Author Archives: Hallo Majed

پ.د.ئیدریس محەمەد تاهیر هەرکی، سەرۆکی زانکۆی پۆلیتەکنیکی هەولێر ئامادەی پێشوازیی و کۆبوونەوەی وەزارەتی خوێندنی باڵا و توێژینەوەی زانستی حکوومەتی هەرێمی کوردستان بوو لەگەڵ شاندێکی فراوانى وەزارەتى پەروەردەو خوێندنى باڵاى وڵاتى ئوردن.

ئەمڕۆ سێشەمە ڕێکەوتى (2022/12/13) د.ئارام محەمەد قادر، وەزیری خوێندنی باڵا و توێژینەوەی زانستی پێشوازى کرد لە شاندێکی وەزارەتی پەروەردە و خوێندنى باڵای وڵاتى ئوردن، کە پێکهاتبون لە د. ظافر الصرایرە سەرۆکى دەستەى متمانە بەخشین لە دامەزراوەکانى خوێندنى باڵا و دڵنیایى جۆرى و ژمارەیەک سەرۆک زانکۆ و ئەمیندار و ئەندامانى دیکەی ئەنجوومەنى خوێندنى باڵاى ئەو وڵاتە.

لە کۆبوونەوەیەکدا کە بریکارى وەزارەت و ژمارەیەک لە سەرۆکی زانکۆکانی کوردستان و ڕاوێژکاران و بەڕێوەبەرە گشتییەکان ئامادەیبون، گفتوگۆ لەبارەى چەند بابەتێکى گرنگ کرا لەوانە ئاڵوگۆڕی خوێندکاران و قوتابیان و ئەزموونە هاوبەشەکان، هاوکاری و کارکردن بۆ چڕکردنەوەی پەرەپێدانی پەیوەندییە دوو قۆڵییەکان لە بوارە جیا جیاکاندا.

هەر لە کۆبوونەوەکەدا جەخت لە پەرەپێدان بە پەیوەندییەکان لەنێوان زانکۆکانی هەرێمی کوردستان و زانکۆکانی ئوردن بەتایبەتی باس لە ئەنجامدانی دیدار و کۆنفرانسی زانستی لەنێوان زانکۆی پۆلیتەکنیکی هەولێر و زانکۆی یەرمووک لە ئوردن کرا.

رۆژی یەکشەممە رێکەوتی 11ـی دیسەمبەری 2022 زانکۆی پۆلیتەکنیکی هەولێر سیمینارێکی بۆ قوتابیانی قۆناغی یەکەمی کۆلێژی ئەندازیاری لە ژێر ناونیشانی (زانکۆ سێکتەرێکە بۆ هاوسەنگی تاکەکەسی و گۆڕان بەرەو داهاتوویەکی گەشتر) رێکخست کە لە لایەن مامۆستا (ئاڤان حیدر فرحان) مامۆستا لە کۆلێژی پەروەردەی زانکۆی سەڵاحەددین پێشکەشکرا.

سیمنارەکە بە ئامادەبوونی یاریدەدەری سەرۆکی زانکۆ بۆ کاروباری قوتابیان پ.ی.د. یوسف مصطفى رسول، راگری کۆلێژی تەکنیکی ئەندازیاری پ.د. ئەیاد زەکی، بەڕێوبەری تۆماری گشتی سەرۆکایەتی زانکۆ د. سەرسام خلیل عمر، بەڕێوبەری دڵنیایی جۆری سەرۆکایەتی زانکۆ مامۆستا کەمال محمد عبدالله و ژمارەیەکی بەرچاو لە مامۆستایان لە هۆڵی کتێبخانەی کۆلێژی تەکنیکی ئەندازیاری هەولێر بەڕێوەچوو.

لەمیانەی سیمنارەکەدا مامۆستا ئاڤان چۆنیەتی هەڵسوکەوت کردنی قوتابیان لە کۆلێژ، ئاشنا بوون بە ژینگەی زانکۆ، چۆنیەتی مامەڵکردنی قوتابیان لەگەڵ مامۆستایان و هاوڕێیانیان، بەکارهێنانی تاقیگە و کەل وپەلی کۆلێژەکان لەگەڵ چەند بابەتێکی دیکەی پەیوەست بە ژیانی قوتابی بۆ ئامادەبووان روونکردەوە، دواتر دەرگای گفتوگۆ کرایەوە و قوتابیان پرسیارەکانیان ئاراستە کرد و وەڵامدرانەوە.

بڕیارە ئەم سیمنارە بەردەوامی هەبێت و لە گشت کۆلێژ و پەیمانگەکانی سەر بەزانکۆمان پێشکەش بکرێت تاکو زۆرترین قوتابی لێی سودمەند بن.

رۆژی 5ـی کانونی یەکەمی 2022 لەهۆڵی بۆنەکانی سەرۆکایەتی زانکۆ، بەئامادەبوونی سەرۆکی زانکۆ پ.د. ئیدریس محمدطاهر هەرکی و گشت بەڕێوبەرەکانی سەرۆکایەتی زانکۆ و سەرجەم بەڕێوبەرانی کارگێڕی لە کۆلێژ و پەیمانگەکانی سەربە زانکۆمان کۆبوونەوەیەکی فراوان دەربارەی سیستەمی بەڕێوەبردنی ئەلیکترۆنی لە زانکۆمان بەڕێوەچوو.

سەرەتای کۆبوونەوەکە سەرۆکی زانکۆ بەخێرهاتنی ئامادەبووانی کرد و بە گرنگییەوە باسی لە سیستەمەکە کرد و دەستخۆشی لەو کۆلێژ و پەیمانگایانە کرد کە چالاکن و کار بەسیستەمەکە دەکەن هەروەها ئەو کۆلێژ و پەیمانگایانەی کە بەهەر هۆکارێک چالاک نەبوون راسپارد کە لەمەودوا پێویستە کار بە سیستەمەکە بکەن بۆ راییکردنی کاروبارە کارگێڕییەکانی دامەزراوەکانیان.

هەروەها سەرۆکی زانکۆ پاڵپشتی تەواوی خۆی بۆ ئامادەبووان دەربڕی بە دابینکردنی هەر پێداویستیەک کە بۆ کارکردن بەسیستەمەکە پێویستە.

دواتر لە لایەن بەڕێوبەری کارگێڕی سەرۆکایەتی زانکۆ م. سەرمەند بەرزنجی کۆمەڵێک تێبینی و پێشنیار خرانەڕوو بۆ کەمکردنەوەی رۆتینی کارگێڕی لە سەرۆکایەتی زانکۆ، کۆلێژ و پەیمانگەکان، بەمەبەستی زووتر راییکردنی کاروبار و مامەڵەی سەردانیکەرانی زانکۆ.

پاشان بەرپرسی سیستەمی ئەلیکترۆنی زانکۆی پۆلیتەکنیکی هەولێر ئەندازیار محسین علی بە داتای ورد کەموکوڕییەکانی خستەروو هەروەها روونکردنەوەی پێویستی بە ئامادەبووان دا لە چۆنیەتی کارکردن بە سیستەمەکە و چۆنیەتی ئەنجامدانی کارەکان بەباشترین شێوە.