Category Archives: سەرۆکایەتی زانکۆ

پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر سەردانی زانکۆی پۆلیتەکنیکی دهۆکی کرد و لەلایەن پ.د.ئاری عادل، سەرۆکی زانکۆ و یاریدەدەرانی سەرۆکی زانکۆکەوە پێشوازیی لێکرا.

لە کۆبوونەوەیەکدا کە یاریدەدەری سەرۆکی زانکۆی پۆلیتەکنیکی هەولێر بۆ کاروباری زانستی و یاریدەدەرانی سەرۆکی زانکۆی پۆلیتەکنیکی دهۆک و ژمارەیەک لە راگرانی کۆلیژ و پەیمانگانی سەربە زانکۆکە ئامادەی بوون، باس لە هەماهەنگی زیاتری نێوان هەردوو زانکۆ لە بوارەکانی زانستی و ئەکادیمی کرا.

هەر لە کۆبوونەوەکەدا باس لە ئەنجامدانی کۆنفرانسی هاوبەش لە نێوان هەردوو زانکۆی پۆلیتەکنیکی هەولێر و زانکۆی پۆلیتەکنیکی دهۆک کرا کە ساڵانە ئەنجام دەدرێت و جەخت لە پێویستی فراونترکردنی کۆنفرانسەکە و بەشداریکردنی زانکۆی نێودەوڵەتیی دیکە و بە نێودەوڵەتییکردنی کۆنفراسەکە کرا.

هاوکات باس لە پێویستی خزمەتکردنی زیاتری کۆمەڵگا و کولتووری کوردستانی و شارەزابوونی کولتووری کۆمەڵگای دیکەش بکات.

 

رۆژی پێنج شەممە 16ـی نۆڤەمبەری 2023، بەڕێوەبەری چالاکییەکانی سەرۆکایەتی زانکۆی پۆلیتەکنیکی هەولێر لەگەڵ بەرپرسی سەرجەم هۆبەکانی وەرزشی کۆلێژ و پەیمانگە تەکنیکییەکان کۆبوویەوە.

کۆبوونەوەکەدا کە لەسەر راسپاردەی پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر ئەنجامدرابوو، تیایدا باس لە کۆنووسی کۆبوونەوەی (3) کرا ، و بەڕێوبەری چالاکییەکانی سەرۆکایەتی زانکۆ مامۆستا ڕەمزی عیسمەت بەگرنگییەوە لە هەنگاوەکانی بەرێز سەرۆکی زانکۆی رووانی کە بەردەوام پاڵپشت و هاوکاری بەڕێوبەرایەتییەکەیە بۆ دروستكردنی یاریگای دووەمی زانکۆ و دابینكرنی هه‌موو پێداویستیەكانى وه‌رزشی بۆ گشت كۆلیژ و په‌یمانگاكان، هەروەها مامۆستا رەمزی ئاماژەی بە رۆڵی کاریگەری سەرۆکی زانکۆ کرد لە پرۆسەی بە ئه‌ندام بوونی زانکۆمان لە یەكێتی زانكۆكانی عێراق وه‌ك ئەندامى لیژنەى فه‌رعی و بەهەمان شێوە لە هەڵبژاردنی لێژنەی هەرێمى كوردستانیش.

لە درێژەی کۆبوونەوەکەدا بڕیار درا زانكۆمان له‌سه‌ر ئاستی هەرێمی کوردستان و عێراقیش به‌شداری له‌چالاكییەكان بكات، هەروەها ڕێنماییەكانی چۆنیەتی بەڕێوەچوونی كارو چالاكیەكانی گشت كۆلێژو پەیمانگاكان لەگەڵ خۆئاماده‌كرنیان خرایە بە باس.

پاشان ئامادەبووان باسیان لە كارو چالاكیەكانی کۆلێژ و پەیمانگەکانیان كرد بۆ ئەمساڵی خوێندن کرد و ئەو گرفتانەی كە دەبێتە هۆى ئاستەنگ لەكارو چالاكییەكان خستەڕوو، و چەندین پێشنیار پێشکەشکران بە دروستکردنی یاریگەی دیکە یاخود نۆژەنکردنەوەیان لە کۆلێژ و پەیمانگەکان.

لەو کۆبوونەوەیەدا بڕیاردرا بەئەنجامدانى چەند چالاکییەک لەوانە: ئه‌نجامدانی ماراسۆن، پاڵەوانیەتی تۆپی پێ لەسەر ئاستی كوڕان و كچان، پاڵەوانیەتی تۆپی سەرمێز لەسەر ئاستی كوڕان وكچان، پاڵەوانیەتی شەتره‌نج بۆ كوڕان و كچان، پاڵەوانیەتی تۆپی پێی مامۆستایان و فەرمانبەران ، پاڵەوانیەتى تۆپی سەرمێزی مامۆستایان و فەرمانبەران.

رۆژی چوارشەممە 15ی نۆڤەمبەری 2023، لە رێورەسمێکدا پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، 50 ئامێری مایکرۆسکۆبی نوێی ئیتاڵی بەخشییە بەشە پزیشکییەکانی کۆلێژ و پەیمانگەکانی سەر بە زانکۆمان.

لە رێورەسمەکەدا کە سەرجەم ئەندامانی ئەنجومەنی زانکۆی پۆلیتەکنیکی هەولێر ئامادەیبوون، پ.ی.د. نەجیب توما بتو یاریدەدەری سەرۆکی زانکۆ بۆ کاروباری زانستی وتەیەکی پێشکەش کرد و بە گرنگییەوە باسی لە پێویستی ئامێرەکان کرد بۆ قوتابییان و مامۆستایانی زانکۆمان و گوتی: ” بیرۆکەی کرین و دابینکردنی ئەو مایکرۆسکۆبانە دەگەڕێتەوە بۆ هەوڵی د. ئیدریس سەرۆکی زانکۆمان کاتێک دەست بەکاربوو سەردانی گشت کۆلیژ و پەیمانگە تەکنیکییەکانی کرد، تاقیگەو هۆڵەکانیشی بەسەرکردەوە، لەوێ ئەو بیرۆکەیە دروست بوو کاتێک سەردانی پەیمانگەی تەکنیکی سۆرانمان کرد، بینیمان گشت قوتابییان کۆبوونەتەوە لەدەوری یەک ئامێری مایکرۆسکۆبی کۆن، لەسەردانی کۆیەش لەتاقیگەیان هەمان وێنە دووبارە بەرچاومان کەوت، دواتریش داواکاری پەیمانگەی تەکنیکی پزیشکی هەبوو بۆ دابینکردنی ئامێری مایکرۆسکۆب.

بۆیە بریارماندا پڕۆژەیەک جێبەجی بکرێت هەم چاککردن بۆ هەموو هۆڵەکانی خوێندن بکرێت لەگەڵ تاقیگەکان هەم بۆ دابینکردنی ئامێر، لێژنەیەکی پسپۆڕمان لە مامۆستایانی زانکۆمان پێکهێنا بۆ تاوتوێکردن و دیارسەتکردنی ئامێرەکان لە جۆر و کوالیتی باش کە لەگەڵ خواست و پێداویستی قوتابییان و مامۆستایاندا یەکبگرێتەوە، لێژنەکە بە هەماهەنگی لەگەڵ هۆبەی هاوردە و تاقیگەکان، پێشنیاری چەندەها جۆرو مۆدیلی مایکرۆسکۆبی کرد لەناویاندا ئێمە جۆرێکمان هەڵبژارد کە ئیتاڵیە و جۆرێکی زۆرباشە و دابینمان کرد”.

هەریەکە لە کۆلیژی تەکنیکی تەندروستی هەولێر، پەیمانگەی تەکنیکی پزیشکی هەولێر، کۆلیژی تەکنیکی شەقڵاوە، کۆلیژی تەکنیکی سۆران، پەیمانگەی تەکنیکی کۆیە، پەیمانگەی تەکنیکی مێرگەسۆر، سەنتەری توێژینەوەی بەپێی پێویستییان ئامێرەکانی لە جۆری B_159 و لە جۆری B_190  بۆ دابینکرا کە توانای کارکردنیان زۆرباشە بۆ سوودێکی زۆریان بۆ قوتابیان و مامۆستایان هەیە.

شیاوی باسە سەرجەم ئامێرەکان لەسەر داهاتی زانکۆمان دابین کراون ئەمەش لە چوارچێوەی ستراتیژیەتی بەکارخستنەوەی داهاتی زانکۆ بۆ پێشخستن و بنیاتنانی ژێرخانی زانکۆ، هەروەک لە ماوەی رابردوودا لە سەر داهاتی زانکۆمان پرۆژەی دروستکردنی باڵەخانە و هۆڵی تاقیگە لە کۆلێژی تەکنەلۆجی هەولێر چووە بواری جێبەجێکردنەوە، بە هەمان شێوە لەسەر داهاتی زانکۆ 150 ئامێری کۆمپیوتەر بۆ گشت کۆلێژ و پەیمانگەکان دابینکرا.

 

رۆژی سێ شەممە 14ـی نۆڤەمبەری 2023، بەئامادەبوونی پ.د.ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، یاریدەدەرانی سەرۆکی زانکۆ بۆ کاروباری زانستی، کارگێڕی و قوتابییان، مامۆستا هەژار عوسمان بەرپرسی لێژنەی ناوچەی ئاسۆ، خاتوو شیرین خالید بەرپرسی لێژنەی ناوچەی ئایندە و راگری هەردوو کۆلێژی تەکنیکی ئەندازیاری و کارگێڕی هەولێر و ژمارەیەکی بەرچاو لە مامۆستایان و قوتابییان، لە رێوڕەسمێکی شایستەدا، بەڕێوبەرایەتی چالاکییەکانی سەرۆکایەتی زانکۆ یاریگایەکی تۆپی پێی بچووککراوە لە نێو کامپی دووی زانکۆی پۆلیتەکنیکی هەولێر کردەوە.

ئەم یاریگایە لە پێناو زیاتر خزمەتکردنی قوتابییان و دروستکردنی کەشێکی گونجاو بۆیان بنیات نراوە و خەرجی دروستکردنەکەشی لەسەر داهاتی زانکۆی پۆلیتەکنیکی هەولێرە و لەژێر سەرپەرشتی بەڕێوبەرایەتی چالاکییەکانی سەرۆکایەتی زانکۆ دەبێت، کە قوتابییان و مامۆستایانی کۆلێژی تەکنیکی کارگێری هەولێر و کۆلێژی تەکنیکی ئەندازیاری هەولێر سوودمەند دەبن.

جێگای ئاماژەیە یاریگای کەمپی یەکی زانکۆی پۆلیتەکنیکی هەولێر ماوەی چەند ساڵێکە کراوەتەوە لە پەیمانگەی تەکنیکی کارگێری هەولێر، ئەو یاریگایە وەرزشیەش بۆ قوتابیان و مامۆستایانی پەیمانگەی ناوبراوە، هاوکات یاریگای سێیەمیش لە قۆناغی جێبەجێکردندایە.

دوای مەراسیمی کردنەوەی یاریگایەکە، یارییەکی دۆستانە لە نێوان قوتابییانی هەردوو کۆلێژ بەرێوەچوو، یەکەم تۆپی یاریگا لە نێوان هەردوو ڕاگری کۆلێژی تەکنیکی کارگێری هەولێر و کۆلێژی تەکنیکی ئەندازیاری هەولێر جولێنرا.