شاندێکی زانکۆمان کە پێکهاتبوو لە پ.ی.د.سیروان لەتیف حاجی راگری کۆلێژی تەکنیکی سۆران و پ.ی.د.هەتاو کەریم بەڕێوەبەری سەنتەری پەرەپێدان بۆ کار لە زانکۆی پۆلیتەکنیکی هەولێر و ژمارەیەک لە مامۆستایانی زانکۆمان بەشدارییان لە دووەمین کۆڕبەندی پەرەپێدانی هێزی کار لە هەرێمی کوردستان کرد کە لەلایەن سەنتەری پەرەپێدانی کار- زانکۆی سۆران، ڕێکخرا بوو.
کۆڕبەندەکە بەئامادەبوونی، پ.ی.د.شێروان شەریف قورتاس، سەرۆکی زانکۆی سۆران و ئەندامانی ئەنجوومەنی زانکۆ و بەرپرسانی حکومی و حزبی و کارساز و خاوەن کاران و مامۆستا و قوتابیان، “دووەمین کۆڕبەندی پەرەپێدانی هێزی کار لە هەرێمی کوردستان” بەڕێوەچوو.
لە دەستپێکی یەکەمین ڕۆژی کۆڕبەندەکەدا، د. ڕزگار سەعید حسین، یاریدەدری سەرۆکی زانکۆ بۆ کاروباری قوتابیان و هاوکات سەرۆکی لێژنەی باڵای کۆڕبەند، وتاری کۆربەندی پێشکەشکرد، لە وتارەکەیدا باسی لە ڕێکخستن و مەبەستی ئامانج و گرنگی کۆڕبەندەکەی کرد
دواتر، پ. ی. د. شێروان شەریف قورتاس، سەرۆکی زانکۆی سۆران، وتارێکی پێشکەشکرد و وێرڕی بەخێرهێنانی ئامادەبووان، سوپاسی ڕێکخەرانی کۆڕبەندەکەی کرد، لە بەشێکی وتارەکەیدا ئاماژەی بە گرنگی کۆرڕەندەکە کرد: ئەم کۆڕبەندە هەوڵێکە و دەستپێکێکی باشە بۆ ئەنجامدانی کۆنفڕانس و دیداری گەورەتر بۆ ئەوەی کاری زانستی و بەرهەمدار لە بارەی هێزی کار بخرێنەڕوو، چونکە یەکێک لە هۆکارە سەرەکییەکان، لە نەبوونی دەستی کار لەلایەن گەنجانەوە بۆ نەبوونی پلان و بەرنامەی زانستیە دەگەڕێتەوە، لە بەشێکی تری وتارەکەیدا، سەرۆکی زانکۆ باسی لە هەوڵەکانی زانکۆی سۆران، کرد سەبارەت بە دەستی کار و ئاماژەی بەوەکرد: کە لە زانکۆی سۆران، لێکۆڵینەوەمان کردووە سەبارەت بە دەستی کار و بەڕێوەبردن، دەمانەوێت لە چوارچێوەی زانکۆ بچینە دەرەوە، ببینە زانکۆیەکی کرداری و هەوڵدەدەین کار و پڕۆژە و بەرهەمی زانستی پێشکەشی لایەنی پەیوەندار بکەین بۆ چارەسەر کردنی کێشە و هۆکارەکانی کەمی دەستی کار.
پاشان، حەکیم تێلی، جێگری سەرپەرشتیاری ئیدارەی سەربەخۆی سۆران، وتارێکی پێشکەشکرد و سوپاسی زانکۆی سۆران کرد بۆ ئەنجامدانی ئەم کۆڕبەندە و ئاماژەشی بە کرنگی کۆڕبەندەکە کرد: ئەنجامدانی ئەم کۆڕبەندە لە زانکۆی سۆران، تەنها کۆڕبەندێکی زانستی یان گفتۆگۆکردن نییە لەسەر پرسێک، بەڵکۆ بناغەیەکە بۆ پەرەپێدانی هێز کار لە دەڤەری سۆران و دەرفەتێکی زێڕینە بۆ گەنجانی ئیدارەی سەربەخۆی سۆران و کاریگەری گەورەی دەبێت لە سەر هێز و گەشەپێدانی تواناکانیان.
لە کۆڕبەندەکەدا، چەندان پسپۆر و لێکۆڵەر و کارساز و پەروەردەکار و خاوەکان کار، لە هەرێمی کوردستان، بەشداریان تێدا کرد بوو..
لە پانێڵەکاندا بەشداربووان تیشکیان خستە سەر بەهێزکردنی بیرۆکەی کارسازیی و هاندانی گەشەی ئابووری، گفتۆگۆکردن لە بارەی ڕێگاکانی ئامادەکردنی هێزی کار و ئەقڵییەتی کارساز و گەنجی کارساز و داهێنەر و بیرۆکەی کارسازیی، هەروەها باسیان لە چۆنییەتی چارەسەر کردنی کێشە و ئاستەنگەکان لە ناو گەنجان کرا، لە لایەکی تر دەستپێڕاگەیشتن بە دڵنیایی دارایی و شیکاری بازاڕ و ئاڵنگاریی وەک: سنوورداری سەرچاوەکان و بەربەستە کلتوورییەکان و پێشکەشکردنی چارەسەری پێیان لەلایەن پانێلستەکانەوە گەنگەشەیان لە بارەوە کرا.
پانێلی یەکەم: گرنگی ئەقڵییەتی کارسازی لە گەشەکردنی هێزی کاردا.
پانێڵی دووەم: سەرچاوە خۆجێییەکان و هەلی پڕۆگرامەکان بۆ ئەقڵییەتی کارسازی..
هەر لە چورچێوەی کۆڕبەندەکەدا، چەندین قوتابی زانکۆی سۆران، باسیان لە چیرۆکی سەرکەوتنەکەیان کرد لە بواری کارسازیدا.
دواتر چەند پڕۆژە پۆستەرێک و بەرهەمی دروستکراوی دەستی قوتابیان نیشاندران.
هەر لە درێژەی ڕۆژی یەکەمی کۆڕبەندەکە، چەند پارچە میوزیک و گۆرانی پێشکەشی ئامادەبووان کران.
پانێلەکانیش بریتی بوون لە:
پانێلی یەکەم: دیدو ئەرکی کۆمپانیا و رێکخراوەکان بۆ ئەقلیەتی کارسازی..
پانێلی دووەم: لە بیرۆکەکانەوە بۆ پێوانەکردنی کاریگەرییەکانی ئەقلیەتی کارسازی بۆ گەشەکردنی بەردەوام…
پانێلی سێیەم: سەنتەرەکانی پەرەپێدانی کار و پلانیان بۆ ئەقلیەتی کارسازی لە نێوان قوتابیان و کارسازییدا..
لە کۆتاییدا بە چەندین راسپاردە کۆتایی بە کۆربەندەکە هات.
