رۆژی پێنچ شەممە 31ـی ئابی 2023، بە ئامادەبوونی پ.د. ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر، لە مەراسیمێکدا رێکخراوی ئاڤیاری هۆشیاری ژینگە، کۆتایی هێنا بەخولێکی دوو مانگەی تایبەت بە پاراستنی ژینگە، کە قوتابیانی کۆلێژی تەکنەلۆجی هەولێری سەر بە زانکۆی پۆلیتەکنیکی هەولێر تیایدا بەشداربوون.

لە سەرەتای مەراسیمەکەدا کە هەریەکە  لە پ.ی.د. نەجیب توما یاریدەدەری سەرۆکی زانکۆ بۆ کاروباری زانستی و پ.ی.د. بۆتان مەجید ئاسنگەر ڕاگری کۆلێژی تەکنەلۆژی هەولێر و سەرۆکی دەستەی پاراستنی ژینگەی حکومەتی هەرێمی کوردستان د. عەبدولڕەحمان سدیق و ژمارەیەک بەرپرسی حیزبی و حکومی ئامادەیبوون، سەرۆکی رێکخراوی ئاڤیاری هۆشیاری ژینگە ئاسۆ شکاک بەخێرهاتنی میوانەکانی کرد و باسی لە چۆنیەتی بەڕێوەچوونی خولەکە کرد و ستراتیژییەتی کارەکانی رێکخراوەکەی بۆ ئامادەبووان خستەڕوو.

قوتابییان لەم خولەدا بەهەردوو شێوازی تیۆری و کردەنی بەشداربوون تیایدا و لەلایەن 30 مامۆستای ژینگەیی وانەیان پێ گوترایەوە بۆئەوەی لە داهاتوودا رۆڵی خۆیان ببیین لە پاراستنی سەوزایی و پاکی کوردستان.

ئەم خولەی رێکخراوەکە بەهاوکاری سەنتەری ئاڵا و بەسەرپەرشتی فەرمانگەی ریکخراوە ناحکومییەکان و بەهاوکاری بەرێوەبەرایەتی خزمەتگوزاری و ژینگەپارێزی، بەرێوەبەرایەتی ئاو و ئاوەرۆی هەولێر، بەرێوەبەرایەتی ئەندازەی پارک و باخچەکان، بەرێوەبەرایەتی دارستان و پاوانی هەولێر، بەرێوەبەرایەتی پۆلیسی دارستان و ژینگەی هەولێر، فەرمانگەی ژینگەیی هەولێرو ڕێکخراوی بیابانی سەوز بەرێوەچوو.

لە کۆتایی مەراسیمەکەشدا بڕوانامەی رێزلێنان لە لایەن پ.د. ئیدریس محەمەد تاهیر هەرکی و ئامادەبووانی دیکەوە بەخشرایە قوتابییانی بەشداربوو.

 

پاڵپشت بە نووسراوی وەزارەی خوێندنی باڵا و توێژینەوەی زانستی ژمارە ‎798 لە ڕێکەوتی ‎4/7/2023  تایبەت بە پەسەندکردنی ئەنجامی بەرایی پێشکەشکارانی خوێندنی باڵا (دبلۆمی باڵا، ماستەر و دکتۆرا) لە زانکۆکەمان، و هەروەها پەسەندکردنی ئەنجامی کۆتایی پێشکەشکارانی خوێندنی باڵا بە نووسراوی ژمارە ‎925‏ لە ڕێکەوتی ‎8/8/2023 بۆ ساڵی خوێندنی ‎2023-2024‏، زانکۆی پۆلیتەکنیکی هەولێر فەرمانی وەرگرتنی پێشکەشکارانی خوێندنی باڵا (دبلۆمی باڵا، ماستە و دکتۆرا)ی دەرکرد، و لە ئێستادا کاندیدانی وەرگیراو دەتوانن سەردانی کۆلێژەکانیان بکەن بۆ ئەوەی دەست بە مامەڵەی وەرگرتن بکەن.

فەرمانی زانکۆیی:

تێبینیەکی گرنگ:

بۆ بینینی لیستی ناوەکان تکایە ئەم لینکانەی خوارەوە کۆپی بکە و لە گۆگڵ پەیستی بکە بۆ داونلۆدکردنی لیستی ناوەکان:

https://epu.edu.iq/wp-content/uploads/2023/08/لیستی-ناوی-وەرگیراوانی-دبلۆمی-باڵا.pdf

https://epu.edu.iq/wp-content/uploads/2023/08/لیستی-ناوی-وەرگیراوانی-ماستەر.pdf

https://epu.edu.iq/wp-content/uploads/2023/08/لیستی-ناوی-وەرگیراوانی-دکتۆرا-1.pdf

 

مامۆستا وریا عەبدولقادر مامۆستای وەرزش لە زانکۆی پۆلیتەکنیکی هەولێر بووە پاڵەوانی پاڵەوانییەتی نێودەوڵەتی ئەنتاڵیا بۆ تێنسی سەر زەوی لەسەر ئاستی یاریزانە دێرینەکان و سێ مەدالیای زێری بەدەستهێنا.

لە میانی بەشدارییکردنی لە یارییەکانی پالەوانییەتی نێودەوڵەتیی ئەنتاڵیا بۆ تێنسی سەر زەوی، مامۆستا وریا عەبدولقادر دوای گەیشتنی بە قۆناغی کۆتایی، بووە پاڵەوانی پاڵەوانییەتییەکە.

مامۆستا وریا عەبدولقادر کە هاوکات جێگری یەکەمی سەرۆکی یەکێتی تێنسی عێراقە، لە میانی پاڵەوانییەتەییەکەدا لە رووبەڕووبوونەوەی تاکدا بە ئەنجامی دوو کۆمەڵە بەرامبەر بە یەک کۆمەڵە لە یاریزانی تورک، تارق فرەخی کە لە پۆلینبەندی یەکەمەکان بوو، بردەوە.

لە قۆناغی دووەمی پاڵەوانییەتەییەدا، ناوبراو بە ئەنجامی دوو کۆمەڵەی بێ بەرامبەر لە یاریزانی ئازەربایجانی، ئالشین رەحیمۆڤی بردەوە.

هەروەها لە رووبەڕووبوونەوەی دوو بەدوودا، ئەمجارە مامۆستا وریا عەبدولقادر هاوڕێ لەگەڵ ئالشین رەحیمۆڤ رووبەڕووی هەردوو یاریزانی تورک، ئومێد ئاکسۆی و یاریزانی ئەڵمانی، ستیڤان ئولبرێک بوونەوە و یارییەکەیان بە ئەنجامی دوو کۆمەڵە بەرامبەر بە یەک کۆمەڵە بردەوە و بوونە پاڵەوان.

پ.د.ئیدریس محەمەدتاهیر هەرکی، سەرۆکی زانکۆی پۆلیتەکنیکی هەولێر لە پەیوەندییەکی تەلەفۆنییدا پیرۆزبایی لە مامۆستا وریا عەبدولقادر کرد بەبۆنەی بە دەستهێنانی نازناوی پاڵەوانییەتییەکە و هیوای سەرکەوتنی زیاتری بۆ خواست، هاوکات هەموو پشتیوانییەکی بۆ بەدەستهێنانی نازناوی پاڵەوانییەتی دیکەی بۆ دووپات کردەوە.

 

رۆژی چوارشەممە 30ـی ئابی 2023، بە ئامادەبوونی سەرۆک و گشت ئەندامانی ئەنجومەنی زانکۆی پۆلیتەکنیکی هەولێر یەکەمین کۆبوونەوەی ئەنجومەنەکە بۆ ساڵی نوێی خوێندنی 2023-2024 بەڕێوەچوو.

لە سەرەتای کۆبوونەوەکەدا پ.د. ئیدریس محەمەد تاهیر هەرکی سەرۆکی ئەنجومەنی زانکۆی پۆلیتەکنیکی هەولێر، پیرۆزبایی ساڵی نوێی خوێندنی لە ئەندامانی ئەنجومەن کرد و هیوای خواست ساڵی نوێی خوێندن پڕبێت لە دەستکەوت و پێشکەوتن بۆ گشت مامۆستایان و فەرمانبەران و قوتابییانی زانکۆمان.

دواتر دەستکرا بە گفتوگۆکردنی تەوەرەکانی کۆبوونەوەکە و چەند پێشنیار و راسپاردەیەک خرایە بەرباس و بڕیاریان لەبارەوە درا.

بڕیار و راسپاردەکان:

• پەسەندکردنی ساڵنامەی خوێندن بۆ ساڵی 2023-2024.
• رۆژی 2ـی ئەیلولی 2023، یەکەمین رۆژی دەسپیێکی دەوامی مامۆستایانە لە زانکۆی پۆلیتەکنیکی هەولێر.
• رۆژی 16ـی ئەیلولی 2023، یەکەمین رۆژی دەستپێکی دەوامی قوتابیانی قۆناغەکانی (2،3،4)ـە لە هەردوو دەوامی بەیانیان و ئێواران.
• بڕیار درا لە مانگی 10ـی 2023، ئاهەنگی دەرچووانی زانکۆی پۆلیتەکنیکی هەولێر بەڕێوەبچیت. و رۆژێک پاش ئاهەنگی دەرچووان پێشانگایەکی تایبەت بە هەلیکار لەگەڵ کۆمپانیاکانی کەرتی تایبەت رێکدەخرێت بۆ دۆزینەوەی دەرفەتی کارکردن بۆ قوتابییان.
• بەبێ گۆڕانکاری پلانی وەرگرتنی قوتابییان لە کۆلێژ و پەیمانگە تەکنیکییەکان پەسەند کرا، وەک ئەوەی پێشتر بۆ وەزارەتی خوێندنی باڵا و توێژینەوەی زانستی نێردراوە، ئەمەش بەهۆی کەمی پێداویستییەکانی خوێندن لە هۆڵ و تاقیگەکان.