Author Archives: Hallo Majed

سەنتەری گەشەپێدان بۆ کاری زانکۆی پۆلیتەکنیکی هەولێر ئاگاداری دەرچووان و قوتابییانی قۆناغەکانی 3 و 4ـی کۆلێژەکان دەکاتەوە، کە زانکۆمان شانبه‌شانی شه‌ش زانكۆی دیکەی هه‌رێمی كوردستان به‌شداری لە پێشبڕکێی دەستپێک دەکات كه‌ له‌ لایه‌ن دامه‌زراوه‌ی (جی ئای زێد)ـی ئه‌ڵمانیه‌وه‌ به‌ڕێوه‌ده‌برێت به‌ هەماهەنگی لەگەڵ وه‌زاره‌تی خوێندنی باڵا و توێژینه‌وه‌ی زانستی حكومه‌تی هه‌رێمی كوردستان، و بە پاڵپشتی دارایی یه‌كێتی ئه‌وروپا.

بۆ ئەم مەبەستە هەر دەرچوو یان قوتابییەکی قوناغەکانی 3 و 4ـی کۆلێژە تەکنیکییەکان، ئارەزووی بەشداریکردنیان هەیە لە پێشبڕکێیەکە دەتوانێت لە رێگەی ئەو لینکەی کە لە خوارەوە دانرەوە ناوی خۆی تۆمار بکات.

“ده‌ستپێك” پێشبڕكێیه‌كی تایبه‌ت به‌ ده‌ستپێشخه‌ری كارە هانی ده‌رچووان و قوتابیانی زانكۆ ده‌دات بیرۆکەی کار و بزنسی خۆیان پەرە پێبدەن و کاربکەن بۆ دامەزراندنی کاری سەربەخۆی خۆیان. لە قۆناغی سه‌ره‌تادا (60)  ده‌رچوو، و فێرخواز سوودمەند دەبن.

له‌ ڕێگای ئه‌م پرۆژه‌یه‌وه‌ ده‌رچووان و قوتابیانی (قۆناغی 3-4)ی كۆلێژه‌كانی زانكۆی پۆلیته‌كنیكی هه‌ولێر ده‌توانن به‌شداربن له‌ خولێكی راهێنانی دوو رۆژه‌ و لە رێگەیەوە كار له‌سه‌ر بنیاتنانی پرۆژه‌یه‌كی كار ده‌كه‌ن به‌ شێوه‌ی تیم، دواتر دوو تیم هه‌ڵده‌بژێردرێن بۆ قۆناغی داهاتووی پێشبڕكێكه‌ شان به‌شانی تیمه‌كانی تری زانكۆ به‌شداربووه‌كانی ئه‌م پرۆگرامه‌.

 ماوه‌ی یه‌ك مانگ ئه‌م تیمه‌ هه‌ڵبژێردراوانه‌ راهێنان و راوێژی چڕیان پێ ده‌درێت به‌شێوه‌ی كه‌سی و به‌شێوه‌ی ئۆنلاین به‌پێی پێویست له‌ بواره‌ گرینگه‌كانی په‌ره‌پێدانی كار.

له‌ قۆناغی كۆتاییشدا له‌ رێوره‌سمێكی شایسته‌ی تایبه‌تدا، تیمه‌ هه‌ڵبژێردراوه‌كان پرۆژه‌كانیان پێشكه‌ش ده‌كه‌ن و سێ تیم ده‌بنه‌ براوه‌ی پرۆژه‌كه‌ و پاڵپشتی ده‌كرێن بۆ زیاتر په‌ره‌پێدان و به‌ره‌وپێشچوونی تواناكانیان له‌ لایه‌ن چه‌ند هاوبه‌شێك له‌ كه‌رتی تایبه‌ت.

 

ئامانجه‌كانی پرۆژه‌ی ده‌ستپێك خۆی دەبینێتەوە لە: (گۆڕینی تێڕوانین و بیركردنه‌وه‌ی قوتابیان و ده‌رچوانی زانكۆ ده‌رباره‌ی كاركردنیان له‌ داهاتوو، ئاشنا بوون به‌ ده‌ستپێشخه‌ری كار و پێێشه‌نگی بازرگانی، هه‌نگاوه كرده‌ییه‌كانی بنیاتنانی كار و بازرگانی، به‌رەو‌پێشبردن و به‌رزكردنه‌وه‌ی توانای كاركردن به‌ تیم به‌شێوه‌یه‌كی كرداری.

 

بۆ خۆتۆمارکردن کلیک لەسەر ئەم بەستەرە بکە.

مه‌رجه‌كانی به‌شداریكردن:

1. به‌شداربوو پێویسته‌ ده‌رچوو یان قوتابی بێت له‌ (قۆناغه‌كانی 3-4) له‌ زانكۆی پۆلیته‌كنیكی هه‌ولێر.
2. داواكار پێویسته‌ ئاره‌زوومه‌ندی بنیاتنانی كاری تایبه‌تی خۆی بێت و خاوه‌ن بیرۆكه‌ی داهێنه‌رانه‌ بێت.

تێبینی:

كاندیدانی سه‌ركه‌وتوو له‌ لایه‌ن سەرۆکایەتی زانکۆوە په‌یوه‌ندیان پێوه‌ ده‌كرێت.

ڕێكه‌وت و كاتی به‌ڕێوه‌چوونی پرۆگرام

12ـی ئەیلولی 2023، کاتژمێر 9:00 ـی بەیانی تاکو 5:00 ـی ئێوارە

 

قوتابییەکی بەشی تەکنیکی میدیا لە کۆلێژی تەکنیکی کارگێری هەولێر بە ناوی هیلین حازم عبد القادر دواى ئەوەى بەسەرکەوتوویى لە بەرنامەیەکى سەر بە باڵیۆزخانەی ووڵاتە یەکگرتووەکانى ئەمریکا لە شارى بەغدا وەرگیرابوو پڕۆگرامەکەی بە سەرکەوتوویی کۆتایی پێهێنا.

ئەم بەرنامەیە بۆ ماوەى 26 رۆژ لە ولایەتە یەکگرتووەکانى ئەمریکا ئەنجام درا کە تیایدا 85 قوتابى لە ووڵاتى عێراق بەشداربوو وە لە وانە 25 قوتابى لە هەرێمى کوردستان بەشداریان کردبوو کە یەکێکیان قوتابی زانکۆکەمان بوو.

لە ماوەی بەڕێوەچوونی پرۆگرامەکەدا قوتابییان بەشدارییان چەندین بەرنامەى جیاواز کرد کە لە لایەن زانکۆکانى ئەمریکا رێکخرابوو کە پێکاتبوون لە (سەرکردایەتى ، فراوانى بنیاتنان  لەلایەن گەنجان)، لە کۆتایی پرۆگرامەکەشدا بروانامە بە بەشداربووان بەخشرا.

رۆژی چوار شەممە 2ـی ئابی 2023، زانکۆی پۆلیتەکنیکی هەولێر و رێکخراوی (G.I.Z)ی ئەڵمانی و دامەزراوەی وێستگە دیداریێکیان لە ژێر ناونیشانی (بەهێزکردنی پێگەی ئابووری ژنان لە کەرتی تایبەتدا) سەرۆکایەتی زانکۆی پۆلیتەکنیکی هەولێر رێکخست.

لە دیدارەکەدا هەریەکە لە یاریدەدەری سەرۆکی زانکۆ بۆ کاروباری زانستی، راگرانی کۆلێژی تەکنیکی ئەندازیاری هەولێر، پەیمانگەی تەکنیکی کارگێڕی هەولێر و مێرگەسۆر، نوێنەری باڵیۆزخانەی ئەڵمانیا لە بەغدا، ئەمینداری گشتی ئەنجومەنی باڵای خانمان و ژمارەیەک لە بەڕێوبەرانی زانکۆمان ئامادەیبوون چەند وتارێک پێشکەش کرا.

سەرەتا د. نەجیب تۆما وتارێکی سەرۆکی زانکۆی خوێندەوە کە تیایدا وێڕای بەخێرهێنان سوپاسی ئامادەبووانی کرد و خۆشحاڵی زانکۆی دەربڕی بە هاوبەشی کردن و میوانداریکردنی دیدارەکە، و ئاماژەی بەوەدا کە ئافرەت لە کۆمەڵگای کوردی و لە مێژوویی سیاسیی و کۆمەڵایەتی کوردستاندا رۆڵ و پێگەی تایبەتی هەبووە و لە سەردەمی شۆڕشەکاندا وێڕای ئەرکی دایکایەتی و پەروەردەکردنی منداڵ، هاوکات بەشێوەی بەشداریی راستەوخۆ  و ناڕاستەوخۆ پشتیوانییان لە خەباتی پێشمەرگە و شۆڕشدا هەبوو.

هەر لە وتارەکەی سەرۆکی زانکۆدا هاتووە، “هاوتەریب لەگەڵ پلان و ستراتیژی حکومەت بۆ پاراستنی پێگەی ژن لەناو کۆمەڵگا بە گشتی و لەناو دامەزراوەکانی دەوڵەت بەتایبەتی، زانکۆمان بایەخی بەم بوارەش داوە و لەم چوارچێوەیەشدا بەشێک لە پۆستەکانی زانکۆمان لەلایەن ئافرەتەوە بەڕێوەدەبرێن و بۆ سەرکەوتنیشیان هەموو جۆرە پشتیوانییەکمان کردوون و لەداهاتووشدا بە هەمان تێڕوانینەوە بەردەوام دەبین”.

“لەگەڵ بەرەوپێشجوونەکانی کۆمەڵگا و رەخساندنی هەلیکار بۆ ژنان، زانکۆمان بەپلانێکی تۆکمە کاردەکات بۆ رەخساندنی هەلیکار بۆ دەرچووانمان تا ئێستاش بە هەماهەنگیی کۆمپانیاکانی کەرتی تایبەت بەخۆشحاڵییەوە بەشێک لە دەرچووانمان هەڵیکاریان بۆ رەخسێندراوە”.

دوای وتاری هەریەکە لە نوێنەری باڵیۆزخانەی ئەڵمانیا لە بەغدا و ئەمینداری ئەنجومەنی باڵای خانمان دەستکرا بە پێشکەشکردنی پانێڵەکە و تیادا رۆڵی ئافرەتان لە پەرەپێدانی ئابووری و بەشداریکردنیان لە سەرجەم کایەکانی ژیان گەنگەشەکرد، هەروەها باسیان لەو ئاڵنگارییانە کرد کە دێنە بەردەم کارکردنی ئافرەتان لە کاتی کارکردن و باسیان لە چارەسەرییەکان کرد، و چۆنیەتی بەرزترکردنەوەی توانای ئافرەتان بەمەبەستی کارکردن و ئابووری سەربەخۆ لە کەرتی گشتی و تایبەت و گۆڕینی ئەندێک یاسا و رێسا بەشێوەیەک کە لە بەرژەوەندی ئافرەتاندا بێت.

پاشان دەرگای گفتوگۆ واڵاکرا بۆ ئامادەبووان بۆ ئەوەی پرسیار و راوسەرنج و پێشنیارەکانیان بخەنەڕوو و گفتوگۆیەکی چڕوپڕ و بەرهەمداریان ئەنجام دا و کۆتایی بە دیدارەکە هات.