكی هەولێرە

بە بۆنەی هاتنی مانگی پیرۆزی ڕەمەزان، بەناوی خۆم و ئەندامانی ئەنجوومەنی زانکۆی پۆلیتەکنیکی هەولێر، گەرمترین پیرۆزبایی لە سەرجەم مامۆستایان، فەرمانبەران و قوتابیانی زانکۆمان دەکەم. لە خوای گەورە داواکارم نوێژ و رۆژوو و نزاکانمان لێ قبوڵ بکات و هاتنی مانگی رەمەزان ببێتە مایەی خێر و خۆشی و ئارامیی زیاتر بۆ کوردستانیان.

خوای گەورە کوردستان لە هەموو نەهامەتییەک بپارێزێت.

پ.د.ئیدریس محەمەد تاهیر هەرکی
سەرۆكی زانكۆی پۆلیتەكنیكی هەولێر

پ.د.ئیدریس محەمەد تاهیر هەرکی، سەرۆكی زانكۆی پۆلیتەكنیكی هەولێر بەشداری لە کۆنگرەی یەکێتی زانکۆکانی عەرەبی کرد کە لە رۆژانی ١٨-٢٠ی ئاداری ٢٠٢٣ لە هەردوو زانکۆ سوسە و مونتەسیر لە وڵاتی تونس بەڕێوەدەچێت

سەرۆكی زانكۆی پۆلیتەكنیكی هەولێر لەگەڵ ژمارەیەک لە سەرۆکی زانکۆکانی هەرێمی کوردستان بەشداریی لە کارەکانی کردنەوەی ٥٥ هەمین خولی کۆنگرەی گشتیی یەکێتی زانکۆکانی عەرەبی کرد کە لەژێر چاودێری سەرۆک وەزیرانی تونس، نەجلا بودن رەمەزان دەستی بەکارەکانی کرد.

رێوڕەسمی کردنەوەی کارەکانی کۆنگرەکە کە بە ئامادەبوونی وەزیری خوێندنی باڵا و توێژینەوەی زانستی تونس، مونسیف بوکستر بەڕێوەچوو، سەرۆکی زانکۆی پۆلیتەكنیكی هەولێر و سەرۆکی زانکۆکانی هەرێمی کوردستان بەناوی هەرێمی کوردستانەوە زنجیرەیەک دیدار و کۆبوونەوەیان لەگەڵ بەشداربووانی کۆنگرەکە ئەنجامدا، لەوانە وەزیری خوێندنی باڵا و توێژینەوەی زانستی تونس، مونسیف بوکسیر و وەزیری خوێندنی باڵا و توێژینەوەی زانستی میسر، محەمەد ئەيمەن عاشوور.

لەو دیدارانەدا شاندی کوردستان لەبارەی پەرەپێدان بە پەیوەندی و هەماهەنگیی نێوان زانکۆکان ئاڵوگۆڕی بیروبۆچوونەکانیان کرد.

بڕیارە لە میانی کارەکانی کۆنگرەکەدا چەندین بابەتی پەیوەندار بە پرۆسەی خوێندن لە زانکۆکان تاوتوێی بکرێت، بە تایبەتی لە قۆناغی دوای ڤایرۆسی کۆرۆنا کە ئەمە یەکەم کۆنگرەی یەکێتییەکەیە ئەنجام بدرێت و لەمبارەیەوە باس لە کاریگەرییەکانی بڵاوبوونەوەی ڤایرۆسی کورۆنا کرا، کە بووە هۆی ئەوەی بیر لە بەکارهێنانی سیستەمی ئەلیکترۆنی بکرێتەوە و زیاتر گرنگی بە بەکارهێنانی بدرێت لە بواری خوێندنی باڵادا.

جێی ئاماژەیە، زانكۆی پۆلیتەكنیكی هەولێر وەک یەکێک لە زانکۆکانی ئەندام لە یەکێتی زانکۆکانی عەرەبی ساڵانە بە فەرمی بانگهێشتی کۆنگرەی یەکێتییەکە دەکرێت کە هەر خولێکی لەلایەن زانکۆیەکی ئەندام لە یەکێتییەکە میوانداریی دەکرێت.