Yearly Archives: 2021

رۆژی 15ـی ئەیلولی 2021 بەشی تەکنیکی ژمێریاری کۆلێژی تەکنیکی کارگێڕی هەولێر کۆتایی بە خولی ژمێریاری کردارەکی بە بەکارهێنانی پرۆگرامی (اصيل الذهبي) هێنا کە بۆ قوتابیانی قۆناغە جیاوازەکانی بەشەکە کرابوویەوە.

خولەکە دیزاین کراوە ببێتە یارمەتی دەرێک بۆ رێکخستنی کردارە دارایییەکان وەکو چۆنیەتی دروستکردنی لیستی ژمێرکاری و لیستی کریارەکان و لیستی فرۆشیارەکان وە دەرهێنانی راپۆرتە دارایی یەکان..
وە پاش تەواو کردنی خولەکە بەشداربوو لە توانایدا دەبێت کۆمپانیایەکی نوێ لەڕووی ژمێریاری و داراییەوە لەناو پرۆگرامەکە دروست بکات و تۆمارکردنی کردارەکانی رۆژانەی لەگەڵ کڕیار و فرۆشیارەکان لە پسوولەی کڕین و فرۆشتن و پارە وەرگرتن و خەرجکردن وە دەرهێنانی راپۆرتە داراییەکان بەشێوەیەکی سەرکەوتوو ئەنجام بدات .
خولەکە بە بەشداری زیاتر لە 90 قوتابی لە قۆناغەکانی دوو و سێ و چوار دەستی پێکرد و ماوەی 8 رۆژ بەردەوام بوو کە رۆژانە 3 کاتژمێر بەشێوەی ئۆنلاین وانەکان لە لایەن م. دڵشاد عزیز جمال بەم شێوەیەی خوارەوە وترایەوە.

رۆژی شەممە رێکەوتی 11ـی ئەیلولی 2021 لە هۆتێلی ئەربیلی نێودەوڵەتی بە ئامادەبوونی سەرۆکی زانکۆ پ.ی.د. کاوە عبدالکریم شێروانی، زانکۆی پۆلیتەکنیکی هەولێر و رێکخراوی سپارکی نێودەوڵەتی خولێکی راهێنانی تایبەت بە رەوتەکانی بازرگانی و کارگێڕی کردەوە بۆ ژمارەیەک لە مامۆستایانی هەریەک لە زانکۆکانی پۆلیتەکنیکی هەولێر، تەکنیکی باکوور، ئەلفورات ئەلئەوسەت، موسڵ و پەیمانگەی ئاراراتی ناحکومی.

خولەکە بە سەرپەرشتی زانکۆی پۆلیتەکنیکی هەولێر بۆ ماوەی پێنج رۆژ بەردەوام بوو و لە لایەن راهێنەری نێودەوڵەتی پ.د. حسن یونس پێشکەش کرا.

ئامانجی خولەکە ئامادەکردنی راهێنەرانە بۆ ئەوەی دواتر خولی راهێنانی تایبەت بۆ قوتابیانی زانکۆمان و قوتابی کۆچبەری ناوخۆ و دەرەوە بکەنەوە.

و رۆژی چوار شەممە رێکەوتی 15ـی ئەیلولی 2021 کۆتایی بە خولی راهێنانەکە هات و بروانامەی بەشداربوون لە لایەن سەرۆکی زانکۆکانی پۆلیتەکنکی هەولێر و فورات بەخشرایە بەشداربووان.

شایانی باسە لە ماوەی رابردوو یاداشتنامەی لێکتێگەیشتن لە نێوان زانکۆی پۆلیتەکنیکی هەولێر و رێکخراوی سپارک واژوو کرابوو بەمەبەستی پاڵپشتی کردنی قوتابیانی کۆچبەر و کردنەوەی ئەم جۆرە خولانە.

وا بڕیارە رێکخراوی ناوبراو بە هەماهەنگی زانکۆمان لەم ساڵدا دوو خولی دیکەی راهێنان بکەنەوە لە بوارەکانی ئینگلیزی ئەکادیمی و وێنەی ئەندازەیی.

رۆژی سێ شەممە رێکەوتی 14ـی ئەیلولی 2021 شاندێکی زانکۆی پۆلیتەکنیکی هەولێر سەردانی وەزارەتی ناوخۆیان کرد کە پێکهاتبوون لە راگری پەیمانگەی تەکنیکی پزیشکی هەولێر پ.ی.م. اومێد ارشد حەوێزی، بەرێوبەری دڵنیایی جۆری م. کمال محمد عبدالله و بەرێوبەری پرۆگرامەکانی خوێندن م. کۆڤان عمر حسن.

لە کۆبوونەوەیەکدا لەگەڵ هەریەک لە بەرێوبەری گشتی دیوانی وەزارەتی ناوخۆ پ.ی.د. سامی جلال حسین، بەرێوبەری بەڵگەکانی تاوانی هەرێم عمید سەرکەوت جلال حسن، بەرێوبەری تاقیگەی بایۆلۆجی/دی ئێن ئەی مقدمی بایۆلۆجی ئاراز محمد مولود گفتوگۆ کرا لەسەر پێشنیاری کردنەوەی بەشی بەڵگەکانی تاوان لە زانکۆی پۆلیتەکنیکی هەولێر.

کردنەوەی بەشەکە لەسەر پێشنیاری زانکۆی پۆلیتەکنیکی هەولێربووە بەمەبەستی پێگەیاندنی ئەفسەر و کارمەندانی بەڵگەکانی تاوان لە گشت پارێزگاکانی هەرێمی کوردستان.

لە کۆتایی کۆبوونەوەکە کۆنووسێک ئامادە کرا کە تیایدا کۆمەڵێک پێشنیار و رێنمایی تایبەت بە وەرگرتنی کارمەندان خراونەتە روو و ئاراستەی بەرێزان وەزیری خوێندنی باڵا و توێژینەوەی زانستی و وەزیری ناوخۆ دەکرێت بەمەبەستی پەسەند کردنی، شایانی بەبیرهێنانەوەیە کارەکانی کردنەوەی بەشەکە بە هەماهەنگی لەگەڵ وەزارەتی تەندروستی بەرێوەدەچن.

دوای بەشداری کردنی لە کۆنفرانسێکی نێودەوڵەتی لە رێکەوتی 28ـی ئابی 2021 پ.ی.د. هێمن کاکەخان عولا کە هاوکات بەرێوەبەری گشتى سەنتەری توێژینەوەى زانکۆی پۆلیتەکنیکی هەولێریشە بۆ جاری دووەم مدالیایی ئاڵتوونى وەرگرت لە کۆنفرانسی نێودەوڵەتى لەژێر ناونیشانی

(  6th Annual International Invention  Innovation Competition  in CANADA, iCAN 2021 )

لە ولاتی کەندا لەسەر

(( Rhuscor) Nanoemulsion Biopesticide)

کە لەلایەن

Toronto International Society of Innovation & Advanced Skills (TISIAS)

رێکخرابوو.