ئەمڕۆ دووشەممە 27ی ئایاری 2024، شاندێکی زانکۆی پۆلیتەکنیکی هەولێر بە سەرۆکایەتی پ.د.ئیدریس محەمەد تاهیر هەرکی سەرۆکی زانکۆی پۆلیتەکنیکی هەولێر لە ژووری بازرگانی و پیشەسازی هەولێر، بەشداری کرد لە دیدارێكی تایبەت بە خستنەرووی بیرۆکە و داهێنانەکان کە لە لایەن ژووری بازرگانی و پیشەسازی هەولێرەوە رێکخرابوو.
شاندی زانکۆ پێکهاتبوون لە هەر یەکە لە پ.ی.د. موحسین شەریف ڕاگری کۆلێژی تەکنیکی کارگێری هەولێر، پ.ی.د. ڕەنج سیروان عەبدوڵا بەرێوەبەری گشتی سەنتەری توێژینەوەی زانستی، پ.ی.د.عەفان عوسمان حوسێن ئەمینداری ئەنجومەنی زانکۆ و پ.ی.د. هێمن کاکەخان عولا مامۆستا لە زانکۆی پۆلیتەکنیکی هەولێر.
لە دیدارەکەدا سیمینارێک لە لایەن د.عیماد بالەک سەبارەت بە یەکەم کارگەی کۆکردنەوەی ئۆتۆمبێلی کارەبایی لەعێراق و هەرێمی کوردستان پێشکەش کرا.
لە میانی بەشداریکردنێکدا سەرۆکی زانکۆی پۆلیتەکنیکی هەولێر، پێشنیاری کرد لەسەرپەرشتیارانی ئەو پڕۆژەیە پشت بەزانکۆکان ببەستن بەتایبەتی زانکۆی پۆلیتەکنیکی هەولێر کە تاکە زانکۆیە لە سەر ئاستی هەرێمی کوردستان بەشی تەکنیکی ئۆتۆمبێلی هەیە و دەرچووی هەیە و دەتوانن بەگوێرەی پێداویستی ئەوان قوتابی پڕ زانیاری بکەن بۆیان.
د.عیماد بالەک لەوەڵامی تێبینیەکی د.ئیدریس گوتی: بەڕێز د.ئیدریس زۆر خۆشحاڵم بۆ تێبینیە بەسوودەکەت، ئێمە وەکو کارگە و کۆمپانیا ئامانجمانە سوود لەتوانای گەنجانی کورد و قوتابیانی شارەزا وەربگرین، پێخۆشحاڵم لەو بوارە هەماهەنگی هەبێت لەنێوانمان وەک ئێمە و زانکۆتان، خۆشحاڵم پەیوەندیمان هەبێت و لەکاتی دامەزراندنی کارگەکەمان سوود لەتواناکانیان وەربگرین.
جێگای باسە ئینستیتیوتی داهێنان و نوێگەری کوردستان بەهاوبەشی لەگەڵ ژووری بازرگانی و پیشەسازی هەولێر لەگەڵ بازرگانانی هەولێر بۆ ئەوە بوو کە پێکەوە هاوکاری یەکتربن بۆ بەهێزکردنی ژێرخانی ئابووری هەرێمی کوردستان، تا سودێکی باشی هەبێت بۆ بازرگانان، ئامانج لێی پێکەوە بەستنەوەی حکومەت و وەبەرهێنەر و زانکۆکانە بەخاوەن بیرۆکە و پێشخستنی تەکنەلۆجیا و داهێنەران لە هەرێمی کوردستان.
