Category Archives: سەرۆکایەتی زانکۆ

دوێنێ سێ شەممە رێکەوتی 14ـی ئاداری 2023 وەزارەتی خوێندنی باڵا و توێژینەوەی زانستی بە هەماهەنگی لەگەڵ رێکخراوی  (IREX) و بە ئامادەبوونى راوێژکاران و بەڕێوەبەرانى گشتى لە وەزارەتى خوێندنى باڵا و توێژینەوەى زانستى و بە بەشدارى 70 مامۆستاى زانکۆ لە سەرجەم زانکۆ حکومیەکانى هەرێمى کوردستان، یەکەمین خولى راهێنانى تایبەت بە رووپێوى پێداویستییەکانى بازاڕى کار و گونجاندنى لەگەڵ ناوەرۆکى پڕۆگرامەکانى خوێندن دەستی پێکرد و بۆ ماوەى دوو ڕۆژ بەردەوام بوو.

لە خولەکەدا 6 مامۆستای زانکۆی پۆلیتەکنیکی هەولێر بەشدارییان کرد و بۆ ماوەی دوو رۆژ بەردەوام بوو، کە بەشێوەى کردارى و لەسەر بنەماى زانستی لەلایەن پسپۆڕانى نێودەوڵەتی لە رێکخراوی (IREX) راهێنانیان پێکرا، تاکو سەرکردایەتى پڕۆژەى رووپێوى بازاڕى کارى هەرێمى کوردستان و پەرەپێدانی پرۆگرامەکان بکەن.

لەئێستادا وەزارەتى خوێندنى باڵا و توێژینەوەى زانستى پڕۆژەى پەرەپێدانى پڕۆگرامەکانى خستۆتە بوارى جێبەجێ کردنەوە، بۆ ئەم مەبەستە پێویستی بە رووپێوى زانستییانەى پێداویستییەکانى بازاڕى کار و کەرتى گشتى و کەرتى تایبەت بوو، بۆ ئەوەی دووبارە ئاکامەکانی پرۆسەی خوێندن و ناوەرۆکى پڕۆگرامەکانى خوێندن و لە زانکۆکان دابڕێژرێتەوە.

ئامانجی پرۆژەکە ئەوەیە کە کۆی پرۆسەی خوێندن و راهێنان هاوتەریب بێت لەگەڵ پێداویستییەکانی بازاری کار و ئاراستەی گەشەسەندنی ئابووری، بەشێوەیەک کە دەرچوان لێهاتووییان زیاتر بکرێت ئۆ ئەوەی بتوانن لە پێشبرکێی بەدەستهێنانی هەلی کاردا سەرکەوتوبن.

وتەیەکدا کە لە رۆژی یەکەمی خولەکەدا پێشکەشی کرد، راوێژکارى وەزارەتى خوێندنى باڵا و توێژینەوەى زانستى د.ئامانج عبداللە سعید بە مامۆستایانی بەشداربووی خولەکەى گووت: “ئێوە سەرکردایەتى ئەم پڕۆسە گرنگە دەکەن و کارەکانمان ماوە درێژ دەبێت و وەزارەتی خوێندنی باڵا و توێژینەوەی زانستی هاوکارتان دەبێت بۆ پەرەپێدانی تواناکانتان لە بواری داڕشتنەوەی پرۆگرامەکانی خوێندن لەبەر رۆشنایی گۆڕانکارییەکانی بازاری کار.

 

لە دوای واژووکردنی  گرێبەستێکی نێوان زانکۆی پۆلیتەکنیکی هەولێر و کۆمپانیای کۆڕەک تیلیکۆم، دوو ئامێری تاقیگەی پێشکەوتوو لە وڵاتی ئەڵمانیا، بۆ بەشی (ICTE) لە کۆلێژی تەکنەلۆجی هەولێر لەسەر ئەرکی کۆمپانیای ناوبراو دابینکرا، رۆژی چوارشەممە رێکەوتی 15ـی ئاداری 2023 دوو مامۆستای کۆلێژی ناوبراو دەستیان بە راهێنان کرد لەسەر ئامێرەکان.

ئامێرەکانی تاقیگەکە پێکهاتوون لە (Communication System) و (Control System) کە دروستکراوی کۆمپانیای (LN) ـی ئەڵمانین و لەسەر ئەرکی کۆمپانیای کۆڕەک تیلیکۆم کڕدراون، وەک بەشێک لە ناوەرۆکی گرێبەستەکە لە ئێستادا مامۆستایان م. سیڤان حسێن علی و م. جبار مجید صادق  مامۆستا لە کۆلێژی تەکنەلۆجی هەولێر بۆ ماوەی یەک هەفتە راهێنانیان لە وڵاتی ئەڵمانیا پێدەکرێت.

رۆژی پێنج شەممە رێکەوتی 9ـی ئاداری 2023 بە ئامادەبوونی سەرۆکی زانکۆ پ.د. ئیدریس محەمەد تاهیرهەرکی، سەرۆکی سەندیکای ئەندازیارانی کوردستان ئەندزیار عەبدولڕەحمان عەلی کوردە، سەرۆکی ئەی سی ئای کوردستان چاپتەر د. عومەر قەرەنی و راگری کۆلێژی تەکنیکی ئەندازیاری هەولێر پ.د. ئەیاد زەکی، پێشبڕکێی (Pervious Concrete) بەڕێوەچوو کە بۆ قوتابیانی شەش زانکۆی حکومی کوردستان رێکخرابوو.

دوای وتەی بەخێرهاتن لەلایەن راگری کۆلێژی تەکنیکی ئەندازیاری هەولێر پ.د ئەیاد سەرۆکی زانکۆ د. ئیدریس وتەیەکی پێشکەش کرد و وتی: “پێشەکی دەمەوێت دەستخۆشی ئەندازیاری شارستانی بکەم لەگەڵ رێکخەرانی ئەم پێشبڕکێیە لە کۆلێژی تەکنیکی ئەندازیاریی زانکۆی پۆلیتەکنیکی هەولێر ، بەڕێزان ئەم جۆرە چالاکییانە بۆ قوتابیان وانەیەکی ترە یاخود بەجۆرێکی تر لە خوێندن دادەنرێت، ئێمە وەک زانکۆی پۆلیتەکنیکی هەولێر هەردەم پشتگیری ئەوجۆرە چالاکییانەمان کردووە.

لەکاتی خۆی کە دکتۆرە رەفاهـ پێشنیاری بیرۆکەکەی کردزۆر پشتگیریم کرد، خۆشبەختانە لەمانگی ئاداردا کە مانگی هاندانی ئێمەی کوردستانییانە توانییان ئەم پێشبڕکێیە ئەنجام بدەن.

ئومێدەوارین ئەو ئاهەنگ و چالاکییانە بەردەوام بن، بۆیە ئەمڕۆ بە بۆنەی یادەکانی ئادار و ئەنجامدانی ئەم پێشبڕکێیە پیرۆزبایی لە قوتابیان دەکەین هیوای بەردەوامییان بۆ دەخوازم.

هەروەها سوپاسی سپۆنسەرانی ئەم چالاکییە دەکەین و بەخێرهاتنی ئەو 22 گرووپە دەکەین کە لە 6 زانکۆی جیاوازەوە ئەمڕۆ لەگەڵمان بەشدارن هیوای سەرکەوتن بۆ هەموویان دەخوازین، ئومێد دەکەین ئەم پێشبڕکێیە ببێتە هاندانێکی تر بۆ زیاتر فێربوون لە زانستەکانیان بۆ ئەوەی بتوانن لە دواڕۆژدا بە ئاسانی هەلی کار بدۆزنەوە و لەو بوارەی خۆیاندا کار بکەن، دووبارە پیرۆزتان بێت و بەخێر بێن”.

پاشان دەستکرا بە بەرنامەی پێشبڕکێیەکە کە تیایدا ئاستی گرووپەکان لەیەک نزیک بوون، دوای کێبڕکێیەکی زۆر گرووپی قوتابیانی زانکۆی دهۆک و گرووپی قوتابیانی زانکۆی پۆلیتەکنیکی پلەی یەکەم و دووەمیان بەدەست هێنا.

لێژنەی دادوەرانی پێشبڕکێیەکە پێکهاتبوون لە: د. بەهمەن عومەر تەها و د. رەفاهـ رەشید عەبدولمەجید لە زانکۆی پۆلیتەکنیکی هەولێر، هەروەها د. دڵشاد خدر بزێنی، د. سیروان خضر مەلا و مامۆستا پەیام ئیسماعیل عبدالرحمن لە زانکۆی سەڵاحەددین.

شیاوی باسە پێشبڕکێیەکە بە سپۆنسەری هەریەکە لە سەندیکای ئەندزیارانی کورستان، کۆمپانیای هێندستیل، کۆمپانیای فۆربریدج، کار گرووپ، کۆمپانیای سیکا، کۆمپانیای ئاڕ ئێم جی و کۆمپانیای بیڵد تێک رێکخرابوو.

لە کۆتاییدا بڕوانامە و خەڵاتی رێزلێنان بەخشرایە سەرپەرشتیار و دادوەران و گرووپەکانی خاوەن پلەی یەکەم و دووەم.

رۆژی چوارشەممە رێکەوتی 8ـی ئاداری 2023 بە ئامادەبوونی سەرۆکی زانکۆ پ.د. ئیدریس محەمەد تاهیر هەرکی، راگری پەیمانگە پ.ی.د. برزۆ دزەیی و مامۆستایان و قوتابیان، کۆتایی بە خولێکی تۆپی پێی بچووککراوە هات کە بۆ قوتابیانی گشت بە شەکانی پەیمانگەی تەکنیکی کارگێری ھەولێر کرابوویەوە کە پێکهاتبوون لە 16 تیپ.

لە یاری کۆتایی خولەکەدا بەشی راگەیاندن و وەرگێران بە یەک گەیشتن بە شی راگەیاندن توانی یاریەکە لەبەرژەوەندی خۆی بەکۆتا بهێێت و بە ئەنجامی (2) گۆل بەرامبەر (1)  گۆڵ لە بەشی وەرگێران بباتەوە و بووە پالەوانی خولەکە.

پاشان لە لایەن سەرۆکی زانکۆ و  راگری پەیمانگەی تەکنیکی کارگێڕی هەولێرەوە خەڵات بەسەر سەرپەرشتیار و بەڕێوەبەرانی خولەکە و پاڵەوان و باشترینەکاندا دابەشکرا، کە بەم شێوەیە بوو: گۆڵکاری خول لاس لە تیپی وەرگێران ، باشترین گۆڵپارێز  ئەحمەد لە تیپی راگەیاندن باشترین یاریزان مسلم لە تیپی راگەیاندن.