ڕۆژی سێ شەممە 7ـی ئایاری 2024، بە چاودێری ڕاگری کۆلێژی تەکنیکی سۆران و بە ئامادەبوونی بەرپرسانی حکومی و حزبی دەڤەری سۆران ، بەشی تەکنەلۆجیای زانیاری کۆلێژەکەمان یەکەمین فیستیڤاڵی زانستی خۆی لە هۆڵی کتێبخانە سازکرد.
لە فیستیڤاڵەکەدا قوتابییانی بەشی تەکنەلۆجیای زانیاری نوێترین داهێنانە تەکنەلۆجییەکانیان بۆ میوانان و قوتابییانی کۆلێژەکەمان شیکردەوە.
ڕۆژی شەممە 27ـی نیسانی 2024، لە کۆلێژی تەکنیکی سۆران / بەشی ژمێریاری بە هەماهەنگی لەگەڵ ( کۆمپانیای DWER) وۆرکشۆپێک لەسەر چۆنیەتی بەکارهێنانی سیستەمی ژمێریاری تایبەت ( سیستەمی ژمێریاری کریستاڵ وەک نمونەیەکی پراکتیکی ) بۆ 41 قوتابی بەشی ژمێریاری کرایەوە.
وۆرکشۆپەکە لەلایەن ( رەوەز زوبێر ) پێشکەش کرا، ناوبراو تیشکی خستەسەر گرنگی زانینی بەرنامە ژمێریاریەکان بۆ قوتابییان لە ڕۆژگاری ئەمڕۆ دا، بەهۆی پێشکەوتنی تەکنەلۆجیا و کاری ژمێریاری، هەروەها دەرخستنی باری دارایی کۆمپانیاکان و کارکردن لەسەر بنەمای پێشکەشکردنی باشترین خزمەتگوزاری و بەدەستهێنانی زۆرترین قازانج.
لە کۆتایی وۆرکشۆپەکەدا (پ.ی.د. سیروان لەتیف حاجی) ڕاگری کۆلێژەکەمان وتەیەکی پێشکەش بە قوتابییانی بەشداربوو کرد و پاڵپشتی خۆی لە ئەنجامدانی چالاکی لەم شێوەیە بۆ قوتابییان دووپاتکردەوە، دواتر بڕوانامەی بەشداربوونی بەقوتابییان بەخشی و سوپاس و پێزانینیشی ئاراستەی کۆمپانیای ناوبراو و سەرپەرشتانی وۆرکشۆپەکە کرد.
ڕۆژی دووشەممە 22ـی نیسانی 2024 ، بەبۆنەی 126 ساڵەی ڕۆژی ڕۆژنامەگەری کوردی، کۆلێژی تەکنیکی سۆران لە هۆڵی کۆنفرانسی کۆلێژ مەڕاسیمێکی تایبەتی بۆ بەرز ڕاگرتنی ئەم یادە سازکرد.
مەڕاسیمەکە، کە بەئامادەبوونی ( هەڵگورد شێخ نەجیب سەرپەرشتیاری ئیدارەی سەربەخۆی سۆران )، ( پ.د شێروان شەریف قورتاس سەرۆکی زانکۆی سۆران ) و نوێنەری سەندیکای ڕۆژنامەنووسانی کوردستان و بەرپرسانی حکومی و حزبی دەڤەری سۆران بەڕێوەچوو، هەریەک لە ( پ.ی.د سیروان لەتیف حاجی ڕاگری کۆلێژی تەکنیکی سۆران )، ( هەڵگورد شێخ نەجیب سەرپەرشتیاری ئیدارەی سەربەخۆی سۆران ) و ( هەژار ئیبراهیم کارگێری نووسیگەی سۆرانی سەندیکای ڕۆژنامەنووسانی کوردستان) وتاریان پێشکەشکرد، کۆی وتارەکان لەبازنەی بەهای کاری ڕۆژنامەوانی دەخولانەوە.
لە چوارچێوەی ئەم مەڕاسیمە ڕێز لەو دەرچوانەی کۆلێژ نرا کە ئێستا لە دەزگا میدیایی و ڕۆژنامەوانییەکان کاردەکەن، لە هەمانکاتدا بڕوانامەی دەرچوون بەخشرایە ئەو مامۆستا و فەرمانبەرانەی کۆلێژ کە لەو خولە ڕۆژنامەوانییە بەشداربوون، کە کۆلێژ بە هاوبەشی لەگەڵ نوسینگەی سۆرانی سەندیکای ڕۆژنامەنووسانی کوردستان لە ڕۆژانی 16 و 20ی نیسان بۆماوەی 10 کاتژمێر بۆی کردبوونەوە.
لە درێژەی مەڕاسیمەکە پیشانگایەک بۆ گۆڤار و بڵاوکراوەکانی سۆران لە نێوان ساڵانی 1991-2003 و پۆستەری قوتابییانی بەشی شیکاری نەخۆشییەکان کە بە چاودێری (د. پشتیوان ئەسعەد) ئامادەکرابوون کرایەوە.
