Category Archives: سەرۆکایەتی زانکۆ

پێنجەمین کۆنفڕانسی زانستی پڕۆژەی توێژینەوەی قوتابیانی زانکۆمان لە پەیمانگای تەکنیکی کۆیە بەڕێوەچوو

لەژێر چاودێری و ئامادەبوونی پ.د.ئیدریس محەمەدتاهیر هەرکی سەرۆکی زانکۆی پۆلیتەکنیکی هەولێر و یاریدەدەرانی سەرۆکی زانکۆ و ئەندامانی ئەنجوومەنی زانکۆ، پێنجەمین کۆنفڕانسی زانستی پڕۆژەی توێژینەوەی قوتابیانی زانکۆمان، لە پەیمانگای تەکنیکی کۆیە بەڕێوەچوو.

لە سەرەتای کۆنفڕانسەکەدا، پ.د.هاوژین صلێوە عیسی راگری پەیمانگای تەکنیکی کۆیە و سەرۆکی لێژنەی ئامادەکاری کۆنفڕانس وتەی بەخێرهاتنی پێشکەش کرد.

پ.د.هاوژین صلێوە عیسی لەدوای بەخێرهێنانی میوانان، کورتەیەکی لەبارەر ئامادەکارییەکانیان خستەڕوو، هاوکات خۆشحاڵی خۆی نیشاندا بەوەی وەک پەیمانگای تەکنیکی کۆیە میوانداریی ئەم چالاکییە زانستییەی زانکۆ دەکەن.

پاشان پ.ی.د.بۆتان مەجید ئاسنگەر یاریدەدەری سەرۆکی زانکۆ بۆ کاروباری زانستی و خوێندنی باڵا و سەرۆکی لێژنەی باڵای کۆنفڕانس لە وتەیەکدا بەناوی خۆی و سەرۆکی زانکۆوە خۆشحاڵی نیشاندا بەوەی پێنجەمین کۆنفڕانسی زانستی پڕۆژەی توێژینەوەی قوتابیانی زانکۆمان لە پەیمانگای تەکنیکی کۆیە بەڕێوەدەچێت و دەستخۆشی لە لێژنەی ئامادەکاریی کۆنفڕانسەکە کرد.

پ.ی.د.بۆتان مەجید ئاسنگەر ئاماژەی بەوەشکرد کە ئەنجامدانی ئەم کۆنفڕانسە نیشانەی بایەخدان و خەمخۆری زانکۆیە بە توانا و لێهاتووییەکانی گەنجان و قوتابیانی زانکۆمان تاوەکو بەبیری داهێنەرانە، بەخوێندنی تەکنیکی رۆژی بەم شێوەیە دروست بکەن و توانا و داهێنانی قوتابیانی زانکۆمان بگوازنەوە بۆ خزمەتکردنی کۆمەڵگا.

یاریدەدەری سەرۆکی زانکۆ بۆ کاروباری زانستی و خوێندنی باڵا راشیگەیاند کە وەک زانکۆ ساڵانە لە دەستپێکی ساڵی خوێندن ئامادەکاریی دەکەن بۆ ئەنجامدانی ئەم کۆنفرانسە و گوتی”زانکۆ ئەم شوێنەیە کە توانا و دەرفەتەکان دروست دەکات تاوەکو وڵات پشت بە تواناکانی گەنجمان ببەستێت و ئەم داهێنانە لە خزمەت وڵاتدا بەکاربهێندرێت.

گوتیشی، ساڵانە سەدان پڕۆژەی ئاست بەرز لە زانکۆ دەنووسرێنەوە، بەڵام ژمارەیەکیان بەشداریی ئەم کۆنفڕانسەدا دەکەن کە بەسەر پێنج سێکتەردا دابەش بوونە.

پاشان دوو قوتابی بەجیا وەک قسەکەر دوو توێژینەوەیان پێشکەش کرد.

دواتر قوتابیان بەسەر گرووپەکاندا دابەش بوون و لەلایەن لێژنە کەرتییەکانەوە پڕۆژەکانیان کە ژمارەیان ٧٦ پڕۆژە بوو، تاوتوێ کران و هەڵسەنگێندران.

لە دانیشتنی دووەمی کۆنفڕانسەکەدا کە ڕێوڕەسمی کۆتایی کۆنفڕانسەکە بوو، پ.د.ئیدریس محەمەدتاهیر هەرکی سەرۆکی زانکۆی پۆلیتەکنیکی هەولێر وتەیەکی پێشکەش کرد.

پ.د.ئیدریس محەمەدتاهیر هەرکی رایگەیاند کە ئەنجوومەنی زانکۆی پۆلیتەکنیکی هەولێر ساڵانە بڕیار دەدات کە کۆنفڕانسی زانستی پڕۆژەی توێژینەوەی قوتابیانی زانکۆمان لە یەکێک لە کۆلێژ و پەیمانگاکان ئەنجام بدرێت، ئەمساڵیش بڕیاری ئەوە درا کە ئەم کۆنفڕانسە لە پەیمانگای تەکنیکی کۆیە لەژێر ناونیشانی (زانست دەکەین بە کردار؛ داهێنانمان هەلی کارن) ئەنجام بدرێت.

سەرۆکی زانکۆ پیرۆزبایی لە سەرجەم قوتابیانی بەشداربووی کۆنفڕانسەکە کرد و لەبارەی کۆنفڕانسەکەیشەوە ڕایگەیاند، بە هەموو پێوەرێک کۆنفڕانسەکە کۆنفڕانسێکی زۆر سەرکەوتووبوو.

پ.د.ئیدریس محەمەدتاهیر هەرکی راشیگەیاند کە کۆنفڕانسی هاوشێوە لە سەرجەم زانکۆکانی وڵاتانی جیهان ئەنجام دەدرێت و بەگشتی کۆنفڕانسەکان دوو ئامانجیان هەیە کە ئامانجی تایبەتی و ئامانجی گشتییە.

گوتیشی ئامانجە تایبەتییەکە ئەوەیە کە ئەوەی ئەمڕۆ بینیمان کە قوتابیان چۆن بەشێوەیەکی ڕێک و پێک پڕۆژەکانیان نمایش کرد کە ئەنجامی چەند ساڵەی خوێندنیان بوو لە زانکۆ.

سەرۆکی زانکۆی پۆلیتەکنیکی هەولێر سەرسامی خۆی بە توانا و لێهاتوویی و پڕۆژەکانی قوتابیان نیشاندا و رایگەیاند لە خوێندنی بەرایی سەردەمی ئەواندا ئەو دەرفەتەیان بۆ نەڕەخسا کە بەشداریی لەم جۆرە کۆنفڕانسەدا بکەن، و هیچ جیاوازییەک لەنێوان ئەو کۆنفڕانسانەی لە زانکۆکانی وڵاتانی دەرەوە ئەنجام دەرێت لەگەڵ ئەم کۆنفڕانسەدا نییە.

گوتیشی، توێژەر بەر لە بڵاوکردنەوەی توێژینەوەکەی دێت لە کۆنفڕانسێکدا دەیخاتە ڕوو، هەروەها لە کۆنفڕانسەکاندا ئاشنایەتی و ناسین لەگەڵ کەسانێکدا دەکەیت کە لە هەمان پسپۆڕی خۆتن کە پێشتر دەرفەتی ئەوە نەبووە یەکتر ببین و بناسن، هەروەها لێکنزیکبوونەوەی کۆمەڵایەتیشە کە بەهۆی بەشدارییکردن لە کۆنفڕانسێک ئاشنای کولتوور و زمان و دابونەریتی وڵاتانیش دەبیت.

سەرۆکی زانکۆ رووی قسەکانی کردە قوتابیانی بەشداربووی کۆنفڕانسەکە و گوتی تواناکانتان بەشێوەیەکە کە دەتوانن لە کۆنفڕانسە جیهانییەکاندا بەشداربن.

لە کۆتایی قسەکانیدا، سەرۆکی زانکۆی پۆلیتەکنیکی هەولێر پیرۆزبایی لە قوتابیان کرد، دەستخۆشی لە مامۆستایانی سەرپەرشتیار و لێژنەی باڵا و لێژنەی ئامادەکاریی و لێژنە کەرتییەکانی کۆنفڕانسەکە کرد.

دواتر بەشداربووانی کۆنفڕانسەکە ناوچە گەشتیارییەکانی کۆیەیان بەسەرکردەوە و پێکەوە لە خوانێکدا کۆبوونەوە.

ھەڵمەتی خوێن بەخشین لە پەیمانگەی تەکنیکی کارگێری لە کەمپی یەکی زانکۆمان بەرێوەچوو

ڕۆژی سێشەممە ١٣ی ئایاری ٢٠٢٥ لە ژێر چاودێری پ.د.ئیدریس محەمەدتاهیر هەرکی سەرۆکی زانکۆی پۆلیتەکنیکی هەولێر و بە ئامادەبوونی پ.ی.د.سەرسام خەلیل شوانی و پ.ی.م. ئاسۆ وەلی یاریدەدەری ڕاگر و ژمارەیەک لە ئەندامانی ئەنجوومەنی پەیمانگا و بەرپرسی هۆبە و یەکەکەکانی پەیمانگا لە پەیمانگەی تەکنیکی کارگێری لە کەمپی یەکی زانکۆمان بەرێوەچوو.

لەو هەڵمەتەدا ژمارەیەکی بەرچاو لە مامۆستایان، فەرمانبەران و قوتابیان خۆینیان بەخشی بە بانکی خوێن کە دواجار بۆ

تووشبووانی نەخۆشی تالاسیمکە بەکاردەهێندرێت.

 

لە کۆلێژی تەکنیکی سۆران بە چەند چالاکییەک یادی ڕۆژی جیهانیی پەرستاران کرایەوە

 ڕۆژی سێشەممە 12ـی ئایاری 2025 ، بەئامادەبوونی پ.ی.د.سیروان لەتیف حاجی ڕاگری کۆلێژی تەکنیکی سۆران و ئەندامانی ئەنجوومەنی کۆلێژ و عەدنان مەلا عەلی پەرستاری بەئەزموون لە نەخۆشخانەی ئاشتی فێرکاری، قوتابییانی بەشی پەرستاری، بەبۆنەی ڕۆژی جیهانی پەرستاران لە رێوڕەسمێکدا شانۆیەک و چەند چالاکییەکی جۆراوجۆریان لە ناو کەمپەسی کۆلێژ ئەنجامدا.

چاڵاکییەکان پێکهاتبوون لە؛ پێوانی نیشانە زیندەگییەکان وەک پێوانی پەستانی خوێن و لێدانی دڵ و پلەی گەرمی لەش و هەروەها بووژانەوەی دڵ و هەناسەدان (𝐂𝐏𝐑) و نمایشی رزگارکردنی نەخۆش لە کاتی ڕووداوی نەخوازراو کە لە لایەن قوتابییانی بەشی پەرستاری بەیانیان و ئێواران ئەنجام دران.

لە کۆتایی مەڕاسیمەکەدا لەلایەن قوتابییانی بەشی پەرستاری سوپاس و پێزانین ئاڕاستەی ڕاگری کۆلێژ و سەرۆکی بەشی پەرستاری و بڕیاردەری بەشی پەرستاری کرا.

 

سەرۆکی زانکۆ بەشداریی لە دیدارى پەرەپێدانى پرۆگرامى پێداگۆجى (ڕێگەکانى وانەوتنەوە) دەکات

پ.د.ئیدریس محەمەدتاهیر هەرکی سەرۆکی زانکۆی پۆلیتەکنیکی هەولێر بە سەرۆکایەتی شاندێکی زانکۆمان کە پێکهاتبوو لە پ.ی.د.بۆتان مەجید ئاسنگەر یاریدەدەری سەرۆکی زانکۆ بۆ کاروباری زانستی و خوێندنی باڵا و پ.ی.د.رەنج سیروان عەبدوڵڵا بەڕێوەبەری گشتی سەنتەری توێژینەوەی زانستی و ژمارەیەک بەڕێوەبەری بەڕێوەبەرایەتییەکانی زانکۆمان بەشدارییان کرد لە دیدارى پەرەپێدانى پرۆگرامى پێداگۆجى کە ئەمڕۆ سێشەممە ١٣ی ئایاری ٢٠٢٥ لەشارى هەولێر بەڕێوەچوو.

لە وتەکەیدا د. ئارام محمد قادر وەزیرى خوێندنى باڵا و توێژینەوەى زانستى ڕایگەیاند؛ ئەم دیدارە دەرفەتێکە بۆ پێداچونەوەی ناوەرۆکی پرۆگرامی کۆرسەکانی پێداگۆجی لە زانکۆکانی کوردستان، گوتیشى؛ لە ماوەی کارکردنمان هەموو پشتیوانیەکی سەرکەوتن و بەردەوامیمان پێشکەش کردوە، ڕێنماییەکی توندوتۆڵمان داناوە بۆ پارێزگاریکردنی، ئێستاش کاتی ئەوە هاتوە ئەم دیدارە وەک دەرفەتێکی زێڕین ببینین، بۆ گفتوگۆکردن دەربارەی گۆڕانکاری لە پرۆگرامەکانی خوێندنی ئەم کۆرسە، بە وردی بە مۆدیوڵەکاندا بچینەوە، زیاتر دەوڵەمەندی بکەین، چونکە پەرەپێدانی پرۆگرام پرۆسەیەکی داینەمیکیەو بەشداری هەموو مامۆستایانی پێداگۆجی و هاوبەشەکانی پێویستە.

هەر لە وتەکەیدا د. ئارام محمد قادر دوپاتیکردەوە پرۆسەی خوێندن تەنها لە چوارچێوەی هۆڵەکانی خوێندندا قەتیس نەکەین، بەڵکو ئاوێتەی خەم و پرسەکانی کۆمەڵگەببین، خوێندکاران هان بدەین توانای بیرکردنەوە و داهێنانی خۆیان بەکار بهێنن بۆ چارەسەرکردنی کیشەو گیروگرفتەکانی کۆمەڵگە،

گوتیشى؛ گرنگە هەنگاو بنێین ئەم ڕیفۆرمە تەنها بۆ خوێندنی باڵا نەبێت، بەڵکو دەبێت کار بکەین بۆ دروستکردنی تێگەیشتنێکی نیشتیمانی بۆ ڕیفۆرمی پێداگۆجی لە قۆناغەکانی پەروەردە و خوێندنی باڵادا، هەر بۆیەش پلانمان هەیە کارئاسانی بۆ بەشداری هەموو مامۆستایانی زانکۆ بکەین بۆ ئەوەی بەشداری لەم کۆرسە ناوازەیە بکەن، بەشێک لە زانکۆکان دەستیان بەم کارە کردوەو ئێمە دەستخۆشیان لێدەکەین.

هەر لە دیدارى پەرەپێدانى پرۆگرامى پێداگۆجى (ڕێگەکانى وانەوتنەوە) د. ژاڵە سەعید خەتات بەڕێوەبەرى گشتى فەرمانگەى توێژینەوەو پەرەپێدان لە وتەیەکدا ئاماژەى بە هەوڵەکانى وەزارەت کرد بۆ پەرەپێدانى پرۆگرامى پێداگۆجى و ئامانجەکانى ئەنجامدانى ئەم دیدارە بۆ پێداچونەوەى قوڵ و گرنگ بە پرۆگرامى پێداگۆجى.

هەروەک گوتیشى؛ لەم دیدارەدا پانێڵێک بە ناونیشانى رۆڵى پێداگۆجى لەبەرەو پێشبردنى کواڵتى پرۆسەى فێربوون پێشکەش دەکرێت، هەروەها لەڕێگەى شەش گرووپیشەوە کە لەسەر بنەماى شەش مۆدیۆڵى پێداگۆجى پێکهراوە پێشکەش دەکرێت، پێشتریش زنجیرەک کۆبوونەوە ئەنجامدراوە بۆ گفتوگۆکردنى بابەتەکان و ئەنجامدانى گۆڕانکارى پێویست لە ناوەرۆکى پرۆگرامەکان.