Category Archives: سەرۆکایەتی زانکۆ

رۆژی یەکشەممە رێکەوتی 26ـی شوباتی 2023 لەسەر بانگهێشتێکی فەرمی کونسولخانەی ئەرمینیا لە هەرێمی کوردستان، بەنوێنەرایەتی سەرۆکی زانکۆ، یاردەدەری سەرۆکی زانکۆ بۆ کاروباری زانستی و ڕاگری پەیمانگەی تەکنیکی مێرگەسۆر، بەشدارییان کرد لە دووەمین ساڵیادی کردنەوەی کونسولگەری گشتی کۆماری ئەرمینیا لە هەولێر.

هاوکات شاندەکەی زانکۆ بەشدارییان کرد لە پێشانگایەک کە وێنە و ئەرشیف و بەڵگەنامەی مێژوویی دەربارەی پێکهاتەی نەتەوەکانی کورد، یەزیدی و ئاشوریەکانی لە ئەرمینیا تێدا نمایش کرابوو، ئەمەش وەک لێکچوونێک لەنێوان ئەرمینیا و کوردستان نیشاندرا کە ساڵەهای ساڵە پێکهاتە جیاوزەکان بێ جیاوازی نەریت و ئاین و زمان، پێکەوە دەژین و ئاوێتەی یەکتربوون.

نەتەوەی کورد و ئەرمەن بە درێژایی مێژوو نەهامەتی زۆریان بەسەردا هێنراوە و هەردوو گەل جینۆساید کراون.

شیاوی باسە لە مەراسیمەکەدا ژمارەیەکی بەرچاو لە بەرپرسانی باڵای حکومەت و پارتی سیاسی و کۆنسولەکان ئامادەبوون.

ئەمڕۆ یەکشەممە 26ـی شوباتی 2023 سەرۆکایەتی زانکۆی پۆلیتەکنیکی هەولێر، لەژێر سەرپەرشتی راستەوخۆی سەرۆکی زانکۆ، پ.د.ئیدریس محمد تاهیر هەرکی، کۆمەک و هاوکارییەکانی کەمپینی (لەگەڵتانین)ـی زانکۆی پۆلیتەکنیکی هەولێری رادەستی دەزگای خێرخوازی بارزانی کرد، تاکو ئەوانیش بیگەیەنن بە لێقەوماوانی بوومەلەرزەکان لە شار و ناوچەکانی باکوور و رۆژئاوای کوردستان.

سەرۆکی زانکۆ و یاوەرانی لەلایەن موسا ئەحمەد، سەرۆکی دەزگای خێزخوازی بارزانی بەگەرمی پێشوازییان لێکرا.

لە دانیشتنێکدا، پ.د.ئیدریس محەمەد تاهیر هەرکی بەناوی خۆی و زانکۆی پۆلیتەکنیکی هەولێر دەستخۆشی لە سەرۆک و ستافی دەزگای خێرخوازی بارزانی کرد کە لە ساتەکانی یەکەمی بوومەلەرزەکانی باکوور و رۆژئاوای کوردستان کۆمەکیان گەیاندە لێقەوماوان و راستەوخۆ گەیشتنە شوێنی کارەساتەکە.

هەروەها لەبەرامبەر ئەرک و ماندووبوونیان و بەبۆنەی گەڕانەوەیان بۆ هەرێمی کوردستان لەدوای چوونیان بۆ باکوور و رۆژئاوای کوردستان، سەرۆکی زانکۆی پۆلیتەکنیکی هەولێر چەپکە گوڵێکی پێشکەش بە سەرۆکی دەزگای خێرخوازی بارزانی کرد.

دوای رادەستکردنی کۆمەکەکان، سەرۆکی دەزگای خێرخوازی بارزانی وێڕای بەخێرهێنانی پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر یاوەرانی، بۆ دەزگاکانی راگەیاندن گوتی: “بەخۆشحاڵییەوە ئەمڕۆ کۆمەک و هاوکارییەکانی زانکۆی پۆلیتەکنیکی هەولێر وەردەگرین، دەستخۆشی و سوپاسی ستافی مامۆستایان و فەرمانبەرانی ئەو زانکۆیە دەکەین بۆ روحییەتی هاوکاری و یارمەتیدانیان و متمانەکردنیان بەئێمە، دڵنیابن هاوکارییەکانتان جێگای خۆی دەگرێت و بە بەباشترین شێوە دەگاتە جێگای مەبەست”.

موسا ئەحمەد گوتیشی: “دڵخۆشین فەرمانبەران و مامۆستایان وەک چیایەک لەپشت دەزگاکەی خۆیانن، لەناخی دڵەوە شانازیتان پێوە دەکەین زۆر سوپاستان دەکەین، ئێمەش بەهەستەوە لەخزمەت ئەو خەڵکە خۆشەویستە دەبین کە لێیان قەوماوە، ئەوەی ڕوویدا زیانێکی زۆر گەورەبوو بەداخەوە، دەزگاکەمان وەک ئەرکێکی سەرشانی سەیری دەکات، چونکە بارزانی نەمر موڵکی هەموو شارەکانی کوردستانە بێ جیاوازی لە نێوان پارچەکان، بارزانی دەفەرمووێت (شانازییە مرۆڤ خزمەتکاری میللەتی خۆی بێت)، تا هەست و سۆزی ئێوەمان لەپشت بێت دەتوانین خزمەت پێشکەش بکەین”.

دواتر پ.د. ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر، بۆ میدیاکان دوا گوتی: “دوای روودانی بوومەلەرزەکانی تورکیا و سووریا، لەسەر داوای ئەنجوومەنی وەزیرانی هەرێمی کوردستان، کەمپنێکمان بۆ کۆکردنەوەی کۆمەک بۆ لێقەوماوانی ئەو کارەساتە راگەیاند”.

سەرۆکی زانکۆی پۆلیتەکنیکی هەولێر بە ئاماژەدان بە رۆڵی دەزگای خێرخوازی بارزانی لە گەیاندنی کۆمەک بۆ زیانلێکەوتووانی بوومەلەرزەکە، گوتی‌‌‌‌: “دەستخۆشی لەو دەسپێشخەرییەی دەزگای خێرخوازی بارزانی دەکەین کە هەڵساون بە کارێکی پیرۆزی مرۆڤایەتی گرنگ و بەسوود بۆ لێقەوماوانی بوومەلەرزەکەی ناوچە جیاوازەکان، کەمپینی (لەگەڵتانین) جێگای دەستخۆشی گشت مامۆستایان و فەرمانبەرانی زانکۆکەمان بوو کە بەوپەڕی خۆشحاڵییەوە بەشدارییان تێدا کرد و کۆمەک و هاوکارییەکانیان گەیاندە دەستی ئێمە، ئێمەش بەوپەڕی شانازییەوە سەرپەرشتیمان کرد و بە ئەرکی سەرشانی خۆمان زانی، کارێکی گرنگە کە دەزگای خێرخوازی بارزانی لە دەرەوەی سنووری هەرێمی کوردستانیش کاری خێرخوازی مرۆڤایەتیی ئەنجام بدات، لەو کارەساتی بوومەلەرزەیەی کە ڕوویدا بەشێوازێکی تازە هاوکارییەکانی ناوخۆی گواستەوە بۆ دەرەوەی سنووری هەرێم ، ئەو کارە ناودەنێین بە گواستنەوەی خزمەت تا ناو و شۆڕش و دەسکەوتەکانی حکوومەتی هەرێمی کوردستان زیاتر پارێزراوبێت”.

پ.د. ئیدریس محەمەد تاهیر هەرکی ئەم کارەی دەزگای خێرخوازی بارزانی بە شێوازێکی نوێی شۆڕش و نیشاندانی مرۆڤدۆستی گەلی کورد ناوبرد.

لە روانگەی هەستکردن بە بەرپرسیاریەتی بەرامبەر بە لێقەوماوانی بوومەلەرزەکانی باکوور و رۆژئاوای کوردستان، سەرۆکایەتی زانکۆی پۆلیتەکنیکی هەولێر رۆژی 13ـی شوباتی 2023 کەمپینی (لەگەڵتانین)ـی راگەیاند کە بۆ ماوەی 10 رۆژ بەردەوام بوو کە سەرۆکایەتی زانکۆ و گشت کۆلێژ و پەیمانگە تەکنیکییەکان تیایدا بەشدارییان کرد و بڕێکی زۆر پێداویستی و کەلوپەل و سەبەتەی خۆراک و پێخەف کۆکرایەوە، ئەمڕۆش لە مەراسیمێکدا هاوکارییەکان رادەستی دەزگای خێرخوازی بارزانی کرا.

رۆژی پێنج شەممە رێکەوتی 23ـی شوباتی 2023 بە ئـامادەبوونی یاریدەدەرانی سەرۆکی زانکۆ ژمارەیەک ئەندامی ئەنجومەنی زانکۆ و بەڕێوبەرانی سەرۆکایەتی زانکۆ و سەرۆک بەشەکانی کۆلێژ و پەیمانگەکان، وۆرکشۆپی بۆ کارخوازان لە سەنتەری رۆشنبیری زانکۆی پۆلیتەکنیکی هەولێر بەڕێوەچوو.

ئەم وۆرکشۆپە لە لایەن رێکخراوی (ئای. ئێڵ. ئۆ) سەرپەرشتی دەکرێت و لە لایەن زریان جمال خضر/بەرپرسی باڵای پرۆژە لە هەرێمی کوردستان/ڕێکخراوی (ILO) و هێمن هادی پیرداود/ ڕاهێنەر پێشکەش دەکرێت، و ئامانج لێی روونکردنەوەی چۆنیەتی پێشکەشکردنە بۆ دۆزینەوەی هەلیکار لەسەر ڕێنمایی پیشەیی ڕێکخراوی کار بۆ کارخوازان، هەروەها سوودمەندبوونی قوتابیانە لە باشترکردنی کوالیتی و بەردەستبوونی خزمەتگوزارییەکانی دامەزراندن.

وۆرکشۆپەکە یارمەتی قوتابیان دەدات لە بازاڕی کار تێبگەن، ئامانجەکانیان دیاری بکەن، ئامرازەکانی پەیوەندیکردن و میدیاکانیان دروست بکەن، ئینتەرنێت بەکاربهێنن و لە کۆتاییدا، بە سەرکەوتوویی تێکەڵ بە کۆمپانیا نوێیەکە ببن.

شیاوی باسە ئەم وۆرکشۆپە لە لایەن رێکخراوی کار (ئای. ئێڵ. ئۆ) بۆ قوتابیانی زانکۆکانی عێراق و هەرێمی کوردستان رێکخراوە لە زانکۆی پۆلیتەکنیکی هەولێر بە بەشداری زیاتر لە 600 قوتابی لە قوناغەکانی دوو و چوار بەڕێوەچوو.

رۆژی پێنج شەممە رێكه‌وتی 23ـی شوباتی 2023 له‌ هۆتێل شیڕاتۆن به‌ ئاماده‌بوونی سەرۆکی زانکۆ پ.د. ئیدریس محمد تاهیر هەرکی، پارێزگاری هه‌ولێر ئومێد خۆشناو، ڕاوێژكاری سه‌رۆكی حكومه‌تی هه‌رێمی كوردستان د.كارزان كریم ، ڕاوێژكاری وه‌زاره‌تی خوێندنی باڵا د.ئه‌میر چالی، سه‌رۆكی زانكۆی هه‌ولێری پزیشكی پ.ی.د.نورالدین وێردی و یاریده‌ده‌رانی سه‌رۆكی زانكۆی  پۆلیتەکنیکی هەولێر و سه‌لاحه‌دین- هه‌ولێر و ئەندامانی پەرلەمان کۆڕبەندی دیقه‌ت، متمانە و کوالیتی دەستنیشان کردنی نەخۆشیەکان بەڕێوەچوو.

ئەم کۆڕبەندە لە لایەن زانکۆی پۆلیتەکنیکی هەولێر و زانکۆی سەلاحەددین – هەولێر بە هاوبەشی لەگەڵ وەزارەتی تەندروستی حکومەتی هەرێمی کوردستان و رێکخراوی ئێکۆ بۆ پەروەردە و تەندروستی کۆمەڵ ڕێکخرا.

کۆڕبەندەکە بە ساتێک وەستان و گوێکرتن بۆ سروودی نیشتمانی دەستیپێکرد پاشان سەرۆکی زانکۆی پۆلیتەکنیکی هەولێر وتەیەکی پێشکەشکرد و تیایدا بەخێرهاتنی میوانان و بەرپرسانی حزبی و حکومی کرد و گووتی:

خۆشحاڵین ئەمڕۆ لەگەڵ زانکۆی سەڵاحەدین و وەزارەتی تەندروستی لە بەرنامەیەکی تری خزمەتگوزاری کۆمەڵگە لەم کۆڕبەندە پێکەوە کۆبووینەتەوە.

بەڕێزان وەکو لای هەموومان ئاشکرایە زانکۆ جگە لە کاری پێشکەشکردنی مەعریفە و توێژینەوەی زانستی کارێکی تریشی ئەوەیە کە بەردەوام خزمەتگوزاری پێشکەش بە کۆمەڵگە بکات، چ لەڕێگەی کەرتی تایبەت یاخود کەرتی گشتی، چ بە هاوبەشی بێت لەگەڵ رێکخراو و زانکۆکان، خۆشبەختانە ئێمە لە زانکۆی پۆلیتەکنیکی هەولێر لەماوەی ئەمساڵدا چەندین بەرنامەی لەم شێوەیەمان ئەنجامداوە بۆ خزمەتکردنی کۆمەڵگە چ بە هاوبەشی لەگەڵ رێکخراوەکان چ لەگەڵ زانکۆکان.

بەڕێزان زانکۆی پۆلیتەکنیکی هەولێر پێکدێت لە شەش کۆلێژ و شەش پەیمانگە و زیاتر لە 42 پرۆگرامی خوێندن لە 132 بەشی زانستی پێشکەش دەکات کە نزیکەی 41 بەشیان تایبەتن بە تەندروستی و پزیشکی، لەو ژمارەیەش 11 بەشیان لە ئێواران و بەیانیان تایبەتن بە شیکاری نەخۆشییەکان.

بەرێزان ئەم بابەتە بابەتێکی گرنگە بۆ هەموو تاکێکی کۆمەڵگە، چونکە هەموو تاکێک پێویستی بە پشکنیکی نەخۆشی هەیە، پێمانوایە ئەوەی پەیوەستە بەم بابەتەوە سێ خاڵی گرنگن ئەوانیش چۆنیەتی پێگەیاندنی کادری تاقیگەکان، کوالیتی ئامێرەکان کە لەدەرەوە هاوردە دەکرێن، پێداویستیەکانی تاقیکاری وەک ئەو دەرمان و ماددە کیمیاوییانەی کە لە شیکارییەکاندا بەکاردێن، بۆیە دەبێت ئەم کۆربەندە فۆکس بخاتە سەر ئەم خاڵانە.

ئەوەی پەیوەستە بە زانکۆ و کۆلێژ و پەیمانگەکانەوە چۆنیەتی پێگەیاندنی ئەو کادیرانەیە، دەبێت ئێمە لە زانکۆکان رژد بین لەسەر ئەوەی چۆن ئەو کادیرانە پێدەگەیەنین، هەروەها چۆن بەهاوبەشی لەگەڵ وەزارەتی تەندروستی راهێنان بەو قوتابیانە دەکەین، بە خۆشحاڵییەوە لە ئێستادا لەگەڵ وەزارەتی تەندروستی بەهاوبەشی ئەم کارە ئەنجام دەدەین ، ئێمە وەک زانکۆ گرنگی تایبەتمان پێداوە و بەرنامەی تایبتیشمان بۆی داناوە.

لە کۆتاییدا دەمەوێت سوپاسی سپۆنسەر و ئەندامانی لێژنەی سەرپەرشتی ئەم کۆڕبەندە بکەم هیوادارین ئەنجامی کۆڕبەندەکە ببێتە هۆکارێکی تر بۆ باشترکردنی کوالیتی دەرچووان و باشترکردنی بەڕێوەچوونی هەموو ئەو پشکنینانەی کە لە تاقیگەکاندا ئەنجام دەدرێت و تاکو بۆ هەموو لایەکمان سوودبەخش بێت و هەموو لایەکیشمان تەندروست باش بین، دووبارە سوپاس و زۆر بەخێربێن. پاشان دەستکرا بە پرۆگرامی کۆڕبەندەکە بە پێشکەشکردنی پرێزنتەیشن و پانێڵەکان.